‘Liji Lia Zambi Yetu Kumulikalinduluka ku Miaka ya Mutolo’
‘Mwambu wakuma, chitemo chakulela, alioze liji lia Zambi yetu kumulikalinduluka ku miaka ya mutolo.’—IZAIA 40:8.
1, 2. (a) Kuchi te mwono wa atu muupwa chakuhona Mbimbiliya? (b) Yika muyitukwasa mba tuyuke ku Liji lia Zambi?
KUCHI te mwono we muupwa nyi te kushi ni Mbimbiliya? Kachi kushi ni chiyulo cha mana chize muchikusongwela hita tangwa. Kachi kushi kunyingika Zambi wamwenemwene, mwono, hanji yize muyikalingiwa kulutwe lia matangwa. Nawa kachi kushi kunyingika nichimwe hakutwala ku yize Yehova alingile hali atu ku shakulu.
2 Tunawahilila chinji hakuhona kupwa mu ukalu wacho. Mumu Yehova hanatwehe Liji lienyi Mbimbiliya. Kalakenya ngwenyi sango jamo mujikalinduluka ndo ku miaka ya mutolo. Postolo Petulu katongwele Izaia 40:8. Alioze chipwe ngwe versu yacho kuyahanjikile chinji ha Mbimbiliya, nihindu yinatale ha sango jamo. (Tanga 1 Petulu 1:24, 25.) Mutuhasa kuyuka chinji nyi mututanga Mbimbiliya mu limi lietu. Waze azanga Liji lia Zambi kanyingika kanawa chikuma chino. Hakupalika cha miaka, atu kakilikita chinji hanga alumbunune Mbimbiliya ni kuyifwambwisa chipwe ngwe kakwahungumiona ni kumona ukalu unji. Yehova kanazange atu anji ‘alilamwine, akahete ku chinyingi cha umwenemwene.’—1 Timoteu 2:3, 4.
3. Yika mutushimutwina ha mutwe uno? (Tala chizulie ha uputukilo.)
3 Mu mutwe uno mutushimutwinamo chize Liji lia Zambi lialindulukile ha (1) kwalumuka cha malimi, (2) kwoka cha mafwefwe, chize chalumwine malimi waze atu anji te akuhanjika (3) ukanjiso wa kulilumbununa. Mba kuchi chikuma chino muchitukwasa? Muchitukwasa tuzange chinji Mbimbiliya ni Mwenyayo.—Mika 4:2; A-Roma 15:4.
KWALUMUKA CHA MALIMI
4. (a) Kuchi malimi akwalumuka hakupalika cha mashimbu? (b) Kuchi tunanyingika ngwetu Zambi keshi kuzanga wika limwe limi? Kuchi wakwivwa ha chino?
4 Hakupalika cha mashimbu, malimi kakwalumuka. Maliji ni hanjikiso jimwe muyihasa kulumbunuka yuma yeka kulisa ni chize yapwile hanyima. Hanji munuhasa kwiwulukako yilweza yimwe ya mu limi lize nwakuhanjika. Che chalingiwa nawa ni ku malimi waze asonekene no Mbimbiliya. Hepreu ni Ngregu yize atu akuhanjika musono yalisa ni Hepreu ni Ngregu yize asonekene nayo Mbimbiliya. Atu amwe keshi kwivwa sango ja mu Mbimbiliya jize asonekene mu malimi a shakulu, chocho kanafupiwa Mbimbiliya yakulumbununa mu limi lio. Amwe kakunyonga ngwo nyi malilongesa Hepreu ni Ngregu yikulu, mahasa kunyingika kanawa Mbimbiliya. Alioze, kuchishi kulingiwa ngwe chize ayo akunyonga. * (Tala maliji mushi lia lifwo.) Tunawahilila chinji mumu Mbimbiliya yeswe hanji yihanda yayo hanayilumbununa mu unji wa malimi 3,000. Yehova mwe unazange hanga atu “ku mavungu eswe, ni ku minyachi yeswe, ni ku malimi eswe” ayuke ha kutanga Liji lienyi. (Tanga Usolwelo 14:6.) Kwamba pundu, chino chakutukwasa kukundama kuli Zambi yetu wa zango yoze keshi katonde.—Yilinga 10:34.
