TWAPWILE mu Mbonge ya Mexico ha Novembro 1932, mbonge yacho mwapwile mwa too ni atu. Te hikwapalika wika poso chize haze asele yilayi yize yakusongwela mashinyi ni atu (simáforos) Alioze haliapwila atu kanawahilila hamukunda wa chimwe chuma . Akwa-sango kali ha utulilo wa komboiu ni kamera jo akululieka kulu hanga atambule umwe ngeji mulemu yoze te unezako. Mutu wacho iya? Ndumbu Joseph F. Rutherford, kasongo wa ululikiso wetu ha mashimbu jacho. Yela ja Yehova amu chifuchi chacho yaya ni kupatwiza Ndumbu Rutherford yoze te uneza ha kukunguluka cha mambonge cha matangwa atatu.

Mukanda A Idade de Ouro (Despertai!) yiwamba ngwo: “Pundu lume kukunguluka chino kutuchi keza kachivulama mumu chapwile chilemu chinji ” chakwashile kulitanda cha umwenemwene mu Mexico. Alioze chino chapwile wika kukunguluka chikehe cha atu 150. Mba mumu liaka chapwile chilemu?

Shimbu kukunguluka chacho te kanda chilingiwa, umwenemwene mu Mexico te ushi kukola chinji. Kukatuka ha mwaka 1919, kwapwile ni kulingiwa kukunguluka cha mbonge, alioze unji wa yikungulwila te wakutepuluka . Muze asele mutango mu Mbonge ya Mexico ha mwaka 1929, chasolokele ngwe yuma muyiwaha, alioze yikusoloka amwe tupalia. Ululikiso walongesele colportore, che te akuvuluka pionelu, hanga achine kuchinga mingoso ni mulimo wa kwambujola. Umwe colportore yachipihilila chocho yatuhuka mu umwenemwene yaputuka chizavu chenyi cha kulilongesa Mbimbiliya . Nawa ha shimbu liacho kasongo waku mutango yamuchizako mumu te kakwete yitanga yipi. Yela ja Yehova ashishika mu Mexico kafupiwile utakamiso.

Kwiza cha Ndumbu Ruther ford chatakamishine chinji tuvumbi jacho ashishika ha pande jaali jize ahanjikile ha kukunguluka ni pande jikwo jitano jize ahanjikile ku chisaji cha fuji. Wano kapwile mashimbu atangu waze mandumbu azachishile chisaji cha fuji hanga amwange sango lipema mu Mexico. Muze kukunguluka chahwile, yatongola umwe kasongo mwaha hanga afunge mutango. Hachino, Yela ja Yehova yazala too ni zango hamwe ni utayizo wa Yehova, chocho yanunga ni kwambujola sango lipema.

Ha mwaka 1933, mu chifuchi kalingilemo kukunguluka chaali cha mambonge, chimwe mu Veracruznawa chikwo mu Mbonge ya Mexico. Mandumbu yahondangana mungiza, chocho mulimo yiwenda kanawa. Chakutalilaho, ha mwaka 1931 kwapwile wika akwa-kwambujola 82 . Ha mwaka 1941 , akwa-kwambujola kokele ha yisuho kumi! Atu kuhiana 1 ,000 kayile ku kukunguluka chize chalingiwile mu Mbonge ya Mexico ha mwaka 1941.

Ha mwaka 1943, Yela ja Yehova yakalakala chinji hanga ambujole kukunguluka cha mbonge, chakwamba ngwo, “ Vungu Lili ni Utuswilo” chize alingile mu mambonge 12 mu Maxico. * (Tala maliji mushi lia lifwo.) Ayo kalingile mulimo wacho ha kuzachisa kartaze-sanduiche, uno uli uhashi ukwo uze tuvumbi twa Zambi te akuzachisa kukatuka ha mwaka 1936.

Kuzachisa karta-zesanduiche yichikwasa atu amu Mbonge ya Mexico. Umwe mukanda# yiuhanjika hakutwala ku kukunguluka chacho ngwo: “Ha tangwa litangu mandumbu kanakaalweza hanga asanyike atu. Ha tangwa lize liasulileho, kwakapwile nawa chihela cha atu akwo.” Kwambujola chacho chevwishile uli mangana a yingeleja ya Katolika , chocho yaputuka kuhanjika chipi hali atu ja Zambi . Chipwe chocho, mandumbu yanunga ni kwambujola kukunguluka chacho chakuhona kwivwa woma. Mukanda wacho yiwamba nawa ngwo: “Atu eswe mu mbonge yamona malunga ni mapwo kanazale kartaze-sanduiche.” Mukanda wacho yiusolola yimwe foto ya mandumbu ali mu matapalo mu Mbunge ya Mexico. Mushi lia foto mwapwile maliji akwamba ngwo: “Matapalo kaatambula.”

Ha miaka yacho, anji akuli Yela ja Yehova kasele tachi hanga aye ku kukunguluka chimwe chize te chakulingiwa mu Mexico. Anji te katunga ku yihunda kuze kwakapwile matapalo ni jila ya komboiu . Mandumbu mu chikungulwila chimwe yasoneka ngwo: “Uhashi umwe uze tuli nawo kuno uli wika wa telegrafu .” Hachino, mandumbu anji te kakwenda hashi hanji ha yimbulu ha matangwa anji mba akwate komboiu,ya kuya nayo mu mbonge muze te akulingila kukunguluka.

Mandumbu anji te yiswale nawa te keshi kuhasa kufweta hanga aye ku kukunguluka cha mambonge. Mandumbu waze te akuwanako te kakwaatambula kanawa ku mazuwo jo. Akwo te kakupomba mu Mazuwo a Wanangana. Ha limwe shimbu, unji wa mandumbu 90 kanakaatambula ku Mbetele, hachino, ayo yapomba ha yimwe mihela yize alingile ni tusha a mikanda. Mukanda wa Mwaka (Anuário) yiwamba ngwo, mandumbu kanakawahilila chinji hamukunda wa ukwaso uno, nawa yamba ngwo “mihela yacho yapwile yipema nawa yasasaminya kuhiana hashi.”

Kuli mandumbu jacho , kusa tachi hanga apwe hamwe ni mandumbu jo chinahiane chitapo cheswacho. Musono mu Mexico muli akwa-kwambujola kuhiana 850,000, nawa ayo eswe kali ni nyonga lioliene lia kusakwilila. * (Tala maliji mushi lia lifwo.) Ni haliapwila mandumbu kakulemesa kukunguluka cha mambonge. Umwe lusango wa ku mutango asonekene ha Mukanda wa Mwaka wa 1949, kambile ngwo, mandumbu kapalikile mu tupalia anji, alioze yino kuyakahwishile zango lize te akwete lia kuwayila Yehova . Ayo machinunga ni kuhanjika hakutwala ku hita kukunguluka cha mbonge ni kulihula ngwo: “Tangwa lika mutukapwa ni kukunguluka chikwo chambonge?” Kutushi ni kuyambashana ngwetu mandumbu ni musono kali ni nyonga lioliene.—Sango jamu Ululikiso Wetu ku América Central.