MUTWE WA KULILONGESA 37
MWASO 118 “Weza Kama ku Ufulielo Wetu!”
Mukanda Uze Muutukwasa Kunyongonona ni Ushishiko Ndo ku Songo
“Twakakaminya chikolo ndo ku songo ufulielo uze twapwile nawo ku uputukilo.”—HEPRE. 3:14.
YIZE MUTULILONGESA
Mutumona malongeso mu mukanda wa A-Hepreu, waze matukwasa kushishika ha matangwa wano akusula.
1-2. (a) Yika te yinalingiwa mu Yundeya muze postolo Paulu asonekenene Akwa-Kristu A-Hepreu? (b) Mumu liaka mutuhasa kwamba ngwetu, mukanda wacho wahetele ha shimbu lialita?
HA KUPALIKA cha yimwe miaka muze Yesu te hafwa, Akwa-Kristu A-Hepreu yapalika mu yuma yinji yikalu. Ha kupalika cha miaka yikehe wika muze te hasa chikungulwila cha Akwa-Kristu, o yapalika mu yihungumiona yinji. (Yili. 8:1) Hachino, muze te hikwapalika miaka 20, Akwa-Kristu jacho yapalika mu kapinda wa mbongo yoze kota wejile mumu lia zala yize yapwile mu chifuchi. (Yili. 11:27-30) Chipwe chocho, ha amwe mashimbu ha mwaka 61 M.J., o yapwa ni sambukila ha mashimbu akehe. Alioze kulutwe, o te maahungumiona chinji kuhiana. Ha shimbu liacho, he atambwile mukanda kukatuka kuli Paulu. Chinasoloka ngwe mukanda wacho wahetele ha shimbu lialita.
2 Mukanda wa A-Hepreu wahetele lume ha shimbu lialita. Mumu liaka? Mumu sambukila yize Akwa-Kristu jacho apwile nayo, yapwile ya shimbu likehe. Paulu kaehele yiyulo yize te muyaakwasa kukumba lamba lize te muliza kulutwe. Kunongesa cha Yerusaleme chize Yesu aprofetezele te chinakundama. (Luka 21:20) Kwamba umwenemwene, chipwe Paulu, chipwe Akwa-Kristu ku Yundeya, kakanyingikine shimbu lize kunongesa chacho te muchiputuka. Alioze, ayo te mahasa kulilulieka ha mashimbu jacho akehe asalileko hanga apwe ni yitanga ngwe, ufulielo ni kunyongononona.—Hepre. 10:25; 12:1, 2.
3. Mumu liaka mukanda wa A-Hepreu uli ni ulemu kuli yetu musono?
3 Kwasala hakehe, mutupalika mu umwe luyinda mupi chinji kuhiana yoze Akwa-Kristu A-Yunda apalikile. (Mateu 24:21; Uso. 16:14, 16) Mutumona yimwe yiyulo yize Yehova ahanyine hanga akwase Akwa-Kristu jacho, ni chize yiyulo yacho muyihasa kutukwasa.
“TUSENU TACHI HANGA TUNUNGE NI KUJAMA”
4. Kapinda muka apalikile A-Yunda waze apwile Akwa-Kristu? (Tala nawa chizulie.)
4 A-Yunda waze apwile Akwa-Kristu, katambile kwalumuna yitanga yo, kulinga chino kuchakapwile chashi. Kunyima, Yehova kasakwile A-Yunda hanga apwe atu jenyi. Yerusaleme yapwile mbonge ya unguvulu wa Wanangana wa Zambi hano hashi; tembele yapwile chishina cha uwayilo walinanga. A-Yunda eswe te kakukaula Shimbi ya Mose, ni mianda yize mangana a yingeleja apwile ni kwalongesa. Malongeso jacho kapwile ni kwasongwela hakutwala ku yize malia, hakutwala ku ungalami, ni chize matwama ni akwamavungu. Alioze hanyima lia kufwa cha Yesu, Yehova yecha kutayiza yitapo yize A-Yunda apwile ni kuhana. Kashika, chapwile chikalu kuli A-Yunda waze apwile Akwa-Kristu mumu te hanejilila kukaula Shimbi ya Mose. (Hepre. 10:1, 4, 10) Chipwe lume Akwa-Kristu waze te hajama ngwe postolo Petulu, no kapwile ni kapinda wa kwijilila ni kwalumuka chacho. (Yili. 10:9-14; Ngala. 2:11-14) Mumu lia malongeso aha waze Akwa-Kristu jacho te akukaula, mangana a yingeleja ya A-Yunda yaputuka kwahungumiona.
