Nasemukine ha mwaka 1934, yisemi jami kapwile yilambala. Kakatukile ku Suiça ni kuya ku Tenis, Ontário Canadá, mbonge yize yapwile ni upite. Ha mwaka 1939, mama yaputuka kutanga Kaposhi wa Kutalila ni kulikungulula ni Yela ja Yehova. Iye kapwile ni kututwala ku zuwo lia Wanangana yami ni mandumbu jami asambano. Ha kupalika cha mashimbu akehe, yangupapachisa ni kupwa Chela cha Yehova.

Tata kakawahililile ha kunyingika ngwo, mama kapwa Chela cha Yehova, alioze mama te kakuzanga umwenemwene, nawa kazangile kununga ni kushishika kuli Yehova. Kalingile chino ha mashimbu a kuputuka cha ukanjiso wa mulimo wa Yela ja Yehova mu Canadá, ha mwaka 1940. Iye te kakuvumbika tata ni kumusolwela umbovu chipwe ngwe tata kapwile chitenu. Chilweza chipema chize mama apwile ni kusolola chakwashile yami ni mandumbu jami, kutayiza umwenemwene. Ha kupalika cha mashimbu, tata yaputuka kwalumuna manyonga jenyi ni kuputuka kusolwela mama zango.

Ha lushiho, ha mwaka 1950, natalile kukungulula cha mambonge chize chambile ngwo: “O Aumento da TeocracIa” mu mbonge ya Nova York. Hanyima lia kuhanjika ni mandumbu a ku yihela yeka ni yeka, ni kwivwa sango ja ku mwono ja mandumbu waze ayile ku shikola ya Ngiliate, ni yami yinguzanga kunjila mu mulimo wa shimbu lieswe. Yize o ambile yanguvwishile kuwaha chinji, chocho yinguzanga kunjila mu mulimo wa shimbu lieswe. Muze nahetele ku zuwo, yingusoneka petisau ya pionelu wa shimbu lieswe ni kuyituma. Hanyima, Mbetele ya Canadá yiyingukumbulula ngwo, chitangu katamba kungupapachisa. Yino ye nalingile lume ha 1 Outubro, 1950. Mba kulutwe lia kakweji umuwika, yingupwa pionelu wa shimbu lieswe. Hanyima, yangutuma ku mbonge  ya Kapuskasing, kwenako naputukilile mulimo wami wa upionelu. Mbonge yino yapwile kusuku chinji ni ku chihela kuze asoko jami te atwama.

Ha lwiza, ha mwaka 1951, Mbetele yiyituma mutambi mu yikungulwila ni kulweza mandumbu waze akuhanjika Francês hanga akwase mbonge ya Quebec, kuze akuhanjika francês. Ku chihela chacho, te kunafupiwa ukwaso unji. Chize ku wanuke wami te nakuhanjika Francês ni inglês, kashika natayijile kulihana hanga nguye ni kukwasa mu mbonge ya Rouyn. Te chanyingikine mutu niumwe ku chihela chacho. Napwile wika ni mukanda uze te unangusongwela, ngwe chize nalumbununa ku uputukilo. Alioze yuma yeswe yendele kanawa. Yami ni Marcel yitupwa ni usepa akolo, nawa nazangile chinji kukalakala mu mbonge ya Quebec ha miaka yiwana ngwe pionelu walipwila.

Muze napwile ku Quebec, nawahililile chinji ha kutambula mukanda wa kungusanyika ku shikola ya Ngiliate mu kalasa 26, mu South Lansing, Nova York. Nahwishile shikola ya Ngiliate ha 12 Fevereiro, 1956. Yami kangutumine ku Gana, b mu África Ocidental. Alioze muze te kanda nguchiyako, nafupile kufuna mu Canadá hanga ngululieke mikanda yami ya wenyi “ha jimwe poso” ndo haze te munguyitambwila.

