1, 2. Kapinda muka Jefeta ni mwanenyi apwile nenyi?

UMWE mwana-pwo kazombokele hanga apatwize tato. Iye kevwile chiseke chinji ha kumona tato mafuna muze te hakumba jita yize ayile ni kwasa. Kukumba chenyi chinene chalingishile mwanenyi hanga embe miaso ni kuhangana hamwe ni chiseke. Alioze yize tato alingile nawa ambile yamukomwesene chinji. Tato yasuwa mazalo jenyi ni kulila ngwenyi: ‘Lwangu mama mwanami! Wangutusula mbunge.’ Mba yalweza mwanenyi ngwenyi, kalinganga chilakenyo kuli Yehova chize te muchalumuna mwono wenyi ku miaka yeswe. Chilakenyo chenyi chalumbunukine ngwo, iye te kechi kuya ulo chipwe kushita ana. Alioze hazehene aye yatayiza ni kukolweza tato hanga anunge ni chilakenyo chenyi kuli Yehova. Kumbululo lienyi liasolwele ngwo te kakufuliela ngwenyi chuma cheswacho chize Yehova mamwita muchipwa chipema kuli iye. (Akwa Kuyula 11:34-37) Muze tato amwene ufulielo wenyi, aye kawahilile chinji hali mwanenyi, mumu  kanyingikine ngwenyi, kulihana chenyi ni mbunge yeswe te muchivwisa Yehova kuwaha.

² Jefeta ni mwanenyi kafulielele chize Yehova akulinga yuma. Ayo kapwile ni kushishika, chipwe muze kuchakapwile chashi kuchilinga. Kafupile kupwa ni utayizo wa Yehova, uze wapwile ulemu chinji kuli ayo kuhiana chitapo cheswacho.

3. Mumu liaka chilweza cha Jefeta ni mwanenyi muchihasa kutukwasa musono?

³ Hi chashi ko kushishika mashimbu eswe kuli Yehova. Twatamba ‘kulitachika chikolo ha ufulielo.’ (Yundase 3) Mba tuhase kuchilinga, mutulilongesa chize Jefeta ni mwanenyi anyongonwene ha yipikalo ku mwono wo. Kuchi anungine ni kushishika kuli Yehova?

4, 5. (a) Shimbi yika Yehova ahanyine kuli A-Izalele muze ayo anjilile mu Chifuchi cha Chilakenyo? (b) Kulita ni Samu 106, yika yalingiwile kuli A-Izalele ha mukunda wa uhulia wo?

⁴ Matangwa eswe, Jefeta ni mwanenyi te kakwiwuluka yuma yize yalingiwile kuli A-Izalele muze ahonene kwononokena Yehova. Ku uputukilo wa miaka 300 kunyima, Yehova kahanyine shimbi kuli A-Izalele hanga ashihe akwa-kuwayila tuzambi a mahuza eswe mu Chifuchi cha Chilakenyo, alioze kakachilingile. (Shimbi Yamuchiali 7:1-4) A-Izalele anji yaputuka kwimbulula A-Kanana, waze te akuwayila tuzambi a mahuza ni kulinga yitanga ya luchisa.​—Tanga Samu 106:34-39.

⁵ Ha mukunda wa uhulia wa A-Izalele, Yehova kakaapulwile ku kwoko lia akwa-kole jo. (Akwa Kuyula 2:1-3, 11-15; Samu 106:40-43) Kota chapwile chikalu chinji kuli asoko waze te akuzanga Yehova kununga ni kushishika kuli iye ha miaka yacho yikalu. Chipwe chocho, Mbimbiliya yinambe ngwo kwapwile amwe atu ashishika ngwe, Jefeta ni mwanenyi, Elekana, Hana ni Samuele. Ayo kapwile ni hamu lia kuvwisa Yehova kuwaha.​—1 Samuele 1:20-28; 2:26.

6. Yitanga yika ya hano hashi yize yinasoloka musono, alioze yika twatamba kulinga?

⁶ Ha matangwa jetu, atu kakunyonga ni kulinga yuma ngwe A-Kanana. Kakuhulikila mwono ku utanji, ku upupilo ni ku falanga. Alioze Yehova kakutwaha utowezo ungunu. Iye kanazange kutufunga ngwe chize azangile kufunga A-Izalele ku yitanga yacho yipi. Shina mutulilongesa ku chilweza cho chipi? (1 A-Korindu 10:6-11) Twatamba kusa tachi hanga twehuke kunyonga cha hano hashi. (A-Roma 12:2) Shina mutusa tachi hanga tuchilingi nyi?

