Felisa: Nasemukine mu umwe usoko uze te kuushi upite unji mu Espanha. Asoko jami te kakulembela mu Catolica nawa te kakulihana chinji ku yuma Zambi. Kwamba umwenemwene, asoko jami 13 te asasendote hanji mananga. Musonyi wa mama kapwile sasendote nawa te longeshi ku shikola ya Catolica. Muze matu afwile, Papa João Paulo II kamunangamishine ni kumusa mu chihela cha asandu. Tata te fuli, alioze mama te njimi. Katuseme tuli nake, ami mwe mwana-mutangu.

Muze te nguchili miaka 12, jita yiputuka mu Espanha. Ha kuhwa cha jita, tata yamusa mu zuwo lia ususu mumu nguvulu te keshi kuzanga yuma ya mafwefwe yize tata te akwamba. Chapwile chakalu kuli mama kuwana kulia chakumbana hanga atulise yetweswe. Ha chino, mama yatuma anakwetu amapwo atatu Araceli, Lauri, ni Ramoni hanga aye ni kutwama ni mangana a mapwo ku yingeleja mu mbonge ya Bilbao. Kuze te mapwa ni kulia chinji.

Araceli: Ha shimbu liacho, ami te nguli ni miaka 14, Lauri 12 alioze Ramoni 10. Twevwile usona unji wa usoko wetu. Ku yingeleja mulimo wetu wapwile wika kukosa ni kukomba-komba mu mazuwo. Hakupalika cha miaka yaali, mangana amapwo yatutuma ku yingeleja yinene ya ku Zaragoza hanga tupwe ni kufunga tushinakaji. Te twakukalakala chinji ni kukomba-komba mu chikuku, nawa mulimo wacho te wakutuhongesa chinji.

Felisa: Muze atumine anakwetu ku yingeleja ya ku Zaragoza, mama ni matu, yoze te sasendote mu chihunda chetu, yakwata chiyulo chakungutumako. Kazangile kunguhandununa ni umwe mukweze yoze te wakunguzanga. Nawahilile chinji kuya ni kutwama ku yingeleja mumu te nakuzanga Zambi. Te nakuya-ya matangwa eswe ku yingeleja, nawa nazangile kupwa mishionaliu wa Catolica ngwe musonyami yoze te watwama mu Africa.

Alioze ku yingeleja kuze nayile, yingumona ngwami te kuchichi kuhasa kulinga yuma yinji yize te nakunyonga. Mangana amapwo te keshi kungukolweza hanga ngulingile Zambi mu chifuchi cheka, ngwe chize napwile ni kunyonga. Kashika, hakupalika cha mwaka umuwika, yingufuna ku zuwo hanga ngufunge matu, yoze te sasendote. Te nakumulingila milimo ya ku zuwo, ha ufuku weswe te twakulemba hamuwika Rosário. Nawa te nakuzanga kululieka yitemo mu yingeleja ni kululieka tuponya a Maria ni “asandu.”

Araceli: Muze napwile ku Zaragoza, yingukwata yiyulo yitangu ya kupwa ngana. Chocho mangana amapwo yakwata chiyulo cha kunguhandununa ni ma pangiami. Kashika angutumine ku yingeleja ya ku Madrid alioze Lauri yamutuma ku yingeleja ya ku Valencia. Ramoni yasala mu Zaragoza. Mu Madrid, yingukwata nawa yiyulo yamuchiali hanga ngupwe ngana. Atu anji ejile ni kutwama ku yingeleja, ngwe alongi ni tushinakaji. Yitupwako ni milimo yinji ya kulinga. Te nakukalakala ku shipitali ya ku yingeleja.

Te nakuzanga chinji kupwa ngana. Nanyongene ngwe mutupalikisa mashimbu anji kutanga chinji Mbimbiliya ni kulilongesayo. Alioze nevwile chinyengo. Mumu kwakapwile mutu niumwe yoze wapwile ni kutanga Mbimbiliya chipwe kuhanjika hali Zambi ni Yesu. Nalilongesele yimwe ndambu ya Latim, ni kulilongesa mwono wa “asandu” amu yingeleja ya Catolica ni kuwayila Maria. Alioze mashimbu anji, te twakwaapalikisa wika ku milimo.

Yinguputuka kwivwa chinyengo ni kulipikala. Nawa Yingunyonga ngwami, shimbu ngukalakale ku yingeleja ni kupwisa atu eka pichi, natamba kufupa mbongo hanga ngukwase asoko jami. Kashika nahanjikile ni kasongo ka amama hakutwala ku nyonga liacho ni kumulweza ngwami, ngunazange kuya kwami ku zuwo. Alioze aye yangukangila mu chimwe chipatulo. Aye kanyongene ngwe chino te muchalumuna manyonga jami hanga nguchine kuya ku zuwo.

