1-3. (a) Kuchi akwa-Kristu akusolola ngwo kakuzanga kukunguluka hamuwika? (Tala chizulie ha uputukilo.) (b) Yika mutwe uno muulumbununa?

NAYE ya Corinna kamusele mu zuwo lia ususu kuze te akulinga milimo ya ku tachi muze Corinna te uchili ni miaka 17. Hakupalika cha matangwa, Corinna neye yamutwala ku Sibéria. Kwoko, aye te kakukalakala mu minda ngwe kapinji. Ha mashimbu amwe te kakumushinjila hanga akalakale ku chihela kuze te kukwete chishika chinji chakuhona mazalo achishika. Chipwe chocho, Corinna ni pangi mukwo jikwata chiyulo cha kuhichika mulimo wa minda hanga aye ku kukunguluka ku chikungulwila.

² Corinna yamba ngwenyi: “Twakatukile ku mulimo wetu ha ufuku yitwenda kilometro 25 ndo ha ukwachilo wa komboio. Komboio kakatukile ha mandemba, yitwenda maola asambano mba yitusunuka ha chimwe chihela, yitwenda nawa kilometro kumi mba yituheta ku chihela cha kukungulukila.” Corinna kawahilile chinji hakulinga wenyi wacho. Yamba ngwenyi: “Ku kukunguluka, twalilongesele Kaposhi wa Kutalila ni kwimba miaso  ya Wanangana. Chakolesele ufulielo wetu ni kututakamisa.” Hakupalika cha matangwa atatu mapangi wano aali yafuna ku milimo yo ya minda, alioze mukwa-minda kakanyingikine ngwenyi o katuhukile.

³ Tuvumbi twa Yehova mashimbu eswe kakuzanga kukunguluka hamuwika. Chakutalilaho, akwa-Kristu atangu kapwile ni kuzanga chinji kuwayila Yehova hamuwika ni kulilongesa hakutwala kuli iye. (Yilinga 2:42) Chochene, ni yena kota wakuzanga chinji kuya ku kukunguluka. Alioze chizechene ngwe mandumbu ni mapangi je eswe, muchihasa kupwa chikalu chinji kuya ku kukunguluka mashimbu eswe. Kota wakukalakala maola anji hanji ukwete mulimo uze wakukuhongesa chinji. Kashika, yika muyitukwasa kusa tachi hanga tupwe ku kukunguluka chetu? ^[1] (Tala maliji akusongo.) Kuchi mutuhasa kukolweza alongi jetu a Mbimbiliya ni atu akwo hanga apwe ni kwiza ku kukunguluka chetu mashimbu eswe? Mutwe uno muulumbununa mumu liaka kupwa ku kukunguluka (1) chakutukwasa, (2) chakukwasa akwetu, ni (3) kwivwisa Yehova kuwaha. ^[2]—Tala maliji akusongo.

4. Kuchi kukunguluka hamuwika chakutukwasa kulilongesa hakutwala kuli Yehova?

⁴ Kukunguluka chakutufumba. Kukunguluka cheswe chakutukwasa kulilongesa chinji hakutwala kuli Yehova. Chakutalilaho, yikungulwila yinji yalilongesele mukanda Achegue-se a Jeová ha Longeso lia Mbimbiliya lia Chikungulwila. Kuchi wevwile muze walilongesele yitanga ya Yehova ni muze wevwile chize mandumbu je akwivwa hakutwala kuli iye? Pundu lume, chino chakolesele chinji zango lie kuli Yehova. Ku kukunguluka, yetu twakulilongesa chinji Mbimbiliya ha kupanjika kanawa pande, kutala yilweza ni kupanjika kanawa muze anatange Mbimbiliya. (Nehemia 8:8) Achinyonga nawa ha yuma yinji yize twakuwana ha poso jeswe, muze twakululieka kutanga cha Mbimbiliya ni kwivwa yize akwetu no alilongesanga ha kutanga chacho.

5. Kuchi kupwa ha kukunguluka chakukukwasa kuzachisa yuma yize wakulilongesa mu Mbimbiliya ni kululieka mulimo we wa sango lipema?

