1, 2. (a) ‘Chawana cha Zambi chize chahiana’ yika chinalumbunuka? (b) Yihula yika mutulilongesa mu mutwe uno?

YEHOVA katwehele chawana cha zango muze atumine Mwanenyi Yesu, yoze te azanga chinji hanga eze hano hashi! (Yoano 3:16; 1 Yoano 4:9, 10) Postolo Paulu kasanyikine chawana chino ngwo, “chawana chenyi chize keshi kuhasa kuchambujola.” (2 A-Korindu 9:15) Mumu liaka Paulu azachishile maliji wano?

² Paulu te kananyingika ngwo ukuule wa Yesu we unatwehe ushindakenyo ngwo, yilakenyo yeswe ya Yehova muyikamanunuka. (Tanga 2 A-Korindu 1:20.) Chekwamba ngwo, chawana chenyi chahiana hanji “chize keshi kuhasa kuchambujola” chinalumbunuka ukuule wa Yesu ni yuma yeswe ya upeme ni zango lia ushishiko lize Yehova akutusolwela. Chawana chacho chili chikalu kuchilumbunuuna mu maliji ashi. Yika chawana chino chatamba kulinga hali yetu? Nawa kuchi chawana chino chatamba kutukolweza muze tunalilulieka hakutwala ku chiwayino cha kufwa cha Kristu chize muchikalingwa ha tangwa Liamatatu 23 lia Março 2016?

3, 4. (a) Kuchi wakwivwa muze umwe mutu makwaha chimwe chawana? (b) Kuchi chimwe chawana chilemu muchihasa kwalumuna mwono we?

³ Yetu twakuwahilila chinji muze umwe mutu matwaha chimwe chawana. Alioze yawana yimwe yakupwa ni ulemu unji nyi muyalumuna mwono wetu. Chakutalilaho, achinyonga ngwe walinga umwe mulonga unene. Mba himakuhisa hanga akushihe. Uhishilo wa mulonga we ndo kufwa. Hi susukumuku, mukusoloka umwe mutu yoze yena kuushi kunyingika malihana mwene hanga afwe um chihela che. Aye kanazange ni mbunge yeswe kufwila muli yena! Kuchi yena mwivwa ha chawana chino chilemu?

⁴ Zango lie ha chawana chacho mulikukolweza kwalumuna yimwe yuma ku mwono we. Chizechene nawa, ni yena mulikolweza hanga upwe chihanyi ni kuzanga akwenu ni kukonekena mweswao yoze keshi kukuzanga. Ku mwono we weswe, ena muzanga kusolola ngwe wakusakwilila chinji ha ukuule uze akuhanyinyine.

5. Mumu liaka chiwape cha ukuule cha Zambi chili chilemu chinji kuhiana chawana cheswacho?

⁵ Chiwape cha Zambi cha ukuule chili chilemu chinji kuhiana chiwape chize twatongola ha chilweza. (1 Petulu 3:18) Achinyonga ha chino: Yetweswe twahingile shili kuli Alama, upatwilo wa shili kufwa. (A-Roma 5:12) Ha mukunda wa zango, Yehova yatuma Yesu hano hashi hanga afwe hali atu eswe, ni kumona “kufwa hali atu eswe.” (A-Hepreu 2:9) Alioze ukuule wa Yesu muukalinga yuma yinji kuhiana yino! Muukanongesa kufwa liakulu. (Izaia 25:7, 8; 1 A-Korindu 15:22, 26) Atu eswe waze anafuliela muli Yesu makatwama ni sambukila ni chiseke cha mutolo, amwe makapwa mianangana mu malilu hamwe ni Yesu, akwo makatambula mwono wa mutolo mu paraisu. (A-Roma 6:23; Usolwelo 5:9, 10) Yiwape yikwo yika nawa yili ha chawana chino cha Yehova?

6. (a) Yiwape yika ya chawana cha Yehova, unashimbwila kulutwe lia matangwa? (b) Yuma yika yitatu yize chawana cha Zambi muchitukolweza kulinga?

