1, 2. Mumu liaka Paulu asonekenene mukanda kuli akwa-Kristu A-Hepreu?

HA MWAKA 61, yikungulwila ya mu Izalele yapwile ni ndambu ya sambukila. Chipwe ngwe postolo Paulu te kali muzuwo lia ususu, alioze aye te kanashimbwila hanga amutuhwisemo. Chikwashi chenyi Timoteu te hamutusula kulu, kashika eswe ni aali te kananyongo kumeneka mandumbu mu Yundeya. (A-Hepreu 13:23) Ha miaka yitano wika, akwa-Kristu mu Yundeya, chipi-chipi waze te atunga mu Yerusaleme, te katamba kutuhukamo kawashi-washi. Mumu liaka? Mumu, kuuputukilo Yesu katowezele tumbaji twenyi ngwenyi, muze mamona Yerusaleme hayijingilika kuli maswalale, ayo te katamba kutuhukamo.—Luka 21:20-24.

² Te hikwapalika miaka 28, chize haze Yesu ahanyine utowezo uno kuli tumbaji twenyi. Ha mashimbu jacho, akwa-Kristu mu Izalele te kanashishika chipwe ngwe kapwile mu yihungumiona yinji hamwe ni yipikalo yikwo. (A-Hepreu 10:32-34) Alioze Paulu te kanazange kululieka mandumbu jenyi hakutwala ku yuma yize te muyilingiwa kulutwe lia matangwa. Te hi kwasala hakehe hanga ayo alitakane ni chimwe cheseko chinene cha ufulielo wo. (Mateu 24:20, 21; A-Hepreu 12:4) Ayo te mafupa kunyongonona ni kupwa ni ufulielo wahiana, hanga ahase kwononokena maliji ja Yesu akuchina,  mba afunge mwono wo. (Tanga A-Hepreu 10:36-39.) Kashika Yehova atumine Paulu hanga asonekene mandumbu jenyi azango umwe mukanda. Mukanda wacho we haliapwila tunavuluka ngwetu, A-Hepreu, kausonekene hanga utakamise ufulielo wo ha yuma yize te muyilingiwa ko.

3. Mumu liaka twatamba kuzanga mukanda wa A-Hepreu?

³ Amu tuli tuvumbi twa Zambi musono, twatamba kuzanga mukanda wa A-Hepreu. Mumu liaka? Mumu mwono wetu musono unapu ngwe wa akwa-Kristu waze apwile mu Yundeya. Tuli ha “miaka yikalu,” nawa mandumbu jetu anji kananyongonona ni ushishiko weswe yihungumiona ni yipikalo yeka ni yeka. (2 Timoteu 3:1, 12) Alioze anji akuli yetu tuli ni ndambu ya sambukila nawa kutushi mu yihungumiona yinji. Kashika, chizechene ngwe akwa-Kristu ha matangwa a Paulu, ni yetu tunafupu utowezo. Mumu liaka? Mumu hikwasala hakehe, hanga tulitakane ni cheseko chinene cha ufulielo wetu!—Tanga Luka 21:34-36.

4. Chisoneko chika cha mwaka 2016, nawa kuchi chinalite?

⁴ Yika muyitukwasa hanga tulilulieke hakutwala ku yuma yize muyikalingiwa kulutwe lia matangwa? Mu mukanda wa A-Hepreu, Paulu kambile yuma yinji yize muyitukwasa kukolesa ufulielo wetu. Chimwe chikuma chilemu chinji chili mu A-Hepreu 13:1. Chize chinatukolweza hanga: “Zango lia undumbu likalinduluke.” Versu yacho yapwa kusakula hanga yipwe chisoneko cha mwaka 2016.

5. Zango lia undumbu yika linalumbunuka?

⁵ Zango lia undumbu yika linalumbunuka? Liji lia Ngregu lize Paulu azachishile linalumbunuka “zango lize tukwete hali umwe ndumbu.” Zango lia undumbu lili ni tachi, mumu lie akwete asoko ni masepa amwenemwene. (Yoano 11:36) Yetu kutushi kulionga kupwa mandumbu ni mapangi. Alioze tuli mandumbu ni mapangi amwenemwene. (Mateu 23:8) Paulu kambile ngwenyi: “Ha kufwila cha mandumbu, lifwilenu ni utu umwe kuli mukwo. Ha ulemu, eswe akaliange kuulweza kuli mukwo.” (A-Roma 12:10) Maliji wano kanasolola zango linene lize tukwete hali mandumbu jetu. Zango lino lia undumbu, hamwe ni zango lize liakatuka ha shimbi ja akwa-Kristu, liakukwasa tuvumbi twa Zambi hanga apwe masepa kuli umwe ni mukwo ni kulivwashana hakachi ko.

