1-3. Yuma yika yize yalingiwile ha tangwa lia Pentekoste, nawa kuchi yuma yacho yamanunwine yize Yisoneko yambile? (Tala chizulie chili hauputukilo.)

TE LIAYENGA chimene mu Yerusaleme. Tangwa liacho, liapwile tangwa lia chiseke ni uwahililo. Atu te kanalinga chiwanyino cha Pentekoste, chino chapwile chiwanyino chisandu cha kuputuka kucha cha tiliku. Ha chimene chacho, mu tembele sasendote wa lutwe te kanahana yitapo. Mba hi ha ola livwa, iye yahana mbolo jaali jize jili ni ufutunwiso jakulinga ni tiliku yitangu hanji mbuto yitangu. Sasendote wa lutwe yahungisa mbolo sali ni sali hanga ajisolole kuli Yehova. Yuma yino yalingiwile ha Pentekoste ya mwaka 33.—Ulevi 23:15-20.

² Ha miaka yeswe, sasendote wa lutwe te kakuhana chawana chino chakuhunga. Kuhana chacho te chalita chinji ni chuma chize chalingiwile ha Pentekoste ya mwaka 33. Chino chalingiwile kuli tumbaji twa Yesu 120 waze apwile ni kulemba hamuwika mu chipatulo cha kwilu ku Yerusaleme. (Yilinga 1:13-15) Ha miaka  tununu nake kunyima, profeta Joele kasonekene hakutwala ku chuma chize chalingiwile kuli tumbaji twa Yesu ha mwaka wacho. (Joele 2:28-32; Yilinga 2:16-21) Chuma chika chilemu chalingiwileko?

³ Tanga Yilinga 2:2-4. Ha Pentekoste ya mwaka 33, Zambi yahana spiritu yisandu kuli akwa-Kristu, chocho o yapwa kuwayisa. (Yilinga 1:8) Mba hi mbunga yilikunga kuze ayo te ali, hoho tumbaji yaputuka kwambujola hakutwala ku yuma ya ukomokeso yize ayo amwene ni kwivwa. Postolo Petulu yalumbununa yize yalingiwile nawa ni mumu liaka yuma yacho te yili ni ulemu. Aye yamba kuli mbunga ngwenyi: ‘Likonyekenu, anupapachise mutu ni mutu mu jina lia Yesu Kristu, ha ukonekeno wa milonga; mba kumunukatambula spiritu yisandu yawana.’ Ha tangwa liacho, amwe atu 3,000 yaapapachisa, nawa yatambula spiritu yisandu.—Yilinga 2:37, 38, 41.

4. (a) Mumu liaka twatamba kunyingika yize yalingiwile ha Pentekoste? (b) Chuma chika chilemu chize chalingiwile ku mashimbu anji akunyima ha tangwa ni mwaka wowene? (Tala maliji ali mushi.)

⁴ Yika sasendote wa lutwe ni chitapo chize te akuhana ha Pentekoste yinalumbunuka? Sasendote wa lutwe kanalumbunuka Yesu. Mbolo jinalumbunuka tumbaji akuwayisa a Yesu. Tumbaji wano kakwaasakula mukachi ka atu akwa-shili nawa kakwaavuluka ngwo “mihuko yitangu.” (Tiangu 1:18) Zambi kakwaatayiza ngwe ana jenyi ni kwaasakula hanga akayule ni Yesu ngwe mianangana mu malilu, ni kulinga chihanda ku Wanangana wa Zambi. (1 Petulu 2:9) Yehova makazachisa Wanangana wenyi hanga akawahise atu eswe waze akumwononokena. Pentekoste ya mwaka 33 yili ni ulemu unji kuli yetu, chipwe ngwe mutukapwa mu malilu hamwe ni Yesu hanji mu paraisu hano hashi. ^[1]—Tala maliji ali mushi.

