MUTWE WA KULILONGESA 38
MWASO 25 Atu a Kupita Kuli Zambi
Shina Wakupanjika Kanawa Utowezo?
“Umwe makaya nenyi, mukwo makamuhichika.”—MATEU 24:40.
YIZE MUTULILONGESA
Mutumona yishima yitatu ya Yesu ni kunyingika chize yinatale ha mashimbu a upatwilo uze muukalingiwa kusongo lia matangwa a kusula.
1. Upatwilo uka kwasala hakehe hanga ulingiwe?
TULI ha mashimbu waze kwasala hakehe kulingiwe chimwe kwalumuka chinene. Kwasala hakehe Yesu mapatwila mutu mweswe hano hashi. Yesu kahanjikile ha yize te muyilingiwa hano hashi shimbu upatwilo wenyi kanda uchiputuka. Iye yahana kuli tumbaji twenyi “chilayi” cha kwiza chenyi, ni cha “kumanunuka cha miaka yino.” (Mateu 24:3) Chilayi chino che tunawane ha Mateu kapitulu 24 ni 25. Mutuhasa kuchiwana nawa ha Marku kapitulu 13 ni ha Luka kapitulu 21.
2. Yika mutumona ha mutwe uno, mba kuchi muyitukwasa?
2 Kupalikila mu yishima yitatu, Yesu yahana umwe utowezo ulemu. Utowezo wacho uli ha chishima cha pembe ni mapanga, cha ana-mapwo yikanyame ni yihepuke ni ha chishima cha talentu. Hita chishima, muchitukwasa kunyingika chize yitanga ya mutu ni mutu muyikakwata ha upatwilo uze makatambula. Muze mutuhengwola yishima yacho, tutalenu malongeso waze mutuwana ha yishima yino ni chize mutuhasa kwakaula ku mwono wetu. Chishima chitangu chize mutumona chili cha mapanga ni pembe.
MAPANGA NI PEMBE
3. Ha mashimbu aka Yesu makapatwila atu?
3 Ha chishima cha mapanga ni pembe, Yesu kahanjikile hakutwala ku upatwilo wa atu waze ali ni uhashi wa kwivwa sango jipema ni kusakula nyi makwasa mandumbu jenyi akuwayisa hanji ka. (Mateu 25:31-46) Ha mashimbu a “luyinda munene,” Yesu makapatwila atu ngwe mapanga ni pembe shimbu Armagedone kanda yiputuka. (Mateu 24:21) Ngwe chize kafunga a kuhandununa mapanga ni pembe, Yesu neye makahandununa atu waze akukwasa mandumbu jenyi akuwayisa ni waze keshi kwakwasa.
4. Kulita ni Izaia 11:3, 4, mumu liaka mutuhasa kupwa ni shindakenyo ngwetu, Yesu makapatwila atu ni ululi? (Tala nawa chifukilo.)
4 Yehova katongwele Yesu ngwe ngaji. Uprofeto wa mu Mbimbiliya wakusolola ngwo, Yesu makapatwila atu ni ululi. (Tanga Izaia 11:3, 4.) Iye kakutala kanawa ha yitanga ya hita mutu, yize akwamba hanji akunyonga ni yize akulinga hali mandumbu jenyi akuwayisa. (Mateu 12:36, 37; 25:40) Chino muchikakwasa Yesu kunyingika iya chamwenemwene wakukwasa mandumbu jenyi akuwayisa ha mulimo uze ayo akulinga. a Ukwaso uze atu waze anatese ni mapanga akuhana kuli mandumbu ja Yesu, uli wa kwambujola sango jipema ja Wanangana. Atu wano makaapatwila ngwe “akwa-ululi;” o makapwa ni kutalatala cha kutwama ni “mwono wa mutolo” hano hashi. (Mateu 25:46; Uso. 7:16, 17) Lino mulikapwa fweto lipema lize atu waze ashishika makatambula. Mumu lia kununga ni kushishika ha mashimbu a luyinda munene ni hanyima lia luyinda munene, majina jo makapwa a kusoneka mu “mukanda wa mwono.”—Uso. 20:15.
