1. Kuchi Yehova alisolwele mwene kuli Mose? Mumu liaka chino chikwete ulemu?

HA SHIMBU limwe, Zambi kalisolwele mwene kuli Mose ha kumulweza jina ni yitanga Yenyi. Yehova kachi katongwele ndundo hanji mana jenyi, alioze shimbu alinge chocho, iye yatongola chitangu ha utu ni keke yenyi. (Tanga Kutuhuka 34:5-7.) Mose kazangile wika kunyingika nyi Yehova te mamukwasa. Kashika, Yehova yatongola yitanga yenyi hanga asolole ngwo chamwenemwene kakukwasa tuvumbi twenyi. (Kutuhuka 33:13) Kuchi wakwivwa ha kunyingika ngwo Yehova kakutufunga? Mutwe uno muushindakenya ha keke yize yalumbunuka kwivwa yikola ku mbunge ha lamba lia akwetu ni kufupa kwaakwasa.

2, 3. (a) Yika yinasolola ngwo atu kakwete uhashi wakusolola keke? (b) Mumu liaka twatamba kuzanga yize Mbimbiliya yinambe hakutwala ku keke?

² Yehova kali mukwa-keke, nawa iye katangile atu mu chano  chenyi. Kashika, atu eswe kakwete chako chakusolola keke. Chipwe atu waze kanyingikine Yehova, no ha mashimbu amwe kakusolola keke. (Uputukilo 1:27) Mu Mbimbiliya, muli sango jinji ja atu waze asolwele keke. Chakutalilaho, muze Solomone afupile kunyingika naye ya mwana hakachi ka mapwo aali, iye yaalinga cheseko ha kutuma hanga atete mwana hakachi. Naye ya mwana yevwila mwanenyi keke yinji, chocho yeta mwanangana hanga ahane mwana wacho kuli pwo mukwo. (1 Mianangana 3:23-27) Mwana wa pwo wa Falau neye kali chilweza chikwo cha mutu yoze wasolwele keke. Muze awanyine kanuke Mose, iye kanyingikine ngwenyi Ka-Hepreu nawa kapwile ni uhashi wa kumushiha. Alioze “yamuvwila keke,” ni kumwanda akamulele ngwe mwanenyi.—Kutuhuka 2:5, 6.

³ Mumu liaka twatamba kulilongesa chinji hakutwala ku keke? Mumu Yehova kanazange hanga tumwimbulule. (A-Efwesu 5:1) Chipwe ngwe katutangile ni uhashi wakupwa ni keke, nihindu tuli yihenge nawa tukwete ndako yakusolola kuzo. Kashika, ha mashimbu amwe, muchihasa kupwa chikalu kukwasa akwetu mumu lia kunyonga wika hali yetwene. Mba yika muyihasa kutukwasa hanga tusolole keke kuli akwetu? Chitangu, tutalenu chize Yehova ni atu eka asolwele keke. Chamuchiali, mututala nawa chize mutuhasa kwimbulula keke ya Zambi, ni mumu liaka chili chipema kuchilinga.

4. (a) Mumu liaka Yehova atumine angelo mu mbonge ya Sondome? (b) Yika mutuhasa kulilongesa ha yize yalingiwile kuli usoko wa Lote?

⁴ Mbimbiliya yakutongola yilweza yinji yize Yehova asolwele keke. Chakutalilaho, nyonga ha yize yalingiwile kuli Lote. Lote kapwile lunga wa ululi yoze “wevwile kupiha” ha yize apwile ni kulinga atu amu Sondome ni Ngomora. Atu jacho te keshi kuvumbika Zambi, chocho iye yakwata chiyulo cha kwashiha. (2 Petulu 2:7, 8) Yehova yatuma angelo kuli Lote ni kumulweza ngwo kumanongesa Sondome ni Ngomora nawa ngwo iye te katamba kutuhukamo. Mbimbiliya yakwamba ngwo: ‘Muze [Lote] te machilaluka, hachino, Yehova yamuvwila keke, mba malunga [angelo] yamukwata ku kwoko lienyi, ni kwoko lia mukwo-pwo, ni moko ja anenyi a mapwo. Chocho yamuchiza, yamusa haze lia limbo.’ (Uputukilo 19:16) Amu Yehova anyingikine ukalu wa Lote, ni yetu mutuhasa kupwa ni shindakenyo ngwetu manyingika ukalu weswawo mutumona.—Izaia 63:7-9; Tiangu 5:11; 2 Petulu 2:9.

