1, 2. (a) Yika mutuhasa kulilongesa ha kunyongonona cha Ngideone ni maswalale jenyi kulakaji atatu? (Tala chizulie ha uputukilo.) (b) Kulita ni Luka 21:19, mumu liaka kunyongonona chili chilemu?

ACHINYONGA kama, jita yikalu nawa ya uhonge yize maswalale A-Izalele ni kasongo ko Mukwa-kuyula Ngideone te anase ni akwa-kole jo. Ngideone ni maswalale jenyi kahangile A-Mindiane ha ufuku weswe ni kwenda 32 atando hanji a kilometro! Mbimbiliya yinatulweze yize yalingiwileko ha tangwa lize liasulileho: “Ngideone yeza ku Yordau, yazauka, iye ni kulakaji atatu a malunga apwile no.” Alioze te kanda achikumba jita, chipwe chocho o te masa jita ni maswalale 15,000. Akwa-kole wano te kakumwesa chinji A-Izalele lamba ha miaka yinji, kashika ayo te katambile kuhonga. Chocho, Ngideone ni maswalale jenyi yanunga ni kuhanga akwa-kole jo mba hi yaakumba!—Akwa Kuyula 7:22; 8:4, 10, 28.

² Ni yetu tunase jita yikalu nawa ya uhonge. Akwa-kole jetu kali Satana, hashi henyi, ni uhenge uze tukwete. Amwe akuli yetu twaputukile kulu kwasa jita yacho. Ni ukwaso wa Yehova, hitunakumba jita jinji. Alioze kanda tuchikumba jita ya kasula. Ha mashimbu amwe mutuhasa kuhonga kwasa  jita. Hanji mutuhasa kuhonga kushimbwila songo lia hano hashi hapi. Yesu katutowezele ngwenyi, ku matangwa akusula te mutumona lamba ni yihungumiona yinji. Alioze yamba nawa ngwenyi, nyi nwanyongonona, munukakumba. (Tanga Luka 21:19.) Kunyongonona yika chinalumbunuka? Yika muyitukwasa hanga tunyongonone? Yika mutuhasa kulilongesa ha yilweza ya waze anyongonwene? Nawa kuchi mutuhasa kwecha hanga “kunyongonona chikaye ndo ku songo”?—Tiangu 1:4.

3. Kunyongonona yika chinalumbunuka?

³ Mu Mbimbiliya, kunyongonona chinalumbunuka yuma yinji hi wika ko kulengulula chimwe chuma chikalu. Chino chinalumbunuka chize twakunyonga ni kwivwa hakutwala ku yihungumiona. Kunyongonona chakutukwasa hanga tupwe ni hamu, ushishiko ni uhumikizo. Umwe mukanda unambe ngwo kunyongonona chili umwe muhuko uze wakutukwasa kupwa ni tachi ni kwehuka kuhonga muze mutumona lamba. Chakutukwasa nawa hanga tumane ki mu ufulielo chakuhona kunyika chipwe ha mashimbu a yihungumiona. Nawa chakutukwasa kumona yihungumiona yacho ngwe jila ya kukumbilamo, ni kulihulikila mu mulimo wetu, hi ku lamba lietu ko.

4. Mumu liaka mutuhasa kwamba ngwetu kunyongonona chinakatuka ha zango?

⁴ Zango liakutukolweza kunyongonona. (Tanga 1 A-Korindu 13:4, 7.) Mu yuma yika? Kuzanga Yehova chakutukolweza kunyongonona ha chuma cheswacho chize iye mecha hanga chilingiwe hali yetu. (Luka 22:41, 42) Kuzanga mandumbu jetu chakutukwasa kunyongonona mu uhenge wo. (1 Petulu 4:8) Kuzanga mutu yoze twalimbata nenyi chakutukwasa kunyongonona mu “luyinda” yoze akumona chipwe akwa-kulimba waze akwete chiseke, ni kukwasa kukolesa ulo wetu.—1 A-Korindu 7:28.

5. Mumu liaka Yehova wika mwe wajama kutukwasa hanga tunyongonone?

⁵ Eta tachi kuli Yehova. Yehova kali ‘Zambi ya kulembejeka ni kunyongonwesa.’ (A-Roma 15:5) Iye wika unanyingika yipikalo yetu, kunyonga ni kupwa chetu. Kananyingika pundu yize tunafupu hanga tunyongonone. Mbimbiliya yinambe ngwo: “Kamakayukisa usona wa waze akumuvwila woma. Kumakevwa muteto wo nawa, kumakaalamwina.” (Samu 145:19) Alioze kuchi Zambi makumbulula yilemba yetu hakutwaha tachi ja kunyongonona?

