1, 2. (a) Yika muyihasa kulingiwa nyi mutu mahona uhumikizo? (b) Mumu liaka twatamba kushimutwina chikuma cha uhumikizo?

KULIHUMIKIZA, chapwa chitanga chize Yehova Zambi mahasa kutwaha. (A-Ngalashia 5:22, 23) Yehova kakusolola uhumikizo ni ungunu weswe. Alioze yetu ka, mumu tuli yihenge. Musono, kuhona uhumikizo che chinaneha mbwanja yinji ku mwono wa atu. Muchihasa kulalwisa mutu ahone kulinga milimo yilemu, hanji kuhona kulilongesa kanawa ku shikola chipwe kukalakala chipi ku mulimo. Nawa muchihasa kulingisa mutu kwamba yuma yipi, kuzengewa, kuneha mbwanja, kulilakula, kutambula chinji mikuli, kupwa ni ndako jipi, kumukasa mu kamenga, kulinehena yikola ya mbunge, misongo yize yakwiza ku utanji ni kupwa ni ufumba uze te kazangile.—Samu 34:11-14.

² Atu waze keshi kulihumikiza kakuneha milonga hali ene ni hali akwo. Nawa hakupalika cha mashimbu, uhumikizo wakutepuluka kuli atu. Kutwatambile kukomoka, mumu Mbimbiliya hi yinambe ngwo, kuhona uhumikizo muchipwa chilayi chize muchikasolola ngwo tuli “ha matangwa a kusula.”—2 Timoteu 3:1-3.

3. Mumu liaka twatamba kulihumikiza?

 ³ Mumu liaka twatamba kulihumikiza? Mumu lia yikuma yaali yilemu. Chitangu, atu waze akufunga manyonga jo kanji-kanji keshi kupwa ni yipikalo yinji ku mwono wo. Nawa chili chashi kuli ayo kutwama kanawa ni akwo ni kwehuka ufwatulo, kulipikala ku mbunge ni kuhonga. Chamuchiali, mba tupwe masepa apema a Zambi, twatamba kwehuka manyonga ni usolo upi. Ayi ye Alama ni Eva ahonene kulinga. (Uputukilo 3:6) Ngwe Alama ni Eva, atu anji musono kali ni yipikalo yinji, mumu keshi kulihumikiza.

4. Yika muyihasa kukolweza waze keshi kuhasa kulifunga ene ku usolo wo upi?

⁴ Yehova kananyingika ngwenyi tuli yihenge nawa ngwenyi chapwa chikalu kuli yetu kupwa yihumikiji. Alioze, kanazange kutukwasa hanga twehuke usolo wetu upi. (1 Mianangana 8:46-50) Mumu lia zango lienyi, kanakolweza waze, ha mashimbu amwe, keshi kuhasa kufunga manyonga ni usolo wo. Mu mutwe uno mutulilongesa chilweza cha Yehova hakutwala ku uhumikizo. Mutushimutwina nawa yilweza ya Mbimbiliya yipema ni yipi, ni kuhitulula yikuma yipema yize muyihasa kutukwasa.

5, 6. Chilweza chika chize Yehova atwaha?

⁵ Kulihumikiza cha Yehova chingunu, mumu iye kapwa mungunu mu yuma yeswe. (Shimbi Yamuchiali 32:4) Alioze, etu tuli yihenge. Chipwe chocho, twatamba kuhengwola chilweza chenyi cha kulihumikiza, hanga tumwimbulule kanawa. Chino muchitukwasa tunyingike chize mutulihumikiza muze mukulingiwa yuma yize muyituvwisa kupiha. Yilweza yimwe yika yize yasolola uhumikizo wa Yehova?

⁶ Achinyonga yize Yehova alingile ha uhulia wa Satana mu Endene. Kukalisa cha Ndiapu kota chanehene yikola, uli ni kaleleso hali tuvumbi eswe a Yehova mu malilu. Ni yena hanji muhasa kwivwa chocho, muze mumona lamba lize Satana ananeha hano hashi. Alioze Yehova kalihulumbile chinji. Iye yalinga wika yuma yalita. Yehova kapwa makoke kutenuka nawa yasolola ungunu wenyi hakutwala ku chikuma cha uhulia wa Satana. (Kutuhuka 34:6; Yombi 2:2-6) Mumu liaka? Yehova kaneche kupalike shimbu, mumu kazangile niumwe akafwe alioze “eswe alikonyeke.”—2 Petulu 3:9.