5. Kuchi Liji lia Zambi linatulongesa chize mutusolola keke?

⁵ Yehova kanalongesa tuvumbi twenyi kusolola keke. Tunyongenu ha shimbi yimwe yize ahanyine kuli A-Izalele. Nyi umwe matambula mbongo ja mukuli kuli mukwo,  mukwa-mbongo mahasa kumbata hina lia yoze uli ni mukuli wenyi ngwe chifungo chakufunyishinamo mbongo jenyi. (Tanga Kutuhuka 22:26, 27.) Mukwa-mbongo katamba kufunyisa hina kuli mwenyacho ha chingoloshi hanga alifuke nacho ha ufuku. Mutu yoze keshi keke te keshi kuzanga kufunyisa lize hina, alioze Yehova yalongesa atu jenyi hanga apwe ni keke. Yika shimbi yino yinatulongesa? Yinatulongesa ngwo kutwatambile kulengulula yize yinafupiwa kuli mandumbu jetu akwa-Kristu. Nyi tuli ni uhashi wakukwasa ndumbwetu yoze unamono lamba, twatamba kulinga chocho.—A-Kolosu 3:12; Tiangu 2:15, 16; tanga 1 Yoano 3:17.

6. Yika mutuhasa kulilongesa ha keke ya Yehova hali yitanguke A-Izalele?

⁶ Yehova kevwilile keke A-Izalele chipwe ngwe kakumwehuka. Twakutanga ngwo: ‘Yehova Zambi ya tulamba two wapwile ni kuatumina-tumina tunganda twenyi, chimene ha chimene, mumu ha keke ya atu jenyi ni zuwo lienyi.’ (2 Sango ja Mianangana 36:15) Ni yetu nawa twatamba kuvwila keke atu waze kanda achinyingika Yehova, alioze mahasa kulikonyeka ni kupwa masepa jenyi. Yehova keshi kuzanga niumwe hanga akafwe ha upatwilo uze uneza. (2 Petulu 3:9) Kashika, amu kuchili mashimbu, muchilita kwambulwila atu eswe sango ja utowezo ni kukwasa atu anji hanga ayuke ha keke ya Zambi.

7, 8. Mumu liaka usoko umwe watayijile ngwo Yehova kevwililile keke?

⁷ Musono, tuvumbi twa Yehova anji hanamono keke yenyi. Chakutalilaho, mu miaka ya mu ji 1990 mu Bósnia, minyachi yamo yinji yapwile ni kuliasa jita ni kulishiha umwe ni mukwo. Umwe usoko wapwilemo, wapwile ni mwano wa miaka 12 yoze mutuvuluka ngwetu Milan. Milan, ni ndumbwenyi, ni yisemi jenyi ni Yela eka yalinga wenyi kukatuka ku Bósnia ni kuya ku Sérvia. Ayo kapwile ni kuya ku kukunguluka cha mambonge, kuze te mapapachishila yisemi ja Milan. Maswalale waze te akufunga njiza ya chifuchi yaamona ngwo ayo kapwile aku munyachi weka, chocho yaasunwisa mu kalela. Alioze mandumbu akwo yanunga mu wenyi wo. Ha matangwa aali, maswalale kakeechele usoko wacho. Kusulaho, kasongo wa maswalale yasanyika mwata wo ni kumuhula, yize atamba kulinga ni usoko wacho. Usoko wacho te uli ni kupanjika muze mwata wo ambile ngwenyi, “Atuhwisenu wika haze hanga nwaashihe!” 