Mangana yangutuhwisa mu chipatulo, alioze muze amwene ngwo nihindu ngunazange kutuhuka ku yingeleja, ayo yangufunyisa nawa mu chipatulo chacho. Muze te ha chilinga yisuho yitatu, yangwamba ngwo, mungutuhuka nyi nasoneka maliji akwamba ngwo: “Ami ngunatuhuka ku yingeleja mumu ngunazange kuwayila Satana alioze hi Zambi ko.” Nevwile yikola yinji ku mbunge. Mumu te ngunazange chinji kutuhukako, alioze te chichikuhasa kusoneka maliji jacho. Hi kusongo, yingwamba ngwami, ngunazange kuhanjika ni sasendote, chocho yingumulweza yuma yize te yinalingiwako. Aye yalweza kafunga hanga angufunyise ku yingeleja ku Zaragoza. Muze nakumbanyishineko amwe tukweji, hi yangwecha hanga nguye ku zuwo. Ha shimbu liacho Lauri ni Ramoni no yatuhuka ku yingeleja.

Felisa: Hakupalika cha amwe mashimbu yinguya ku ulo ni kuya ni kutwama ku Cantabria, yimwe mbonge mu Espanha. Nihindu te nakuya-ya ku yingeleja mashimbu eswe. Ha Liayenga limwe mu yingeleja, sasendote yevwa uli unji yakalumuka ngwenyi, “Talenu mukanda au!” Aye yatusolwela mukanda A Verdade Que Conduz à Vida Eterna. Yamba ngwenyi, “Nyi umwe mutu manwaha mukanda uno, nuuneha kuno, nyi ka nuumbila!”

Ami te kuchishi ni mukanda wacho, chocho yinguzanga kupwa nawo. Ha mashimbu akehe wika, mapwo aali yeza ku zuwo liami. Mapwo jacho te Yela ja Yehova, yangwaha mukanda wacho. Yinguutanga ha ufuku uze-wene. Muze mapwo jacho afunyine ni kungumeneka, o yanguhula nyi te ngunazange kulilongesa Mbimbiliya, yingwamba ngwami, ewa ngunazange.

Mashimbu eswe te nakuzanga kuhalisa Zambi. Chocho yingulilongesa umwenemwene hakutwala kuli Yehova, ni kuputuka kumuzanga chinji. Nazangile kulweza atu eswe hakutwala kuli iye. Ha mwaka 1973, yangupapachisa. Ha mashimbu waze te nakupwa ni uhashi te nakuhanjika ni asoko jami hakutwala ku umwenemwene. Alioze asoko jami, chipi-chipi pangiami Araceli, yanunga ni kwamba ngwenyi yuma yize te nafuliela yili ya mahuza.

Araceli: Nevwile uli ni chinyengo hakutwala ku yingeleja yami mumu kapwile ni kungumwesa lamba ku yingeleja. Chipwe chocho, nihindu yingununga ni kuya ku yingeleja Liayenga lieswe, ni kulemba Rosário matangwa eswe. Nihindu te nakuzanga kunyingika kanawa Mbimbiliya, ni kwita kuli Zambi hanga angukwase. Mba hi Felisa yangulweza yize te akulilongesa. Te kakuwahilila chinji ha yize te akufuliela, yingunyonga ngwe te kanazaluka. Te kuchishi kutayiza yuma yize te akungulweza.

Hakupalika cha matangwa, yingufuna ku Madrid hanga ngukalakalileko, kuzekwene yinguya ulo. Hakupalika cha miaka, yingumona ngwami, atu waze te akuya-ya ku yingeleja mashimbu eswe te keshi kutwama kulita ni malongeso ja Yesu. Chocho, yingwecha kuya ku yingeleja. Yingwecha nawa kufuliela muli “asandu” hanji ku chitende cha kahia, nawa yingunyingika ngwami asasendote keshi ni uhashi wa kukonekena shili ya atu. Yingumbila tuponya eswe a yingeleja waze napwile no. Te chanyingikine nyi yize napwile kulinga yili yamwenemwene. Nevwile chinyengo, alioze yingununga ni kulemba kuli Zambi ngwami: “Ngunazange kukunyingika kanawa. Ngukwase kama!” Ngunewuluka chize Yela ja Yehova apwile ni kungwongwela ku chikolo cha zuwo liami, alioze te kuchishi kwaazulwila. Mumu te kuchishi kufuliela nawa uwayilo niumwe.

Pangiami Lauri yaya ni kutwama mu França, alioze Ramoni yanunga mu Espanha. Ha mwaka 1980, o yaputuka kulilongesa Mbimbiliya ni Yela ja Yehova. Namwene ngwami, ayo te keshi kunyingika ngwo kanalilongesa yuma yinji ya mahuza ngwe chize chapwile kuli Felisa. Hakupalika cha matangwa, yingunyingika Angelines, umwe mwenyembo wami, yitupwa masepa apema. Neye te Chela cha Yehova. Angelines ni mukwo-lunga te kakunguhula chinji nyi te munguzanga kulilongesa Mbimbiliya ni ayo. Ayo yanyingika ngwo chipwe ngwe te nakwaalweza ngwami kuchishi kupala uwayilo niumwe, alioze te nakuzanga chinji kunyingika yize Mbimbiliya yakwamba. Mba kusongo, yingwaalweza ngwami: “Muchilita. Alioze mungutayiza kulilongesa ni yenu nyi nazachisa wika Mbimbiliya yami!” Napwile ni Mbimbiliya ya ulumbunwiso wa Nácar-Colunga.