Tunawahilila chinji mumu Mbimbiliya yeswe hanji yihanda yayo hanayilumbununa mu unji wa malimi 3,000
5. Yika yahanyine ulemu Mbimbiliya King James?
5 Mbimbiliya kanayilumbununa kulita nawa ni kwalumuka cha malimi. Mbimbiliya yize yapwile yashi kutanga muze autuhwishile muuhasa kukaliwa hakupalika cha matangwa. Chilweza chimwe chili cha Mbimbiliya ya King James yize atuhwishile ha mwaka 1611. Ayi yapwile Mbimbiliya ya Inglês yize te atu anji akutanga chinji. Maliji azachishile mu Mbimbiliya ya King James yakwashile limi lia Inglês. * (Tala maliji mushi lia lifwo.)Alioze, Mbimbiliya yacho yazachishile jina Yehova mu yihela yikehe wika. Mu yihela yinji muze mwapwile jina lia Zambi mu Yisoneko ya Hepreu, Mbimbiliya yacho yiyisamo liji “MWENE,” liakusoneka ni sona jinene-jinene. Ni jikwo atuhwishile kulutwe lia matangwa yazachisamo liji “MWENE” liakusoneka ni sona jinene-jinene ha versu jimwe ja mu Yisoneko ya Ngregu ya akwa-Kristu. Hachino, Mbimbiliya King James yiyisolola pundu ngwo kumana jina lia Zambi te liatwama mu yisoneko ya Usendo Waha.
6. Mumu liaka twakusakwilila chinji ha kupwa ni Mbimbiliya ya Yisoneko Yisandu ya Chifuchi Chaha?
6 Muze Mbimbiliya ya King James ayituhwishile, maliji a Inglês waze azachishilemo te kakwivwakana kanawa kuli atu. Alioze hakupalika cha miaka, maliji amwe yaputuka kukaliwa, mba musono kali akalu chinji kwaanyingika. Yino ye yalingiwile nawa ha Mbimbiliya jikwo jize alumbunwine ku shakulu. Kashika tunasakwilila chinji hakupwa ni Mbimbiliya ya Yisoneko Yisandu ya Chifuchi Waha (Tradução do Novo Mundo das Escrituras Sagradas), yize yili ni maliji ashi. Mbimbiliya yacho hayituhwisa yeswe hanji yihanda mu malimi kuhiana 150. Chino chinalumbunuka ngwo atu anji hano hashi mahasa kutanga Mbimbiliya yino mu limi lio. Maliji aha nawa akulumbunuka kanawa waze anazachisamo kanakwase hanga sango ja Liji lia Zambi jihete ku mbunge ja atu. (Samu 119:97) Alioze Mbimbiliya ya Yisoneko Yisandu ya Chifuchi Waha yalisa ni jikwo mumu yakusa jina lia Zambi muyihela muze alisele mu Yisoneko yitangu.
LIMI LIZE ATU ANJI TE AKUHANJIKA
7, 8. (a) Mumu liaka A-Yunda anji ha sekulu yamuchitatu K.M.J. te keshi kuhasa nawa kutanga Yisoneko ya Hepreu? (b) Septuaginta ya Ngregu yika?
7 Kwoka cha mafwefwe hano hashi ha mashimbu amwe cha kwalumuna limi lize atu te akuhanjika. Alioze Yehova nihindu kanase shindakenyo hanga atu apwe ni Mbimbiliya mu limi lize ayo mevwa kanawa. Chakutalilaho, mikanda yitangu ya Mbimbiliya 39 kayisonekene kuli A-Yunda chipwe ngwetu A-Izalele. Ayo kapwile atu atangu waze “ahanyine maliji a Zambi.” (A-Roma 3:1, 2) Mikanda yacho kayisonekene chitangu mu Hepreu ni Arame. Alioze ha sekulu yamuchitatu K.M.J., A-Yunda anji te keshi kwivwa nawa Hepreu. Mumu liaka? Muze Alexandre Munene atambwile chihanda cha chifuchi, A-Ngregu yaputuka kuyula mu chifuchi chacho. Hachino, limi lia Ngregu yaputuka kulihanjika chinji mu yihela yize Ngresia te akuyula, chocho atu anji yecha kuhanjika maliji jo ni kuputuka kuhanjika Ngregu. (Daniele 8:5-7, 20, 21) A-Yunda anji no chocho alingile, mba yichipwa chikalu kunyingika Mbimbiliya mu limi lia Hepreu. Mba kuchi te mahasa kuwana Mbimbiliya mu limi lize anyingika kanawa?