Kwasala hakehe, Yesu mapatwila atu ngwe mapanga ni pembe (Tala paragrafu 4)
5. Longeso lika twawana ha chishima cha mapanga ni pembe, hali aya linatale?
5 Solola ngwe uli wamwenemwene nawa washishika. Chishima cha mapanga ni pembe, kanji-kanji chakutala hali waze ali ni kutalatala cha kutwama hano hashi. Atu jacho kakusolola ufulielo wo ha kukwasa mandumbu ja Kristu mu mulimo wa kwambujola, ni kushishika ku chizavu chikehe cha Akwa-Kristu akuwayisa chize Yesu atongwele ngwe ndungo washishika, wakanyama. (Mateu 24:45) Waze ali ni kutalatala cha kuya mu malilu no katamba kukaula utowezo uze uli ha chishima cha mapanga ni pembe. Mumu liaka? Mumu Yesu kakutala ha yitanga, utu, manyonga ni ha yize o akwamba. Ayo no katamba kusolola ushishiko wo, kashika Yesu atele yishima yikwo yaali, yize yinakwate hali Akwa-Kristu akuwayisa. Yishima yacho tunayiwane ha Mateu kapitulu 25. Haliapwila, tutalenu chishima cha ana-mapwo yikanyame ni yihepuke.
ANA-MAPWO YIKANYAME NI YIHEPUKE
6. Kuchi ana-mapwo atano asolwele ngwo kakanyama? (Mateu 25:6-10)
6 Ha chishima cha ana-mapwo, Yesu kahanjikile hali ana-mapwo kumi waze ayile ni kupatwiza sandungi. (Mateu 25:1-4) Ayo eswe kazangile kukaula sandungi ha chiwanyino cha umbachiso. Yesu kambile ngwenyi, atano a kuli ayo kapwile “yikanyame,” atano akwo “yihepuke.” Ana-mapwo yikanyame kaliluliekele ni kulawola ni kumushimbwila, chipwe ngwe sandungi te maheta ha muchima ufuku. O yaneha maji mu ndeya jo hanga jinunge ni kutemuka, ni kumbata maji akwo mu milangi nyi ngwe sandungi malaluka. Kashika, ayo kaliluliekele kanawa hanga ndeya jo jihone kujima. (Tanga Mateu 25:6-10.) Muze sandungi ahetele, ana-mapwo yikanyame yaya nenyi ha chiwanyino. Chizechene nawa, Akwa-Kristu akuwayisa waze mapwa akulilulieka ha kununga ni kulawola ni kushishika ndo ha kwiza cha Kristu, makaatayiza hanga alichinge ni sandungi Yesu mu Wanangana wa mu malilu. b (Uso. 7:1-3) Mba yika yalingiwile kuli ana-mapwo atano yihepuke?
7. Yika yalingiwile kuli ana-mapwo atano yihepuke, mumu liaka?
7 Kulisa ni ana-mapwo yikanyame, anamapwo yihepuke te keshi akulilulieka. Muze sandungi ahetele, ndeya jo te jinayi ni kujima mumu kakanehene maji akwo mu milangi. Muze anyingikine ngwo kwasala hakehe sandungi ahete, yaya ni kulanda maji. Muze sandungi ahetele, o te kanda achifuna. Hachino, “ana-mapwo atano waze te halilulieka yanjila ni sandungi ha chiwanyino cha umbachiso, mba chikolo yachiyika.” (Mateu 25:10) Chocho muze ana-mapwo yihepuke afunyine, yeseka kunjila ha chiwanyino, alioze sandungi yaalweza ngwenyi, “chanunyingikine.” (Mateu 25:11, 12) Ana-mapwo jacho yihepuke kakapwile akulilulieka ni kushimbwila sandungi ha shimbu lieswalio maheta. Yika Akwa-Kristu akuwayisa mahasa kulilongesa ha chishima chino?