6. Kulita ni chize Mbimbiliya yakulakenya, kuchi Yehova mahasa kusolola ‘jila ya kutuhuka’ mu yipikalo yetu?

⁶ Muze twakwita kuli Yehova hanga atukwase kunyongonona, iye kakutulakenya “jila ya kutuhukamo.” (Tanga 1 A-Korindu 10:13.) Kuchi akuchilinga? Ha mashimbu amwe iye mahasa kuchiza yipikalo yize tulinayo. Alioze kanji-kanji, iye kakutwaha tachi ‘hanga tukanyongonone ni uhomboloji hamwe ni uwahililo.’ (A-Kolosu 1:11) Yehova kechi keza kecha niumwe  kapinda hanga atukinde kununga ni kushishika, mumu kananyingika kanawa mujimba wetu, manyonga ni ulelu wetu.

7. Hana chilweza cha mumu liaka tunafupu kulia cha ku spiritu mba tunyongonone.

⁷ Echa hanga kulia cha ku spiritu chikolese ufulielo we. Mumu liaka kulia cha ku spiritu chili chilemu chinji? Chakutalilaho: Mutu mba anyine ku mulundu uze usuku chinji, katamba kulia ha tangwa yuma yize te mahasa kulia ha matangwa atatu hanji awana. Kulia chino chinahiane chinji chize mutu akulia. Alioze mba ahase kunyina ku mulundu, mutu wacho katamba kulia chinji hanga apwe ni tachi. Chizechene nawa, tunafupiwa kulia chinji cha ku spiritu hanga tunyongonone mba tulinge kanawa mulimo wetu. Twatamba kulinga longeso lia wika ni kuyaya ku kukunguluka. Yuma yino muyitukwasa chinji hanga tununge ni kukolesa ufulielo wetu.—Yoano 6:27.

8, 9. (a) Kulita ni Yombi 2:4, 5, kupwa mu yihungumiona yika chinalumbunuka? (b) Muze mumona lamba, yuma yika yize kuyishi kumoneka muhasa kunyonga?

⁸ Iwuluka ushishiko we kuli Zambi. Muze twakupwa mu yihungumiona, chakulumbunuka yuma yinji hi wika ko kumona lamba. Ushishiko wetu kuli Zambi wakupwa mu cheseko. Yitanga yize twakupwa nayo muze matuhungumiona yakusolola nyi Yehova kali pundu Mwata wa chifuchi cheswe. Yika chino chinalumbunuka? Satana, yoze wakulimika ni chiyulo cha Zambi, kachokele Yehova ha kwamba ngwenyi, atu kakumuwayila ni manyonga a kuzo. Satana ngwenyi: “Chikowa ha chikowa, mutu mecha yeswe ali nayo ha kulamwina mwono wenyi.” Ha chino Satana yamba hakutwala kuli Yombi ngwenyi: “Zoza kwoko lie uchisunge ku chifwaha chenyi ni musunya wenyi mba makutuka, kwe kumeso je.” (Yombi 2:4, 5) Shina Satana kalumukine kukatuka haze ambile maliji wano? Ka! Mumu ha miaka yinji kunyima, muze Satana amuhanjile mu malilu, iye nihindu te kakununga mashimbu eswe ni kulamikiza tuvumbi twa Zambi ashishika. (Usolwelo 12:10) Musono, Satana nihindu kakwamba ngwenyi atu kakuwayila Zambi ni manyonga a kuzo. Kanazange chinji hanga tunyonge ngwetu, Zambi keshi mukwa-kuyula mupema nawa hanga tweche kumuwayila.

⁹ Muze mumona lamba ha mukunda wa yihungumiona, eseka kwiwuluka yuma yino yize kuyishi kusoloka. Satana ni andemoniu kali sali limwe. Ayo kanakutale hanga amone yize mulinga ni kwamba ngwo kumuhonga. Sali likwo, mumona Yehova, Mwanangana wetu Yesu Kristu ni akwa-Kristu akuwayisa waze hanahindwisa, hamwe ni tununu twa angelo. Nawa ayo kanamono tachi jize unase, alioze makukolweza hanga ununge! Ayo mawahilila ha kukumona ngwo unahase kunyongonona ni kununga ni kushishika kuli Yehova. Nawa muwivwa Yehova makwamba ngwenyi: “Mwanami pwako ni mana ukawahise mbunge yami, ngukahase kukumbulula yoze manguchoka.”—Yishima 27:11.

