1, 2. (a) Yika muyihasa kutulingisa mba tulihule ngwetu: “Ndo mwiji muka?” (b) Mumu liaka yilweza ya tuvumbi ashishika ku shakulu yakututakamisa musono?

“NDO mwiji muka?” Chihula chino kachihulile kuli aprofeta ashishika, Izaia ni Habakuke. (Izaia 6:11; Habakuke 1:2) Muze Mwanangana Ndawichi asonokene Samu 13, kahulile chihula chacho ha yisuho yiwana. (Samu 13:1, 2) Nawa muze Yesu Kristu apwile hamwe ni atu waze te keshi ufulielo, iye yaahula ngwenyi: “Ndo mwiji muka?” (Mateu 17:17) Ni yetu nawa musono, mutuhasa kuhula chihula chacho.

² Yika muyihasa kutulingisa mba tulihule ngwetu: “Ndo mwiji muka?” Mutuhasa kulihula chocho, nyi mukulingiwa chuma chipi ku mwono wetu. Hanji muze mutuyiza chipwe kushinakajiwa. Mutuhasa kwivwa kupihia mumu twatwama ha “miaka yikalu.” (2 Timoteu 3:1) Hanji manyonga api ja atu waze twatunga no matuhongesa ni kutuhonesa utakamiso. Chipwe ngwe  mutuhula ni nyonga lieswalio, nihindu chili utakamiso kunyingika ngwetu, Yehova kakahishile tuvumbi twenyi ashishika waze ahulile chihula chacho.

3. Yika muyihasa kutukwasa muze tunapalika mu ukalu?

³ Yika muyihasa kutukwasa muze tunapalika mu ukalu? Tiangu mwakwo ya Yesu ni ukwaso wa Zambi kanatulweza ngwenyi: “Lihumikizenu, mandumbu, ndo ku kuheta cha Mwene.” (Tiangu 5:7) Hachino yetweswe tunafupiwa kupwa yihumikiji. Mba uhumikizo yika unalumbunuka, nawa kuchi mutuhasa kusolola chitanga chino chipema?

4, 5. (a) Uhumikizo yika unalumbunuka, nawa kuchi mutuhasa kupwa yihumikiji? (b) Kuchi Tiangu alumbunwine uhumikizo? (Tala chizulie ha uputukilo.)

⁴ Mbimbiliya yinambe ngwo, uhumikizo wapwa muhuko wa spiritu yisandu ya Zambi. Nyi kukushi ukwaso wa Zambi, muchihasa kupwa chikalu atu akwa-shili kupwa yihumikiji muze mapalika mu ukalu. Uhumikizo wapwa chiwape cha Zambi, nawa twakusolola zango lietu kuli Yehova ni kuli akwetu ha kusolola muhuko wacho. Nyi kutushi uhumikizo, zango hali akwetu mulikekema. (1 A-Korindu 13:4; A-Ngalashia 5:22) Mba uhumikizo yika unalumbunuka? Unalumbunuka kunyongonona ha yuma yikalu ha kupwa ni nyonga lialita. (A-Kolosu 1:11; Tiangu 1:3, 4) Uhumikizo nawa muuhasa kutukwasa hanga tununge ni kushishika kuli Yehova chipwe ngwe mutumona lamba lieswalio. Chino muchikatukwasa tuhone kufwetesa upi ni upi muze matumwesa lamba. Mbimbiliya yakwamba ngwo twatamba kushimbwila ni mbunge yeswe. Lino lili longeso lilemu twawana ha mukanda wa Tiangu 5:7, 8 (Tanga.)

⁵ Mumu liaka twatamba kushimbwila ni mbunge yeswe muli Yehova hanga amanunune yilakenyo yenyi? Kambaji Tiangu kanatese yuma yize twakupalika ni yize akulinga njimi. Chipwe ngwe njimi kakuhondangana hanga alime mbuto, nihindu keshi kuhasa kusongwela mbuto jacho hanga jikole. Iye kakushimbwila wika ni uhumikizo weswe “mihuko yilemu ya hashi.” Chizechene nawa, kuli yuma yinji yize kutuchi kuhasa kusongwela muze tunashimbwila kumanunuka cha yiwape ya Yehova. (Marku 13:32, 33; Yilinga 1:7) Ngwe njimi, ni yetu twatamba kushimbwila ni uhumikizo weswe kumanunuka cha yiwape ya Zambi.

6. Yika mutuhasa kulilongesa ha chilweza cha profeta Mika?

⁶ Profeta Mika kanyongonwene mu yuma yikalu, ngwe chize tunalingi musono. Iye katwamine ha mashimbu akuyula cha Mwanangana Ahaze. Ahaze kapwile mwanangana mupi chinji. Hachino, mu chifuchi yimuzala too ni kalimbalimba. Yuma yapihile chinji kashika Mbimbiliya yakwamba ngwo atu apwile ‘ni kulinga yuma yipi ni mbunge yeswe.’ (Tanga Mika 7:1-3.) Mika kanyingikine ngwenyi te keshi kuhasa kwalumuna yuma yacho. Mba yika te malinga? Iye kanatulweze ngwenyi: “Hakutwala kuli yami, mungutala kuli Yehova. Mungutwaminyina Zambi ya ulamwino wami; Zambi yami mangwivwa.” (Mika 7:7) Ngwe Mika, ni yetu twatamba kupwa ni mbunge ya ‘kutwaminyina.’