Akwa-Kristu A-Hepreu katambile kulikwachilila ku Liji lia Zambi ni kwehuka manyonga a mahuza a A-Yunda waze te akulimika ni umwenemwene wa mu Liji lia Zambi (Tala maparagrafu 4-5)
5. Ha yika Akwa-Kristu te atamba kulifunga?
5 Akwa-Kristu mu Yundeya, kapwile ni kwahungumiona kuli yizavu yaali ya atu. Chitangu, kuli mangana a yingeleja ya A-Yunda waze apwile ni kwamona ngwe kali yitanganyanyi mumu lia kutuhuka mu uwayilo wo. Chamuchiali, amwe mukachi ko waze apwile ni kuliamba ngwo kali Akwa-Kristu, kapwile ni kushinjila akwo hanga anunge ni kulinga yimwe yuma ya Shimbi ya Mose. O kota kalingile yino mumu kakazangile kupalika mu yihungumiona. (Ngala. 6:12) Yika te muyikwasa Akwa-Kristu jacho kununga ni kushishika kuli Yehova?
6. Yika Paulu akolwezele mandumbu jenyi kulinga? (A-Hepreu 5:14–6:1)
6 Ha mukanda wa A-Hepreu, Paulu yakolweza mandumbu jenyi hanga alilongese chinji Liji lia Zambi. (Tanga A-Hepreu 5:14–6:1.) Paulu yatongola Yisoneko ya Hepreu ni kulumbununa chize uwayilo wa Akwa-Kristu wapwile upema chinji kuhiana wa A-Yunda. a Paulu kanyingikine ngwenyi, nyi Akwa-Kristu malilongesa umwenemwene ni kuunyingika kanawa, chino te muchaakwasa kunyingika malongeso a mahuza ni kwaehuka.
7. Kapinda muka twakupalika musono?
7 Chizechene ngwe Akwa-Kristu A-Hepreu, ni yetu musono twakuliwana ni atu waze a kumwanga sango ja mahuza, ni manyonga waze akulimika ni yize Yehova akwamba hakutwala ku chipi ni chipema. Amwe keshi kutayiza yize Yela ja Yehova akulongesa hakutwala ku kwononokena shimbi ja mu Mbimbiliya jize jakukanjisa utanji ni upangala. Kunyonga cha atu hano hashi chinayi ni kulisa chinji ni kunyonga cha Yehova. (Yishi. 17:15) Kashika, chili chilemu kuli yetu kulianga kunyingika manyonga jacho, ni kwehuka. Kutwatambile kwecha mutu niumwe atukokolole hanji kututwala tweche kuwayila Yehova.—Hepre. 13:9.
8. Yika muyitukwasa kununga ni kukola ku ufulielo?
8 Ni yetu twatamba kukaula chiyulo chize Paulu ahanyine kuli Akwa-Kristu A-Hepreu, cha kusa tachi hanga tununge ni kujama. Chino chinalumbunuka ngwo, twatamba kulilongesa Mbimbiliya hanga tunyingike kanawa Yehova ni chize akunyonga. Twatamba kununga ni kukola ku ufulielo, chipwe ngwe hi twalihana kuli Yehova ni kutupapachisa. Chipwe ngwe tuli mu umwenemwene ha miaka yinji hanji ka, yetu eswe twatamba kutanga Mbimbiliya mashimbu eswe. (Samu 1:2) Kupwa ni katalilo mupema wakulinga longeso lia wika muchitukwasa kukolesa ufulielo: chimwe chitanga chize Paulu atongwele ha mukanda wa A-Hepreu.—Hepre. 11:1, 6.