10. Kuchi mutuhasa kwimbulula Yesu ha kulihukila ku yiwape ya kunyongonona?

¹⁰ Kulihulikila ha yiwape. Achinyonga ngwe unalingi wenyi usuku chinji, nawa mukaheta kuze unayi ha tangwa lize mulisulaho. Mba uheteko, watamba kwenda ufuku wa muwundu. Kweswako mutala kunalaa  pwi. Alioze unanyingika ngwe, kwasala hakehe mumona pangu, nawa nyi mununga ni kwenda, muheta kawashi kuze unayi. Ni mwono neyo wapwa ngwe wenyi. Ena muhasa kupalika mu yipikalo yinji, hanji kuhonga mu mbunge ha mukunda wa milonga ye. Chipwe Yesu neye kota che evwile. Muze te anamushihila ha mutondo wa lamba, kamuhepwishile ni kumumwesa lamba linji. Wano kota kapwile mashimbu akalu chinji ku mwono wenyi! Mba yika yamukwashile kunyongonona? Mbimbiliya yinambe ngwo, iye yalihulikila “ha uwahililo uze asele kumeso jenyi.” (A-Hepreu 12:2, 3) Yesu kalihulikilile ha yiwape ya kunyongonona chenyi, chuma chilemu chize afupile kulinga chili kulemesa jina lia Zambi ni kukwasa kuyula chenyi chingunu. Kanyingikene ngwenyi, yihungumiona yapwile ya mashimbu akehe alioze chiwape chenyi cha mu malilu chapwile cha mutolo. Musono, yihungumiona yize unamono muyihasa kukuhongesa ni kumona lamba, alioze iwuluka ngwe yili ya matangwa akehe wika.

11. Mumu liaka twatamba kuhengula yakulitakana nayo ya “waze anyongonwene”?

¹¹ Kutwatambile kunyongonona ukawetu. Postolo Petulu ha kutakamisa akwa-Krisu hanga anyongonone mu yeseko ya Satana, yamba ngwenyi “Limikenu nenyi, nikujikiza mu ufulielo, nikunyingika lamba lienu limuwika kulinamanunuka muli mandumbu jenu waze ali hano hashi.” (1 Petulu 5:9) Yakulitakana nayo ya “waze anyongonwene” yakutulongesa chize mutununga ni kushishika, ni kutwaha shindakenyo ngwetu mutuhasa kukumba, ni kwiwuluka ngwetu kushishika chetu muchikapwa kuwahisa. (Tiangu 5:11) Tuhengulenu yimwe yilweza yikehe. ^[1]—Tala maliji akusongo.

12. Yika mutuhasa kulilongesa ha chilweza cha akerupimi waze apwile mu Endene?

¹² Akerupimi kali angelo waze akwete ulemu unji. Muze Alama ni Eva alingile shili, Yehova yahana amwe akerupimi umwe mulimo waha hano hashi. Mulimo wacho walisele chinji ni mulimo uze apwile nawo mu malilu. Yilweza yo muyihasa kutulongesa chize mutunyongona muze mutupwa ni umwe mulimo ukalu. Mbimbiliya yinambe ngwo Yehova “Mba yahuma mutu, yasa ku sali lia Chivumbuko lia munda wa Endene akerupimi ni katana wa mulengi wa kutalikisa majila eswe kufunga jila ya mutondo wa mwono.” ^[2] (Tala maliji akusongo.) (Uputukilo 3:24) Mbimbiliya kuyishi kwamba ngwo Akerupimi kapwile ni kulisozola hanji kunyonga ngwo mulimo uze apwile nawo mu malilu te ulemu chinji kuhiana uze apwile nawo hano hashi. Kakevwile kupihia ku mbunge hanji kwecha mulimo wacho. Alioze, yanunga ha mulimo  wo ndo aze mulimo wo wahetele ku songo, kota ndo ha mashimbu a Sango Linene lia Meya, muze te hikwapalika miaka 1,600!

13. Kuchi Yombi ahashile kunyongonona ha lamba lienyi?

¹³ Yombi kavumbi washishika. Ha mashimbu amwe muuhasa kwivwa yinyengo mumu umwe sepa hanji usoko we makwamba chuma chize muchikulemeka ku mbunge. Hanji muhasa kuyiza chinji hanji kwivwa yikola ku mbunge ha mukunda wa kufwa cha mutu yoze twazanga chinji. Chipwe mumona lamba, ena muhasa kuwana utakamiso ha chilweza cha Yombi. (Yombi 1:18, 19; 2:7, 9; 19:1-3) Yombi kakanyingikine mumu liaka amwene lamba lia susumuku, alioze kakahongele. Yika yamukwashile kunyongonona? Kahashile kunyongonona, mumu te kakuzanga Yehova ni kwivwa woma wa kumuvwisa yikola ku mbunge. (Yombi 1:1) Yombi kazangile kwivwisa Zambi kuwaha ha mashimbu apema ni api. Chikwo nawa, Yehova kakwashile Yombi hanga amone ndundo Jenyi ha kumusolwela yimwe yuma yaukomokeso yize atangile. Yuma yino ye yakwashile Yombi kufuliela ngwenyi Yehova te mahwisa lamba lienyi ha shimbu lize lialita. (Yombi 42:1, 2) Yino ye yalingiwileko. ‘Yehova yahilwisa kuwaha cha Yombi hamwe ni upite wenyi. Yehova yamwaha yisuho yaali ya yuma yize apwile nayo hatangu.’ Mba Yombi yatwama “matangwa anji” ku mwono.—Yombi 42:10, 17.

