KWAMBUJOLA chili umwe mulimo ulemu chinji. Alioze hi eswe ko waze twakwambujola ali ni nyonga liacho. Chipwe ngwe atu kakuzanga chinji yize Mbimbiliya yinambe, alioze kanji-kanji keshi kumona ulemu wa kulilongesa Liji lia Zambi ni yetu.

Tutalenu chilweza cha Gavin. Kapwile kuya mashimbu eswe ku kukunguluka ku Zuwo lia Wanangana, alioze te keshi kuzanga kulilongesa Mbimbiliya. Gavin te kakwamba ngwo kanyingikine yuma yinji ya mu Mbimbiliya, nawa te kasolo hanga akwo achinyingike. Gavin te kanevu woma ngwo hanji te mamwita hanga alingi chihanda cha umwe ulembelo, mumu te kasolo hanga amwonge. Yika wanyonga? Shina chapwile chashi kukwasa Gavin? Achinyonga chize yuma yipema ya mu Mbimbiliya muyihasa kukwasa mutu. Yehova kalwezele A-Izalele ngwenyi: “Kuhanjika chami chikapwe ngwe mume, ngwe vula wa kuwayangila ha mwambu wovu.” (Shimbi Yamuchiali 31:19, 30; 32:2) Haliapwila mutulilongesa yimwe yuma hakutwala ku mume, nawa mutuutesa ni mulimo wetu wa kwambujola, hanga tukwase “atu eswe.”—1 Timoteu 2:3, 4.

Mume uli chuma chipema. Mume uli mbundu jize jakusotoka kwilu ngwe meya. Yika maliji a Yehova akwamba ngwo, “kuhanjika chami chikapwe ngwe mume” analumbunuka? Kanalumbunuka ngwo, iye kahanjikile kuli atu jenyi ni umbovu, vumbi ni zango lieswe. Twakumwimbulula muze twakusolola vumbi ha yuma yize akwetu afuliela. Mutuhasa kwaakolweza hanga anyonge ene ni kukwata yiyulo yo ene. Nyi twapwa ni zango liacho, atu mapwa ni kutayiza ni mbunge yeswe yuma yize twakwaalweza, nawa mulimo wetu wakwambujola muupema chinji.

Mume wakekema. Mulimo wetu wa kwambujola muuhasa kuhuzulula akwetu nyi twawana majila alisa akwakwashilamo kunyingika umwenemwene. Ndumbu Chris, yoze wazangile kulongesa Mbimbiliya kuli Gavin, aye kakamushinjilile hanga atayize kulilongesa. Alioze iye kafupile majila eka ni eka hanga Gavin te apwe ni zango liakuhanjika hakutwala ku Mbimbiliya. Chris kalwezele Gavin ngwo, longeso liacho lili ni jimwe sango jilemu ja mu Mbimbiliya jize te anambe kuhanjika nenyi, nawa ngwo sango jacho te mujimukwasa kunyingika kanawa kukunguluka chetu. Ha chino, Chris yalumbununa ngwenyi, uprofeto wa Mbimbiliya wamukwashile kunyingika ngwenyi Mbimbiliya yili yamwenemwene. Kashika, ayo yaputuka kushimutwina chinji ha uprofeto wa mu Mbimbiliya uze hiunamanunuka. Kushimutwina chino chahuzulwile mbunge ya Gavin, hi kusulaho aye yatayiza longeso lia Mbimbiliya.

Mume ukwete ulemu unji ku mwono. Ha mashimbu a changa, mu Izalele kumushi kunoka vula ha tukweji anji. Ha chino, mitondo yakwoma, mumu kwilu kushi kupwa mbundu jize jakuneha mume. Yehova kambile ngwenyi ha matanga jetu te mukupwa changa, changa chacho te muchilingisa atu hanga apwe ni pwila ya “kwivwa Liji lia Zambi.” (Amose 8:11) Iye kalakenyene ngwo akwa-Kristu akuwayisa te mapwa ngwe “mume wa kuli Yehova,” ha kwambujola sango lipema lia Wanangana ni ukwaso wa “mapanga akwo.” (Mika 5:7; Yoano 10:16) Sango jize twakwambujola jakukatuka kuli Yehova hanga jihane mwono kuli waze ali ni pwila ya kunyingika umwenemwene. Shina twakulemesa sango jacho?

Mume uli chiwape cha Yehova. (Shimbi Yamuchiali 33:13) Mulimo wa kwambujola muuhasa kupwa chiwapwe hanji chawana kuli waze akutupanjika. Longeso lia Mbimbiliya liapwile chiwape kuli Gavin, mumu liamukwashili kuwana makumbululo a yihula yenyi yeswe. Nawa yatakama chinji um ufulielo hachino kwapalikile mashimbu anji yamupapachisa, haliapwila kakwambujola sango lipema lia Wanangana hamwe ni mukwo pwo Joice.

Kutesa mulimo wetu wa kwambujola ni mume muchihasa kukwasa mutu ni mutu kunyingika ngwo tachi jize akusa ha kwambujola sango lipema jili jilemu chinji. Kuchi chenacho? Musoto umuwika wa meya ushi kukwasa chinji, alioze ni kwaholoka misoto yinji ya meya yakuulisa hashi. Chizechene nawa, ni twambujola ukawetu muchihasa kusoloka ngwe mulimo wetu kuushi ni ulemu. Alioze ni twauchinga ni milimo yize akulinga kuli tununu a tununu twa tuvumbi a Yehova, mutumona ngwetu twakwambujola chinji “mu yifuchi yeswe ya hashi.” (Mateu 24:14) Shina mulimo wetu wa kwambujola muupwa chiwape cha Yehova kuli akwetu? Ewa, sango jetu mujipwa ngwe mume, nyi twajihanjika ni umbovu, vumbi, zango, hamwe ni kujilemesa!