1. Kuchi mutuhasa kwononokena Zambi hamwe ni manguvulu a hano hashi?

MBIMBILIYA yakutulongesa hanga twononokene manguvulu a hano hashi, alioze yakutulweza nawa ngwo mashimbu eswe twatamba kwononokena Zambi. (Yilinga 5:29; Titu 3:1) Kuchi chino muchihasa kulingiwa? Yesu kalumbunwine yimwe shimbi yize yakutukwasa kunyingika yoze twatamba kwononokena. Aye kambile ngwenyi, twatamba kufweta “kuli Sesare yuma ya Sesare; ni kuli Zambi yuma ya Zambi.” ^[1] (Tala maliji akusongo.) (Mateu 22:21) Twakufweta “kuli Sesare yuma ya Sesare” muze twakwononokena shimbi ja manguvulu, kwaavumbika ni kufuta lijimo. (A-Roma 13:7) Alioze nyi manguvulu matulweza hanga tulinge yuma yize Zambi keshi kuzanga, twakulituna kuyilinga, chipwe chocho, twakuchilinga ni vumbi lieswe.

2. Kuchi mutusolola ngwetu kutushi kukwasa yuma ya mafwefwe a hano hashi?

² Yimwe jila yize twakufweta “kuli Zambi yuma ya Zambi” yili kwehuka yuma ya mafwefwe a hano hashi. Kutushi kulinjisa mu yuma yacho. (Izaia 2:4) Kutushi kulimika ni manguvulu a hano  hashi, mumu Yehova kakweecha hanga ayule. Yetu nawa kutushi kulinjisa mu yuma ya chifuchi hanji kupwa ni zango lia chifuchi chetu. (A-Roma 13:1, 2) Kutushi kweseka kwalumuna manyonga ja akwa-mafwefwe hanji kwakwasa ha yuma ya mafwefwe, nawa kutushi kwaavotala chipwe kupwa akwa-mafwefwe.

3. Mumu liaka kutwatambile kulinga yuma ya mafwefwe?

³ Kuli yitela yinji yize Zambi akutulweza hanga twehuke yuma mafwefwe. Chitela chilemu chili ngwo, etu twakwimbulula Yesu, yoze te hi “mukwa hashi ko.” Iye kakalinjishile mu yuma ya mafwefwe hanji kwasa jita. (Yoano 6:15; 17:16) Chitela chikwo chili ngwo, etu twakukwasa Wanangana wa Zambi. Amu tushi kukwasa manguvulu a hano hashi, kashika tukwete mbunge yitoma muze twakwambujola ngwo, Wanangana wa Zambi we wika muukahwisa lamba lieswe lia atu. Mayingeleja amahuza kakulinga yuma ya mafwefwe, ni kuhandununa atu. Alioze etu twalinunga ni mandumbu ni mapangi jetu a hashi heswe, mumu tushi kulinga yuma ya mafwefwe.—1 Petulu 2:17.

4. (a) Kuchi tunanyingika ngwetu muchikapwa chikalu chinji kwehuka yuma ya mafwefwe? (b) Mumu liaka twatamba kulilulieka haliapwila hanga twehuke yuma ya mafwefwe?

⁴ Hanji twatwama mu chifuchi chize atu keshi kutushinjila hanga tulinge yuma ya mafwefwe. Alioze muchihasa kupwa chikalu kununga ni kwehuka kulinga yuma ya mafwefwe, mumu tunakundama ku songo lia hano hashi ha Satana. Atu musono ‘keshi keke’ nawa “akwa kulipupula.” (2 Timoteu 3:3, 4) Amwe mandumbu kakumona yipikalo ha kwalumuka cha yuma ya mafwefwe mu chifuchi cho. Kashika twatamba kulilulieka haliapwila hanga tununge ni kwehuka yuma ya mafwefwe chipwe ha mashimbu akalu. Tutalenu yuma yiwana yize mutuhasa kulinga hanga tulilulieke.