7. Yika mutuhasa kulilongesa ha chilweza cha Yehova?

⁷ Chilweza cha Yehova chatulongesa ngwo twatamba kunyonga shimbu kanda tuhanjika nawa kutwatambile kulusuka ni kulinga yuma. Kashika muze mutufupa kulinga chimwe chuma chilemu, twatamba kupwa ni shimbu lia kunyonga kanawa ha chikuma chacho. Tulembenu ni kwita mana mba tuhanjike hanji tulinge chuma chalita. (Samu 141:3) Nyi tuli ni uli hanji ufwatulo, chakupwa chikalu kulihumikiza. Kashika atu anji akuliseha ha yize ambile hanji alingile chakuhona kunyonga!—Yishima 14:29; 15:28; 19:2.

8. (a) Kulihi mutuhasa kuwana yilweza yipema ya uhumikizo? (b) Yika yakwashile Yosefwe mba akumbe cheseko muze pwo lia Potifwa afupile kulisumbakenya nenyi? (Tala chizulie ha uputukilo.)

⁸ Yilweza yika ya Mbimbiliya yize yinashindakenya ha ulemu wa uhumikizo? Chilweza chimwe chili cha Yosefwe mwana wa Yakomba. Iye kakumbile cheseko muze te anakalakala ku zuwo lia Potifwa, kapitau wa tufunga twa Falau. Pwo lia Potifwa yaputuka kuzanga Yosefwe, mumu kapwile ni ‘mujimba upema, nawa mupema kumeso,’ chocho yaputuka kumweseka ha yisuho yinji. Yika yakwashile Yosefwe kukumba cheseko chacho? Kota iye kasele shimbu hanga anyonge kanawa ha yize te muyihasa kulingiwa nyi te malinga yize afupile pwo wacho. Kashika, muze amukwachile ku mazalo, iye yamutusuka, yachina. Yosefwe yamba ngwenyi: “Kuchi munguhasa kulinga ungulungulu upwa haha nikuvulumuna Zambi?”—Uputukilo 39:6, 9; tanga Yishima 1:10.

9. Kuchi mutuhasa kulilulieka mba tukumbe yeseko?

⁹ Yika twalilongesa ha chilweza cha Yosefwe? Twalilongesa ngwo, nyi matweseka hanga twehuke shimbi ja Zambi, twatamba kusa tachi hanga tuchikumbe. Amwe, shimbu kanda achipwa Yela ja Yehova, te kapwile yipulutu, yizengi, akwa-kunwa makanya ni yitumbo yakuzengewesa, yitanji yitanga yikwo yipi. Chipwe muze hapapachisa, ha mashimbu amwe mahasa kupwa mu cheseko cha kulinga yuma yacho. Nyi chino muchilingiwa kuli yenu, nyongenu ha chize usepa wenu ni Yehova muuhasa kupiha nyi nwalinga yuma yacho. Munuhasa kusa tachi nunyingike yize yakunusa mu cheseko ni kuwana mwakuyehukina. (Samu 26:4, 5; Yishima 22:3) Nyi nuli mu chimwe cheseko, etenu Yehova anwehe mana ni uhumikizo wa kuchikumba.

10, 11. (a) Yika yakulingiwa kuli akweze anji ku shikola? (b) Yika muyihasa kukwasa akweze akwa-Kristu hanga akumbe yeseko ya kwehuka shimbi ja Zambi?

¹⁰ Yize yalingiwile kuli Yosefwe, yinalingiwa ni kuli akweze anji a Yela ja Yehova. Chilweza chimwe chili cha Kim. Akwo akwa-shikola kanji-kanji te kakuhanjika ha utanji uze te akulinga kusongo lia poso. Kim te keshi ni sango ja mutapu awu, jakwalweza. Mba yamba ngwenyi, kulisa ni akwo ha mashimbu amwe te chamuvwisa ngwe kali ukawenyi, nawa ngwenyi akwo akwa-shikola kapwile ni kumwamba ngwo chihepuke mumu te keshi ni kasendo. Alioze, Kim kasolwele mana. Aye kanyingikine ngwenyi mbunge ya akweze yakuzanga chinji utanji. (2 Timoteu 2:22) Alongi akwo te kakumuhula-hula evwe nyi kanda achilimona kama ni lunga. Chino chamukwashile kulumbununa yize te keshi kuzangila kulinga utanji. Twakuwahilila chinji akweze jetu akwa-Kristu waze akwehuka utanji, mba ni Yehova neye kakwevwila kuwaha!