5. Kuchi tunanyingika ngwetu eswe waze akuwayisa keshi kutambula uwayiso wo mutapu umuwika?

⁵ Tumbaji waze apwile mu chipatulo cha kwilu, te kechi keza kavulama tangwa liacho. Mutu ni mutu te kapwile nichimwe chuma ngwe mulengi wa kahia ha mutwe wenyi. Yehova kahele uhashi wa kuhanjika malimi a yilambala. Ayo kakayambashanyine ngwo kaawayisa ni spiritu yisandu. (Yilinga 2:6-12) Alioze yuma yino kuyishi kulingiwa kuli akwa-Kristu eswe muze akwaawayisa. Chakutalilaho, Mbimbiliya kuyishi kwamba ngwo, umwe mulengi wa kahia wasolokele ha mitwe ya tununu twa atu waze awayishile mu Yerusaleme hakupalika cha tangwa liacho. Ayo kaawayishile muze aapapachishile. (Yilinga 2:38) Nawa, chino kuchishi kulumbunuka ngwo akwa-Kristu eswe kakwaawayisa muze akwaapapachisa. Akwa-Samaria kawayishile muze te hikwapalika mashimbu aupapachiso wo. (Yilinga 8:14-17) Nawa ha limwe shimbu, Koneliu hamwe ni waze apwile ku zuwo lienyi kawashile muze o te kanda achaapapachisa.—Yilinga 10:44-48.

6. Yika akwa-kuwayisa eswe akutambula, nawa kuchi chino cha kwaatwa?

⁶ Chochene, akwa-Kristu kakunyingika majila eka ni eka waze akwaawayishilamo. Amwe mahasa kunyingika ngwo Yehova hawayisa. Akwo kakuchinyingika hakupalika cha mashimbu. Alioze postolo Paulu kalumbunwine yize  yakulingiwa kuli umwe ni umwe wa kuli ayo. Hakwamba ngwenyi: ‘Se nwafulielele, anujikile ni chijikilo cha spiritu yisandu ya chilakenyo. Yize ye chifungo cha chihinga chetu.’ (A-Efwesu 1:13, 14) Kashika, Yehova kakuzachisa spiritu yenyi yisandu hanga asolole pundu kuli akwa-Kristu wano ngwo iye hanaasakula hanga akapwe mu malilu. Ha chino, spiritu yisandu yili “chifungo,” hanji ushindakenyo kuli ayo ngwo kulutwe lia matangwa o makatwama mu malilu ku miaka ya mutolo, hi hano hashi ko.—Tanga 2 A-Korindu 1:21, 22; 5:5.

7. Yika mukwa-Kristu mweswe wa kuwayisa atamba kulinga mba akatambule chiwape chenyi cha mu malilu?

⁷ Shina mukwa-Kristu nyi hamuwayisa, chino chinalumbunuka ngwo kwahwa lume aye makatambulula chiwape chenyi nyi? Hi chochoko. Iye kali wika ni ushindakenyo ngwo kamusanyika hanga aye mu malilu. Alioze iye makatambula chiwape chenyi nyi manunga ni kuwayila Yehova ni ushishiko weswe. Petulu kalumbunwine ngwenyi: “Kashika, mandumbu, lipupwisenu kukolesa chinyingi cha kwamba ngwenu, Hanatutambika,hanatutongola; mumu nyi kachi munulinga yino yuma kachi kunuchi kalimbuka nilimwe tangwa. Mumu chocho, kumakanwaha unjililo wahiana mu Wanangana wa mutolo wa Mwene wetu kanda chilamwina Yesu Kristu.” (2 Petulu 1:10, 11) Kashika mukwa-Kristu mweswe wakuwayisa katambile kwecha chuma nyichimwe hanga chimukwike kuwayila Yehova. Chipwe ngwe, hanamusakula hanga aye mu malilu. Nihindu nyi iye kanungine ni kushishika, aye kechi katambula chiwape chenyi.—A-Hepreu 3:1; Usolwelo 2:10.

8, 9. (a) Mumu liaka chili chikalu kuli atu anji kunyingika yize yakulingiwa muze umwe mutu mapwa kuwayisa? (b) Kuchi mutu akunyingika ngwenyi hamusakula hanga aye mu malilu?

