1. Chipwe ngwe Yehova kali Mukwa-Ndundo-Jeswe, yika akusanyikina akwo hanga alinge?

YEHOVA kali Mukwa-Ndundo-Jeswe. Iye mwe watangile yuma yeswe, nawa iye kali ni mana ni ndundo jahiana. Muze akwashile Yombi kuchinyingika, Yombi yamba ngwenyi: “Ngunanyingika nunahase kulinga yuma yeswe, nichimwe chuma muchifuwa chize munupala kulinga” chakuhi. (Yombi 42:2) Yehova mahasa kulinga yuma yeswayo yize iye mazanga kulinga chakuhona ukwaso wa mutu niumwe. Alioze aye kakusolola zango ha kusanyika akwo hanga akalakale nenyi hamuwika ni kumanununa upale wenyi.

2. Mulimo uka ulemu uze Yehova ahanyine kuli Yesu hanga alinge?

² Zambi chitangu katangile Mwanenyi Yesu, muze te kanda achitanga mutu hanji chuma nyichimwe. Ha chino, Yehova yazanga hanga Mwanenyi amukwase kutanga yuma yikwo yeswe. (Yoano 1:1-3, 18) Postolo Paulu yasoneka hakutwala kuli Yesu ngwenyi: “Mumu muli iye yuma yeswe yatangiwile, mu malilu ni hano hashi, yuma yize yakumoneka, ni yize kuyishi kumoneka, chipwe ngunja ja wanangana, hanji  wene, hanji mawanangana, hanji yiyulo; yuma yeswe iye wayitangile, mba hali iye ayitangile.” (A-Kolosu 1:15-17) Ha chino, Yehova kakahanyine wika mulimo ulemu kuli Mwanenyi, alioze yalweza akwo hakutwala ku mulimo wacho. Uno uli uhenya unene!

3. Yika Yehova ahanyine Alama kulinga, nawa mumu liaka?

³ Yehova nawa kakusanyika atu hanga akalakale nenyi hamuwika. Chakutalilaho, iye kahanyine Alama chiteli cha kuluka majina kuli tushitu eswe. (Uputukilo 2:19, 20) Achinyonga chiseke chize Alama evwile! Ni uhomboloji weswe Alama yamona chize kashitu ni kashitu apwa ni yize akulinga, mba yaaluka majina. Yehova mwe watangile tushitu eswe, kachi mwene mwe waalukile majina. Alioze aye yasolola zango lize te akwete hali Alama ha kumwaha chiteli cha kuluka tushitu majina. Zambi nawa yahana Alama mulimo wa kululieka hashi heswe hanga hapwe paraisu. (Uputukilo 1:27, 28) Alioze Alama chakuhona mana yakwata chiyulo chakwecha kukalakala ni Zambi, nawa chino yichineha lamba linji hali iye, ni hali ana jenyi eswe.—Uputukilo 3:17-19, 23.

4. Kuchi atu akwo akalakalile ni Zambi hanga amanunune upale wenyi?

⁴ Ha kupalika cha mashimbu, Zambi yasanyika atu akwo hanga akalakale nenyi hamuwika. Noa yatunga ulungu hanga alamwine mwono wenyi ni wa asoko jenyi ku Sanga Linene lia Meya. Mose yatusula vungu lia Izalele mu undungo ku Engitu. Yoshua yasongwela A-Izalele ndo mu Chifuchi cha Chilakenyo. Solomone yatunga tembele mu Yerusaleme. Maria yapwa naye ya Yesu. Tuvumbi wano ashishika ni akwo nawa anji kakalakalile hamwe ni Yehova hanga amanunune upale wenyi.

5. Mulimo uka mutuhasa kulinga, nawa mumu liaka Yehova anazange hanga tulinge mulimo wacho? (Tala chizulie chili hauputukilo.)

⁵ Musono, Yehova kanatusanyika hanga tulinge yeswe yize mutuhasa hanga tukwase Wanangana wenyi. Kuli majila anji waze mutuhasa kulingilamo Zambi. Chipwe ngwe etu eswe kutushi ni uhashi wa kumulingila mu jila yoyene, alioze etu eswe mutuhasa kwambujola sango lipema lia Wanangana. Yehova mwene kachi te mahasa kulinga mulimo uno. Aye te mahasa kuhanjika ni atu kukatuka mu mulilu. Yesu kambile ngwo, Yehova te mahasa kuzachisa mawe hanga alweze atu hakutwala ku Wanangana Wenyi. (Luka 19:37-40) Chipwe chocho, nihindu Yehova kakutupwisa “akwa milimo-ni akwo.” (1 A-Korindu 3:9) Postolo Paulu yasoneka ngwenyi: ‘Yetu waze twakukalakala hamwe ni Zambi, tunaliumbu kuli yenu ngwetu, Kanda nulelesa vumbi lize Zambi hananulweze.’ (2 A-Korindu 6:1) Chili uhenya unene kutusanyika hanga tukalakale hamwe ni Zambi. Tutalenu yimwe yuma yize yakutunehena chiseke chinji.