⁸ Muze maswalale te anahanjika, ngeji aali yakundama kuli usoko wacho. Ayo yaayewutwila ngwo no te Yela ja Yehova nawa ngwo mandumbu waze apwile mu kalela kaalwezele yize yalingiwileko. Aze Yela aali yalweza Milan ni mwanakwo anjile mu mashinyi yo ni kuzauka njiza ya chifuchi, mumu maswalale jako te keshi kuhengula mikanda ya twanuke. Mba yalweza yisemi jo apalikile muyambu hanga aliwanyine sali likwo lia chifuchi. Milan kapwile ni kwivwa woma unji kashika yahona kunyingika nyi katamba kuseha ni hanji kulila. Yisemi jo yaahula Yela jacho ngwo: “Shina chamwenemwene matwecha lumwe tuye?” Alioze muze ayo asosolokele ndambu, chapwile ngwe maswalale jacho kaamwene. Milan ni mwanakwo yaliwana ni yisemi jo sali likwo lia njiza, chocho yaya ku kukunguluka cha mambonge. Hachino, yanyingika ngwo  Yehova mwe wakumbulwile kulemba cho! Tunanyingika ngwetu, Mbimbiliya yakwamba ngwo, Yehova keshi kutufunga mashimbu eswe kupalikila mu yipupu. (Yilinga 7:58-60) Alioze ha chikuma chino, Milan yamba ngwenyi: “Namwene ngwe angelo e apupuchishile maswalale, chocho Yehova mwe watupulwile.”— Samu 97:10.

9. Kuchi Yesu evwile hali mbunga yize yamukawile? (Tala chizulie ha uputukilo.)

⁹ Yesu neye kapwile chilweza chipema cha keke. Iye kevwilile atu keke mumu kaamwene “analikatalisa nikulimbilambila, ngwe mapanga waze keshi kafunga.” Kuchi iye achilingile? Ha kuputuka “kualongesa yuma yinji.” (Mateu 9:36; tanga Marku 6:34.) Alioze A-Fwalizeute keshi keke, nawa te keshi kukwasa atu. (Mateu 12:9-14; 23:4; Yoano 7:49) Ngwe Yesu, shina twakuzanga chinji kukwasa atu ni kwaalongesa hakutwala kuli Yehova?

10, 11. Shina chalita kupwa ni kusolola keke ha mashimbu eswe? Lumbununa.

¹⁰ Chino kuchalumbunukine ngwo chalita kupwa kusolola keke mashimbu eswe. Chakutalilaho, Mwanangana Saulu kota kanyongene ngwenyi kasolwele keke muze ahonene kushiha Agage, mwanangana wa A-Amaleke yoze wapwile mukwa-kole wa Zambi. Saulu nawa yahona kushiha yimuna eswe A-Amaleke. Alioze Yehova kalwezele Saulu hanga ashihe A-Amaleke eswe hamwe ni yimuna yo. Amu Saulu kakononokene, Yehova yalitunayo kupwa mwanangana. (1 Samuele 15:3, 9, 15) Yehova kapwa Ngaji mungunu. Kakumona yili ku mbunge ya mutu ni kunyingika shimbu lize katambile kusolola keke. (Lungungu wa Jeremia 2:17; Ezekiele 5:11) Kwasala hakehe iye maneha upatwilo hali atu eswe waze keshi kumwononokena. (2 A-Tesalonika 1:6-10) Lino kulichi kapwa shimbu lize Yehova makasolola keke hali atu api ko. Alioze, hakushiha atu jacho, makasolola keke hali akwa-ululi, waze makalamwina.

¹¹ Ewa, mulimo wakupatwila atu nyi makanunga ni mwono ni ka hi wa yetu ko. Alioze, twatamba kusa tachi haliapwila hanga tukwase atu anji. Mba majila aka mutuhasa kusolwelamo keke kuli akwetu? Tutalenu amwe majila jacho.

12. Kuchi mutuhasa kusolola keke kuli akwetu twatwama no?

¹² Kukwasa akwetu hita tangwa. Yehova kanechi akwa-Kristu hanga evwile keke enyembo ni mandumbu jo. (Yoano 13:34, 35; 1 Petulu 3:8) Keke yinalumbunuka “kumona lamba hamuwika ni akwetu.” Mutu yoze wakusolola keke kakufupa kukwasa akwo waze anamono lamba. Kashika twatamba kufupa jila ja kukwashilamo akwetu, hanji kulihana hanga twaakwase ha yize anafupu.—Mateu 7:12.