Alioze yingutwama tukweji shimbiali mu Toronto ni kushimbwila mikanda. Ha mashimbu jacho eswe, natwamine ku zuwo lia asoko a zango avuluka ngwo Cripp, kuzekwene yingunyingika mwano Sheila, chocho yitulizanga. Muze nazangile hanga tulimbate, mikanda yami te hiyafwambuka. Yami ni Sheila yitulemba ni kukwata chiyulo ngwo, yami natamba kuya kuze angutumine. Twalitesele nawa ngwo, te mutununga ni kuhanjika kupalikila mu mikanda ni kushimbwila hanga tumone nyi usendo muuheta ndo ku umbachiso. Kukwata chiyulo chino kuchakapwile chashi, alioze ha kupalika cha mashimbu, yitumona ngwetu chapwile chiyulo chalita.

Hanyima lia kulinga kakweji umuwika wa wenyi mu comboio, ulungu ni mu ndeke, yinguheta ku Accra, mu Gana. Yangutongola hanga ngukalakale ngwe kalayi wa mambonge. Natambile kuya wenyi ni  kumeneka chifuchi cheswe cha Gana. Yino ye nalingile nawa mu Costa de Marfim, chifuchi chize ananyingika musono ngwo, Côte D’Ivoir mu Togoland (musono ngwo Togo). Ha mashimbu anji, napwile ni kwenda ni mashinyi a ku Mbetele. Te nakuzanga chinji kuya mu wenyi hanga ngumeneke mandumbu.

Kusongo lia poso, te nakupwa ni yihanda ha kukunguluka cha mbonge. Ha mashimbu jacho, kutwakapwile ni mazuwo a kukunguluka chinene-chinene. Mandumbu yatunga chimwe chihela cha mashimbu akehe chize alingile ni pote ni mafwo a mingaji yize apwile ni kulinga nayo yizulie hanga alifunge ku mwalwa. Chikwo nawa, ku chipatulo cha yuma ya kulia kumwakapwile arca muze te mandumbu mahasa kutulikila kulia chize mahana kuli mbunga.

Ha yisuho yimwe, ha kukunguluka chacho hapwile ni kulingiwa yuma yize yapwile ni kusehesa chinji. Limwe tangwa muze ndumbu Herb Jennings, c yoze wapwile mishionaliu te anahanjika pande jenyi, umwe ngombe yatusuka ni kuzomboka kukatuka ku palku ndo kuze te atu anatwama. Iye yecha kuhanjika pande mumu lia kuchamangila cha ngombe. Mandumbu awana yitakame, yakwata ngombe wacho ni kumutwala kuze te akululiekela kulia, mandumbu yalamba koshi.

Hakachi ka poso, napwile ni kusolola chinema chetu chize chapwile ni kwamba ngwo: “Associação do Novo Mundo em Ação” mu yihunda yize yapwile hakamwihi. Mba nguhase kuchilinga, napwile ni kusolola chinema kupalikila ha hina litoma lize napwile ni kukasa ku manguji aali. Atu mu yihunda yacho kapwile ni kuzanga chinji chinema chacho. Kuli anji, achize chapwile chinema cho chitangu chize atalile ku mwono wo. Kapwile ni kulamba koshi muze apwile ni kumona atu waze anapapachisa. Chinema chacho chapwile ni kukwasa amone ngwo, tuli umwe ululikiso walinunga wa hashi heswe.

Muze hinatwama miaka yaali mu África, nawahililile chinji ha kutala kukunguluka cha mambonge cha hashi heswe mu mbonge ya Nova York ha mwaka 1958. Ngunakawahilila chinji muze naliwanyine ni Sheila wakatukile ku Quebec, yoze te unakalakala ngwe pionelu walipwila. Te twakuhanjikila kupalikila mu mikanda, alioze haliapwila te twaliwana cheka, chocho yingumwita hanga tulimbate; yatayiza. Kulutwe, yingusonekena ndumbu Knorr d mukanda ni kumuhula nyi Sheila te mahasa kuya ku shikola ya Ngiliate, hanga amutume mu África tukalakale hamuwika. Iye yatayiza. Hachino, Sheila yaheta ku  Gana. Twalimbachilile ku Accra ha 3 Outubro, 1959. Twamwene chize Yehova atuwahishile ha kusa Wanangana wenyi ha chihela chitangu ku mwono wetu.