8-9. Longeso lika Akwa-Kristu akuwayisa mahasa kuwana ha chishima cha ana-mapwo? (Tala nawa chizulie.)
8 Solola ngwe uli wakulilulieka ni kulawola. Yesu te keshi kwamba ngwenyi, mukupwa yizavu yaali ya Akwa-Kristu akuwayisa; chimwe chize te muchipwa cha kulilulieka ni kushimbwila kumanunuka cha miaka yino, chikwo ka. Shimbu ambe chocho, iye te kanalumbununa yize muyihasa kulingiwa kuli Akwa-Kristu akuwayisa nyi mahona kulilulieka ni kunyongonona ni ushishiko weswe ndo ku songo. Nyi ayo mahona kulilulieka, te kechi kutambula chiwape cho. (Yoa. 14:3, 4) Uno uli utowezo ulemu! Chipwe ngwe tuli ni kutalatala cha kuya mu malilu hanji kutwama hano hashi, yetu eswe twatamba kufunga kanawa utowezo wa chishima cha ana-mapwo. Yetu eswe twatamba kulawola ni kulilulieka hanga tunyongonone ndo ku songo.—Mateu 24:13.
9 Hanyima lia kuta chishima cha ana-mapwo hanga asolole ulemu wakulilulieka ni kulawola, Yesu yata chishima cha talentu. Chishima chino, chakusolola ulemu wa kupwa yikilikita ni kulinga kanawa yeswayo mutuhasa mu mulimo wa Yehova.
Chili chilemu yetu eswe kupanjika ku utowezo wa chishima cha ana-mapwo hanga tupwe akulilulieka ni kulawola, mba tuhase kunyongonona ndo ku songo (Tala maparagrafu 8-9)
TALENTU
10. Kuchi ndungo aali asolwele ngwo kashishika? (Mateu 25:19-23)
10 Ha chishima cha talentu, Yesu yahanjika hali ndungo aali waze ashishikile kuli mwene wo ni umuwika yoze kakashishikile. (Mateu 25:14-18) Ndungo aali kasolwele ushishiko wo ha kukalakala chinji hanga awezele upite wa mwene wo. Shimbu te kanda achiya wenyi, lunga wacho yahana kuli ndungo jenyi talentu hanji ngwetu, mbongo jinji. Ndungo aali ashishika kakalakalile chinji ni mbongo jacho ni mana. Yika yalingiwileko? Muze mwene wo afunyine, ayo te hafumbula hanji kwokesa mbongo jize aehele. Mwata wo yaachichimieka, mba ‘yawahilila hamwe ni mwata wo.’ (Tanga Mateu 25:19-23.) Yika yalingiwile kuli ndungo wamuchitatu? Yika alingile ni mbongo jize amuhele kuli mwata wenyi?
11. Yika yalingiwile kuli ndungo “chileya,” mumu liaka?
11 Ndungo wamuchitatu katambwile talentu yimuwika, alioze kapwile “chileya.” Mwene wenyi kapwile ni kushimbwila hanga iye akalakale ni talentu yacho ni mana. Shimbu achilinge, iye yayivumbika mu mavu. Muze mwene wenyi afunyine, ndungo wacho yamufunyishina wika talentu yize amuhele. Ndungo yono kakapwile ni yitanga yipema, shimbu ete ukonekeno mumu lia kuhona kulinga yize mwene wenyi amutumine, iye yamwamba ngwenyi kali mutu mukalu. Yize ndungo yono alingile, kuyakawahililile mwene wenyi, hachino yamutambula talentu yacho ni kumuhuma ku zuwo.—Mateu 25:24, 26-30.
12. Yika ndungo aali ashishika analumbunuka musono?
12 Ndungo aali ashishika kanalumbunuka Akwa-Kristu akuwayisa waze ashishika. Mwata wo Yesu, kakwasanyika hanga ‘awahilile hamwe nenyi.’ Ayo kakutambula chiwape cho chakuya mu malilu ha uhindukilo utangu. (Mateu 25:21, 23; Uso. 20:5b) Alioze chilweza chipi cha ndungo chileya, chili utowezo kuli Akwa-Kristu akuwayisa. Mumu liaka tunambe chocho?
