1-2. Mumu liaka Yehova atutangile hanga tuwahilile muze mutuhana yuma kuli akwetu kuhiana muze mututambula?

 YEHOVA katutangile mu yimwe jila yipema, muze twakuhana yuma kuli akwetu twakuwahilila chinji kuhiana muze twakutambula. (Yili. 20:35) Shina chino chinalumbunuka ngwo, yetu kutushi kuwahilila muze twakutambula yuma? Ka. Yetu eswe twakuwahilila muze twakutambula chimwe chawana, alioze muze twakuhana yimwe kuli akwetu, twakuwahilila chinji kuhiana. Chakupema chinji kunyingika ngwetu, Yehova katulingile mu jila yino. Mumu liaka?

² Mumu Yehova kanyingikine ngwenyi, yino yili jila yipema ya kuwanyinamo uwahililo. Mutuhasa nawa kuwahilila chinji muze mutufupa majila a kukwashilamo akwetu. Chakupwa chipema kunyingika ngwetu, Yehova katutangile mu jila ya mutapu au, hi chocho ko?—Samu 139:14.

 3. Mumu liaka mutuhasa kwamba ngwetu, Yehova kali “Zambi ya uwahililo”?

³ Mbimbiliya yakwamba ngwo, kulingila akwetu yuma chakuneha uwahililo. Kashika, kutushi kukomoka muze Mbimbiliya yakwamba ngwo, Yehova kali “Zambi ya uwahililo.” (1 Timo. 1:11) Iye kapwile mutu mutangu kulingila akwo yuma. Ngwe chize postolo Paulu ambile, kukushi mutu niumwe yoze ukwete zango kuhiana Yehova, “mumu muli iye tuli ni mwono, muli iye twakwenda muli iye tuli hano.” (Yili. 17:28.) Kwamba umwenemwene, “chawana cheswe chipema ni chawana cheswe chingunu chakwiza” kuli Yehova.—Tia. 1:17.

 4. Yika muyitukwasa kuwahilila chinji?

⁴ Kwamba umwenemwene, yetu eswe twakuzanga kwivwa kuwaha  chize chakwiza ha kulingila akwetu yuma. Mutuhasa kuchilinga nyi mutwimbulula Yehova ha kupwa yihanyi. (Efwe. 5:1) Ha kulilongesa chilweza cha Yehova, mutumona yize mutuhasa kulinga chipwe ngwe akwetu keshi kusolola usakwililo ha yize twakwalingila. Yino muyitukwasa kununga ni kulingila akwetu yuma ni kuwezela uwahililo wetu.

IMBULULA YEHOVA HA KUPWA CHIHANYI

 5. Yuma yimwe yika Yehova akutwaha?

⁵ Mu mutapu uka Yehova apwa chihanyi? Tutalenu yimwe yilweza. Yehova kakutwaha yuma ya ku musunya. Tunanyingika ngwetu, Yehova keshi kutwaha yuma yeswe yize twakuzanga, alioze kakutwaha yize twakufupa. Ngwe chilweza, Yehova kakutukwasa hanga tupwe ni kulia, mazalo ni chihela chakutwama. (Samu 4:8; Mateu 6:31-33; 1 Timo. 6:6-8) Shina Yehova kakutwaha yuma yize twakufupa ku musunya mumu ngwo katamba lume kutwahayo? Ka, hi chocho ko. Mba mumu liaka akuchilinga?