⁵ Kukunguluka chakutukwasa hanga tuzachise yuma yize twakulilongesa mu Mbimbiliya ku mwono wetu. (1 A-Tesalonika 4:9, 10) Chakutalilaho, shina hinapu ha kukunguluka cha Longeso lia Kaposhi wa Kutalila chize chakukwashile hanga uzange chinji mulimo wa Yehova, kululieka yilemba ye, hanji kukonekena umwe ndumbu hanji pangi? Kukunguluka chize twakupwa nacho hakachi ka poso chakutulongesa chize mutwambujola sango lipema ni chize mutukwasa akwetu hanga anyingike umwenemwene wa Mbimbiliya.—Mateu 28:19, 20.

6. Kuchi kukunguluka chetu chakutukolweza ni kutukwasa hanga tukole ku ufulielo?

⁶ Kukunguluka chakututakamisa. Hano hashi ha Satana ha kutulingisa hanga tukokoloke ku ufulielo ni kutuhongesa ku mbunge ni kuhona utakamiso. Alioze kukunguluka chetu chakututakamisa ni kutwaha  tachi hanga tununge ni kuwayila Yehova. (Tanga Yilinga 15:30-32.) Kanji-kanji, twakuhanjika hakutwala ku uprofeto wa mu Mbimbiliya chize unamanunuka. Chino chakutukwasa kupwa ni shindakenyo ngwetu yilakenyo yeswe ya Yehova pundu lume kumuyikamanunuka. Mandumbu ni mapangi jetu keshi kututakamisa wika muze akuhanjika pande, alioze chipwe muze akuhana kumbululo ni kuhalisa Yehova ha kwimba miaso ni mbunge yeswe. (1 A-Korindu 14:26) Nawa muze twakuhanjika no ku uputukilo ni kusongo lia kukunguluka, twakuhuzuluka ku mbunge mumu tuli hamwe ni masepa anji waze akutuzanga.—1 A-Korindu 16:17, 18.

7. Mumu liaka chili chilemu kupwa ku kukunguluka?

⁷ Ku kukunguluka twakutambula ukwaso wa spiritu yisandu ya Zambi. Yesu kakuzachisa spiritu yino yisandu hanga asongwele chikungulwila. Kwamba umwenemwene, katulwezele ngwo twatamba ‘kupanjika yize spiritu yakwamba ku yikungulwila.’ (Usolwelo 2:7) Spiritu yisandu muyihasa kutukwasa kulimika ni yeseko ni kwambujola ni hamu lieswe. Muyihasa nawa kutukwasa kukwata yiyulo ya mana. Kashika, twatamba kusa tachi hanga tupwe ni kuyaya ku kukunguluka chetu hanga tutambule ukwaso wa spiritu yisandu ya Zambi.

8. Muze mandumbu jetu akutumona ku kukunguluka, ni kwivwa makumbululo jetu, ni kwimba miaso, kuchi chino chakwaakwasa? (Tala nawa kasha “ Iye Kakwivwa Chiseke Mashimbu Eswe.”)

⁸ Kukunguluka chakutukwasa hanga tusolole zango lietu kuli mandumbu ni mapangi jetu. Mandumbu anji mu chikungulwila chetu kananyongonona mu yipikalo yinji. Postolo Paulu kasonekene ngwenyi: “Tulitalenu umwe ni mukwo ni mukwo.” (A-Hepreu 10:24, 25) Mutuhasa kusolola zango lietu kuli mandumbu jetu ha kukunguluka hamuwika hanga tulitakamise umwe ni mukwo. Muze twakuya ku kukunguluka, twakusolola kuli mandumbu jetu ngwetu twakuzanga kupwa hamwe no ni kuhanjika no nawa ngwetu twakuzanga chinji kunyingika chize ayo akwivwa. Twakwaatakamisa nawa muze akwivwa makumbululo jetu ni kwimba miaso ni mbunge yeswe.—A-Kolosu 3:16.

9, 10. (a) Lumbununa chize maliji a Yesu waze ali ha Yoano 10:16 anatukwasa kunyingika mumu liaka chili chilemu kukunguluka ni mandumbu jetu. (b) Nyi twakukunguluka mashimbu eswe, muchihasa kukwasa umwe ndumbu yoze hanamwehuka kuli asoko?