5. Yika Yehova akunyonga hali manguvulu a hano hashi?

⁵ Jila yitangu yize mutuhasa kuliluliekelamo haliapwila hanga twehuke yitanga ya mafwefwe, yili kunyonga manguvulu a hano hashi ngwe chize Yehova akwaanyonga. Muze Yehova atangile atu kakehele ulite wa kuliyula ene. (Jeremia 10:23) Iye kakumona atu eswe ngwe kali usoko umuwika. Alioze manguvulu a hano hashi hanahandununa atu mumu ayo kakulisamba ngwo vungu lio lie lipema. Chipwe manguvulu masoloka ngwe apema, nihindu o kechi kuhasa kuhwisa lamba lieswe lia atu. Nawa hanapu akwa-kole ja Wanangana wa Zambi, uze waputukile kuyula ha mwaka 1914. Kwasala hakehe Wanangana wacho uchize mawanangana eswe a hano hashi.—Tanga Samu 2:2, 7-9.

6. Kuchi twatamba kumona waze ali ni poko ya kuyula ku manguvulu?

⁶ Zambi kakwecha manguvulu ja atu hanga ayule mumu ayo kakuneha yimwe ndambu ya sambukila ni ululikiso. Chino chakutukwasa kwambujola sango lipema lia Wanangana wa Zambi. (A-Roma 13:3, 4) Zambi kakutulweza hanga tulembele waze ali ni poko ya kuyula hanga tuhase kumuwayila  ni sambukila. (1 Timoteu 2:1, 2) Nyi matumwesa lamba, hanji kutuhungumiona, mutuhasa kwita kuli waze ali ni poko ya kuyula ku nguvulu hanga atukwase. Ni Paulu che alingile. (Yilinga 25:11) Chipwe ngwe Mbimbiliya yinambe ngwo, Satana mwe unasongwela manguvulu a hano hashi, alioze kuyishi kwamba ni hehamwe ngwo, iye kakusongwela mutu ni mutu yoze uli ni poko ya kuyula. (Luka 4:5, 6) Kashika kutwatambile nilimwe tangwa kwamba ngwetu, amwe atu waze ali ni poko ya kuyula kali mu moko lia Ndiapu. Mbimbiliya yinalumbununa ngwo kutwatambile kusosomba akwetu.—Titu 3:1, 2.

7. Manyonga aka twatamba kwehuka?

⁷ Twakwononokena Zambi ha kwehuka kukwasa nguvulu hanji chizavu cha mafwefwe, chipwe ngwe manyonga hanji yikuma yo muyihasa kutukwasa. Ha mashimbu amwe chino kuchishi kuhasa kupwa chashi. Chakutalilaho, achinyonga ngwe atu malimika ni umwe unguvulu uze unaneha lamba linji kuli atu, chipwe kuli Yela ja Yehova. Kwamba pundu, tuchi kulichinga ni yihulia jacho, alioze shina mutunyonga ngwetu yihulia jacho kanalingi kanawa ni kushimbwila ngwetu malulieka yuma? (A-Efwesu 2:2) Nyi tunazange kwehuka yitanga ya mafwefwe, twatamba kwehuka kunyonga ngwo sali limwe lipema kuhiana sali likwo. Chino muchisoloka ha yize mutuhanjika ni ha yize mutulinga.

8. Muze muchipwa chikalu kwehuka yuma ya mafwefwe, kuchi mutuhasa ‘kukanyama’ ni kupwa “akwa kusamba”?

⁸ Jila yamuchiali yize mutwehukilamo yuma ya mafwefwe yili ‘kukanyama ngwe tupela alioze kupwa akwa kusamba ngwe tutele.’ (Tanga Mateu 10:16, 17.) ‘Twakukanyama’ muze mutunyonga chitangu ha yipikalo yize muyiza kulutwe. Nawa twakupwa “akwa kusamba” muze twakununga ni kwehuka yuma ya mafwefwe ha mashimbu jacho akalu. Tuhengulenu yimwe yuma yacho, ni yize mutuhasa kulinga hanga twehuke yuma ya mafwefwe.