TWAKUFULIELA “HANGA TUFUNGE MWONO”
9. Mumu liaka chapwile chilemu kuli Akwa-Kristu A-Hepreu kupwa ni ufulielo ukolo?
9 Akwa-Kristu A-Hepreu te katamba kukolesa ufulielo wo mumu chino te muchakwasa kulilamwina muze luyinda maputuka mu Yundeya. (Hepre. 10:37-39) Yesu katowezele tumbaji twenyi ngwenyi, muze mamona Yerusaleme hayijingilika kuli maswalale, o te katamba kuchinyina ku milundu. Akwa-Kristu eswe waze apwile mu Yundeya ni waze apwile mu yihunda te katamba kukaula chiyulo chino. (Luka 21:20-24) Ku mashimbu akunyima, muze maswalale te akulukukila atu mu yihunda, o kapwile ni kuchinyina mu mbonge yinene mumu lia yipanga yamo yisuku-yisuku. Kuchinyina ku milundu, chapwile ni kusoloka ngwe kuchishi ni ulemu, kashika o katambile kupwa ni ufulielo ukolo mba akaule chiyulo cha Yesu.
10. Yika Akwa-Kristu te malinga nyi mapwa ni ufulielo ukolo? (A-Hepreu 13:17)
10 Akwa-Kristu A-Hepreu katambile nawa kujikijila hali malunga waze Yesu asakwile hanga asongwele chikungulwila. Tusongo jacho, kota kahanyine usongwelo wa kuze atamba kuchinyina, ni shimbu lize atamba kuchina. (Tanga A-Hepreu 13:17.) Liji lia Ngregu lize anakasoneka ha A-Hepreu 13:17 “ononokenenu,” liakusolola ngwo, mutu kakwononoka mumu mwene kakujikijila hali yoze unahane usongwelo wacho. Chino chinatale ha yuma yinji hi wika ko kwononokena mutu wacho mumu ngwo kali ni ulite wa kuhana usongwelo. Kashika, Akwa-Kristu A-Hepreu katambile kulilongesa kujikijila hali waze apwile tusongo, shimbu te luyinda kanda achiputuka. Nyi Akwa-Kristu jacho kononokenene mandumbu waze apwile tusongo ha mashimbu a sambukila, te muchipwa chashi kwononokena ha mashimbu akalu.
11. Mumu liaka kupwa ni ufulielo ukolo chili chilemu kuli Akwa-Kristu musono?
11 Chizechene ngwe Akwa-Kristu A-Hepreu, ni yetu tunafupu kupwa ni ufulielo ukolo. Tuli ha mashimbu waze atu anji keshi kutayiza ngwo, songo lia chifuchi chino linakundama, nawa akutukekuna mumu lia kutayiza umwenemwene uno. (2 Petu. 3:3, 4) Chipwe ngwe Mbimbiliya yakutukwasa kunyingika jimwe sango hakutwala ku yize muyikalingiwa ha luyinda munene, nihindu kuli yuma yinji yize kutwanyingikine. Twatamba kupwa ni ufulielo ukolo ngwetu ha shimbu lialita, songo lia chifuchi chino muliza. Muze yino muyilingiwa, Yehova makatufunga.—Haba. 2:3.
12. Yika muyikatukwasa kulilamwina ha luyinda munene?
12 Twatamba kufuliela ngwetu, musono Yehova kanatwehe usongwelo kupalikila muli “ndungo washishika, wakanyama.” (Mateu 24:45) Muze luyinda munene makaputuka, kota mutukatambula usongwelo mu yimako-yimako uze muukalamwina mwono wetu, ngwe uze kota Akwa-Kristu A-Hepreu atambwile muze maswalale a A-Roma ajingilikile Yerusaleme. Kashika, wano kali mashimbu alemu waze twatamba kujikijila hali waze apwa tusongo mu ululikiso wa Yehova. Nyi kutwajikijilile ni kwononoka ku usongwelo wo haliapwila, muchikapwa chikalu kwononokena usongwelo uze makatwaha ha mashimbu a luyinda munene.