7. (a) Yika Jefeta amulingile kuli akwa-vungu lienyi? (b) Yika Jefeta alingile?

⁷ Ha matangwa ja Jefeta, A-Izalele te kakwahungumiona kuli A-Filistea ni A-Amone, mumu A-Izalele te keshi kwononokena Yehova. (Akwa Kuyula 10:7, 8) Kuchizako yihungumiona ya akwa-kole jo, Jefeta kapwile nawa ni kumupinjisa kuli mandumbu jenyi ni kuli mangana A-Izalele. Mandumbu jenyi kapwile akwa-kuzo nawa te kakumuvwila kole, ayo yamushinjila hanga ahichike chihunda chenyi. (Akwa Kuyula 11:1-3) Jefeta kakechele hanga yitanga yo yipi yimupiangule. Kuchi tunachinyingika? Mumu muze makulwana a mu Izalele amwichile  hanga aakwase, iye kachilingile ni nyonga lize lialita. (Akwa Kuyula 11:4-11) Yika yakwashile Jefeta hanga alinge yuma yize yalita?

8, 9. (a) Yiyulo yika ya mu Shimbi ya Mose yize yakwashile Jefeta? (b) Chuma chika Jefeta te akulemesa chinji ku mwono wenyi?

⁸ Jefeta kapwile kajita munene, nawa te kanyingika kanawa sango ja A-Izalele ni Shimbi ya Mose. Mutapu uze Yehova te akufungilamo atu Jenyi wamulongesele yiyulo ya Zambi hakutwala ku chipi ni chipema. (Akwa Kuyula 11:12-27) Jefeta kazachishile chinyingi chacho ku mwono wenyi muze te akukwata yiyulo. Aye kanyingikine kanawa chize Yehova te akwivwa hakutwala ku ufwatulo ni kufunyisa upi ni upi ni chize Zambi akuzanga atu Jenyi hanga alizange umwe ni mukwo. Chikwo nawa, Shimbi yamulongesele chize te atamba kufunga akwo, chipwe waze te akumuvwila kole.—Tanga Kutuhuka 23:5; Ulevi 19:17, 18.

⁹ Chilweza cha Yosefwe kota necho chakwashile Jefeta. Iye kota kalilongesele chize Yosefwe asolwele keke kuli mandumbu jenyi chipwe ngwe o kamwivwilile kole. (Uputukilo 37:4; 45:4, 5) Kunyonga ha chilweza chino kota chakwashile Jefeta hanga alinge yuma yize te muyivwisa Yehova kuwaha. Yuma yize mandumbu jenyi alingile yahanyine Jefeta yikola yinji ku mbunge. Alioze kwasa-jita ha mukunda wa jina lia Yehova ni atu jenyi yapwile ni ulemu unji kuli Jefeta kuhiana yuma yize te akuzanga ku mwono wenyi. (Akwa Kuyula 11:9) Kapwile ni hamu lia kushishika kuli Yehova. Yitanga yino yamukwashile hanga iye ni A-Izalele azuke yiwape ya Yehova.—A-Hepreu 11:32, 33.

10. Kuchi mutuhasa kwecha shimbi ja Zambi hanga jitukwase kupwa ni yitanga ya akwa-Kristu musono?

¹⁰ Yika mulilongesa ha chilweza cha Jefeta? Yika mutulinga nyi mandumbu jetu akwa-Kristu matulemeka ku mbunge hanji nyi mutwivwa ngwe o keshi kutuzanga? Kutwatambile kwecha hanga yikola yize tuli nayo ku mbunge yitukinde kuwayila Yehova. Kanda twecha kukunguluka hanji kupwa hamuwika ni mandumbu jetu mu chikungulwila. Twimbululenu Jefeta ni kwononokena Yehova. Chino muchitukwasa kukumba yipikalo yeswayo nawa mutuhasa kupwa chilweza chipema.—A-Roma 12:20, 21; A-Kolosu 3:13.