9. Ha yuma yika twatamba kukanyama muze tunahanjika ni akwetu?

⁹ Yuma yize twakuhanjika. Twatamba kukanyama muze atu maputuka kuhanjika hakutwala ku yuma ya mafwefwe. Chakutalilaho, muze mutuhanjika ni umwe mutu hakutwala ku Wanangana wa Zambi, kutwambile kwamba ngwetu, twakutayiza hanji kutushi kutayiza manyonga hanji yiyulo ya chimwe chizavu cha mafwefwe hanji mwata. Shimbu tuhanjike ha yize manguvulu anazange kulinga hanga ahwise lamba lia atu, tusololenu mu Mbimbiliya chize Wanangana wa Zambi muukahwisa yuma yacho ku miaka ya mutolo. Nyi amwe atu mazanga kuhanjika hakutwala ku yikuma ngwe, umbachiso wa utumwa hanji kuchiza ufumba, twaalwezenu yize Liji lia Zambi linambe ni chize mahasa kukaula shimbi jacho ku mwono wo. Nyi umwe mutu mamba ngwenyi, jimwe shimbi ja nguvulu katamba kujichiza hanji kujalumuna, kutwatambile kupwa sali lienyi, nawa kutwatambile kulalaminya mutu hanga alumune manyonga jenyi.

10. Kuchi mutuhasa kusa shindakenyo ngwetu, tunehuka yuma ya mafwefwe muze mututala hanji kupanjika jimwe sango?

¹⁰ Akwa-sango. Ha mashimbu amwe akwa-sango kakuhanjika ni nyonga lia kukwasa chinji yimwe yikuma. Yino kanji-kanji yakulingiwa mu yifuchi yize sango ja yifuchi anajisongwela kuli manguvulu. Nyi akwa-sango mapwa sali limwe, etu twatamba kukanyama hanga twehuke kuputuka kunyonga ngwe ayo. Chakutalilaho, achilihule ngwenyi, ‘Shina nakuzanga ­kupanjika jimwe  sango mumu nakutayiza yize jakwamba hakutwala ku yuma ya mafwefwe?’ Mba tuhase kwehuka yuma ya mafwefwe, twatamba kwehuka kutala hanji kutanga sango jize jinakwase limwe sali lia yuma ya mafwefwe. Ha chino, tufupenu sango jize kujishi kukwasa yuma ya mafwefwe. Nawa mashimbu eswe tutesenu sango jize twakwivwa ni “maliji angunu” waze ali mu Mbimbiliya.—2 Timoteu 1:13.

11. Kuchi muchihasa kutupwila chikalu kwehuka yuma ya mafwefwe nyi yuma yize tukwete muyipwa ni ulemu unji kuli yetu?

¹¹ Kufupa kupwa ni upite unji. Nyi mbongo ni yuma yikwo yize tukwete yapwa ni ulemu unji ku mwono wetu, muchihasa kupwa chikalu kwehuka yuma ya mafwefwe. Kunyina lia mwaka 1970 Yela ja Yehova anji mu Malawi kahichikile hanji kwecha yuma yeswe yize apwile nayo, mumu kakazangile kulichinga mu chizavu cha mafwefwe. Alioze amwe kakazangile kwehuka yuma ya mafwefwe ha mukunda wa kuzanga mwono upema hanji upite. Pangi Ruth kanewuluka ngwenyi, “Mandumbu amwe twayile no hamuwika mu zuwo lia ususu, alioze kulutwe lia matangwa yalinjisa mu yizavu ya mafwefwe ni kufuna ku mazuwo jo, mumu kakazangile kwecha yikumba ni kumona lamba mu zuwo lia ususu.” Alioze tuvumbi twa Zambi anji kalisa ni wano twavuluka. Ayo kakwehuka yuma ya mafwefwe, chipwe ngwe muyaahonesa mbongo hanji kutokesa yuma eswe yize akwete.—A-Hepreu 10:34.

