Muze tunalilulieka hanga tulilongese, mutuhasa kulihula ngwetu: ‘Yika ngunazange lume kulilongesa?’ Alioze, twatamba kunyingika ngwetu chipwe ngwe hitwatesa kulu yize mutulilongesa, nihindu mukuhasa kupwa yuma yikwo yize Yehova anazange hanga tunyingike. Kuchi mutuhasa kupwa ni nyonga lialita muze tunalilongesa?

Lemba ni kwita mana. Eta hanga Yehova akukwase kumona yize iye anazange hanga ulilongese ha shimbu lino. (Tia. 1:5) Kanda usulila wika ha yize unanyingika.— Yishi. 3:5, 6.

Kanda ulelesa ndundo ja Liji lia Zambi ku mwono we. “Liji lia Zambi likwete mwono.” (Hepre. 4:12.) Kashika, ha mashimbu eswawo mutanga Mbimbiliya, mulilongesamo chimwe chuma chaha nawa muyikukwasa mu majila alisa ku mwono we. Alioze chino muchilingiwa wika nyi muopwa ni nyonga lialita ni kufupa kunyingika yize Yehova anakulongesa.

Lemesa yuma yeswe yize Yehova akukulongesa. Kulia cha ku spiritu chize Yehova akutwaha chapwa ngwe “chiwanyino cha yuma ya maji.” (Iza. 25:6) Kashika, kanda uhichika kulia chize unamono ngwe kuuchi kuchizanga. Echa hanga Yehova akukwase kupwa mutu mupema. Nyi wachilinga, muzanga kulilongesa yize Yehova anazange!