11, 12. Chilakenyo chika Jefeta alishingile, nawa yika chilakenyo chacho te chinalumbunuka?

¹¹ Jefeta te kananyingika ngwenyi kanafupiwa ukwaso wa Zambi hanga atusule A-Izalele ku koko lia A-Amone. Iye yalakenya kuli Yehova ngwenyi, nyi makumba jita, te mamwaha chawana ngwe ‘mulambu wa kwocha,’ mutu mweswawo te matuhuka ku zuwo lienyi muze mafuna ku jita. (Akwa Kuyula 11:30, 31) Yika chino te chinalumbunuka?

¹² Kuhana mwono wa atu ngwe yitapo Yehova keshi kuchizanga, kashika tunanyingika ngwetu, Jefeta te kechi kushiha mutu hanga amuhane ngwe chitapo. (Shimbi Yamuchiali 18:9, 10) Kulita ni Shimbi ya Mose, mulambu wa kwocha kanji-kanji te wapwile chimwe chawana chize mutu te akuhana kuli Yehova ni mbunge yenyi yeswe. Kashika, te chinalumbunuka ngwo mutu yoze te Jefeta mahana kuli Yehova, mutu wacho te makalakala ku tabernakulu ku mwono wenyi weswe. Yehova kevwile kulemba cha Jefeta ni kumukwasa kukumba kanawa jita yacho. (Akwa Kuyula 11:32, 33) Mba iya te Jefeta mahana kuli Yehova?

13, 14. Yika maliji a Jefeta waze ali ha mukanda wa Akwa-Kuyula 11:35 anasolola hakutwala ku ufulielo wenyi?

¹³ Achinyonga ha yuma yize twatongola kuuputukilo wa mutwe uno. Muze Jefeta te anafuna ku jita, mutu mutangu yoze wayile ni kumupatwiza te mwanenyi wa wika yoze te azanga chinji! Mba kuchi Jefeta te mashishika ku chilakenyo chenyi? Shina te mahana mwanenyi kuli Yehova hanga amulingile ku tabernakulu ku mwono wenyi weswe?

¹⁴ Chikwo nawa, yiyulo ya Shimbi ja Zambi yakwashile Jefeta hanga akwate chiyulo chize chalita. Kota kewulukile maliji waze ali ha Kutuhuka 23:19, waze akolwezele atu ja Zambi hanga ahane yuma yo yipema kuli Yehova ni mbunge yeswe. Shimbi yambile nawa ngwo, nyi mutu malakenya chimwe chuma kuli Yehova, “kanda akajilula liji lienyi, iye akalinge nikulita ni yeswe muyituhuka mu kanwa lienyi.” (Kwalula 30:2) Chizechene ngwe mukwa-kushishika Hana, yoze kota watwamine ha shimbu lize-liene, Jefeta neye kanungine ni chilakenyo chenyi, chipwe ngwe kanyingikine yize muyilingiwa kuli mwanenyi ni kuli iye mwene. Mwanenyi te kechi kushita mwana niumwe, mumu te maya ni kukalakala ku  tabernakulu. Kashika te kukuchi kupwa niumwe yoze te mahinga jina lia Jefeta ni chihunda chenyi. (Akwa Kuyula 11:34) Chipwe chocho, Jefeta ni ushishiko weswe yamba ngwenyi: ‘Hinahanjika ni Yehova kashika chahashile kulishingulula ku chilakenyo chami.’ (Akwa Kuyula 11:35) Yehova katayijile chitapo cha Jefeta ni kumuwahisa. Shina nyi yena mupwa ni ushishiko ngwe wa Jefeta?

15. Shingo lika anji akuli yetu hitunalingi, nawa kuchi mutuhasa kusolola ushishiko?

¹⁵ Muze twahanyine mwono wetu kuli Yehova, twalishingile ngwetu, mutulinga upale wenyi chipwe mukupwa chuma cheswacho. Tunanyingika ngwetu, kuchichi kupwa chashi mashimbu eswe kununga ni chilakenyo chacho. Alioze kuchi mutulinga nyi matwita hanga tulinge chuma chize kutushi kuzanga kulinga? Nyi mutululieka manyonga jetu ni kwononokena Zambi ni mbunge yeswe, mutusolola ngwetu tunashishika ha chilakenyo chetu. Yitapo yetu muyihasa kuneha yikola yinji ku mbunge, chipwe chocho, yiwape ya Yehova mashimbu eswe yipema chinji. (Malakia 3:10) Mba yika mutwamba hakutwala kuli mwana wa Jefeta? Yika yize aye alingile ku chilakenyo cha tato?