13. Yika tuvumbi twa Zambi akulinga nyi kumwe mukupwa luyinda?

 ¹³ Kukwasa waze anafupiwa ukwaso. Muze mutumona atu waze anamono lamba mumu lia luyinda, twatamba kwevwila keke. Tuvumbi twa Yehova kaanyingika kanawa ha ukwaso uze akuhana kuli akwo ha mashimbu jacho. (1 Petulu 2:17) Chakutalilaho, umwe ndumbu wa pwo ku Japão te katwama ku chihela kuze kwapwile munyiko unene ni tsunami ha mwaka 2011. Iye yamba ngwenyi “kawanyine utakamiso ni ukolwezo unji” muze amwene akwa-kulihana kanakatuka ku yihela yalisa mu Japão ni mu yifuchi yeka hanga atungulule mazuwo jo ni Mazuwo a Wanangana. Yawezela ngwenyi: “Yino yangukwashile kunyingika ngwami Yehova kakutufunga, nawa Yela ni akwetu kanalihulumba hali umwe ni mukwo. Mandumbu jetu anji hashi heswe te kanatulembelako.”

14. Kuchi mutuhasa kukwasa mieji ni tushinakaji?

¹⁴ Kukwasa waze anayiza ni waze anashinakajiwa. Twatamba kuvwila keke waze anamono lamba mumu lia misongo ni ushinakaji. Tunashimbwila kuhwa cha lamba lino, kashika twakwita Wanangana wa Zambi hanga wize. Ha mashimbu wano twakusa tachi hanga tukwase mieji ni tushinakaji. Umwe mukwa-kusoneka yasoneka ngwenyi, limwe tangwa naye yoze te hashinakaja, wapwile ni musongo wa ku wongo, yapihisa mazalo jenyi. Muze te anaakosa, ngezo yaku chikolo chenyi  yiyiteta. Kumana Yela ja Yehova aali waze te akumumeneka hita shimbu e apwileko. Mandumbu yeta hanga amukwase. Pwo liacho yamba ngwenyi: “Changunehena sonyi, alioze munuhasa kungukwasa.” Mandumbu yamukwasa kukosa mazalo. Yamulingila nawa shá, ni kununga kushimutwina nenyi. Mwanenyi yawahilila chinji ni kwamba ngwo, kuma Yela ja Yehova “kakulinga yize akulongesa.” Shina keke yetu hali mieji ni tushinakaji, yakutulingisa tuse tachi hanga twaakwase nyi?—A-Fwilipu 2:3, 4.

15. Kuchi mulimo wetu wa kwambujola wakukwasa akwetu?

¹⁵ Kukwasa atu hanga anyingike Yehova. Jila yipema yakukwashilamo atu, yili kwaalongesa hakutwala kuli Zambi ni Wanangana wenyi. Jila yikwo yili ha kwaakwasa hanga amone upeme wa kukaula shimbi ja Yehova ku mwono wo. (Izaia 48:17, 18) Mulimo wa kwambujola uli jila yakuhalishilamo Yehova ni kusolola keke kuli akwetu. Shina mutuhasa kwambujola chinji mu munda nyi?—1 Timoteu 2:3, 4. 

16. Kuchi mutuyuka nyi tuli akwa-keke?

¹⁶ Atu waze akulilongesa hakutwala ku wongo kakwamba ngwo, kusolola keke muchihasa kukwasa mujimba wetu ni kupemesa usendo wetu ni akwetu. Nyi mutukwasa waze anamono lamba, mutuwahilila, ni kupwa ni kutalatala chikolo, chakuhona kwivwa uli hanji kulipikala chinji ku mbunge. Kashika, kusolola keke muchitukwasa ni yetwene. (A-Efwesu 4:31, 32) Nyi zango mulitulingisa hanga tukwase akwetu, mutupwa ni mbunge yipema mumu tunanyingika ngwetu tunalingi yize Yehova anechi hanga tulinge. Keke muyitukwasa hanga tupwe yisemi, malunga, mapwo ni masepa apema. Chikwo nawa, atu waze akusolwela akwo keke kanji-kanji kakutambula ukwaso muze maafupiwa ukwaso.—Tanga Mateu 5:7; Luka 6:38.

17. Mumu liaka twatamba kupwa akwa-keke?

¹⁷ Chipwe ngwe ni yetu mutuyuka hakusolola keke, alioze chitela chinene twakusolwela keke chili ngwo tunazange kwimbulula Yehova ni kumuhalisa. Iye mwe Chishina cha zango ni keke. (Yishima 14:31) Iye hanatwehe chilweza chingunu. Kashika, twatamba kulikolweza chinji hanga twimbulule Zambi hakusolwela akwetu keke. Mba mutunyingika kanawa mandumbu jetu ni kutwama kanawa ni enyembo jetu.—A-Ngalashia 6:10; 1 Yoano 4:16.