IMu Mbimbiliya, liji lia mu Ngregu lize kanji-kanji liakulumbunuka “mbunge yipema” linalumbunuka chimwe “chuma chize chingunu.” Nawa mulihasa kulumbunuka chimwe chuma chipema chinji, chize mutuhasa kumona ni nyonga lipema.

Akwa-Kristu kakulemesa chinji maliji waze postolo Paulu ambile ngwenyi: “Tunazange kwenda kanawa hakutwala ku yuma yeswe.” Yika maliji wano analumbunuka?

Atu anji kakulitala ku katalilo ha chimene cheswe shimbu kanda achituhuka haze. Mumu liaka? Mumu kakuzanga kusoloka kanawa. Alioze kuli yuma yilemu chinji kuhiana kupwa ni kambu ja kuteula kanawa hanji mazalo apema. Kwamba umwenemwene, utu wetu wa mu mbunge muuhasa kululieka hanji kupihisa utu wetu wa haze.

Liji lia Zambi linambe ngwo mbunge jetu jili wika ku manyonga akulinga yuma yipi. Mukanda wa Uputukilo 8:21 unambe ngwo: ‘Kunyonga cha mbunge ya atu chapiha chize ku wanuke wo.’ Mba tupwe ni mbunge yipema, twatamba kulimika ni yitanga yetu ya shili. Postolo Paulu kalumbunwine kanawa chize alimikine ni yitanga yenyi ya shili, ha kwamba ngwenyi: “Nakuwaha ni shimbi ya Zambi ni kulita ni mutu wa muchima: alioze ngunamono shimbi yeka mu mujimba wami, yakwasa jita ni shimbi ya kunyonga chami, yakunguneha ku ufunge ku shimbi ya shili yize yili mu mujimba wami.”—A-Roma 7:22, 23.

Chakutalilaho, muze mbunge yetu muyitushinjila kulinga yuma yipi ni kwivwa usolo wa kuhona mbunge yipema, kutwatambile kupwa tupinji twa shili yetu. Nyi chino muchilingiwa, nihindu etu tuli ni ulite wa kusakula yize mutulinga. Nyi mutwehuka manyonga api, mutuhasa kupwa ni mbunge yipema chipwe ngwe tuli mukachi ka atu waze akuhanjika mahuza.

Mba tupwe akwa-mbunge yipema, twatamba kusolola yitanga yipema. Alioze atu anji kakupalikisa mashimbu anji ha kunyonga ha ‘mwono’ wo ene, cha kuhona kunyonga hakutwala ku yitanga yo yipema. Ha chino, o kakukalila yitanga ya mahuza yize muyaakwasa ha yize anafupu. Mukanda unahanjika hakutwala ku kuhona mbunge yipema unambe ngwo: “Kwamba umwenemwene, tuli ni uhashi wa kupwa ni mbunge yipema.” (The Honest) [Truth About Dishonesty] Shina kuli jimwe shimbi jize mujihasa kutukwasa hanga tukwate yiyulo yetwene cha kuhona kulinga yuma yize kuyalitele? Ewa kujili.

Tununu twa atu hano hashi hanamono ngwo, Mbimbiliya yili ni shimbi jize o akufupa. Mbimbiliya yili ni shimbi jipema chinji kuhiana jeswajo. (Samu 19:7) Mbimbiliya yakutwaha usongwelo upema hakutwala ku usoko, mulimo, ndako ni ufulielo. Mbimbiliya hiyalinga miaka yinji. Alioze shimbi jamo mahasa kujikaula kuli mavungu, minyachi, ni atu eswe. Nyi twatanga Mbimbiliya, twapukuna ha yize tunatange, ni kukaula shimbi jamo, mutuhasa kufumba mbunge yetu hanga yipwe yipema nawa ya ululi.

Nihindu, ndo tulimike ni yitanga ya mahuza hi wika ko kupwa ni chinyingi cha Mbimbiliya. Mumu twatwama hashi haze hakutushinjila kulinga yitanga ya kalimbalimba. Kashika twatamba kulemba kuli Zambi hanga atukwase nawa atufunge. (A-Fwilipu 4:6, 7, 13) Nyi mutulinga chocho, mutuhasa kupwa ni hamu hanga tulinge yuma yize yipema ni kupwa ni mbunge yipema ha yuma yeswe.