¹¹ Mu Mbimbiliya muli yilweza ya atu waze kakahashile kwehuka cheseko cha kulinga  utanji. Nawa yinasolola yuma yipi yize yakulingiwa, nyi mutuhona uhumikizo. Nyi munupwa mu cheseko ngwe cha Kim, nyongenu hali mukweze wa chihepuke yoze uli ha Yishima kapitulu 7. Nyongenu nawa hali Amnone ni ha lamba lize liejile mumu lia yitanga yenyi. (2 Samuele 13:1, 2, 10-15, 28-32) Yisemi, munuhasa kukwasa ana jenu hanga apwe ni uhumikizo ni mana ha kushimutwina yilweza yino mu uwayilo wenu wa mu usoko.

12. (a) Kuchi Yosefwe afungile mbunge yenyi muze alitakanyine ni mandumbu jenyi? (b) Ha yikuma yika twatamba kufunga manyonga jetu?

¹² Ha chisuho chikwo, Yosefwe kahichikile nawa chilweza chipema cha uhumikizo. Chino chalingiwile muze mandumbu jenyi ayile mu Engitu ni kulanda kulia. Mba anyingike kanawa yize te yili mu mbunge yo, Yosefwe yahona kwaalweza ngwenyi iye kali ndumbwo. Mba muze aputukile kulipikala chinji, yasosoloka hali mandumbu jenyi ni kuya ni kulila kwa ukawenyi. (Uputukilo 43:30, 31; 45:1) Nyi umwe ndumbu matulinga chuma chize muchituvwisa kupiha, twimbululenu chilweza cha Yosefwe cha uhumikizo chize muchitukwasa hanga twehuke kwamba hanji kulinga chuma chize muchikatunehena yinyengo kulutwe lia matangwa. (Yishima 16:32; 17:27) Hanji tukwete usoko yoze hanasosolola mu chikungulwila. Nyi chocho, twatamba kulifunga hanga tuhone kupwa ni kuhanjika nenyi chinji. Achi muchihasa kupwa chikalu. Alioze muchipwa chashi, nyi mutwiwuluka ngwetu tunembulula chilweza cha Yehova ni kulinga yize iye anatwite.

13. Malongeso aka mutuhasa kuwana ha yize yalingiwile ku mwono wa Ndawichi?

¹³ Mutuhasa nawa kuwana longeso ha chilweza cha Mwanangana Ndawichi. Muze Saulu ni Shimei amusosombele, Ndawichi kakapihililile hanji kuzachisa wata wenyi hanga alinge upi. (1 Samuele 26:9-11; 2 Samuele 16:5-10) Chipwe chocho, Ndawichi kakasolwele uhumikizo mashimbu eswe. Tunachinyingika muze twakutanga ha shili yize alingile ni Bate-Shipa ni yize alingile ha kuzo ya Nabale. (1 Samuele 25:10-13; 2 Samuele 11:2-4) Mutuhasa kuwana malongeso alemu hali Ndawichi. Chitangu, chipi-chipi, tulayi waze akufunga atu ja Zambi katamba kupwa ni uhumikizo hanga azachise kanawa chiyulo chize alinacho. Chamuchiali, niumwe wakuhi watamba kulilamba ha pambo ni kunyonga ngwenyi nyi mamweseka kechi kufwa mu muheto.—1 A-Korindu 10:12.

14. Yika yalingiwile kuli umwe ndumbu, nawa mumu liaka yuma mutulinga ha mashimbu amutapu awu yili yilemu?

¹⁴ Kuchi mutuhasa kupwa ni mbunge yakulihumikiza? Uchivwenu yize yalingiwile kuli Luigi. Mashinyi amwe yapupa kunyima lia mashinyi jenyi. Chipwe ngwe mukwo mwe wapupile mashinyi jenyi, alioze mutu  wacho yaputuka kutenuka ngwenyi alilambe. Luigi yalemba kuli Yehova amukwase kuhwima mbunge, ni kweseka kuunjisa mbunge ya lunga wacho. Alioze lunga wacho yanunga ni kukalumwoka. Luigi yasonekena chizavu cha waze makafuchila yoze lunga ni kumuhichika ni ufwatulo unji. Hanyima ya poso, Luigi yaya ni kumeneka umwe pwo. Kuma pwo liacho te pwo lia lunga yoze wendesele mashinyi waze amupupile! Lunga wacho yevwa sonyi ni kulikonekena ha yize alingile. Yalweza Luigi ngwenyi malweza akwa-kumufuchila hanga akalulieke mashinyi a Luigi. Lunga wacho yapwa ha longeso lia Mbimbiliya, nawa yalizanga chinji. Hamukunda wa chino, Luigi yamona ulemu wa uhumikizo wenyi, hanyima ya ponde apwilemo. Nyi te neye kevwile uli ha chikuma chacho kachi yuma yapihile chinji.—Tanga 2 A-Korindu 6:3, 4.