⁸ Tuvumbi twa Yehova anji musono muchihasa kupwa chikalu kunyingika yize yakulingiwa kuli mutu muze mamuwayisa kuli Zambi. Nyonga lino hi lipi ko mumu o hi akuwayisa ko. Zambi katangile atu hanga atwame hano hashi ku miaka ya mutolo, hi mu malilu ko. (Uputukilo 1:28; Masamu 37:29) Alioze Yehova kakusakula amwe hanga akapwe mianangana ni asasendote mu malilu. Kashika, muze mandumbu jacho akwawayisa kutalatala cho ni manyonga jo kakwalumuka, ni kupwa ni nyonga lia kutwama mu malilu.—Tanga A-Efwesu 1:18.

⁹ Mba kuchi mutuhasa kunyingika ngwo ndumbu umwe kamusakula hanga aye mu malilu? Tala yize Paulu ambile kuli mandumbu akuwayisa mu Roma waze avulukile ngwo ‘asandu.’ Iye yaamba ngwenyi: ‘Spiritu nwatambwile, hi yize yakunupwisa ndungo ni kunwivwisa woma ko. Alioze spiritu yize yakunupwisa ana ja Zambi. Ku tachi jenyi twakutambika Zambi ngwetu: Tata! Tata yetu! Spiritu ya Zambi yakushindakenya hamwe ni spiritu yetu ngwo, tuli ana já Zambi.’ (A-Roma 1:7; 8:15, 16) Zambi kakuzachisa spiritu yenyi yisandu hanga asolole ngwenyi, mutu umwe kapwa kusakula hanga akayule hamwe ni Yesu mu malilu ngwe mwanangana.—1 A-Tesalonika 2:12.

10. Yika mukanda 1 Yoano 2:27 unalumbunuka ha kwamba ngwo mukwa-Kristu wakuwayisa kafupile mutu niumwe hanga amulongese?

 ¹⁰ Waze eswe akusakula kuli Zambi hanga aye mu malilu kafupile mutu niumwe hanga alweze ngwo o kapwa kuwayisa. Alioze Yehova mwene mwe akwaakwasa kupwa ni ushindakenyo wacho. Postolo Yoano yalweza akwa-Kristu akuwayisa ngwenyi: “Yenu kanuwayisa kuli mwe Musandu, nunanyingika yuma yeswe.” Aye yamba nawa ngwenyi: “Ha kutwala kuli yenu, kuwayisa chize hinunatambula kuli iye kuchatwama muli yenu, mba kunushi kufupa umwe anulongese. Alioze ngwe kuwayisa chenyi chakunulongesa hakutwala ku yuma yeswe, chinapu chamwenemwene, hi mahuza ko, chizechene ngwe hichinanulongesa, nwatwama muli iye.” (1 Yoano 2:20, 27) Akwa-Kristu akuwayisa kafupiwa kwaalongesa kuli Yehova ngwe chize chapwa kuli mutu mweswawo. Alioze o kafupile mutu niumwe hanga alweze ngwo kapwa kuwayisa. Yehova kakuzachisa tachi jenyi jahiana, spiritu yisandu, hanga asolole zwalala kuli ayo ngwo kali akuwayisa!

11, 12. Yika umwe mukwa-Kristu wakuwayisa mahasa kulihula, alioze ha yika aye katambile kukakajana?

¹¹ Muze akwa-Kristu akwawayisa ni spiritu yisandu, ayo kakwalumuna chinji. Kashika Yesu ambile ngwenyi: O “kakusemuka cheka” hanji “kusemuka kwilu.” (Yoano 3:3, 5) Iye yalumbununa ngwenyi: “Kanda ukomoka ngwe hinamba kuli yena ngwami, Chanutamba kusemuka cheka. Fuji muyipalika kweswako muyipalika. Muwivwa liji liayo, alioze kushi kunyingika kuze muyikatuka hanji kuze muyiya. Chocho mapwa eswe waze asemuka ku spiritu.” (Yoano 3:7, 8) Kwamba umwenemwene, chili chikalu kulumbununa kanawa chize mutu wakuwayisa akwivwa kuli  mutu yoze kanda achimuwayisa kama. ^[2]—Tala maliji ali mushi.