 6. Yika twalilongesa ha mukanda wa Mateu 6:25, 26?

⁶ Yehova kakutwaha yeswe yize tunafupu mumu kakutuzanga. Tutalenu yize Yesu ambile ha Mateu 6:25, 26. (Tanga.) Ha versu jino, Yesu kahanjikile ha yitangiwa. Ha kuhanjika hali tujila, Yesu yamba ngwenyi: “Talenu kanawa tujila a mwilu; keshi kutumba chipwe kuhela, hanji kukunga mu machila, alioze Tatenu wa mu malilu kakwalisa.” Chocho yahula ngwenyi: “Shina yenu kunwahianyine chinji tujila nyi?” Yika twalilongesa? Twalilongesa ngwetu, kuli Yehova tuvumbi twenyi kali ni ulemu unji kuhiana tushitu. Nyi Yehova kakufunga tushitu, mutuhasa kupwa ni shindakenyo ngwetu, ni yetu matufunga. Ngwe chizechene umwe tata wa zango akufunga ni kuhana kuli asoko jenyi yize anafupu, Yehova neye kakutwaha yize tunafupu ni kutufunga ni zango.—Samu 145:16; Mateu 6:32.

 7. Kuchi mutuhasa kwimbulula Yehova ha kupwa yihanyi? (Tala nawa chizulie.)

⁷ Chizechene ngwe Yehova, ni yetu mutuhasa kukwasa akwetu ha yize anafupu ku musunya mumu twakwazanga. Ngwe chilweza, shina unanyingika umwe ndumbu yoze unahono kulia hanji mazalo? Yehova mahasa kukwasa ndumbu wacho kupalikila muli yena. Yela ja Yehova kaanyingika nawa ngwe yihanyi muze kwakulingiwa luyinda. Ha mashimbu a COVID-19, mandumbu jetu a malunga ni a mapwo kanakalianyina ni akwo yuma ya kulia, mazalo ni yuma yikwo yize te anafupu. Mandumbu akwo, kahanyine milambu hanga akwase mulimo uze analingi hashi heswe. Milambu yacho, yakwashile kufunga mandumbu jetu a hashi heswe waze apalikile mu umwe luyinda. Mandumbu wano yihanyi,  kakawile yize yili ha A-Hepreu 13:16 ngwo: “Kanda nuvulama kulinga yuma yipema ni kulitetela ni akwenu yize nuli nayo, mumu Zambi kakuwahilila ni yitapo ngwe yino.”

 8. Kuchi Yehova akutukwasa nawa? (A-fwilipu 4:13)

⁸ Yehova kakutwaha tachi. Yehova kakuhana tachi jize tuvumbi twenyi ashishika akufupa. (Tanga A-Fwilipu 2:13.) Hiunalembe kama ni kwita tachi hanga unyongonone muze unapalika mu umwe kapinda? Hanji hiunalembe kama kuli Yehova hanga akwehe tachi ulinge yuma yize unazange kulinga ha tangwa. Nyi yilemba ye kayikumbulwile, kota weulukile maliji a Paulu ali ha A-fwilipu 4:13, anambe ngwo: “Mu yuma yeswe nguli ni tachi mumu lia yoze wakungwaha ndundo.”

 9. Kuchi mutuhasa kwimbulula Yehova kupalikila ku tachi jetu hanga tukwase akwetu? (Tala nawa chizulie.)

⁹ Chipwe ngwe tuli yihenge, nihindu mutuhasa kwimbulula chize Yehova akulianyina ndundo jenyi ni yetu. Kwamba umwenemwene, yetu kutuchi kuhasa kuhana tachi jetu kuli akwetu. Chipwe chocho, ni tachi jize tuli najo, mutuhasa kulinga yimwe hanga tukwase akwetu. Ngwe chilweza, nyi umwe ndumbu kashinakaji hanji yoze unayiji keshi kuhasa kuya ni kulanda yuma, mutuhasa kumukwasa ha kuya ni kumulanjila yuma yacho ni kumukwasa kulinga milimo ya ku zuwo. Nyi mutupwa nawa ni uhashi, mutuhasa kukwasa kululieka ni kukomba-komba mu Zuwo lia Wanangana. Kupalikila mu majila wano, mutuhasa kulianyina tachi jetu ni mandumbu jetu a ku ufulielo.