16. Kuchi mwana wa Jefeta alingile ha chilakenyo cha tato? (Tala chizulie chili hauputukilo.)

¹⁶ Chilakenyo cha Jefeta te chalisa ni cha Hana. Hana kahanyine mwanenyi Samuele hanga akalakale ku tabernakulu ngwe Ka-Nazireu. (1 Samuele 1:11) Ka-Nazireu te kakumbata ni kupwa ni usoko. Alioze mwana Jefeta kamuhanyine ngwe “mulambu wa kwocha,” ha chino te kechi kuya ulo chipwe kushita. (Akwa Kuyula 11:37-40) Achinyonga kama ha chino! Aye kachi kalimbachile ni lunga wa lufuma wa mu chifuchi, mumu tato te kasongo mu Izalele. Alioze te mapwa wika umwe kavumbi ku tabernakulu. Yika mwana-pwo yono alingile? Aye yasolola ngwenyi mulimo wa Yehova watamba kupwa utangu ku mwono wenyi hakwamba ngwenyi: ‘Linga cheswacho wambile.’ (Akwa Kuyula 11:36) Aye yalituna usolo wenyi wa kupwa ni lunga ni kushita ana hanga alingile Yehova. Kuchi mutuhasa kwimbulula kulihana chenyi?

17. (a) Kuchi mutuhasa kwimbulula ufulielo wa Jefeta ni mwanenyi? (b) Kuchi maliji mu A-Hepreu 6:10-12 anakukolweza hanga ulihane mu milimo ya Zambi?

¹⁷ Akweze anji akwa-Kristu, malunga ni mapwo ni mbunge yo yeswe kanalituna ene kumbata, ni kuya malo hanji kushita mumu ha chimwe chitela. Mumu liaka? Mumu o kanazange kulihulikila chinji mu mulimo wa Yehova. Nawa, yisemi anji keshi kupalikisa mashimbu anji hamwe ni ana jo hanji ajikulu jo. Mumu ayo kanase mashimbu ni tachi jo mu mulimo wa Yehova. Amwe akuli ayo kakutunga Mazuwo a Wanangana, hanji kuya ku Shikola ya akwa-Kwambujola Wanangana ni kuya ku yikungulwila yize yinafupiwa chinji akwa-kwambujola. Akwo kakutesa katalilo wo hanga okese mulimo wo wakwambujola ha mashimbu a Kwiwuluka Kufwa cha Yesu. Yehova kechi keza kavulama tuvumbi wano eswe akulihana ni zango lieswe. (Tanga A-Hepreu 6:10-12.) Mba ena mukwetu? Shina muhasa kulihana kama hanga ulingile chinji Yehova?

18, 19. Yika yize twalilongesa mu Mbimbiliya hakutwala kuli Jefeta ni mwanenyi, nawa kuchi mutuhasa kwembulula?

¹⁸ Yika yakwashile Jefeta hanga akumbe milonga yenyi? Iye kechele hanga Yehova amusongwele ha kukwata yiyulo ku mwono wenyi. Kakembulwile yitanga yipi ya atu waze te atunga no. Alioze kanungine ni ushishiko wenyi chipwe muze akwo amulemekene ku mbunge. Yehova kawahishile Jefeta ni mwanenyi ha yitapo yo ya zango, ni kwaazachisa hanga atwale uwayilo wamwenemwene kulutwe. Chipwe muze akwo echele kulinga yuma yize yalita, Jefeta ni mwanenyi kanungine ni kushishika kuli Yehova.

¹⁹ Mbimbiliya yinambe ngwo: “Nukapwe akwa kwimbulula waze ku ufulielo ni uhumikizo mahinga yilakenyo.” (A-Hepreu 6:12) Ha chino, twimbululenu Jefeta ni mwanenyi, ni kunyingika ngwetu, nyi twanunga ni kushishika, Yehova makatuwahisa chinji.