8 Miaka 250, shimbu kanda Yesu asemuka, mikanda yitano yitangu ya Mbimbiliya yayilumbununa mu Ngregu. Kusulaho, Yisoneko ya Hepreu yize yasalileho neyo yayilumbununa. Mbimbiliya yacho yayivuluka ngwo Septuaginta ya Ngregu. Ayi ye Mbimbiliya yitangu wa Yisoneko yeswe ya Hepreu.
9. (a) Kuchi Septuaginta ni Mbimbiliya jize alumbunwine chitangu jakwashile atu kutanga Liji lia Zambi? (b) Yisoneko yika ya Hepreu yize wakuzanga chinji kutanga?
9 Septuaginta yakwashile A-Yunda waze te akuhanjika Ngregu hanga atange Yisoneko mu limi lia Ngregu. Uchinyongenu chiseke apwile nacho ha kwivwa hanji ha kutanga Liji lia Zambi mu limi lio ene? Hakupalika cha mashimbu, yihanda yikwo ya Mbimbiliya yayilumbununa mu malimi akwo waze atu te anyingika chinji ngwe, Siriaku, Gotika ni Latinu. Chino chakwashile atu anji kutanga ni kunyingika kanawa Liji lia Zambi, chocho yaputuka kulizanga chinji. No yapwa ni versu jize te akuzanga chinji, ngwe chizechene twakulinga musono. (Tanga Samu 119:162-165.) Chochene, Liji lia Zambi liakulinduluka chipwe ngwe yuma ya mafwefwe muyalumuka nawa chipwe malimi waze atu anji akuhanjika malumuka.
UKANJISO WA KULUMBUNUNA MBIMBILIYA
10. Mumu liaka ha mashimbu a John Wycliffe, atu anji te keshi kuhasa kutanga Mbimbiliya?
10 Hakupalika cha miaka manguvulu anji kesekele kukanjisa atu kutanga Mbimbiliya. Alioze, malunga waze te akuvwila Zambi woma kakechele kukalakala hanga Mbimbiliya yihete kuli atu eswe. Umwe wa kuli ayo te John Wycliffe, yoze te watwama mu Inglaterra ha sekulu 14. Aye yamona ngwenyi atu eswe katamba kutanga Mbimbiliya.Ha mashimbu jenyi, atu anji mu Inglaterra te kanda achivwa kama sango ja Mbimbiliya mu limi lio. Mumu Mbimbiliya yapwile ni ndando yinji, nawa te kakuyisoneka ku moko. Kashika, Mbimbiliya yapwile wika kuli atu akehe. Chikwo nawa, atu anji ha mashimbu jacho te kechi kuhasa chipwe kuyitanga. Atu waze te akuya ku yingeleja kapwile ni kwivwa wika matanga Mbimbiliya mu limi lia Latinu, alioze limi liacho te kalinyingikine kuli atu waze kalilongesele. Kuchi Yehova asele shindakenyo mba atu apwe ni Mbimbiliya mu limi lio?—Yishima 2:1-5.
John Wycliffe ni atu akwo kazangile atu eswe apwe ni Liji lia Zambi. Shina ni yena che unazange? (Tala paragrafu 11)
11. Kuchi atu evwile ha Mbimbiliya yize alumbunwine Wycliffe?
11 Ha mwaka 1382, John Wycliffe ni atu akwo yalumbununa Mbimbiliya mu Inglês. Mbimbiliya yacho yayinyingikisa chinji kuli atu waze te avuluka ngwo A-Lolardu. Atu jacho kazangile chinji Mbimbiliya. Yenda hashi ni kuya ku hita limbo mu Inglaterra yeswe. Yatangila atu Mbimbiliya ni kwaaha-ha kopia ja mikanda yimwe. Mulimo wo wakwashile kunyingikisa chinji Mbimbiliya kuli atu.