13. Mumu liaka chiyulo cha Paulu chili ha A-Hepreu 13:5 chapwile chilemu?
13 Muze te anashimbwila chimwe chilayi mba achine, Akwa-Kristu A-Hepreu katambile kwashiwisa mwono ni kwehuka ‘kuzanga mbongo’ ha kulihulikila mu mulimo wa Yehova. (Tanga A-Hepreu 13:5.) Kunyima, amwe kamwene lamba mumu lia zala ni uswale. (Hepre. 10:32-34) Chipwe ngwe katayijile ni uwahililo weswe kupalika mu yipikalo mumu lia sango jipema, kota amwe a kuli ayo kaputukile kulihulikila ha kufupa mbongo hanga alifunge ku ponde hanji uswale. Alioze mbongo te kujichi kulamwina mwono wo muze Yerusaleme mayinongesa. (Tia. 5:3) Kwamba umwenemwene, eswe waze te mazanga kupwa ni yikumba yinji, te muchaapwila chikalu kuchina ni kuhichika mazuwo ni yikumba yo.
14. Kuchi ufulielo ukolo muutukwasa kupwa ni nyonga lialita hakutwala ku yikumba?
14 Nyi twafuliela ngwetu kwasala hakehe Yehova manongesa chifuchi chino chipi, kutuchi kunyonga ngwetu kupwa ni mbongo hanji yikumba yinji chili chilemu. Ha mashimbu a luyinda munene, mbongo kujichi kapwa nawa ni ulemu. Mbimbiliya yakwamba ngwo, atu “makambila prata yo mu matapalo” mumu makanyingika ngwo, chipwe ‘prata ni oru yo kuyichi kahasa kwapulwila ha tangwa lia ufwatulo wa Yehova.’ (Eze. 7:19) Shimbu tulihulikile ha kufupa mbongo, twatamba kukwata yiyulo yize muyitukwasa kuwana yize mutulikwasa nayo, kufunga asoko jetu ni kutukwasa tununge ni kuwayila Yehova. Kashika, kutwatambile kufupa kulanda yuma yize muyifwika mbongo jize kutushi najo, hanji kukisa mashimbu jetu ni kufunga yikumba. Twatamba nawa kukanyama hanga tuhone kulikwachilila chinji ku yikumba yize tuli nayo. (Mateu 6:19, 24) Amu songo linakundama, twatamba kunyingika nyi twakujikijila muli Yehova nyi ha yikumba yize tukwete.
“NWATAMBA KUNYONGONONA”
15. Mumu liaka Akwa-Kristu A-Hepreu atambile kunyongonona?
15 Akwa-Kristu A-Hepreu katambile kunyongonona mba ahase kupalika mu yuma yize te muyeseka ufulielo wo. (Hepre. 10:36) Chipwe ngwe amwe a kuli ayo kapalikile mu yihungumiona kunyima, nihindu anji kapwile Akwa-Kristu ha mashimbu a sambukila yikehe yize apwile nayo. Hachino, Paulu yaeulula ngwo te katamba kulilulieka hanga ahase kupalika mu yihungumiona ni kushishika ndo ku kufwa cho ngwe chize Yesu alingile. (Hepre. 12:4) Mumu lia kwoka cha Akwa-Kristu, A-Yunda waze te akulimika no yaputuka kutenuka chinji. Ha yimwe miaka kunyima, mbunga yimwe yashile Paulu mawe muze te anambujola mu Yerusaleme. A-Yunda kuhiana 40 yamba ngwo: “Yetu hitunalishingi ni shingo lino mgwetu, kutuchi kulia nichimwe ndo haze mutushihila Paulu.” (Yili. 22:22; 23:12-14) Chipwe ngwe kapwile ni kwavwila kole ni kwahungumiona, nihindu Akwa-Kristu katambile kununga ni kulikungulula hanga awayile Zambi, kwambujola sango jipema ni kukolesa ufulielo wo.
16. Kuchi mukanda wa A-Hepreu muuhasa kutukwasa kupwa ni nyonga lialita muze tunapalika mu yihungumiona? (A-Hepreu 12:7)
16 Yika te muyikwasa Akwa-Kristu A-Hepreu kunyongonona mu yihungumiona? Paulu kakwashile hanga amone yiwape yize yakwiza ha kunyongonona mu yihungumiona. Yaalumbunwina ngwenyi, muze Akwa-Kristu akupalika mu yeseko ya ku ufulielo, Zambi mahasa kwafumba kupalikila mu yeseko yacho. (Tanga A-Hepreu 12:7.) Fumbo liacho muliakwasa kupwa ni yitanga ya Akwa-Krisu ni kuyilulieka. Ha kulihulikila ha yiwape yize muyiza ku yeseko yacho, Akwa-Kristu A-Hepreu te mahasa kunyongonona.—Hepre. 12:11.