14. Kulita ni 2 A-Korindu 1:6, kuchi kunyongonona cha Paulu chakwashile akwo?

¹⁴ Postolo Paulu. Kutala unamona lamba linji hanji yihungumiona? Shina uli mukulwana mu chikungulwila hanji kalayi wa mbonge yoze unahongo mu mbunge ha mukunda wa yiteli yinji yize uli nayo? Nyi che wakwivwa, chilweza cha Paulu muchihasa kukukwasa. Paulu kamumwesene lamba linji, nawa kapwile ni kulihulumba chinji ha mukunda wa mandumbu mu yikungulwila. (2 A-Korindu 11:23-29) Alioze Paulu kakahongele, chilweza chenyi chakolesele ufulielo wa akwo. (Tanga 2 A-Korindu  1:6.) Chilweza che cha kunyongonona muchihasa kukolweza akwenu hanga no anyongonone.

15, 16. (a) “Mulimo” uka watamba kunyongonona ndo ku songo? (b) Hana yilweza ya chize mutuhasa “kwecha kunyongonona chikaye ndo ku songo.”

¹⁵ Kambaji Tiangu kasonekene ngwenyi: “Kunyongonona chikaye ndo ku songo lia milimo yacho, hanga nukapwe angunu, a muwundu, nikuhona nichimwe.” (Tiangu 1:4) Kuchi kunyongonona muchihasa kuya ndo ku songo lia “milimo” wacho hali yetu? Muze mutumona lamba, mutuhasa kumona ngwetu, twatamba kupwa ni uhomboloji, usakwililo hanji zango. Muze mutunyongonona ha lamba, mutulilongesa kusolola chinji yitanga yacho, nawa ni chize mutululieka utu wetu wa akwa-Kristu.

¹⁶ Amu kunyongonona muchihasa kutupwisa akwa-Kristu apema, kutwatambile kwehuka shimbi ya Yehova hanga tuhwise wika lamba lietu. Chakutalilaho, nyi unapinda ni manyonga a utanji, kanda ulinjisa mu cheseko! Eta ukwaso kuli Yehova hanga wehuke manyonga api. Shina uli ni umwe mutu usoko yoze wakulimika yena? Kanda uhonga ku mbunge! Pwako ni hamu lia kununga ni kuwayila Yehova. Nyi walinga chocho, muukolesa ufulielo we muli Yehova. Iwuluka ngwe: Mba tupwe ni utayizo wa Zambi, twatamba kunyongonana.—A-Roma 5:3-5; Tiangu 1:12.

17, 18. (a) Lumbununa ulemu wa kunyongonona ndo ku songo. (b) Ujikijilo uka mutuhasa kupwa nawo amu tunakundama kusongo?

¹⁷ Kutwatambile kunyongonona wika ha limwe shimbu, alioze ndo ku songo. Achinyonga ngwe umwe ulungu unashimbama. Atu waze alimo mba alilamwine o katamba kusana hanga aye ndo kusesa lia lwiji. Mutu yoze mahonga iye maputuka kushimbama. Chizechene nawa, mutu yoze mahonga muze kanda achiheta kusesa lia lwiji neye mashimbama. Nyi mutuzanga hanga tukatwame mu paraisu, twatamba kununga ni kunyongonona. Tupwenu ni yitanga ngwe ya postolo Paulu, yoze wambile ngwenyi: Kanda ‘tulezumioka.’—2 A-Korindu 4:1, 16.

¹⁸ Ngwe Paulu, ni yetu tuli ni ushindakenyo ngwetu, Yehova matukwasa hanga tunyongonone ndo ku songo. Paulu yasoneka ngwenyi: “Mu yino yuma yeswe twakuhiana kukumba ku tachi ja yoze hanatuzange. Mumu ngunakunuka ngwami, Chipwe kufwa, chipwe mwono, chipwe angelo, chipwe yiyulo, chipwe yuma ya haliapwila, chipwe yuma yize muyizaho, chipwe tachi, chipwe usuku kwilu, chipwe usuku kushi, chipwe chuma chikwo chize atangile, nichimwe chuma muchihasa kutuhandununa ku zango lia Zambi lize lili muli Kristu Yesu Mwene wetu” chakuhi. (A-Roma 8:37-39) Chili umwenemwene ngwo ha mashimbu amwe mutukahonga mu mbunge. Chipwe chocho, twimbululenu chilweza cha Ngideone ni maswalale jenyi. Ayo kahongele, alioze kakechele kwasa no jita. O ‘nihindu yanunga ni kuhanga akwa-kole jo’!—Akwa Kuyula 8:4.