⁶ Ha mukunda wa chawana cha Zambi, hashi muhakapwa paraisu, akwa-kuyiza makapwa kawape, nawa afu makaahindwisa. (Izaia 33:24; 35:5, 6; Yoano 5:28, 29) Tunawahilila chinji hali Yehova ni Mwanenyi ha kutwaha ‘chawana chino chize chahiana.’ Yika chawana chino muchitukolweza kulinga? Muchitukolweza (1) kwimbulula kanawa Yesu Kristu, (2) kuzanga mandumbu jetu, ni (3) kukonekena akwetu ni mbunge yeswe.

7, 8. Kuchi twatamba kwivwa hakutwala ku zango lia Kristu, nawa yika chino muchitukolweza kulinga?

⁷ Chitangu, chawana chacho chatamba kutukolweza kuzachisa mwono wetu hanga tulemese Yesu. Postolo Paulu yamba ngwenyi: ‘Zango lia Kristu kuliakutuyula.’ (Tanga 2 A-Korindu 5:14, 15.) Paulu kanyingikine ngwenyi, nyi twatayiza zango linene lia Yesu, zango liacho mulitushinjila hanji kutuyula hanga tuzange ni kuhalisa Yesu. Chochone, ni twanyingika kanawa yuma yeswe yize Yehova akulinga hali yetu, zango lienyi mulitukolweza hanga tupwe ni mwono uze muusolola ngwo twakulemesa Yesu. Kuchi mutuchilinga?

⁸ Zango hali Yehova mulitukolweza hanga twimbulule chilweza cha Yesu, ha kukaula kanawa chano chenyi. (1 Petulu 2:21; 1 Yoano 2:6) Muze mutwononokena Zambi ni Kristu, mutusolola zango lietu hali ayo. Yesu yamba ngwenyi: “Yoze uli ni shimbi jami, wakujifunga, mwenawo wakunguzanga. Yoze  wakunguzanga, kumakamuzanga kuli Tata, ni yami mungumuzanga, mungulisolola kuli iye. Mumu lino lie zango lia Zambi ngwo, Tukafunge shimbi jenyi. Shimbi jenyi hi jikalu ko.”—Yoano 14:21; 1 Yoano 5:3.

9. Usolo uka mutuhasa kupwa nawo?

⁹ Ha mashimbu a Chiwanyino cha Kwiwuluka Kufwa cha Yesu, chili chipema kupukuna ha chize mutuzachisa mwono wetu. Mutuhasa kulihula ngwetu: ‘Mu yitanga yami ngunembulwila Yesu? Yitanga yika natamba kululieka ku mwono wami?’ Kulihula yihula yino chili ni ulemu unji mumu atu a hano hashi kanazange hanga tupwe ni yitanga ngwe yize ayo ali nayo. (A-Roma 12:2) Nyi kutwakanyamine, mutuhasa kupwa ni usolo wa kwimbulula yitanga ya alongeshi, akwa-lufuma ni akwa-yiheho a hano hashi. (A-Kolosu 2:8; 1 Yoano 2:15-17) Kuchi mutuhasa kwehuka usolo wacho?

10. Yihula yika mutuhasa kulihula ha shimbu lia Chiwanyino cha Kwiwuluka Kufwa cha Yesu, nawa yika makumbululo matukolweza kulinga? (Tala chizulie chili hauputukilo.)

¹⁰ Chili chipema ha mashimbu a Chiwanyino cha Kwiwuluka Kufwa cha Yesu, tuhengwole kanawa mazalo, filme, computador, telefone ni tablet jetu. Kashika, twatamba kulihula ngwetu: ‘Nyi Yesu te kali hano hi mamona yize ngunazale, shina ami te mungwivwa sonyi?’ (Tanga 1 Timoteu 2:9, 10.) ‘Shina mahina jami masolola lume ngwami nguli kambaji ka Kristu? Shina Yesu matayiza kutala yinema yize ami nakutala? Iye mahasa kupanjika miaso yize nakwivwa? Nyi Yesu meta telefone hanji tablet yami, shina mungwivwa sonyi ha yuma yize iye mamonaho? Shina muchipwa chikalu kulumbununa kuli Yesu mumu liaka nakuzanga kuheha video game?’ Zango lietu hali Yehova liatamba kutukolweza hanga twehuke chuma cheswacho kuchalitele kuli mukwa-Kristu, chipwe ngwe muchifwika ndando yinji. (Yilinga 19:19, 20) Muze twakuhana mwono wetu kuli Yehova, twakumulakenya hanga tuzachise mwono wetu ni kuhalisa Kristu. Kashika kutwatambile kulinga chuma cheswacho chize muchihasa kupinjisa mwono wetu hakwimbulula Yesu.—Mateu 5:29, 30; A-Fwilipu 4:8.