6. Kuchi Mwana mutangu wa Zambi anasolola chize iye evwile ha kukalakala hamuwika ni Tato?

⁶ Kukalakala hamwe ni Yehova chakuneha mashimbu eswe chiseke hali tuvumbi twenyi. Muze te  kanda achiza hano hashi, Mwana mutangu wa Zambi yamba ngwenyi: “Yehova wanguzukile kuuputukilo wa jila yenyi . . . Kweswe napwile nenyi hamuwika ngwe chilangaji. Tangwa ha tangwa napwile nguli uwahililo wenyi, ni kuwahilila kumeso jenyi matangwa eswe.” (Yishima 8:22, 30) Muze Yesu te akukalakala hamuwika ni Tato, aye te kakuwahilila mumu kalingile yuma yinji nawa te kananyingika ngwenyi, Yehova te kakumuzanga. Mba yika mutwamba hakutwala kuli yetu?

7. Mumu liaka mulimo wa kwambujola wakutunehena chiseke?

⁷ Yesu kambile ngwenyi kuhana ni kutambula chakutunehena chiseke chinji. (Yilinga 20:35) Chino chatwehele chiseke chinji muze twatambwile umwenemwene, alioze mumu liaka twakwivwa nawa chiseke chinji muze twakwambujola kuli akwetu? Mumu twakwaamona chize akupwa ni chiseke chamwenemwene muze o akunyingika yize Mbimbiliya yakulongesa ni kuputuka usepa wo ni Zambi. Twakuwahilila chinji hakwaamona chize akwalumuna manyonga jo ni mwono wo. Mulimo wa kwambujola uli ulemu chinji nawa uli mulimo uze wakuneha chiseke chinji, uze mutuhasa kulinga. Wakupwisa chashi hanga atu apwe masepa ja Zambi ni kupwa ni mwono wa mutolo.—2 A-Korindu 5:20.

8. Yika amwe ambile hakutwala ku chiseke chize akwivwa ha kukalakala hamwe ni Yehova?

⁸ Muze twakukwasa atu hanga anyingike Zambi, tunanyingika ngwetu twakuvwisa Yehova kuwaha, nawa iye kakulemesa tachi jize twakusa hanga tumuwayile. Chino nawa chakutwaha chiseke. (Tanga 1 A-Korindu 15:58.) Marco yoze watwama mu Italia yamba ngwenyi: “Ami nakuwahilila chinji ha kunyingika ngwami, ngunakalakalila Yehova ni mbunge yeswe hi mutu ko yoze mahasa kuvulama ha shimbu likehe mulimo uze namulingila.” Chizechene nawa Franco, yoze watwama mu Italia, yamba ngwenyi: “Ni uhashi wa Liji lienyi ni ukwaso wa yuma ya spiritu, Yehova kakutwiwulula matangwa eswe ngwenyi kakutuzanga nawa ngwo chuma cheswe chize mutulinga kuchili ni ulemu, chipwe ngwe tachi jetu mujisoloka kuli akwetu ngwe jangwaza. Kashika kukalakala hamwe ni Zambi chakungunehena uwahililo unji ku mwono.”

9. Usepa uka wapwile hakachi ka Yehova ni Yesu, nawa mumu liaka?

⁹ Muze twakukalakala hamuwika ni atu waze twakuzanga, twakukundama hamwe no. Twakunyingika kanawa utu ni yitanga yo. Nawa twakunyingika yuma yize akuzanga kulinga ni chize akusa tachi hanga ayilinge. Kota Yesu kakalakalile hamuwika ni Yehova ha tununu anji amiaka. Zango kuli umwe ni mukwo liakolele chinji, kashika te kukushi chuma nyichimwe chize te muchipihisa usepa wo. Yesu yalumbununa chize usepa wo wapwile, ha kwamba ngwenyi. “Yami ni Tata tuli umuwika.” (Yoano 10:30) Chochene, o kapwile ni usepa ungunu, nawa kapwile ni kulivwashana muze apwile ni kukalakala hamuwika.

