Kwamba umwenemwene, muze Yesu alingile Chiwanyino cha Mwene cha Ufuku, tumbaji 70 kakapwileho. Alioze chino kuchalumbunukine ngwo, ayo te hanahichika Yesu hanji ngwo, kakapwile nawa ni utayizo wenyi. Iye kazangile wika kupwa ni apostolo jenyi ha chiwanyino chacho.

Apostolo 12 ni tumbaji 70, eswe kapwile ni utayizo wa Yesu. Chitangu, Yesu kasakwile malunga 12 hakachi ka tumbaji twenyi eswe ni kwavuluka ngwo apostolo. (Luka 6:12-16) Muze Yesu apwile mu Ngalileya, “yakungulula tumbaji Kumi ni Aali,” ni kwatuma “kwambujola sango jipema ni kuuka mieji.” (Luka 9:1-6) Kusulaho, mu Yundeya, Yesu “yatongola tumbaji akwo 70 yaatuma aali aali.” (Luka 9:51; 10:1) Chekwamba, Yesu kapwile ni tumbaji ku yihela yalisa kuze apwile ni kwambujola sango jenyi.

A-Yunda waze apwile tumbaji twa Yesu, nihindu te mahasa kulinga Chiwanyino cha Chizomboka ha hita mwaka. Ayo kota te kakuchilinga hamwe ni asoko jo. (Kutuhu. 12:6-11, 17-20) Muze kwasalile hakehe hanga Yesu afwe, iye yaya hamwe ni apostolo jenyi mu Yerusaleme. Alioze Yesu kakasanyikine tumbaji twenyi eswe a mu Yundeya, Ngalileya ni a mu Pereya hanga alinge no chiwanyino chinene cha Chizomboka. Chinasoloka pundu ngwo, ha chiwanyino chacho, Yesu kazangile wika kupwa ni apostolo jenyi. Iye yaalweza ngwenyi: “Nazangile kulu kulia Chizomboka chino hamwe ni yenu, shimbu kanda nguchimona lamba.”—Luka 22:15.

Yesu kapwile ni yikuma yinji yilemu yize yamutwalile kulinga chino. Kwasalile hakehe hanga afwe ngwe “Mwana-panga wa Zambi, yoze wakuchiza shili ya akwa-hashi.” (Yoa. 1:29) Iye te mafwila mu Yerusaleme, chihela chize ha miaka yinji apwile ni kuhanyina yitapo kuli Zambi. Chizomboka te chakwiulula A-Izalele hakutwala ku yize Yehova alingile hanga aatusule mu undungo ku Engitu. Alioze chitapo cha Yesu te muchipwa chilemu chinji, mumu te muchitusula atu eswe ku shili ni kufwa. (1 Kori. 5:7, 8) Kufwa cha Yesu chapwishile chashi hanga “apostolo kumi ni aali apwe fundamentu ya chikungulwila cha Akwa-Kristu.” (Efwe. 2:20-22) Chili kukomoka kunyingika ngwo, mbonge yisandu ya Yerusaleme yili ni “mawe 12 a fundamentu,” haze asonekene “majina ja apostolo 12 a Mwana-panga.” (Uso. 21:10-14.) Ewa, apostolo ashishika kapwile ni mulimo ulemu chinji mu kumanunuka cha upale wa Zambi. Kashika chalitele Yesu kupwa no ha Chizomboka chakasula, haze iye aputukile Chiwanyino cha Mwene cha Ufuku.

Tumbaji 70 ni tumbaji akwo a Yesu kakapwile ha chiwanyino cha mwene. Chipwe chocho, tumbaji eswe ashishika te mayuka ha Chiwanyino cha Mwene cha Ufuku. Hachino, tumbaji eswe waze kulutwe te mapwa Akwa-Kristu akuwayisa te manjila mu usendo wa wanangana uze Yesu alwezele apostolo jenyi ha ufuku wenyi wa kasula.—Luka 22:29, 30.