6. Kuchi akwa-Kristu amwenemwene ananyingika ulumbunwiso wa zango lia undumbu?

⁶ Liji “zango lia undumbu” liakusoloka chinji mu Yisoneko ya akwa-Kristu. Mumu A-Yunda kushakulu, liji “ndumbu” te liakulumbunuka usoko hanji umwe mutu wa mu vungu lio. Ha chino, A-Yunda te keshi kuvuluka yilambala ngwo, mandumbu jo. Alioze, amu tuli akwa-Kristu amwenemwene, ndumbwetu kali mukwa-Kristu wamwenemwene mweswao, chipwe ngwe kali akwa vungu lieka. (A-Roma 10:12) Yehova kakutulongesa hanga tusolole zango kuli mandumbu jetu. (1 A-Tesalonika 4:9) Alioze mumu liaka chili chilemu kununga ni kusolola zango lia undumbu?

7. (a) Mumu liaka twakusolola zango lia undumbu? (b) Nawa mumu liaka twatamba kukolesa zango lietu kuli umwe ni mukwo?

⁷ Twakusolola zango lia undumbu, mumu Yehova che akuzanga hanga tulinge.  Yetu kutushi kuhasa kuzanga Yehova nyi twalituna kuzanga mandumbu jetu. (1 Yoano 4:7, 20, 21) Chikwo nawa, yetu tunafupu ukwaso wa umwe ni mukwo chipi-chipi ha mashimbu akalu. Muze postolo Paulu asonekene mukanda wenyi kuli akwa-Kristu amu A-Hepreu iye te kananyingika ngwenyi, te hikwasala hakehe hanga amwe ahichike mazuwo jo ni yikumba yo. Yesu kalumbunwine chize mashimbu jacho akalu te mapwa. (Marku 13:14-18; Luka 21:21-23) Kashika, muze mashimbu jacho te kanda achiheta, akwa-Kristu jacho te katamba kukolesa zango lio kuli umwe ni mukwo.—A-Roma 12:9.

8. Yika twatamba kulinga haliapwila shimbu luyinda munene kanda achiputuka?

⁸ Luyinda munene hakundama kulu. (Marku 13:19; Usolwelo 7:1-3) Yetu mutukafupa kononokena usongwelo uno: “tweyenu atu jami njilenu mu yipatwilo yenu, nukaliajilile mapito jenu. Swamenu kashimbu ndo ufwatulo hiwapalika.” (Izaia 26:20) “Yipatwilo” yino muyihasa kulumbunuka yikungulwila yetu. Muze twakuwayila Yehova hamwe ni mandumbu ni mapangi jetu. Yetu twatamba kulinga yuma yinji kuhiana kulikungulula wika mashimbu eswe. Paulu kewulwile akwa-Kristu A-Hepreu ngwo, ayo te katamba kulitakamisa ha kusolola zango ni kulinga yuma yipema hali umwe ni mukwo. (A-Hepreu 10:24, 25) Ni yetu musono twatamba kukolesa zango lietu lia undumbu, mumu chino muchikatukwasa kunyongonona mu yipikalo yeswayo mutumona kulutwe lia matangwa.

9. (a) Uhashi uka tulinawo wa kusolola zango lia undumbu musono? (b) Hana yilweza ya yuma yize tuvumbi ja Yehova kusolwelamo zango lia undumbu?

⁹ Yetu tuli ni uhashi unji wa kusolola zango lia undumbu musono, shimbu luyinda munene kanda achiputuka. Mandumbu jetu musono kanamono lamba linji ha mukunda wa minyiko, masanga ja meya, tsunami hanji yilungo yeka ni yeka. Mandumbu jetu amwe kananyongonona mu yihungumiona. (Mateu 24:6-9) Nawa amwe kanahono mbongo hamukunda wa kalimbalimba wa hano hashi. (Usolwelo 6:5, 6) Ha mukunda wa yipikalo yinji yize mandumbu jetu ali nayo, yetu tuli ni uhashi wa kusolola zango linji kuli ayo. Chipwe ngwe, hano hashi kuheshi zango, alioze yetu twatamba kununga ni kusolola zango kuli mandumbu jetu. (Mateu 24:12) ^[1]—Tala maliji ali mushi.