10. Mumu liaka kwambujola chakutukundamisa kuli Yehova ni kuli akwetu?

¹⁰ Yesu ketele kuli Yehova hanga afunge tumbaji twenyi. Mumu liaka? Aye yalemba ngwenyi: “Hanga akapwe umuwika, chizechene ngwe yetu.” (Yoano 17:11) Nyi mututwama nikulita ni shimbi ja Zambi ni kwambujola sango lipema, mutunyingika kanawa yitanga yenyi yipema. Twakunyingika mumu liaka chili chipema kujikijila muli iye ni kukaula usongwelo wenyi. Nawa muze mutukundama kuli Zambi, aye makundama kuli yetu. (Tanga Tiangu 4:8.) Yetu nawa twakukundama kuli mandumbu ni mapangi jetu mumu twakumona no lamba ni chiseke hamuwika nawa tuli ni nyonga limuwika. Twakukalakala, kuwahilila, ni kunyongonona hamuwika. Octavia, yoze watwama mu Grã-Bretânia, yamba ngwenyi: “Kukalakala ni Yehova chakungukundamisa kuli mandumbu jami.” Aye yalumbununa ngwenyi, chino chakulingiwa mumu usepa wami ni mandumbu haliapwila, wakukatuka “ha nyonga ni usongwelo umuwika.” Chochene, ni etu che twakwivwa. Muze twakumona tachi jize mandumbu jetu akusa hanga evwise Yehova kuwaha, chino chakutukundamisa kuli ayo.

11. Mumu liaka hashi haha mutukakundama kuli Yehova ni kuli mandumbu jetu?

¹¹ Zango lietu kuli Zambi ni kuli mandumbu jetu haliapwila linakolo, alioze mulikakola chinji hashi haha. Achinyonga mulimo upema uze mutukalinga kulutwe lia matangwa! Mutukatambwisa atu waze makahindwisa ni kwaalongesa shimbi ja Yehova. Mutukakalakala ni kululieka hashi hanga hapwe paraisu. Chino muchikaneha chiseke chinji ha kukalakala hamuwika, nawa hakehe-hakehe mutupwa atu angunu mushi lia chiyulo cha Kristu. Atu eswe kumakapwa ni usepa upema kuli umwe ni mukwo ni kuli Yehova, yoze ni umwenemwene weswe ‘makayukisa usona wa waze eswe atwama ni mwono.’—Samu 145:16.

12. Kuchi mulimo wa kwambujola wa kutufunga?

¹² Twakuzanga kufunga usepa wetu ni Yehova. Amu tuli hashi ha Satana ni uhenge  wetu, muchihasa kupwa chashi kunyonga ni kulinga yuma ya hano hashi. Chino chili ngwe kusana mu lwiji yoze uli ni miavu yinji yize muyitutwala sali lize kutwazangile kuya. Ha chino, twatamba kuzachisa tachi jetu jeswe hanga tuye sali likwo. Chizechene nawa, twatamba kuhondangana hanga twehuke yitanga yipi ya hano hashi ha Satana. Alioze, kuchi kwambujola muchihasa kutukawasa? Muze mutuhanjika ni Yehova ha kuzachisa Mbimbiliya, chocho mutulihulikila ha yuma yilemu nawa yipema, hi ha yuma yize muyipihisa ufulielo wetu ko. Kwambujola chakukolesa ufulielo wetu mumu chakutwiwulula yilakenyo ni shimbi ja zango ja Zambi. Chakutukwasa nawa hanga tupwe ni yitanga yize muyitufunga ku yitanga yipi ya Satana ni hashi henyi.—Tanga A-Efwesu 6:14-17.

13. Kuchi umwe Chela cha Yehova mu Australia akumona mulimo wa kwambujola?

¹³ Muze mutulihukila chinji mu mulimo wa kwambujola, kulilongesa Mbimbiliya ni kulingila akwetu yimwe yuma mu chikungulwila, mutulifunga mumu kutuchi kupwa shimbu lia kunyonga ha yipikalo yetu. Joel yoze watwama mu Austrália, yamba ngwenyi: “Mulimo wa kwambujola wakungukwasa kuhona kuvulama yuma yize yinalingiwa hano hashi. Wakungwiwulula yipikalo yize atu anamono ni yiwape yize ami nakutambula ha kukaula shimbi ja Mbimbiliya ku mwono wami. Mulimo wakwambujola wakungukwasa nawa hanga ngupwe ni yitanga yakulikehesa; yize yakungwaha uhashi wa kujikijila muli Yehova ni muli mandumbu ni mapangi jami.”