10. Kuchi mutuhasa kutakamisa akwetu ha yize mutwamba?

¹⁰ Kanda uvulama ngwe, maliji no kakwete tachi. Shina muhasa kunyonga hali umwe yoze mahasa kuwahilila ni wamuchichimieka ni mbunge ye yeswe? Shina unanyingika yoze unafupiwa utakamiso? Nyi chenacho, shina muhasa kulweza mutu wacho ngwo wakumuzanga chinji? Mutuhasa kuya ni kumumeneka, kumusanyika ku telefone, kumutumina mukanda hanji kumusonekena mesage. Kanda ulipikala ha kufupa kuhanjika maliji akukomwesa. Maliji akehe waze anakatuka ku mbunge, mahasa kupwa ukwaso uze ndumbu anafupu hanga anunge ni kushishika ha tangwa likalu ni kulivwa kanawa.—Yishi. 12:25; Efwe. 4:29.

11. Kuchi Yehova akutwaha mana jenyi?

¹¹ Yehova kakutwaha mana. Kambaji Tiangu kasonekene ngwenyi: “Nyi mutu umwe hakachi kenu keshi ni mana, anunge ni kwita kuli Zambi, mumu iye kakuhana kuli eswe ni mbunge yeswe, keshi kuchokana.” (Tia. 1:5; ftn.) Ngwe chize maliji wano anasolola, Yehova keshi kuswekela akwo mana jenyi. Mumu lia kupwa chihanyi, iye kakulianyina mana jacho ni akwo. Tunyingikenu nawa ngwetu, muze Yehova akutwaha mana jenyi, iye keshi kuchilinga a ku nawa ‘matwamba’  hanji ‘kutuchoka.’ Yehova kazangile hanga twivwe woma muze mutwita usongwelo wenyi. Kwamba umwenemwene, iye kanazange hanga tumwite mana jenyi.—Yishi. 2:1-6.

12. Uhashi uka tuli nawo wa kulianyina ni akwetu yize tunanyingika?

¹² Mba yika mutwamba hali yetu? Shina mutuhasa kwimbulula Yehova ha kulianyina ni akwetu yize tunanyingika? (Samu 32:8) Tuvumbi twa Yehova kali ni uhashi unji wa kulianyina ni akwo yize akulilongesa. Ngwe chilweza, yetu twakufumba akwa-kwambujola aha hanga ahase kwambujola kanawa. Ni uhumikizo weswe, makulwana kakukwasa tuvumbi ni mandumbu akwo waze hanapapachisa hanga anyingike chize malinga kanawa milimo yo mu chikungulwila. Waze ali ni yinyingi ni utotombo wa kutunga ni kululieka yuma, kakukwasa waze keshi yinyingi akalakale mu mulimo wa kutunga mazuwo mu ululikiso wa Yehova.

13. Kuchi mutuhasa kwimbulula Yehova muze tunafumbu akwetu?

¹³ Imbulula Yehova muze unafumbu akwenu. Iwuluka ngwe, Yehova kali chihanyi ha kulianyina ni akwo yuma yize ananyingika. Chizechene nawa, ni yetu tunazange kulianyina ni akwetu yuma yize tunanyingika. Yetu kutushi kwivwa woma wa kulongesa umwe ni kunyonga ngwetu, kulutwe mutu wacho makatutambula chihela. Kutwatambile nawa kunyonga ngwetu: ‘Amu kakatufumbile kuli mutu niumwe, ni yetu kutwatambile kufumba akwetu.’ Kavumbi wa Yehova niumwe katambile kunyonga chocho. Shimbu tunyonge chocho, twakuwahilila hi ha kulianyina wika ko ni akwetu yuma yize tunanyingika, alioze nawa ha kulihana hanga twafumbe. (1 Tesa. 2:8) Twakuchilinga “hanga no ajame ni kuyilongesa kuli akwo.” (2 Timo. 2:1, 2) Nyi yetu eswe twapwa yihanyi ni kulongesa akwetu yuma yize tunanyingika, muchipwa ngwe tunatungu chimwe chizavu cha yihanyi chize muchineha uwahililo kuli atu eswe.