13-14. Longeso lika Akwa-Kristu akuwayisa akuwana ha chishima cha talentu? (Tala nawa chizulie.)
13 Solola ngwe uli chikilikita. Ha chishima cha talentu ni cha ana-mapwo, Yesu kakaprofetezele ngwenyi, Akwa-Kristu akuwayisa te mapwa yileya. Alioze, kalumbunwine yize te muyihasa kulingiwa nyi o mahona kupwa yikilikita. Ayo te mahona kukakaminya ku kutambika chize ‘aatambikile, hanji kuhona kupwa ni utayizo’ wa kunjila mu Wanangana wa mu malilu.—2 Petu. 1:10.
14 Yishima ya Yesu hakutwala kuli ana-mapwo ni talentu, yinasolola pundu ngwo, Akwa-Kristu akuwayisa katamba kupwa akulilulieka ni kulawola, ni kupwa yikilikita ha kulinga kanawa mulimo wo. Shina Yesu kahanyine nawa utowezo ukwo kuli Akwa-Kristu akuwayisa? Ewa. Mutuhasa kuwana utowezo wacho ha Mateu 24:40, 41.
Yesu kanazange hanga Akwa-Kristu akuwayisa apwe yikilikita ni kulinga kanawa mulimo wo (Tala maparagrafu 13-14) d
IYA “MAKAYA NENYI?”
15-16. Kuchi mukanda wa Mateu 24:40, 41 unakwase Akwa-Kristu akuwayisa kumona ulemu wa kununga ni kulawola?
15 Muze te kanda achita yishima yenyi yitatu, Yesu yahanjika ha upatwilo wa kasula hali Akwa-Kristu akuwayisa uze muukasolola yoze makapwa ni utayizo. Iye kahanjikile hali ‘malunga aali waze anakalakala mu munda, ni mapwo aali waze anatu ku utwilo.’ Ha yikuma yino yaali, eswe kapwile ni kulinga mulimo umuwika, alioze, Yesu yamba ngwenyi: “Umwe makaya nenyi, mukwo makamuhichika.” (Tanga Mateu 24:40, 41.) Hanyima, Yesu yalweza tumbaji twenyi ngwenyi: “Nungenu ni kulawola, mumu kunwanyingikine ola yize Mwene wenu meza.” (Mateu 24:42) Muze Yesu atele chishima cha ana-mapwo kumi, iye kahanjikile yimwe yalifwa ni yino. (Mateu 25:13) Shina yalifwa lume? Ewa. Akwa-Kristu akuwayisa amwenemwene nawa ashishika e wika Yesu ‘makaya no’ mu Wanangana wa mu malilu.—Yoa. 14:3.
16 Solola ngwe unalawola. Akwa-Kristu akuwayisa waze kechi kununga ni kulawola ku spiritu, kechi kaakungulula hamwe ni “waze hanatongola.” (Mateu 24:31) Alioze tuvumbi twa Yehova eswe, chipwe ngwe kali ni kutalatala cha kuya mu malilu hanji cha kutwama hano hashi, katamba kumona maliji a Yesu ngwe utowezo uze muwaakwasa kununga ni kulawola ni kushishika.
17. Mumu liaka kutwatambile kulipikala nyi Yehova mazanga kuwayisa amwe Akwa-Kristu ha matangwa jetu?
17 Yetu tunanyingika kanawa Yehova, tunanyingika nawa ngwetu, mutapu wa kuyula chenyi wapwa wa ululi. Yetu kutushi kulipikala nyi Yehova mawayisa amwe Akwa-Kristu ashishika ha matangwa jetu. c Twakwiuluka chishima chikwo chize Yesu atele, cha malunga waze akalakalile mu munda wa vinyu ha ola 11. (Mateu 20:1-16) Waze asanyikine hanga akalakale mu munda wacho ha kuhwa cha tangwa, yatambula fweto limuwika ni waze aputukile kukalakala chimene. Chizechene nawa, chipwe ngwe Akwa-Kristu akuwayisa maasakula ha mashimbu alisa, nyi manunga ni kushishika ayo eswe makatambula fweto ya mwono mu malilu.