11. (a) Kuchi zango lietu hali Yehova ni Yesu mulitukolweza mu mulimo wa kwambujola? (b) Kuchi zango lietu mulihasa kutukolweza hanga tukwase akwetu mu chikungulwila?

¹¹ Zango lietu hali Yesu mulitukolweza kwambujola sango lipema ni hamu. (Mateu 28:19, 20; Luka 4:43) Shina muuhasa kulilulieka ku mwono we ha mashimbu a Chiwanyino, hanga uhase kupwa pionelu wa maola 30 hanji 50 mu mulimo wa kwambujola? Umwe tuliwa wa miaka 84 yanyonga ngwe te kechi kuhasa kupwa pionelu ha mukunda wa ushinakaji ni yikatalo. Alioze mapionelu a mu limbo lienyi yanyonga kumukwasa. O yalulieka ukwaso wa kumutwala-twala ni kusakula ngiza jize jalita hanga ahase kwambujolamo. Ha chino, ndumbu wacho yahasa kulinga maola 30. Shina yena muuhasa kukwasa umwe ndumbu mu chikungulwila hanga apwe pionelu ha kakweji wa Março hanji Abril? Ewa, tunanyingika ngwetu, hi eswe ko mahasa kupwa pionelu, alioze mutuhasa kuzachisa shimbu lietu ni tachi jetu hanga twokese mulimo uze twakulingila Yehova. Nyi twalinga ngwe chize alingile Paulu, yetu mutusolola ngwetu, zango lia Kristu liakutuyula. Yika nawa zango lia Zambi mulihasa kutukolweza kulinga?

12. Yika zango lia Zambi liakutukolweza kulinga?

¹² Chamuchiali, zango lia Zambi liatamba kutukolweza kuzanga mandumbu jetu. Postolo Yoano kasonekene ngwenyi: “Akwetu a zango, nyi kachi Zambi watuzangile chocho, ni  yetu nawa chatutamba kulizanga umwe ni mukwo.” (1 Yoano 4:7-11) Nyi twakutayiza lume zango lia Zambi, twatamba kuzanga mandumbu jetu. (1 Yoano 3:16) Kuchi mutuhasa kusolola zango hali ayo?

13. Chilweza chika Yesu ahichikile ha kuzanga akwetu?

¹³ Chilweza cha Yesu chinasolola chize mutuhasa kuzanga akwetu. Muze iye apwile hano hashi, kakwashile atu, chipi-chipi akwa-kulikehesa. Yawuka akwa-yikola, yilema, tupuputa, afwa matwi ni tunaye. (Mateu 11:4, 5) Yesu te kalisa ni mangana a mayingeleja, mumu iye te kakuzanga kulongesa atu waze te anazange kunyingika Zambi. (Yoano 7:49) Iye yazanga atu jacho nawa yakalakala chinji hanga aakwase.—Mateu 20:28.

14. Yika muhasa kulinga hanga usolole zango kuli mandumbu je?

¹⁴ Mashimbu a Chiwanyino kali nawa mashimbu apema akunyonga ha chize mutuhasa kukwasa mandumbu jetu mu chikungulwila, chipi-chipi tushinakaji. Shina yena muhasa kwaameneka kama? Kutala muhasa kwaanehena chimwe kulia, kwaakwasa ha yimwe milimo ya ku zuwo, kwaaha ukwaso wa kuya ku kukunguluka hanji kwaasanyika hanga ukalakale no mu mulimo wa sango lipema? (Tanga Luka 14:12-14.) Echa zango lia Zambi hanga likukolweze kuzanga mandumbu je!

15. Yika twatamba kunyingika?

¹⁵ Chamuchitatu, zango lia Yehova liakutukolweza kukonekena mandumbu ni mapangi jetu. Yetweswe twahingile shili ni kufwa kuli Alama, kashika niumwe mahasa kwamba ngwenyi, “Ami kuchafupile ukuule” wakuhi. Chipwe kavumbi ka Zambi yoze washishika chikolo neye kanafupu ukuule. Yetu eswe hanatukonekena lipaza liacho linene. Mumu liaka chili chilemu kunyingika chino? Mutuhasa kuwana kumbululo ha yishima ya Yesu.