MUZE UMWE MAHONA KUSAKWILILA HA YIZE TWAKUMULINGILA

14. Yika atu anji akulinga muze twakwaha yimwe?

¹⁴ Muze twakupwa yihanyi, chipi-chipi kuli mandumbu jetu a ku ufulielo, kanji-kanji o kakutusakwilila. Ayo mahasa kuchilinga ha kututumina mukanda wa usakwililo hanji kuchilinga mu majila akwo. (Kolo. 3:15) Muze o akutusakwilila, twakuwahilila chinji mumu lia kwalingila yimwe yuma.

15. Yika twatamba kwiuluka nyi akwetu mahona kulemesa yize twakwalingila?

¹⁵ Alioze twatamba kunyingika ngwetu, hi ha mashimbu eswe ko atu malemesa yize twakwalingila. Ha mashimbu amwe mutuhasa kumona ngwetu, mutu kalemesene mashimbu, tachi jetu ni yuma yize twamwaha. Nyi yino muyilingiwa, yika muyihasa kutukwasa tuhone kutokesa uwahililo wetu hanji kunenganyana? Twiulukenu maliji a chisoneko chize chinakwate mutwe uno, Yilinga 20:35. Uwahililo wetu kuushi kwiza ha kunyingika ngwetu, atu kalemesa yuma yize twalingila hanji ka. Kashika, mutuhasa kununga ni kukwasa akwetu ni uwahililo, chipwe ngwe o mahona kutusakwilila. Kuchi mutuhasa kuchilinga? Tutalenu majila amwe.

16. Yika twatamba kwiuluka nyi akwetu mahona kulemesa yize twakwalingila?

¹⁶ Lihulikile ha kwimbulula Yehova. Yehova kakuhana yuma yipema kuli atu, chipwe ngwe ha mashimbu amwe keshi kumusakwilila. (Mateu 5:43-48) Yehova kanambe ngwenyi, nyi twalingila akwetu yuma yipema “chakuhona kushimbwila nichimwe,” ‘fweto lietu mulipwa linene.’ (Luka 6:35) Kashika, kanda unenganyana nyi atu mahona kukusakwilila ha yize waalingila. Iwuluka ngwe, Yehova mashimbu eswe makuwahisa ni yuma yipema mumu lia kukwasa akwenu ni uwahililo.—Yishi. 19:17; 2 Kori. 9:7.

17. Kuchi mutuhasa kupwa ni nyonga lialita ha kukwasa akwetu? (Luka 14:12-14)

¹⁷ Chuma chikwo chize mutuhasa kulinga hanga twimbulule Yehova ha kupwa yihanyi chili  kwiuluka maliji a Yesu ali ha Luka 14:12,14. (Tanga.) Hi chipi ko kusanyika mutu ku zuwo lietu yoze tunanyingika ngwetu, neye kali ni uhashi wa kutusanyika ku zuwo lienyi. Alioze, yika mutulinga nyi mutunyingika ngwetu, tunalingila akwetu yuma ni kushimbwila ngwo no atulingileyo? Ha chikuma ngwe chino, mutuhasa kulinga yize Yesu ambile ha kupwa yihanyi kuli waze keshi uhashi wa kutulingila yuma yize yene twalingila. Nyi twachilinga, mutuwahilila chinji ha kwimbulula Yehova. Kulinga yuma mu jila yino, muchitukwasa kununga ni kuwahilila, chipwe ngwe akwetu mahona kutusakwilila ha yize twalingila.