14. Mumu liaka kunyongonona chetu mu mulimo wa kwambujola chinasolola ngwetu tuli ni ukwaso wa spiritu ya Zambi?

¹⁴ Kwambujola chakutwaha nawa ushindakenyo unji ngwetu, spiritu ya Zambi yili hali yetu. Chakutalilaho: Achinyonga ngwe mulimo we uli kutetela kulia kuli atu mu chihunda chize watwama. Keshi kukwaha fweto ha kulinga mulimo wacho, alioze yena mwene mwe wakutwihwisa mbongo ja kulanda kulia chacho ni yuma yikwo. Chikwo nawa, atu jacho keshi kuzanga kulia chize wakwaaha, kakukwivwila kole ha kwanehena kulia chacho. Mashimbu angahi yena muununga ni kulinga mulimo wacho? Kwamba pundu, yena kota kuuchi kushimbwila chinji hanga ulitwamine kuhana kulia chacho. Chochene, chipwe ngwe twakupalikisa mashimbu anji nawa twakuzachisa mbongo jetu, nawa chipwe ngwe atu kakutuseha hanji kutuvwila uli, nihindu, anji akuli yetu mutuchinunga ni kwambujola sango lipema ha mwaka ni mwaka. Chino chinasolola ngwetu tuli ni ukwaso wa spiritu ya Zambi.

15. Kuchi mulimo wa kwambujola sango lipema unalite ni upale wa Zambi hali atu?

¹⁵ Kuchi mulimo wa kwambujola unalite ni  upale wa Yehova hali atu? Upale wa Zambi hali atu wapwile ngwo atwame ni mwono wa mutolo, nawa upale wenyi wakalumukine muze Alama alingile shili. (Izaia 55:11) Zambi hanatulingila umwe ululikiso hanga atuchize ku shili ni kufwa. Kuchi muchihasa kulingiwa? Yesu kejile hano hashi ni kuhana mwono wenyi ngwe chitapo. Alioze, mba tuyuke ku chitapo chenyi, atu katamba kwononokena Zambi. Kashika Yesu alongesele atu yize Zambi afupa hali ayo, ni kutoweza tumbaji twenyi hanga alinge chochene. Muze mutwambujola ni kukwasa akwetu hanga apwe masepa ja Zambi, tunakalakala hamuwika mu ululikiso wenyi wa zango wa kulamwina atu ku shili ni kufwa.

16. Kuchi kwambujola sango lipema chinasolola ngwetu tunakaula shimbi jinene ja Zambi?

¹⁶ Nyi mutukwasa akwetu hanga awane jila ya mwono wa mutolo, mutusolola ngwetu twakwaazanga nawa ngwo twakuzanga Yehova. Mumu ‘iye kanazange hanga atu eswe alilamwine, ni kuheta ku chinyingi chamwenemwene.’ (1 Timoteu 2:4) Muze umwe Ka-Fariseu ahulile Yesu shimbi yinene ya Zambi, Yesu yamukumbulula ngwenyi: “Ukazange Mwene Zambi ye ni mbunge ye yeswe, ni mwono we weswe, ni kunyonga che cheswe. Lino lie liji litangu kanda linene lia shimbi. Mba liamuchiali lialifwa nalio ngwo, Ukazange mwenyembo we ngwe wakulizanga yena mwene.” (Mateu 22:37-39) Kashika, muze mutwambujola sango lipema, yetu tunakaula shimbi jino.—Tanga Yilinga 10:42.

17. Kuchi wakwivwa hakutwala ku ulemu wa kwambujola sango lipema?

¹⁷ Cho kuwaha ku mwono wetu! Yehova hanatwehe umwe mulimo uze wakutunehena chiseke, mulimo wacho wakutukundamisa kuli iye ni kuli mandumbu jetu, nawa wakutukwasa kufunga usepa wetu ni iye. Wakutwaha nawa uhashi wa kusolola zango lietu kuli Yehova ni kuli akwetu. Yehova kali ni tununu a tununu a tuvumbi hashi eswe, nawa ayo eswe kali ni mwono walisa. Chipwe ngwe, amwe twanuke hanji makulwana, pichi hanji yiswale, amwe ni tachi jinji hanji ka, eswe mutuhasa kwambujola ufulielo wetu kuli akwetu. Twakwivwa ngwe Chantel wa mu França, yoze wambile ngwenyi: “Mukwa-ndundo-jeswe wa hashi eswe, Sakatanga wa yuma yeswe, Zambi wa sambukila, kanambe kuli yami ngwenyi: ‘Yako! Hanjika! Hanjika mu jina liami, hanjika ni mbunge yeswe. Mungukwaha tachi jami, Liji liami Mbimbiliya, ukwaso wa angelo, ni ukwaso wa mandumbu je, fumbo liami, ni malongeso waze akwiza ha shimbu lialita.’ Chili chiwape chinene kulinga yuma yize Yehova akutwita ni kukalakala hamuwika ni Zambi yetu!”