Ha mwaka 1961, yatutuma ku chifuchi cha Camarões. Yami napwile ni milimo yinji, mumu te twatamba kutunga mutangu waha, ngwe tetekeli wa mutangu mwaha kwapwile yuma yinji ya kulilongesa. Alioze kulutwe ha mwaka 1965, yitunyingika ngwetu Sheila kali kafumba. Chapwile chikalu kuli yetu kunyonga kupwa yisemi. Alioze kunyingika ngwetu, mutupwa ni chiteli chino, chatuvwishile kuwaha chinji. Muze te tunalilulieka hanga tufune ku Canadá, yikulingiwa chimwe chuma chipi chinji. Sheila yaselumuna mwana wacho.

Ndotolo yatulweza ngwenyi, kapwile mwana wa lunga. Chize haze yuma yino yalingiwile hikwapalika miaka 50, alioze chipwe chocho kanda tuchivulama yize yalingiwileko. Chipwe ngwe twevwile chinyengo chinji mumu lia yize yalingiwileko, nihindu yitununga mu chiteli chetu chize twapwile ni kuzanga chinji.

Mandumbu mu Camarões te kakupalika mu yihungumiona yinji mumu lia kulituna kulinjisa mu yuma ya mafwefwe. Yuma te yakupihia chinji ha mashimbu a kusakula nguvulu. Chuma chize twapwile ni kuvwila woma yichilingiwa ha 13 ya Maio, 1970, muze akanjishile mulimo wa Yela ja Yehova. Mbetele yetu yipema chinji yize te machiyitunga, yayiyika kuli nguvulu muze te hitwatwamamo ha tukweji atano wika. Muze kwapalikile poso yimuwika, mishionaliu eswe, kuchingako yami ni Sheila, yatuhuma mu chifuchi. Chapwile chikalu kuli yetu kuhichika mandumbu mumu te twakwazanga chinji. Te twakulihula ngwetu, haliapwila yika o malinga?

Ku uputukilo yituya ku Mbetele ya França, twalingileko tukweji asambano. Kukatuka ku Mbetele ya França te nakuhasa kukwasa mandumbu jami ku Camarões. Ha Dezembro ya mwaka wacho, yatutuma ku Mbetele ya mu Nigéria, kwekuze atwalile milimo ya ku Camarões. Mandumbu mu Nigéria, katutambwile kanawa. Twazangile chinji kukalakala ku Nigéria ha miaka yacho yeswe.

Ha mwaka 1973, twatambile kukwata chimwe chiyulo chikalu. Sheila te kanayiji. Muze twapwile ha kukunguluka cha mambonge mu Nova York, iye te keshi kulivwa kanawa. Yangulweza ngwenyi: “Yami chatambile kununga chize, ngunahongo chinji.” Te hitwakalakala hamuwika mu África Ocidental, ha miaka 14. Te nakuwahilila chinji hali iye mumu lia kukalakala ni ushishiko mu mulimo wa Yehova. Alioze twatambile kwalumunako yimwe. Hanyima lia kuhengwola kanawa yize te tunapalika, yitulemba chinji kuli Yehova. Twakwachile chiyulo cha kufuna ku Canadá kuze Sheila te mahasa kutambula uukiso upema. Kuhichika chiteli chetu ngwe mishionaliu ni kukatuka mu mulimo wa shimbu lieswe, chapwile chiyulo chikalu chinji chize twakwachile ku mwono wetu.

Muze twahetele ku Canadá, yinguputuka kukalakala ni umwe sepa yoze te twanyingika ha miaka yinji. Iye kapwile ni chihela cha kulanjishila mashinyi chize chapwile hakamwihi ni Toronto. Twalukalile zuwo ni kulanda yikwata yetu chakuhona kunjila mapanza. Twazangile kununga ni kumbata mwono washi ni kushimbwila ngwetu, tangwa limwe mutukahiluka mu mulimo wa shimbu lieswe. Chakuhona  kushimbwila, yino yiyilingiwa ni kawashi kuhiana chize twanyongene.

Napwile ni kulihana hita Sambata hanga ngukalakale mu zuwo lia kulingila kukunguluka cha mambonge mu Ontario. Ha kupalika cha mashimbu, yangutongola hanga ngukalakale ngwe kalayi ku zuwo lia kulingila kukunguluka chinene-chinene. Sheila te kanayi ni kulivwa kanawa, chocho yitukwata chiyulo ngwetu, te mutuhasa kununga ni kukalakala mu chiteli chino. Hachino, ha Junho, 1974, yitwaluka.