18. Yika muyitukwasa mba tuhone kunyongena akwetu yuma yipi?

¹⁸ Kanda unyongena akwenu yuma yipi. (1 Kori. 13:7) Nyi umwe mahona kusakwilila ha yize wamulingila, lihule ngwe: ‘Shina mutu wacho keshi kusakwilila? Nyi kavulama wika kwamba ngwenyi, nasakwila?’ Muchihasa kupwa ngwe, kuli yimwe yize yamutwala mba ahone kukusakwilila ngwe chize te unashimbwila. Atu amwe kakuzanga kusakwilila, alioze chakwakalila kwamba yize anevu. Ayo hanji mahasa kwivwa sonyi mumu lia kutambula ukwaso, chipi-chipi nyi kunyima ayo e te akukwasa akwo. Alioze nyi twakuzanga mandumbu jetu ni mbunge yeswe, kutuchi kwanyongena yuma yipi; mutununga ni kwakwasa ni uwahililo.—Efwe. 4:2.

19-20. Mumu liaka chili chilemu kulihumikiza muze mutulingila akwetu yuma? (Tala nawa chizulie.)

¹⁹ Pwako mukwa-kulihumikiza. Hakutwala ku kupwa chihanyi, Mwanangana mukwa-mana Solomone yasoneka ngwenyi: “Mbila mbolo mu meya mumu muyiwana nawa kulutwe lia matangwa anji.” (Chilu. 11:1) Ngwe chize maliji wano anasolola, amwe mahasa kusolola usakwililo wo ha yize tunakaalingila ha kupalika cha mashimbu anji hanji ngwetu, “kulutwe lia matangwa anji.” Tutalenu lusango unasolola chize yino yalingiwile kuli umwe ndumbu wa pwo.

²⁰ Ha miaka yinji kunyima, pwo lia umwe kalayi wa mbonge yasonekena umwe ndumbu yoze te machimupapachisa mukanda wa utakamiso, ni kumusolwela ulemu wa kununga ni kushishika kuli Yehova. Kwapalikile miaka nake, mba ndumbu yakumbulula mukanda wacho, ni  kwamba ngwenyi: “Nazangile kukusonekena hanga ngukulweze chize maliji je angukwasa ha miaka yino yeswe, chipwe ngwe yena kuwanyingikine chize mukanda wacho wangukwashile.” Yamba nawa ngwenyi: “Chisoneko chize watongwele chishi kuchivulama mumu changukwachile chinji ku mbunge.” a Hanyima lia kulumbununa kapinda yoze apalikile, iye yamba ngwenyi: “Ha mashimbu amwe, nazangile kwecha umwenemwene ni yuma yeswe lume. Alioze chisoneko chize watongwele, nachifungile ku mbunge; nawa changukwashile kununga ni kunyongonona.” Yawezela nawa ngwenyi: “Ha kupalika cha miaka yino nake, kukushi chuma chize changutakamisa chinji kuhiana mukanda uze wangutuminyine.” Pwo lia kalayi kawahililile chinji muze atambwile mukanda wa usakwililo ha kupalika cha “matangwa anji.” Chizechene nawa, ni yetu hanji akwetu matusakwila ha kupalika cha mashimbu anji.

21. Mumu liaka tunazange kununga ni kwimbulula Yehova ha kupwa yihanyi?

²¹ Ngwe chize twamona, Yehova katutangile mu yimwe jila yalipwila. Chipwe ngwe twakwivwa kuwaha muze twakutambula, alioze twakuwahilila chinji muze twakuhana yuma kuli akwetu. Twakulivwa kanawa muze twakukwasa mandumbu jetu a ku ufulielo. Chikwo nawa, chakupema chinji muze o akutusakwilila ha yize twakwalingila. Chipwe ngwe atu mahona kulemesa yize twalingila, nihindu mutuwahilila ha kunyingika ngwetu, twalinga yuma yalita. “Yehova mahasa kutwaha yuma yinji” kuhiana ukwaso weswawo mutuhana kuli akwetu. (2 Sango 25:9) Kwamba umwenemwene, hakutwala ku chikuma cha kuhana, niumwe unahiane Yehova wakuhi. Mumu kwononona cha Yehova chinahiane yuma yeswe yize mutuhasa kutambula. Kashika, twatamba kulinga yeswayo mutuhasa hanga twimbulule Tata yetu wa mu malilu ha kupwa yihanyi.