15, 16. Kuchi longeso lia Mbimbiliya mulihasa kutukwasa hamwe ni asoko jetu hanga tupwe ni uhumikizo?

¹⁵ Kulilongesa kanawa Mbimbiliya matangwa eswe muchihasa kukwasa mukwa-Kristu kupwa ni uhumikizo. Iwuluka yize  Zambi ambile kuli Yoshua ngwenyi: “Mukanda uno wa shimbi kanda ukakatuka mu kanwa lie, alioze ukaupukune mwalwa ni ufuku, ukalinge kanawa nikulita ni yize yeswe yinasonewamo. Chocho muwahisa jila ye; chocho yuma ye muyiwaha.” (Yoshua 1:8) Mba kuchi longeso lia Mbimbiliya mulihasa kutukwasa hanga tupwe yihumikiji?

¹⁶ Tunanyingika ngwetu mu Mbimbiliya muli yilweza yize yinasolola chize mutuyuka muze mutupwa ni uhumikizo ni lamba lize mutumona nyi kutushi nawo. Yehova katumine kusoneka yilweza yino hanga yitukwase ku mwono wetu. (A-Roma 15:4) Muchipwa mana kuli yetu kutanga, kulilongesa, ni kunyonga kanawa ha yilweza yacho. Tusenu tachi hanga tunyingike chize muyihasa kutukwasa hamwe ni asoko jetu. Twitenu Yehova atukwase kukaula yiyulo yamu Mbimbiliya. Nyi mutumona ngwetu kutushi kulihumikiza ha chimwe chikuma, tutayizenu. Hanyima, tulembenu ha chikuma chacho, ni kusa tachi hanga tumone mwakulifungila. (Tiangu 1:5) Tuhengwolenu mikanda yetu hanga tuwane yiyulo ya mana yize muyihasa kutukwasa.

17. Mu mutapu uka yisemi mahasa kukwasa ana jo hanga apwe ni uhumikizo?

¹⁷ Yisemi, kuchi munuhasa kukwasa ana jenu hanga apwe ni uhumikizo? Nunanyingika ngwenu, ana jenu kakasemukine ni uhumikizo. Kashika, nwatamba kulongesa ana jenu yitanga yipema kupalikila mu yilweza yenu. (A-Efwesu 6:4) Nyi munumona ngwenu ana jenu keshi ni uhumikizo, uchilihulenu nyi nwakwaaha chilweza chipema ha chikuma chacho. Munuhasa kusolola yilweza yipema kuli ana jenu hakutuhuka mu munda hita shimbu, kwiza ku kukunguluka, ni kulinga uwayilo wa mu usoko. Nawa kunwatambile kwivwa woma wakuhanjika ni ana jenu muze mukusoloka chimwe chakuhanjika no! Yehova kasele shimbi hali Alama ni Eva. Shimbi jacho te mujakwasa hanga avumbike wata wa Yehova. Ni yisemi nawa, muze mafumba ana jo, ni kwaasolwela chilweza chipema, chino muchihasa kulongesa ana kupwa ni uhumikizo. Kupwa ni zango ha wata wa Zambi ni kuvumbika shimbi jenyi yili yuma yilemu yize nwatamba kukwasa ana jenu hanga apwe nayo.—Tanga Yishima 1:5, 7, 8.

18. Mumu liaka twatamba kusakula masepa jetu ni mana?

¹⁸ Chipwe ngwe tuli yisemi hanji ka, tulieswe twatamba kusakula masepa jetu ni mana. Nyi masepa jetu kakuzanga Yehova, ayo matukolweza hanga tulinge yize yalita ni kwehuka yuma yipi. (Yishima 13:20) Yilweza yo yipema muyitukwasa hanga twimbulule uhumikizo wo. Nawa yitanga yetu yipema muyaakolweza chinji. Kulihumikiza mutulilongesa muchitukwasa kupwa ni utayizo wa Zambi, kuwahilila ku mwono ni kushimutwina yuma yipema ni atu waze twazanga.