10. Yuma yika mutushimutwina haliapwila?

¹⁰ Chipwe ngwe tuli ni milonga yinji, kuchi mutuhasa kupwa ni shindakenyo ngwetu tunanungu ni kusolola zango lia undumbu? Kuchi mutuhasa kusolola ngwetu tuli ni zango liacho hali mandumbu jetu? Muze postolo Paulu te hahwisa kwamba ngwenyi, “zango lia undumbu likalinduluke,” iye yasolola yuma yinji yize akwa-Kristu mahasa kulinga. Haliapwila tushimutwinenu wika yuma yisambano.

11, 12. Yika chinalumbunuka kuzumbula ngeji? (Tala chizulie chili hauputukilo.)

¹¹ “Kanda nuvulama kuzumbula ngeji.” (Tanga A-Hepreu 13:2.) Liji “kuzumbula ngeji” yika linalumbunuka? Liji lize Paulu azachishile linalumbunuka kusolola “zango hali yilambala.” Liji lino kota linatwiwulula Apalahama ni Lote. Wano malunga aali kasolwele zango lio ha kutambula ngeji waze te kanyingikine. Ha chino, Apalahama ni Lote yanyingika ngwo yilambala jacho te angelo. (Uputukilo 18:2-5; 19:1-3) Yilweza yino yakwashile akwa-Kristu A-Hepreu kukolesa zango lio lia undumbu ni kuzumbula ngeji.

¹² Kuchi mutuhasa kusolola ngwetu twakuzumbula ngeji? Ha kusanyika mandumbu ni mapangi jetu ku mazuwo jetu hanga tulie no hamuwika hanji kwaakolweza. Chipwe ngwe kutwanyingikine kalayi wetu wa kumeneka yikungulwila ni mukwo-pwo, nihindu mutuhasa kwaasanyika ku zuwo lietu muze mameneka chikungulwila chetu. (3 Yoano 5-8) Kulinga chino, kuchalumbunukine ngwo twatamba kupwa ni yuma yinji yakulia hanji ni mbongo jinji. Nyonga lietu lili wika kukolweza mandumbu jetu, hi kwaachikimisa ko ni yuma yize tuli nayo. Nawa kutwatambile kusanyika wika waze mahasa kutufunyisa yuma yize twakwaaha. (Luka 10:42; 14:12-14) Chikuma chilemu chili chino, kutwatambile kupwa ni milimo yinji chakuhona kupwa ni shimbu liakuzumbula akwetu ku mazuwo jetu!

13, 14. Kuchi mutuhasa kwiwuluka “funge” hanji waze ali mu mazuwo aususu?

¹³ “Iwulukenu funge” hanji waze ali mu mazuwo aususu. (Tanga A-Hepreu 13:3.) Muze Paulu asonekene maliji wano, iye te kanahanjika hakutwala kuli mandumbu waze te ali mu mazuwo aususu ha mukunda wa ufulielo wo. Paulu kachichimiekene mandumbu a mu chikungulwila mumu o kasolwele “keke hali funge.” (A-Hepreu 10:34) Mandumbu amwe kakwashile Paulu ha miaka yiwana yize iye apwile mu zuwo lia ususu, alioze akwo te kusuku atwama. Mba kuchi ayo te mahasa kukwasa Paulu? O te mamukwasa ha kununga ni kumulembela.—A-Fwilipu 1:12-14; A-Hepreu 13:18, 19.

¹⁴ Musono, Yela ja Yehova anji kali mu mazuwo aususu ha mukunda wa ufulielo wo. Mandumbu ni mapangi waze atwama no hakamwihi mahasa kwakwasa ni yikumba. Alioze anji akuli yetu twatwama kusuku ni mazuwo jacho aususu. Kuchi mutuhasa kwakwasa chakuhona kwaavulama? Zango lietu lia undumbu mulitukolweza hanga twaalembele chinji. Chakutalilaho, mutuhasa kulembela mandumbu ni mapangi jetu chipwe twanuke waze ali mu mazuwo aususu mu Eritrea ngwe mandumbu jetu, Paulos Eyassu, Isaac Mogos, ni Negede Teklemariam waze halinga miaka 20 mu zuwo lia ususu.

15. Kuchi mutuhasa kulemesa ulo wetu?

¹⁵ “Umbachiso akaulemese  kuli eswe.” (Tanga A-Hepreu 13:4.) Yetu mutuhasa nawa kusolola zango lia undumbu ha kwehuka yitanga ya luchisa. (1 Timoteu 5:1, 2) Chakutalilaho, nyi mutulinga utanji ni umwe ndumbu hanji pangi, yetu mutuneha yinyengo yinji kuli mutu wacho ni kuli asoko jenyi. Nawa usepa uze tuli nawo ni mandumbu jetu muupihia. (1 A-Tesalonika 4:3-8) Achinyonga nawa, chize umwe pangi manyonga nyi mevwa ngwo mukwo-lunga kakutala pornografia. Shina aye manyonga ngwo mukwo-lunga kakumuzanga nawa ngwo kakuvumbika ululikiso wa ulo?—Mateu 5:28.