⁹ Muze twakuya ku kukunguluka twakukwasa chikungulwila hanga chilinunge. (Tanga Yoano 10:16.) Yesu kalitesele mwene ni umwe kafunga alioze tumbaji twenyi ni chendo cha mapanga. Achinyonga ha chino: Nyi mapanga aali kali ha mulundu, akwo aali kali mu chimbongo, nawa mukwo kali kweka, shina mutwamba ngwetu mapanga wano atano kali mu chendo chimuwika? Ka, mumu mapanga katamba kupwa hamuwika ni kukaula kafunga ko. Chizechene nawa, kutwatambile kulihandununa ni mandumbu jetu ha kuhona kuya ku kukunguluka. Twatamba kukunguluka hamuwika hanga tupwe mu “chendo chimuwika” ni “kafunga umuwika.”

¹⁰ Kukunguluka chetu chakutukwasa hanga tulinunge ngwe umwe usoko wa zango. (Samu 133:1) Mandumbu amwe mu chikungulwila hanalengulula kuli asoko jo, ngwe a yisemi hanji mandumbu jo. Alioze Yesu kalakenyene kuwaaha asoko waze maazanga ni kwaafunga. (Marku 10:29, 30) Nyi twakukunguluka mashimbu eswe, mutuhasa kupwa ngwe tata, mama, ndumbu hanji pangi wa umwe ndumbu mu chikungulwila. Muze mutunyonga ha chino, mutusa tachi hanga tupwe ha kukunguluka cheswe.

11. Kuchi kukunguluka chakutukwasa kuhana kuli Yehova yize yamutela?

¹¹ Ku kukunguluka twakulinga yize yatela wika kuli Yehova. Twatamba kusakwilila Yehova, kumuhalisa ni kumuwayila  mumu iye mwe Sakatanga wetu. (Tanga Usolwelo 7:12.) Mutuhasa kulinga chino ku kukunguluka muze mutulemba kuli Yehova, mutumwimbila miaso ni kuhanjika hakutwala kuli iye. Tukwete chiwape chinene cha kuwayila Yehova ha poso jeswe!

12. Kuchi Yehova akwivwa muze twakwononokena shimbi yenyi ya kukunguluka?

¹² Yehova mwe watutangile, kashika twatamba kumwononokena. Iye kanatwite hanga tununge ni kukunguluka hamuwika, kanji-kanji amu tunakundama ku songo lia hano hashi. Kashika muze twakukaula shimbi yacho, Yehova kakuwahilila chinji. (1 Yoano 3:22) Iye kakumona pundu ngwenyi, chamwenemwene tunazange kupwa ha kukunguluka nawa kakuwahilila chinji ha tachi jeswe jize twakusa hanga tupweko.—A-Hepreu 6:10.

13, 14. Kuchi twakukundama kuli Yehova ni Yesu ku kukunguluka?

¹³ Muze twakuya ku kukunguluka twakusolola kuli Yehova ngwetu tunazange kukundama kuli iye ni kuli Mwanenyi. Ku kukunguluka twakulilongesa Mbimbiliya ni kulilongesa kuli Yehova yize twatamba kulinga ni chize twatamba kutwama. (Izaia 30:20, 21) Chipwe atu waze keshi kuwayila Yehova muze akwiza ku kukunguluka, kakumona pundu ngwo, Zambi mwe wakutusongwela. (1 A-Korindu 14:23-25) Yehova kakusongwela kukunguluka chetu kupalikila mu spiritu yenyi yisandu, nawa yize twakulilongesako yakwiza kuli iye. Kashika muze twakuya kukunguluka, twakupanjika yize Yehova akwamba, chize akwivwa, chize akutuzanga, ni chize mutukundama kuli iye.