Hitoshi, yoze twavuluka ha mutwe utangu yapwa ni jina lipema ha kupwa ni yitanga ya mbunge yipema ku mulimo. Haliapwila kanakalakalila umwe mwata yoze wakuzanga yitanga yenyi ya mbunge yipema. Hitoshi yamba ngwenyi: “Ngunawahilila chinji hakuwana mulimo uze unangukwasa kupwa ni mbunge yitoma.”

Atu akwo no hanamono ngwo chino chili chamwenemwene. Tala yimwe yilweza ya atu waze hanayuku chinji hakukaula shimbi ja Mbimbiliya ha “kwenda kanawa hakutwala ku yuma yeswe.”

• Kupwa ni Mbunge Yitoma

  “Ami nechele shikola muze napwile ni miaka 13, yinguputuka kukalakala ni eji. Ha chino, 95 porcento ya yikumba yami te yakwiza ku wiji. Kulutwe lia mashimbu, yangumbata, ami ni lunga liami yituputuka kulilongesa Mbimbiliya ni Yela ja Yehova. Yitulilongesa ngwetu, Yehova * Zambi keshi kuzanga yitanga ya mahuza ni wiji, ha chino, yitwalumuna mwono wetu. Ha mwaka 1990 hituhana mwono wetu kuli Yehova ni kutupapachisa ngwe Yela ja Yehova.”—Yishima 6:16-19.

  “Ku mashimbu akunyima, mu zuwo liami te mwakuzala too ni yikumba ya wiji, alioze haliapwila kuyishimo; nawa chino chakungukwasa kupwa ni mbunge yitoma. Nyi natala kunyima ha miaka yeswe yize te nakulinga yitanga ya mahuza, nakusakwilila chinji kuli Yehova ha kusolola keke yenyi hali yami. Ha mashimbu akupomba nakwivwa chiseke chinji ha kunyingika ngwami, Yehova kanawahilila ni yami.”—Cheryl, Irlanda.

  “Muze mwata wami evwile ngwenyi kuchatayijile kalimbalimba wa mukwa-kulanda yuma, aye yamba ngwenyi: ‘Zambi ye kakupwisa mutu mupema chinji! Chili chiwape kupwa ni yena ku mulimo wetu.’ Kupwa ni mbunge yipema ku yuma yeswe chakungukwasa kupwa ni mbunge yitoma kuli Yehova Zambi. Nawa chakungukwasa hanga ngukwase asoko jami ni atu akwo hanga no alinge chochene.”—Sonny, Hong Kong.

• Kupwa ni Sambukila ku Mbunge

  “Ami nakalakala ngwe chikwashi ku chimwe chipatulo cha banco internacional. Mu mulimo wacho atu keshi kulemesa yitanga ya kupwa ni mbunge yipema, mumu kanafupu kupwa ni upite. Atu anji kakwamba ngwo, ‘Upi hali uli nyi mutu malionga yimwe ndambu, ngwami chino chakwokesa upite ni kuufunga?’ Ha kupwa ni mbunge yipema, ami haliapwila nguli ni sambukila ku mbunge. Ami mungulinga tachi hanga ngusolole mbunge yipema chipwe mungumona kapinda mweswao. Miata jami kananyingika ngwo, ami kuchichi kuhasa kwoonga, chipwe kulionga mu chihela cho.”—Tom, Estados Unidos.

• Kupwa ni Vumbi lia Akwetu

  “Limwe tangwa mwata wami yangukolweza hanga ngulionge hakutwala ku yimwe yuma yize yatokele ku mulimo. Muze eji jacho akwachile, mwata wami yangusakwilila ha kupwa ni mbunge yipema. Kupwa ni mbunge yipema hano hashi haze kuheshi yitanga yipema chatela hamu. Nyi mutulinga chocho, mutuhasa kupwa ni ujikijilo ni vumbi lia akwetu.”—Kaori, Japão.

Kupwa ni mbunge yitoma, kupwa ni sambukila ku mbunge, ni kupwa ni vumbi lia akwetu, yeswe ai yinasolola ngwo, chili chipema kupwa ni mbunge yipema. Shina yena kuwatayijile ngwo yino yili yamwenemwene?