16, 17. (a) Yika mutuhasa kulilongesa ha chishima cha Yesu cha mwanangana ni ndungo wenyi? (b) Yika muulinga muze mupukuna ha chishima cha Yesu?

¹⁶ Yesu katele chimwe chishima cha umwe mwanangana yoze wakonekenene ndungo wenyi limwe kongo linene lia 60,000,000 ja denario. Alioze ha kupalika cha mashimbu, ndungo wacho kakonekenene ndungo-ni-mukwo yoze te wamutwama ni kongo likehe lia 100 denario. Kachi keke ya mwanangana yakolwezele ndungo wenyi hanga akonekene mukwo. Mwanangana yevwa uli unji muze hevwa ngwo, ndungo yenyi kakonekenene kongo liacho likehe. Iye yamba ngwenyi: “Ena ndungo uli chingulungulu, ami ngunakakukonekena kongo lie liswe, mumu unakaliumba kuli yami. Chatamba yena nawa te kuvwila keke ndungo-ni-mukwenu ngwe yami nawa kunakakuvwila keke.” (Mateu 18:23-35) Chizechene ngwe mwanangana yono, ni Yehova hanatukonekena lipaza linene.  Yika zango ni keke ya Yehova mulitukolweza kulinga?

¹⁷ Muze mutulilulieka hanga tupwe ha Chiwanyino, twatamba kuliha chino: “Shina umwe ndumbu wangulemeka ku mbunge? Shina chinangukaliwa kumukonekena nyi? Nyi chenacho, wano kali mashimbu akwimbulula Yehova, “mukwa-kukonekena.” (Nehemia 9:17; Samu 86:5) Nyi twawahilila ni keke yinene ya Yehova, mutusolola keke kuli akwetu ni kwaakonekena ni mbunge yeswe. Nyi kutushi kuzanga mandumbu jetu ni kwaakonekena, kutuchi kuhasa kushimbwila hanga Yehova atuzange ni kutukonekena. (Mateu 6:14, 15) Muze mutukonekena akwetu, chino kuchichi kwalumuna upi uze atulinga, alioze muchitukwasa hanga tupwe ni sambukila kulutwe lia matangwa.

18. Kuchi zango lia Zambi liakwashile umwe pangi hanga alengulule uhenge wa pangi mukwo?

¹⁸ Muchihasa kupwa chikalu chinji kulengulula uhenge wa mandumbu jetu. (Tanga A-Efwesu 4:32; A-Kolosu 3:13, 14.) Pangi Lily kalengulwile uhenge wa umwe pangi. ^[1](Tala maliji ali mushi.) Aye kakwashile umwe tuliwa yoze te avuluka ngwo Carol. Chakutalilaho, iye te kakutwala Carol kweswako mafupa kuya, ha kumukwasa kulanda yuma yize te akufupa, nawa kamukwashile ha yuma yikwo yinji. Chipwe ha yuma yeswayi Lily alingile hali Carol, nihindu Carol te kakwasa Lily mikuta. Alioze Lily yalihulikila ku yitanga yipema ya Carol ni kumukwasa ha yimwe miaka ndo hoho Carol ayijile ni kufwa. Chipwe ngwe, chapwile chikalu chinji kuli Lily kukwasa Carol, nihindu aye yamba ngwenyi: “Ngunashimbwila kulutwe lia matangwa kumona Carol ha uhindukilo. Ngunazange kumunyingika muze makapwa mungunu.” Pundu lume, zango lia Zambi mulitukolweza hanga tutwame ni mandumbu jetu ni kushimbwila shimbu lize kukuchi kapwa nawa akwa-shili.

19. Kuchi ‘chawana cha Zambi chize chahiana’ muchitukolweza?

¹⁹ Pundu lume, Yehova hanatwehe ‘chawana chize chahiana.’ Mutuhasa kusakwilila mashimbu eswe ha mukunda wa chawana chacho! Mashimbu a Chiwanyino kali mashimbu apema chinji hanga tupukune ha yuma yeswe yize Yehova ni Yesu hanalingi hali yetu. Zango lio mulihasa kutukolweza hanga twimbulule kanawa chano cha Yesu, ha kusolola zango kuli mandumbu jetu, ni kukonekena ni mbunge yeswe uhenge wo.