12, 13. (a) Yika Yehova akunyonga hali atu? (b) Kuchi mutulinga nyi mutuputuka kulizata ha mukunda wa chifuchi chetu?

¹² Kulinangamisa hanji kulisuta. Atu kanji-kanji kakuzanga kulisuta ni kulizata hakutwala ku minyachi yo, vungu, ndako mbonge, hanji chifuchi cho. Alioze Yehova keshi kunyonga ngwenyi umwe mutu hanji chizavu cha atu chili chipema kuhiana chikwo. Kuli Yehova tuli munyachi umuwika. Chipwe ngwe Yehova katutangile yetweswe twalisa umwe ni mukwo, alioze mutuhasa kuwahilila chinji ha mukunda wa kulisa chacho. Iye keshi kuzanga hanga tulengulule ndako ja ku chisemuko chetu. Chipwe chocho, iye kazangile hanga tunyonge ngwetu, tuli apema chinji kuhiana akwetu hanji akwa-vungu lieka.—A-Roma 10:12.

¹³ Kanda tupwa ni kulizata ha mukunda wa chifuchi hanji vungu lietu kunyonga ngwe lili lipema kuhiana likwo. Nyi twanyonga chocho, muchihasa kupwa chikalu kwehuka yuma ya mafwefwe. Chino chalingiwile ku sekulu yitangu. Amwe mandumbu A-Hepreu te keshi kutalatala kanawa tuliwa A-Ngregu. (Yilinga 6:1) Kuchi mutuhasa kunyingika nyi hitwaputuka kupwa ni mbunge ya kulizata? Nyi ndumbu hanji pangi wa ku vungu lieka makwaha chimwe chiyulo, shina munyonga ngwe, ‘Yetu kuno twakulinga yuma kanawa kuhiana kumahenu,’ ni kulituna chiyulo chenyi? Nyi chenacho, iwuluka shimbi yino yilemu yakwamba ngwo: “Ni mbunge ya kulikehesa, mweswe anyongene ngwenyi, Mukwetu wanguhiana.”—A-Fwilipu 2:3.

14. Kuchi kulemba muchihasa kutukwasa, chilweza chika cha Mbimbiliya chinasolola shindakenyo yacho?

¹⁴ Jila yamuchitatu ya kwehukilamo yuma ya mafwefwe, yili kujikijila muli Yehova. Lemba hanga wite spiritu yisandu, yize muyihasa  kukwasa kupwa ni uhomboloji ni uhumikizo. Yitanga yino muyikukwasa chinji nyi nguvulu malinga chuma cha kalimbalimba hanji chize kuchalitele. Eta kuli Yehova hanga akwehe mana akunyingika chuma chize muchihasa kukupinjisa kwehuka yuma ya mafwefwe. Eta nawa kuli Yehova hanga akukwase kulinga yuma yize yalita ha chikuma ni chikuma. (Tiangu 1:5) Mahasa kukusa mu zuwo lia ususu hanji kukumwesa lamba ha mukunda wa ushishiko we kuli Yehova. Nyi chapwa chocho, lemba ni hamu lieswe hanga uhase kulumbununa kanawa kuli akwenu mumu liaka wakwehuka mafwefwe. Muhasa kupwa ni shindakenyo ngwe Yehova makukwasa hanga unyongonone.—Tanga Yilinga 4:27-31.

15. Kuchi Mbimbiliya yakutukwasa kwehuka yuma ya mafwefwe? (Tala kasha “ Liji lia Zambi Liakolesele Ufulielo Wo.”)

¹⁵ Yehova hanatwehe Mbimbiliya hanga yitutakamise. Pukuna ha versu jize mujikukwasa kwehuka yuma ya mafwefwe. Eseka kunyingika versu jacho ni kujiwuluka, mumu mujikakukwasa, nyi ha shimbu limwe kuushi ni Mbimbiliya. Mbimbiliya nawa muyihasa kukolesa kutalatala che ha yize Zambi akwamba hakutwala ku kulutwe lia matangwa. Tunafupiwa kutalatala chino hanga tunyongonone mu yihungumiona. (A-Roma 8:25) Sakula versu jize jinahanjika kanji-kanji hakutwala yuma yize unashimbwila kulinga hashi haha, ni kunyonga ngwe he uli.