¹² Ndumbu yoze awayisa mahasa kulihula ngwenyi: ‘Mumu liaka Yehova angusakula chakuhona kusakula ndumbu mweka?’ Nawa aye mahasa kulihula nyi kali ni uhashi wa kupwa ni chiteli chacho. Alioze iye kechi kukakajana ngwenyi, Yehova kamusakula. Ha chino, aye mevwa chiseke chinji nawa mawahilila ha chawana chacho. Mandumbu akuwayisa kakwivwa ngwe chize evwile Petulu hakwamba ngwenyi: “Zambi kanda Tato ya Mwene wetu Yesu Kristu afumane, yoze hanatuseme chaha nikulita ni keke yenyi yinji, tukapwe ni kutalatala cha mwono mumu ha uhindukilo wa Yesu Kristu hakachi ka afu, tukapwe ni chihinga chingunu, kananufungilacho mu malilu.” (1 Petulu 1:3, 4) Muze mandumbu akuwayisa akutanga maliji wano, ayo kakunyingika pundu ngwo Tato kanahanjika ni ayo.

13. Kuchi umwe mutu akwalumuna kunyonga chenyi muze akumusakula kupalikila mu spiritu yisandu, nawa yika yakwalumuna manyonga jenyi?

¹³ Muze Yehova kanda achisakula  akwa-Kristu wano hanga aye mu malilu, ayo te kakwete kutalatala cha kutwama ni mwono wa mutolo hano hashi. O te kakushimbwila shimbu lize Yehova makapwisa hashi paraisu ni kuchizaho upi weswe. Ayo te kakunyonga kutambula asoko ni masepa jo waze hanafu. Nawa ayo te kakushimbwila kutunga mazuwo ni kutwamamo hanji kutumba minda ni kulia mihuko yawo. (Izaia 65:21-23) Mba mumu liaka ayo akuputuka kunyonga cheka? Shina o kalumwine manyonga jo mumu lia lamba lize akumona nyi? Kutala o kakukwata chiyulu chacho susumuku mumu ngwo kutwama ni mwono wa mutolo hano hashi muchikaakenya nawa kechi kapwa ni chiseke? Nyi o kakuzanga wika kunyingika chize mwilu mwapwa? Ka. Zambi mwene mwe wakukwata chiyulo ha chikuma chino. Muze akwaasakula, iye kakuzachisa spiritu yenyi yisandu hanga alumune manyonga jo ni yiwape yize o anashimbwila.

14. Kuchi mandumbu akuwayisa akwivwa hakutwala ku mwono wo hano hashi?

¹⁴ Shina chino chinalumbunuka ngwo mandumbu akuwayisa kakuzanga kufwa nyi? Paulu kalumbunwine chize mandumbu akuwayisa akwivwa. Aye yatesa mujimba wo wa utu ngwe “mbalaka” ha kwamba ngwenyi: “Chamwenemwene, yetu tuli mu mbalaka yino, twakutwa mikuma, mumu tunalemewa. Kuchapwile ngwe tunazange kuzula, alioze tunazange kuzala, hanga chize cha kufwa chikajimuke mu mwono.” (2 A-Korindu 5:4) Akwa-Kristu wano keshi kuzanga kufwa. Ayo kakuwahilila ni mwono nawa kakuzanga mashimbu eswe kuwayila Yehova amwe ni asoko ni masepa jo. Chipwe ngwe malinga chuma cheswacho, nihindu o kakwiwuluka yize Zambi analakenya hali ayo kulutwe lia matangwa.—1 A-Korindu 15:53; 2 Petulu 1:4; 1 Yoano 3:2, 3; Usolwelo 20:6.