Tunakawahilila chinji ha kufuna mu mulimo wa shimbu lieswe. Sheila yanunga ni kulivwa kanawa, ha kupalika cha miaka yaali yitutayiza kukalakala ngwe kalayi wa mbonge. Te mutukalakalila mu mbonge ya Manitoba Canadá, chihela chize ananyingika mumu lia chishika chinji. Twapwile ni kuzanga chinji kupwa hamwe ni mandumbu a malunga ni a mapwo mu mbonge yacho, ayo kapwile akwa-zango linji. Twalilongesele ngwetu, chipwe ngwe tuli ku chihela cheswacho, chuma chilemu chili kulingila Yehova.

Hanyima lia kukalakala ha miaka yinji mu mulimo wa kalayi, yatusanyika hanga tukalakale ku Mbetele ya Canadá ha mwaka 1978. Ha kupalika cha mashimbu akehe wika, yingulilongesa chimwe chuma chilemu chinji, alioze kuchakapwile chashi. Kangutongwele hanga nguhanjike pande ha ola yimuwika ni ndambu mu limi lia Francês ha kukunguluka chalipwila, mu Montreal. Chaluyinda, atu kapwile ni kapinda ha kukaula pande jami. Mumu lia chikuma chino, ndumbu umwe wa ku Mbetele, wa ku chipatulo cha serviço, yangwaha chimwe chiyulo. Kwamba umwenemwene, natambile kunyingika ngwami, te chishi kulinga pande kanawa! Alioze, chakatayijile chiyulo chacho ni mbunge yeswe, nevwile uli unji ni kunyonga ngwami, ndumbu wacho keshi kumona yuma yipema hali akwo, kakanguchichimiekene. Nahengesele ha kulihulikila ha mutapu uze anguhele chiyulo chacho, ni ha yize te nakunyongena mutu yoze wanguhele chiyulo.

Ha kupalika cha amwe matangwa, mandumbu a mu Komite ya mutangu yeza ni kuhanjika ni yami hakutwala ku yize yalingiwileko. Yingutayiza ngwami, chakasolwele nyonga lialita ha chiyulo chize anguhele. Yingwamba ngwami, chapihia chinji ha yize yalingiwileko, chocho yinguya ni kuhanjika ni ndumbu yoze wanguhele chiyulo. Ni umbovu weswe, iye yangukonekena. Yize yalingiwileko, yangulongesele kupwa mukwa-kulikehesa, chuma chize chichikeza kavulama. (Yishi. 16:18) Napwile ni kulemba chinji kuli Yehova hakutwala ku chikuma chino, te ngunazange kulinga yeswe yize munguhasa hanga ngupwe ni kumwena chiyulo cheswe mangwaha mu jila yalita.

Ngunakalakala ku Mbetele ya Canadá ha miaka kuhiana 40. Chize ha mwaka 1985, nguli ni chiwape cha kukalakala mu Komite ya Mutangu. Ha Fevereiro ya 2021, chileza chami Sheila yafwa. Mumu lia kufwisa mukwetu-pwo ni yami mwene yinguputuka kuyiza-yiza chinji. Alioze kulihulikila mu mulimo wa Yehova, chakungukwasa kuwahilila. Kulinga chino, chakungukwasa nguhone kulihulikila chinji ha mwono wami wa mashimbu akehe. (Chilu. 5:20) Chipwe ngwe napalikile mu kapinda munji ku mwono wami, alioze nakupwa ni uwahililo unji kuhiana yipikalo yami. Kusa Yehova ha chihela chitangu ku mwono wami ni kupalikisa miaka 70 mu mulimo wa shimbu lieswe, changunehena yiwape yinji. Nakulemba hanga mandumbu jetu akweze a malunga ni a mapwo, anunge ni kusa Yehova ha chihela chitangu ku mwono wo. Nguli ni shindakenyo ngwami, nyi nachilinga, no mapwa ni yiwape yinji ni kupwa ni chiseke chize chakwiza ha kulingila Yehova.