16, 17. Yika mutuhasa kulilongesa ha yilweza ya tuvumbi twa Zambi ashishika waze ehukile yuma ya mafwefwe? (Tala chizulie ha uputukilo.)

¹⁶ Chuma chamuchiwana chize muchihasa kutukwasa kwehuka yitanga ya mafwefwe chili kunyonga ha yilweza ya tuvumbi ashishika a Yehova. Tuvumbi anji a ku shakulu ali mu Mbimbiliya kasolwele hamu, nawa kapwile ni mana ha kukwata yiyulo yize yakwaashile kwehuka yuma ya mafwefwe. Achinyonga hali Shadrake, Meshake, Abedenego, waze alitununyine kuwayila kaponya wa mwanangana wa Babilonya. (Tanga Daniele 3:16-18.) Sango jino jakukwasa Yela ja Yehova musono kupwa  ni tachi ja kulituna kuwayila pandela ya mu chifuchi muze atwama. Yesu kakalinjishile mu yuma mafwefwe hanji yikuma ya atu. Kanyingikine ngwenyi, chilweza chenyi chipema te muchikwasa tumbaji twenyi. Yamba ngwenyi: “Hamukenu chikolo; hingunakumbu hashi.”—Yoano 16:33.

¹⁷ Yela ja Yehova anji ha mashimbu jetu kananungu ni kwehuka yuma ya mafwefwe. Amwe akuli ayo kakwaamwesa lamba, kwaasa mu zuwo lia ususu, hanji kwaashiha ha mukunda wa ushishiko wo kuli Yehova. Yilweza yo muyihasa kutukwasa hanga tupwe ni hamu. Umwe ndumbu wa mu Turquia yamba ngwenyi: “Franz Reiter umwe ndumbu mukweze kamushihile ha mukunda wa kwehuka kulichinga mu chilombo cha maswalale Hitler. Mukanda uze asonekenene naye ha ufuku muze te kanda achimushiha wasolwele ufulielo ukolo ni ujikijilo wenyi kuli Yehova, ami nazangile chinji kukaula chilweza chenyi nyi te mungupwa mu cheseko chacho.” ^[2]—Tala maliji akusongo.

18, 19. (a) Kuchi mandumbu a mu chikungulwila che mahasa kukwasa hanga wehuke yuma ya mafwefwe? (b) Yika yena watamba kulinga?

¹⁸ Mandumbu ni mapangi mu chikungulwila muze watwama, mahasa kukukwasa kwehuka yuma ya mafwefwe. Lweza makulwana amu chikungulwila hanga anyingike kapinda yoze unapalika ku mwono we. Ayo mahasa kukwaha yiyulo yipema ya mu Mbimbiliya. Nawa, nyi mandumbu mu chikungulwila kananyingika yize yinapalika ku mwono we, ayo mahasa kukukolweza. Ete hanga akulembele. Alioze, ni etu nawa twatamba kukwasa mandumbu jetu ha kwaalembele. (Mateu 7:12) Mba uwane majina ja mandumbu waze ali mu mazuwo a ususu, tala ha chikuma cha jw.org, chize chakwamba ngwo, “Testemunhas de Jeová Presas Por Causa de Sua Fé—Por Região” chize muhasa kuwana ha IMPRENSA > CASOS JURÍDICOS. Sakula amwe majina, hanga wite kuli Yehova akwase mandumbu ni mapangi jacho hanga apwe ni hamu ni kushishika kuli iye.—A-Efwesu 6:19, 20.

¹⁹ Mutuhasa kushimbwila kapinjiso munji kuli manguvulu, mumu tunakundama ku songo lia hano hashi. Kashika chili chilemu chinji kulilulieka haliapwila hanga twehuke yuma ya mafwefwe a hano hashi halihandununa!