16. Kuchi kuwahilila muchihasa kutukwasa kusolola zango lia undumbu?

¹⁶ Wahililenu ni “yuma yize nuli nayo.” (Tanga A-Hepreu 13:5.) Kufuliela muli Yehova muchihasa kutukwasa hanga tuwahilile ha yuma yize tulinayo. Kuchi chino muchitukwasa hanga tusolole zango kuli mandumbu jetu? Muze mutuwahilila ni yuma yize tulinayo mutwiwuluka ngwetu mandumbu ni mapangi jetu kali ni ulemu unji kuhiana mbongo hanji yikumba. (1 Timoteu 6:6-8) Yetu kutwatambile kulinyenga ha mukunda wa mandumbu jetu hanji ha yuma yize yakulingiwa ku mwono wetu. Nawa kutwatambile kwivwila akwetu kuzo hanji chipululu. Alioze nyi mutuwahilila ha yuma yize tulinayo, mutupwa yihanyi.—1 Timoteu 6:17-19

17. Kuchi kupwa ni ‘hamu’ lipema muchitukwasa kusolola zango lia undumbu?

¹⁷ Tupwenu ni ‘hamu’ lipema. (Tanga A-Hepreu 13:6.) Kufuliela muli Yehova muchitwaha tachi hanga tunyongonone ha mashimbu akalu. Chino muchitukwasa hanga tupwe ni nyonga lipema. Nyi twapwa ni nyonga lipema, mutuhasa kusolola zango lietu lia undumbu ha kutakamisa ni kukolweza mandumbu ni mapangi jetu. (1 A-Tesalonika 5:14, 15) Chipwe ha mashimbu a luyinda munene, yetu mutuhasa kupwa ni hamu, ni kunyingika ngwetu, utuswilo wetu uli hakamwihi.—Luka 21:25-28.

18. Kuchi mutuhasa kukolesa zango lietu lia undumbu hali makulwana amu yikungulwila yetu?

¹⁸ “Iwulukenu . . . tusongo twenu” (Tanga A-Hepreu 13:7, 17.) Makulwana amu chikungulwila kakuzachisa mashimbu jo hanga akalakale chinji ha mukunda wa yetu. Muze mutunyonga ha yuma yeswe yize o akulinga, zango ni usakwililo wetu hali ayo muwoka. Kutwazangile hanga chiseke cho chitoke hanji evwe uli ha mukunda wa yuma yize mutulinga. Alioze, tunazange kwoononokena ni mbunge yeswe. Nyi twalinga chocho, mutwaalemesa “chikolo mu zango, mumu ha milimo yo.”—1 A-Tesalonika 5:13.

19, 20. Kuchi mutuhasa kununga ni kusolola zango lia undumbu kuhiana?

¹⁹ Tuvumbi twa Yehova kanaanyingika kanawa kuli atu ha mukunda wa zango lio lia undumbu. Ngwe chize chapwile ha mashimbu ja Paulu. Alioze Paulu kakolwezele mandumbu hanga asolole zango mu jila yikwo nawa yahiana. Aye yamba ngwenyi: ‘Lingenu chino kuhiana.’ (1 A-Tesalonika 4:9, 10) Chochene, nihindu kuli yuma yize mutuhasa kululieka ku mwono wetu.

²⁰ Kashika muze mututala ku chisoneko chetu cha mwaka mu Zuwo lia Wanangana ha mwaka uno, yetu mutupukuna ha yihula yino: Munguhasa kuzumbula chinji ngeji? Kuchi munguhasa kukwasa mandumbu jetu waze ali mu mazuwo aususu? Shina ami nakulemesa ululikiso wa ulo nyi? Yika muyingukwasa kupwa ni uwahililo wamwenemwene? Kuchi munguhasa kufuliela chinji muli Yehova? Kuchi munguhasa kwononokena kanawa tusongo? Nyi twasa tachi hanga tupemese yitanga yetu hakutwala ku yikuma yino yisambano, chisoneko cha mwaka uno kuchichi kupwa wika chilayi chize chili ku chikalakala cha Zuwo lia Wanangana; alioze muchitwiwulula hanga twononokene maliji a Paulu, waze iye ambile ngwenyi: “Zango lia undumbu likalinduluke.”—A-Hepreu 13:1.