17. Yika Paulu anyingikine hakutwala ku yihungumiona?
17 Paulu kakolwezele Akwa-Kristu A-Hepreu asolole hamu ni kuhona kukokoloka muze te anapalika mu yihungumiona. Postolo Paulu, te mahasa kwaha yiyulo yipema hakutwala ku chikuma chino, mumu kunyima iye kahungumionene Akwa-Kristu. Kashika te kananyingika kanawa yize o apwile ni kupalika. Chikwo nawa, hanyima lia kupwa Mukwa-Kristu, iye kapalikile mu yihungumiona yeka ni yeka. (2 Kori. 11:23-25) Hachino, Paulu kanyingikine kanawa yize Akwa-Kristu jacho te anafupiwa hanga anyongonone. Iye yaeulula nawa ngwenyi, muze mapalika mu yihungumiona katambile kulijikijila ene, alioze katamba kujikijila muli Yehova. Ayo te mahasa kusolola hamu nyi meuluka maliji wano anambe ngwo: “Yehova iye chikwashi chami, chichi kwivwa woma.”—Hepre. 13:6.
18. Yika muyitukwasa kupalika mu yihungumiona?
18 Ni musono, mandumbu jetu amwe kanapalika mu yihungumiona. Mutuhasa kwakwasa ha kwalembela hanji kwakwasa ha yize anafupu ku musunya. (Hepre. 10:33) Mbimbiliya yakwamba ngwo: “Waze eswe mazanga kuwayila Zambi ku mwono wo, ni kulivwashana ni Kristu Yesu, no makaahungumiona.” (2 Timo. 3:12) Kashika, yetu eswe twatamba kulilulieka hanga tukahase kupalika ha mashimbu akalu waze aneza kulutwe. Twatamba kununga ni kujikijila muli Yehova ni kupwa ni shindakenyo ngwetu, matukwasa kupalika mu kapinda mweswawo. Ha shimbu lialita, iye makahuzulula waze eswe akumuwayila ni ushishiko.—2 Tesa. 1:7, 8.
19. Yika twatamba kulinga mba tuhase kulilulieka hakutwala ku luyinda munene? (Tala nawa chizulie.)
19 Chochene, mukanda wa Paulu kuli A-Hepreu, wakwashile Akwa-Kristu ku sekulu yitangu alilulieke ha kapinda yoze te mapalika. Paulu kaakolwezele hanga alilongese Liji lia Zambi ni kulinyingika kanawa. Ha kulinga chino, ayo te manyingika malongeso waze mahasa kukokolola ufulielo wo ni kwaehuka. Iye yaakolweza akolese ufulielo wo hanga ahase kukaula usongwelo wa Yesu, ni wa waze apwile ni kusongwela chikungulwila chakuhona kukakajana. Paulu yakwasa nawa Akwa-Kristu A-Hepreu hanga anunge ni kunyongonona ni kumona yihungumiona ngwe uhashi wa kwafumbilamo kuli Tato wa zango, Yehova. Ni yetu twatamba kukaula yiyulo yacho ya mu Mbimbiliya. Nyi twachilinga, mutuhasa kununga ni kushishika ndo ku songo.—Hepre. 3:14.
Akwa-Kristu ashishika waze anyongonwene, kaawahishile. Muze achinyine mu Yundeya, o yanunga ni kulikungulula. Yika chino chinatulongesa? (Tala paragrafu 19)
MWASO 126 Keyenu, Jikizenu, Takamenu
a Ha kapitulu mutangu wika, Paulu katongwele versu shimbiali ja Yisoneko ya Hepreu jize jinasolola ngwo, uwayilo wa Akwa-Kristu wahiana uwayilo wa A-Yunda.—Hepre. 1:5-13.
