Mateu muze asonekene mukanda wenyi, kahulikile lusango wenyi hali Yosefwe. Unasolola nyonga lia Yosefwe muze anyingikine ngwenyi, Maria hapwa kafumba. Mateu yahanjika hakutwala ku chilota cha Yosefwe, chize mungelo alumbunwine yize te yinalingiwako, ni chize Yosefwe akawile usongwelo wa mungelo. (Mateu 1:19-25) Mateu nawa yalumbununa chize mungelo atowezele Yosefwe mu chimwe chilota hanga aye mu Engitu hamwe ni usoko wenyi ni chize iye akawile utowezo wacho. Mateu kanatulweze ngwenyi, Yosefwe kalotele nawa, mu chilota chacho umwe mungelo yamwamba ngwenyi, funa mu chifuchi cha Izalele. Nawa muze afunyineko yaya ni kutwama mu Nazare ni asoko jenyi. (Mateu 2:13, 14, 19-23) Mu Evanjelu yenyi, mu tupitulu aali atangu, Mateu yatongwola jina lia Yosefwe yisuho nake, alioze jina lia Maria yisuho yiwana wika.

Alioze mukanda wa Luka wakulihulikila chinji hali Maria kuhiana hali Yosefwe. Luka yahanjika hakutwala hali Maria ni mungelo Gabriele, muze iye ayile ni kumeneka Izabele ni maliji jenyi akuhalisa Yehova. (Luka 1:26-56) Mukanda uno unalumbununa yize Simeone ambile hali Maria hakutwala ku yipikalo yize Yesu te mapalika kulutwe lia matangwa. Luka kahanjikile ha wenyi wa usoko wa Yesu ku tembele muze Yesu apwile ni miaka 12. Mu mukanda uno, Luka yatongwola maliji a Maria hi waze a Yosefwe ko, ni kutulweza chize Maria anyongene chinji ha yuma yacho. (Luka 2:19, 34, 35, 48, 51) Mu Evanjelu yenyi, mu tupitulu aali atangu, Luka yatongwola jina lia Maria yisuho 12, alioze lia Yosefwe 3 wika. Kashika Mateu anatulweze chinji hakutwala ku yize Yosefwe anyongene ni yize alingile. Alioze Luka, kalihulikilile ha yize Maria anyongene ni yize apalikile ku mwono.

Chikwo nawa munyachi wa chisemuko cha Yesu kanausolola mu mutapu walisa mu mikanda yino yaali. Mateu kasonekene munyachi wa Yosefwe nawa yasolola ngwo, Yesu te mwana wakatumba wa Yosefwe nawa ngwo kapwile ni ulite wakuhinga Wanangana wa Ndawichi. Mumu liaka? Mumu Yosefwe kapwile wa ku chisemuko cha Mwanangana Ndawichi kupalikila muli mwanenyi Solomone. (Mateu 1:6, 16) Alioze, Luka kasonekene munyachi wa Maria ni kusolola ngwo Yesu kali ni ulite wakuhinga wanangana wa Ndawichi “kulita ni musunya.” (A-Roma 1:3) Mumu liaka? Mumu Maria kapwile wa ku chisemuko cha Mwanangana Ndawichi kupalikila muli mwanenyi Natane. (Luka 3:31) Mba mumu liaka Luka kakatongwele Maria ngwe mwana wa Heli? Mumu munyachi kapwile ni kuusoneka wika hakutongwola majina a malunga. Kashika, muze Luka atongwele Yosefwe ngwe mwana wa Heli, chino te chinalumbunuka ngwo iye kali tato-weno wa Heli.—Luka 3:23.

Munyachi wa chisemuko cha Yesu uze anatongwola mu Evanjelu wa Mateu ni Luka unasolola ngwo Yesu te Mesaya yoze Zambi alakenyene. Umwenemwene hakutwala kuli Yesu ngwo kali mukwa-munyachi wa Mwanangana Ndawichi kaunyingikine chinji, kashika chipwe akwa-kole jenyi A-Fwariseu ni A-Saduseu kakachihamikine. Sango ja Mateu ni Luka hakutwala ku munyachi wa chisemuko cha Yesu jakutakamisa ufulielo wetu ni kutwaha shindakenyo ngwo, yilakenyo yikwo ya Zambi muyikamanunuka pundu.