7. Mumu liaka kutwatambile wika kushimbwila ngwetu Yehova amanunune yilakenyo yenyi?

⁷ Nyi twapwa ni ufulielo ngwe wa Mika, mutushimbwila muli Yehova ni mbunge yeswe. Ukalu wetu kuushi ngwe wa funge uli mu kamenga yoze unashimbwila tangwa  lize mamushiha. Iye kanashimbwila tuhu tangwa liacho, alioze hi ni uwahililo ko. Yuma ya funge wacho yinalise chinji ni ya yetu! Mumu tunashimbwila muli Yehova ni mbunge yeswe ha kunyingika ngwetu ha shimbu lialita, iye makamanununa chilakenyo chenyi chakutwaha mwono wa mutolo! Kashika twakunyongonona “ni uhomboloji hamwe ni uwahililo.” (A-Kolosu 1:11, 12) Muze tunashimbwila, twatamba kukanyama hanga tuhone kulinyenyeta ngwetu, Yehova kanashimbula ha kumanununa yilakenyo yenyi. Nyi twalinyenyeta, kutuchi kumuvwisa kuwaha.—A-Kolosu 3:12.

8. Yika mutulilongesa kuli malunga ni mapwo ashishika aku shakulu?

⁸ Yika muyitukwasa mba tupwe ni mbunge yakushimbwila? Kunyonga ha ushishiko wa malunga ni mapwo aku shakulu waze ashimbwile ni mbunge yeswe muli Yehova hanga amanunune yilakenyo yenyi. (A-Roma 15:4) Muze mutunyonga ha yilweza yo, chili chipema kwiwuluka mashimbu waze ayo anakashimbwila, mumu liaka apwile ni mbunge ya kushimbwila, ni chize Yehova awahishile ha uhumikizo wo.

9, 10. Miaka yingahi Apalahama ni Sara ashimbwile kuli Yehova?

⁹ Tutalenu chilweza cha Apalahama ni Sara. Mumu lia kusolola “ufulielo ni uhumikizo,” ayo yahinga “yilakenyo.” Mbimbiliya yinatulweze ngwo, Apalahama “wanyongonwene ni uhumikizo.” Hachino, Yehova yalakenya kumuwahisa ni kumupwisa tato ya vungu linene. (A-Hepreu 6:12, 15) Mumu liaka  Apalahama atambile kusolola uhumikizo? Mumu te mukupalika miaka yinji mba chilakenyo chacho chimanunuke. Ha tangwa 14 lia Nisane ha mwaka 1943 muze Kristu te kanda asemuka, Apalahama ni Sara ni atu eswe ajiko lienyi yazauka Lwiji Ufrateze ni kuya mu Chifuchi cha Chilakenyo. Alioze Apalahama te mashimbwila miaka 25 mumu mwanenyi Izake te kanda achisemuka ni miaka yikwo 60 mumu ajikulu jenyi Esau ni Yakomba no te kanda achisemuka.—A-Hepreu 11:9.

¹⁰ Shina Apalahama kahingile lume Chifuchi cha Chilakenyo? Mbimbiliya yinambe ngwo: Yehova “kamuhelemo chihinga nichimwe, chipwe haze masa chiliato chenyi, ka. Hindu yalakenya kumwahacho akachipite iye mwene ni munyachi wenyi kulutwe lienyi, shimbu te kanda apwa ni mwana.” (Yilinga 7:5) Chino chakalingiwile ha miaka 430 muze Apalahama azaukile Lwiji Ufrateze, mumu munyachi wenyi te kanda upwa vungu lize te mulitambula chifuchi chacho ni kuchihinga.—Kutuhuka 12:40-42; A-Ngalashia 3:17.

11. Mumu liaka Apalahama ashimbwile ni mbunge yeswe, nawa yiwape yika makapwa nayo mumu lia uhumikizo wenyi?

¹¹ Apalahama kapwile ni mbunge ya kushimbwila mumu kapwile ni shindakenyo ngwo Yehova te mamanununa yilakenyo yenyi. Iye te kakufuliela muli Yehova ni mbunge yeswe. (Tanga A-Hepreu 11:8-12.) Apalahama chipwe ngwe kafwile chakuhona kumona kumanunuka cha yilakenyo yeswe ya Zambi, nihundu kashimbwile muli iye ni uwahililo weswe. Achinyonga ha chiseke chize makapwa nacho Apalahama muze makamuhindwisa mu paraisu. Makakomoka muze matanga sango ja mwono wenyi ni ja asoko jenyi mu mikanda yinji ya Mbimbiliya. * (Tala maliji mushi lia lifwo.) Nyonga nawa chiseke chize makevwa ha kunyingika ulemu wa chihanda chize alingile ha kumanunuka cha upale wa Yehova hali Mesaya! Mutuhasa kupwa ni shindakenyo ngwetu, Apalahama makevwa kuwaha mumu lia kusolola mbunge ya kushimbwila.