¹⁴ Yesu, Kasongo wa chikungulwila, kambile ngwenyi: “Kuze aali hanji atatu anakunguluka mu jina liami, kuzekwene yami kunguli mukachi ko.” (Mateu 18:20) Mbimbiliya yinambe nawa ngwo, Yesu ‘kakwenda mukachi’ ka yikungulwila. (Usolwelo 1:20–2:1) Pundu lume, Yehova ni Yesu kali hamwe ni yetu nawa kakututakamisa muze twakuya ku kukunguluka. Ku nyonga lie, kuchi Yehova akwivwa muze akumona tachi jize wakusa hanga ukundame kuli iye ni kuli Mwanenyi?

15. Kuchi kuya ku kukunguluka chakusolola kuli Zambi ngwo twakuzanga kumwononokena?

¹⁵ Muze twakuya ku kukunguluka twakusolola kuli Yehova ngwetu tunazange kumwononokena. Yehova keshi kutushinjila hanga tulinge yize akuzanga. (Izaia 43:23) Kashika muze twakusakula kukaula shimbi yenyi ya kuya kukunguluka, twakusolola ngwetu twakumuzanga ni kufuliela ngwetu kali ni ulite wakutulweza yize twatamba kulinga. (A-Roma 6:17) Chakutalilaho, kuchi mutulinga nyi mwata wa ku mulimo wetu mazanga hanga tukalakale chinji chakuhona kukunguluka mashimbu eswe? Hanji nguvulu mahasa kwamba ngwenyi, mweswawo makunguluka hanga awayile Yehova, mafweta, mamusa mu zuwo lia ususu hanji kumumwesa lamba chinji. Hanji ha mashimbu akwo mutuzanga kulinga chuma cheka shimbu te tuye kukunguluka. Ha yikuma yeswayi, yetwene twatamba kukwata chiyulo  cha chize mutulinga. (Yilinga 5:29) Alioze muze mutusakula kwononokena Yehova, twakumuvwisa kuwaha.—Yishima 27:11.

16, 17. (a) Kuchi tunanyingika ngwetu kukunguluka chapwile chuma chilemu kuli akwa-Kristu atangu? (b) Kuchi ndumbu George Gangas te akwivwa hakutwala ku kukunguluka cha akwa-Kristu?

¹⁶ Chize ha kukunguluka cha Pentekoste ha mwaka 33, akwa-Kristu te kakukunguluka mashimbu eswe hanga awayile Yehova. “O anyongonwene mu longeso lia apostolo, nikuliendela.” (Yilinga 2:42) Nawa o kakechele kukunguluka hamuwika chipwe muze apwile ni kwaahungumiona kuli nguvulu wa A-Roma ni kuli mangana A-Yunda. Chipwe ngwe chino kuchakapwile chashi, nihindu ayo te kakusa tachi hanga anunge ni kukunguluka hamuwika.

¹⁷ Musono, tuvumbi twa Yehova kakusakwilila chinji ha mukunda wa kukunguluka nawa kakwivwa chiseke cha kupwako. Ndumbu George Gangas, yoze wapwile mu Chizavu cha Tusongo ha miaka 22 , yamba ngwenyi: “Kuli yami, kukunguluka hamwe ni mandumbu chili chuma chize chakungunehena uwahililo ni utakamiso ku mwono wami. Kulita ni uhashi wami nakuzanga kupwa mutu mutangu kuheta ku Zuwo lia Wanangana ni kupwa mutu wa kasula kutuhukako. Nakwivwa chiseke mu mbunge muze nakuhanjika ni atu ja Zambi. Muze nakupwa mu kachi ko, nakwivwa ngwe ku zuwo nguli ni asoko jami, paraisu ya ku spiritu.” Yamba nawa ngwenyi: “Kwamba pundu ku mbunge nakuzanga chinji kukunguluka.”

18. Kuchi wakwivwa ha kukunguluka chetu, nawa yika unazange kulinga?

¹⁸ Shina ni yena lie nyonga ukwete ha kuwayila Yehova? Ni chocho, nunga ni kusa tachi hanga upwe hamwe ni mandumbu je ku kukunguluka, chipwe muze muchikaliwa. Solola kuli Yehova ngwenyi wakwivwa ku mbunge ngwe chize evwile Ndawichi wambile ngwenyi: “Yehova kunazanga kutwama mu zuwo lie, muze mwatwama ulemu we.”—Samu 26:8.