15. Yika yize kuyishi kuhana ushindakenyo ngwo mutu kamuwayisa ni spiritu yisandu?

¹⁵ Kota hiunalihula nyi Yehova hanakusakula hanga uye mu malilu. Nyi che wakwivwa, achinyonga ha yihula yino yilemu: Shina ena wakwivwa ngwe uli ni zango linji lia kwambujola sango lipema? Wakuzanga chinji kulilongesa Mbimbiliya ni kunyingika “yuma yeswe yikalu ya Zambi?” (1 A-Korindu 2:10) Shina wakumona ngwe Yehova hanakuwahisa mu mulimo wa sango lipema? Kutala unazange kulinga yize Yehova kuzanga kuhiana chuma cheswacho nyi? Yena uli ni zango linji hali akwenu ni chiteli cha kwakwasa hanga alingile Yehova? Hiunamono kama umwe ushindakenyo ngwenyi Yehova kakukukwasa ku yuma yinji ku mwono we? Nyi kutala ngwe, kumbululo lie lili ewa, ha yihula yino, shina chinalumbunuka ngwo kuma wapwa kusanyika mu malilu? Ka, hi chocho ko. Mumu liaka? Mumu tuvumbi eswe a Yehova chenacho akunyonga, chipwe kali akuwayisa hanji ka. Ni uhashi wa spiritu yisandu, Yehova mahasa kuhana ndundo jojene kuli kavumbi kenyi mweswawo, chipwe makaya mu malilu hanji ka. Kwamba pundu, nyi muchikakajana hakutwala ku chikuma chakuya mu malilu, chino chinalumbunuka ngwo, yena kanda achikusakula. Waze Yehova akusakula keshi kukakajana ha chikuma chacho! O kanachinyingika kanawa!

16. Kuchi tunanyingika ngwetu hi tuvumbi eswe ko waze akutambula spiritu ya Zambi kakwaasakula hanga aye mu malilu?

 ¹⁶ Mu Mbimbiliya, muli yilweza yinji ya tuvumbi twa Zambi waze atambwile spiritu yisandu ya Yehova alioze kakayile mu malilu. Chilweza chimwe chili cha Yoano Chipapachisa. Yesu kambile ngwenyi, kukushi mutu munene kuhiana Yoano, alioze yamba nawa ngwenyi Yoano kechi kayula ngwe mwanangana mu malilu. (Mateu 11:10, 11) Ni Ndawichi ni neye kapwile ni usongwelo wa spiritu yisandu. (1 Samuele 16:13) Spiritu yisandu yamukwashile hanga anyingike yuma yikalu hakutwala kuli Yehova nawa yinakamusongwela hanga asoneke chimwe chihanda cha Mbimbiliya. (Marku 12:36) Chikwo nawa, postolo Petulu yamba ngwenyi Ndawichi ‘kakazezukile mu malilu.’ (Yilinga 2:34) Yehova kazachishile spiritu yenyi yisandu hanga ahane tuvumbi wano ndundo ja kulinga yuma yize yahiana, alioze kakaasakwile hanga aye mu malilu. Shina chino chinalumunuka ngwo o kakapwile ni ufulielo unji hanji kakajamine hanga aye ni kuyula mu malilu? Ka. Chino chinalumbunuka ngwo Yehova makahindwisa hanga akatwame hano hashi.—Yoano 5:28, 29; Yilinga 24:15.

17, 18. (a) Chiwape chika tuvumbi twa Yehova anji anashimbwila musono? (b) Yihula yika mutushimutwina ha mutwe muusulaho?

¹⁷ Tuvumbi anji a Yehova musono, kechi kaya mu malilu. Ngwe Apalahama, Ndawichi, Yoano Chipapachisa, ni atu akwo anji malunga ni mapwo waze ali mu Mbimbiliya, kanashimbwila hanga akahindwise hano hashi muze wanangana wa Zambi muukaayula. (A-Hepreu 11:10) Mu malilu mukapwa wika atu 144,000 waze makayula ni Yesu. Alioze Mbimbiliya yinambe hakutwala ku “masalila” ja amwe akuwayisa waze achili hano hashi ha matangwa wano akusula. (Usolwelo 12:17) Kwamba pundu, anji akuli 144,000 hanayi kulu mu malilu.

¹⁸ Alioze nyi umwe mutu mamba ngwenyi kali wa kuwayisa, kuchi waze ali ni kutalatala cha kutwama hano hashi atamba kunyonga hali iye? Nyi umwe mutu mu chikungulwila che maputuka kulia mbolo ni kunwa vinyu kuchi twatamba kumunyongena? Yika mba mutwamba nyi kwalula cha atu waze akwamba ngwo kali akuwayisa chinanungu ni kwoka? Shina twatamba kulipikala ha chikuma chacho? Mutwivwa kumbululo lia yihula yino ha mutwe uze muusulaho.