12. Kuchi mangana a yingeleja evwile ha Wycliffe ni mulimo wenyi?
12 Mangana a yingeleja yevwila kole Wycliffe, Mbimbiliya yize alumbunwine ni atu waze te akalakalano. Ayo yayanjisa chinji A-Lolardu ni kwonona Mbimbiliya ya Wycliffe yeswayo apwile ni kuwana. Nyi muze te Wycliffe hafwa kulu, mangana a yingeleja yamwamba ngwo kali mukwa-kole wa Yingeleja jo. Chocho ayo yashikulula yifwaha yenyi, yayocha ni kumbila uto wayifwaha yacho mu lwiji. Alioze atu anji kazangile kutanga ni kunyingika Liji lia Zambi, kashika Yingeleja yiyihona kwaakwika. Ha kulakaji lia miaka yize yasulileho, atu mu Europa ni mu yifuchi yikwo ya hashi yaputuka kulumbununa Mbimbiliya ni kuyituhwisa mu malimi waze atu anji te akuhanjika.
“YOZE WAKUNULONGESAHANGA NUKALUMBUNUKE”
13. Ha yika mutuhasa kupwa ni ushindakenyo? Kuchi chino chakukolesa ufulielo wetu?
13 Mbimbiliya kayihwimine kuli Zambi. Alioze chino kuchalumbunukine ngwo Mbimbiliya ya Septuaginta, Mbimbiliya ya Wycliffe, King James ni Mbimbiliya jikwo jeswe kajihwima kuli Zambi. Alioze muze mutuhengwola ha chize alumbunwine Mbimbiliya jino, mutumona pundu ngwetu Liji lia Zambi linanunga lume ngwe chize alakenyene mwene. Chino chakutukwasa tufuliele chinji ngwetu yuma yikwo yeswe yize Yehova alakenya muyikamanunuka.—Yoshua 23:14.
14. Kuchi yize twakulilongesa hakutwala ku Mbimbiliya muyikolesa zango lietu kuli Zambi?
14 Nyi twanyingika chize Yehova afungile Liji lienyi, ufulielo ni zango lietu muli iye muyikola chinji. * (Tala maliji mushi lia lifwo.) Mumu liaka Yehova atuhele chitangu Mbimbiliya mba hanyima alakenye kuyifunga? Mumu katuzanga chinji nawa kanazange kutulongesa chize mutuyuka ku mwono wetu. (Tanga Izaia 48:17, 18.) Chino chakutukwasa hanga tumuzange ni kumwononokena.—1 Yoano 4:19; 5:3
15. Yika mutulilongesa ha mutwe uze muusulaho?
15 Kwamba pundu, twakuzanga chinji Liji lia Zambi. Kuchi mba mutuhasa kuyuka ha kulitanga? Kuchi mutuhasa kukwasa waze twakuwana mu munda hanga azange Mbimbiliya? Kuchi mandumbu akulongesa mu chikungulwila mahasa kupwa ni shindakenyo ngwo yuma yeswe analongesa yinakatuka mu Liji lia Zambi? Mutwe muusulaho muukumbulula yihula yino.
^ kax. 4 Tala mutwe wakwamba ngwo, “Shina Unafupiwa Kulilongesa Hepreu ni Ngregu?” mu Kaposhi wa Kutalila wa ingles 1 wa Novembro, 2009.
^ kax. 5 Maliji anji a Inglês waze anyingika kanawa, ali ngwe, “Yafulamana hashi” (fell flat on his face), “kowa lia mazo jami” (the skin of my teeth), ni “zukwilenu mbunge yenu” (pour out your heart), kakatukine mu Mbimbiliya ya King James.—Kwalula 22:31; Yombi 19:20; Samu 62:8.
^ kax. 14 Tala mushete “Yitale Yena Mwene!”