PANJIKA UTOWEZO
18-19. Malongeso ni utowezo uka twamona ha mutwe uno?
18 Yika twalilongesa ndo hano? Twalilongesa ngwetu, kuli waze ali ni kutalatala cha kutwama hano hashi, chishima cha mapanga ni pembe chinasolola ulemu wa kununga ni kushishika kuli Yehova haliapwila ni ha mashimbu a luyinda munene yoze kwasala hakehe hanga aputuke. Kulutwe, Yesu makapatwila eswe manunga ni kushishika ngwe waze atela “mwono wa mutolo.”—Mateu 25:46.
19 Twalilongesa nawa yishima yaali yize yatoweza Akwa-Kristu akuwayisa. Ha chishima cha ana-mapwo yikanyame ni yihepuke, atano kasolwele mana. Ayo kapwile akulilulieka ni kulawola, ni kushimbwila sandungi ha shimbu lieswalio te maheta. Alioze ana-mapwo yihepuke kakapwile akulilulieka. Hachino, sandungi katayijile hanga anjile ha chiwanyino cha umbachiso. Ni yetu twambata kulilulieka ni kutwaminyina shimbu lize Yesu makaneha songo lia chifuchi chino chipi. Kuchizako yino, ha chishima cha talentu, twamona ndungo aali ashishika waze apwile yikilikita ni kulinga kanawa mulimo wo. Ayo kakalakalile chinji hanga akwase mwata wo, hachino iye yaatayiza. Alioze ndungo chileya yamuhuma. Longeso lika twawana hano? Longeso lili ngwo, twatamba kulihana chinji mu mulimo wa Yehova ndo ku songo. Kusulaho, twamona ngwetu Akwa-Kristu akuwayisa, katamba kununga ni kulawola mba ‘akaye’ mu malilu ni Yesu hanga akatambule chiwape cho. Ayo kanashimbwila ni uwahililo weswe hanga ‘akapwe hamwe’ ni Yesu mu malilu. Hanyima lia jita ya Armagedone, makapwa ndungi ya Yesu mu umbachiso wa Mwana-panga.—2 Tesa. 2:1; Uso. 19:9.
20. Yika Yehova makalinga hali waze akupanjika utowezo wenyi?
20 Kwasala hakehe Yesu mapatwila atu, alioze yetu kutwatambile kwivwa woma. Nyi twanunga ni kushishika, Tata yetu wa zango makatwaha “ndundo jahiana” hanga tuhase “kumana kwe kumeso ja Mwana-mutu.” (2 Kori. 4:7; Luka 21:36) Chipwe ngwe tuli ni kutalatala cha kutwama hano hashi hanji kuya mu malilu, twatamba kusa tachi hanga tuvwise Yehova kuwaha ha kukaula utowezo uze twawana ha yishima ya Yesu. Mumu lia chawana cha keke cha Yehova, majina jetu makapwa “a kusoneka mu mukanda” wa mwono.—Danie. 12:1; Uso. 3:5.
MWASO 26 Yami Nwakwashile
a Tala chikuma, “Yika Tunanyingika ha Chize Yehova Makapatwila Atu Kulutwe lia Matangwa?” mu Kaposhi wa Kutalila Maio, 2024.
b Nyi muzanga kunyingika sango jikwo, tala chikuma, “Shina Mununga ni Kulawola?” mu Kaposhi wa Kutalila 15 Março, 2015.
c Tala Kaposhi wa kutalila Janeiro 2020, mafwo 29-30, paragrafu 11-14.
[Maliji mushi lia lifwo]
d ULUMBUNWISO WA YIZULIE: Ndumbu wa pwo wakuwayisa kanasongwela longeso lia Mbimbiliya kuli umwe mwana-pwo.