Felisa: Muze angupapachishile ha mwaka 1973, mu Santander mbonge yinene ya Cantabria te muli wika Yela ja Yehova 70. Te twakuya kusuku ni kwambujola kuli atu eswe mu membo anji amu mbonge. Te twakuya-ya mu tulela mba hi mutuya mu mashinyi ku limbo ni limbo.

Ha miaka yeswayi, nalilongesele Mbimbiliya ni atu anji, alioze 11 yaapapachisa. Anji akuli atu jacho te kakulembela mu Catolica. Ha kuhanjika no te natamba kupwa ni uhomboloji. Chizechene ngwe yami, ayo te kanafupiwa shimbu hanga anyingike ngwo yize te akufuliela ya mahuza. Te ngunanyingika ngwami, Mbimbiliya ni spiritu yisandu ya Yehova ye wika muyihasa kukwasa mutu kwalumuna manyonga jenyi ni kunyingika umwenemwene. (A-Hepreu 4:12) Lunga liami Bienvenido, te policia, aye kamupapachishile ha mwaka 1979, nawa mama kaputukile kulilongesa Mbimbiliya shimbu te kanda achifwa.

Araceli: Muze naputukile kulilongesa Mbimbiliya ni Yela ja Yehova, namwene ngwe kuchichi kuhasa kutayiza yize te akulongesa. Alioze ha kupalika cha mashimbu, hi kuchapwile nawa ni nyonga lino. Yela ja Yehova keshi kulongesa wika Mbimbiliya alioze kakulinga yize akulongesa. Ufulielo wami mu Mbimbiliya yiputuka kukola nawa yinguputuka kuwahilila chinji ku mwono. Muze amwe enyembo jami amwene kwalumuka chami, yamba ngwo, “Araceli, nunga mu jila yize wasakula!”

Ngunewuluka muze nalembele ngwami, “Yehova ngunakusakwila, mumu kuwangumbilile alioze wangwaha uhashi unji hanga nguwane yize te ngunafupu​—we umwenemwene wa mu Mbimbiliya.” Nawa yingwita ukonekeno kuli pangiami Felisa ha yuma yipi yize te nakumwamba. Chize haze, shimbu te tuzwele umwe ni mukwo, te twakuwahilila kuhanjika hakutwala ku yuma ya mu Mbimbiliya. Ha mwaka 1989, yangupapachisa, te nguli ni miaka 61.

Felisa: Haliapwila nguli ni miaka 91. Lunga liami hanafu, nawa kuchishi kukalakala chinji ngwe chize napwile ni kulinga. Alioze nihindu nguchinunga ni kutanga Mbimbiliya matangwa eswe, ni kuya kukunguluka ni kwambujola sango lipema kulita ni uhashi wami.

Araceli: Kota amu napwile ngana, kashika nakuzanga kuhanjika hakutwala kuli Yehova kuli asasendote hamwe ni mangana amapwo eswe waze nakuliwanano. Amwe akuli ayo nakuhanjika no kanawa, nawa anji hanatambula mikanda ni tuposhi twetu. Ngunewuluka sasendote umuwika. Muze nahanjikile nenyi ha shimbu likehe, yatayiza yuma yeswe yize namulwezele. Chocho, yanguhula ngwenyi: “Miaka yino ngulinayo kuli munguya nawa? Mba kuchi mamba atu waze nakulongesa ni asoko jami?” Ami yingumukumbulula ngwami: “Yika Zambi manyonga ha yino?” Aye yanyingika ngwenyi te ngunahanjika umwenemwene, nawa yinguhasa kumona chinyengo chize te anevu. Alioze chino te chinasolola ngwo iye te keshi ni hamu lia kwalumuna mwono wenyi.

Kuchichi keza kavulama muze mukwetu-lunga angwambile ngwenyi kanazange kuya hamwe ni yami ku kukunguluka. Muze ayile ku kukunguluka chitangu te kali ni miaka 80, kukatuka hoho, aye te keshi kuhona kukunguluka. Yalilongesa Mbimbiliya ni kuputuka kwambujola sango lipema. Nguli ni yuma yipema yinji ya kwiwuluka muze te twakwambujola sango lipema hamuwika. Aye yafwa muze te kwasala tukweji aali hanga amupapachise.

Felisa: Muze naputukile kuwayila Yehova, ma pangiami atatu kapwile ni kulimika ni yami. Alioze kulutwe lia matangwa, no yatayiza umwenemwene. Chino che chuma chipema chize hichinalingiwa ku mwono wami. Ha chino, te mutuwahilila kupalikisa mashimbu ni kuhanjika hamuwika hakutwala kuli Zambi yetu wa zango, Yehova ni Liji lienyi! Haliapwila, yetweswe tunawayila Yehova. *