12, 13. Mumu liaka Yosefwe atambile kulihumikiza, nawa nyonga lika lipema apwile nalio?

¹² Kakwata-mbuli wa Apalahama Yosefwe neye kapwile ni uhumikizo. Kapalikile mu yimwe yuma ya uhenge. Chitangu, mandumbu jenyi yamulanjisa mu undungo muze te ali ni miaka 17. Hachino, yamuliongela ngwo kambile kulisumbakenya kutachi ni pwo lia mwata wenyi, chocho yamusa mu kamenga. (Uputukilo 39:11-20; Samu 105:17, 18) Chipwe ngwe Yosefwe kapwile kavumbi washishika wa Zambi, nihindu kasolokele ngwe te kakumona chinji lamba kuhiana kupwa ni yiwape. Alioze hakupalika cha miaka 13, yuma yeswe yiyalumuka ku mwono wa Yosefwe. Yamutuhwisa mu kamenga ni kupwa mutu wamuchiali mu Engitu.—Uputukilo 41:14, 37-43; Yilinga 7:9, 10.

¹³ Shina uhenge wacho wevwishile Yosefwe yikola ku mbunge? Kutala kanyongene ngwenyi Yehova kamwehuka? Ka. Yosefwe kashimbwile ni uhumikizo weswe. Yika mba yamukwashile? Ufulielo wenyi muli Yehova we wamukwashile. Iye kanyingikine ngwenyi Yehova te kananyingika yeswe. Manyonga jenyi twakwaamona ha yize ambile kuli mandumbu jenyi ngwenyi: “Kanda nwivwa woma. Te yami nguli mu chitwamo cha Zambi?  Nyi yenu, e, nwangunyongenene chipi, alioze Zambi wachalumwine mu upeme, hanga akachilinge akafunge atu anji ni mwono; chocho chapwa musono.” (Uputukilo 50:19, 20) Yosefwe kanyingikine ngwenyi, katamba kushimbwila yiwape ya Yehova mumu yikwete ulemu nawa yafumbuka.

14, 15. (a) Mumu liaka kulihumikiza cha Ndawichi chakukomwesa? (b) Yika yakwashile Ndawichi mba ashimbwile ni uhumikizo weswe?

¹⁴ Mwanangana Ndawichi neye kapalikile mu yuma yinji ya uhenge. Yehova kawayishile Ndawichi hanga apwe mwanangana mu Izalele muze te uchili mukweze. Alioze Ndawichi katambile kushimbwila miaka 15 shimbu te kanda achipwa mwanangana chipwe ku munyachi wenyi. (2 Samuele 2:3, 4) Ha mashimbu amwe, Ndawichi kapwile ni kuchina Mwanangana Saulu, yoze te unafupu kumushiha. * (Tala maliji mushi lia lifwo.) Mumu lia yino, Ndawichi kakapwile ni zuwo. Kapwile ni kuswama ku yivwenge mu puya, ha shimbu limwe yaya mu chifuchi cha yilambala. Kulutwe Saulu yamushihila ku jita. Chipwe chocho, Ndawichi yanunga ni kushimbwila ha miaka kuhiana shimbiali mba hi yapwa mwanangana wa vungu lieswe lia Izalele.—2 Samuele 5:4, 5.

¹⁵ Mumu liaka Ndawichi ashimbwile ni uhumikizo weswe? Iye kanatwehe kumbululo ha Samu yoyene, haze ahulile yisuho yiwana ngwenyi: “Ndo mwiji muka?” Iye yamba ngwenyi: ‘Kunafuliela mu utu wa zango lie; mbunge yami muyiwahilila mu ulamwino we. Kumungwimbila Yehova, mumu lia yiwape yize hanangwehe.’ (Samu 13:5, 6) Ndawichi kanyingikine ngwenyi, Yehova te kakumuzanga chinji kashika te manunga ni kushishika kuli iye. Iye kanyongene mashimbu waze Yehova amukwashile, nawa kanyongene mashimbu akulutwe muze Yehova te mahwisa lamba lienyi lieswe. Ndawichi kanyingikine ngwenyi, katamba kushimbwila yiwape ya Yehova mumu yikwete ulemu nawa yafumbuka.

16, 17. Kuchi Yehova Zambi ni Yesu Kristu ali yilweza yipema ya kushimbwila?

¹⁶ Yehova keshi kutwita hanga tulinge chuma chize mwene keshi kuzanga kulinga ni mbunge yeswe. Iye hanatwehe chilweza chinene cha kushimbwila ni mbunge yeswe. (Tanga 2 Petulu 3:9.) Chakutalilaho, ha tununu twa miaka kunyima mu munda wa Endene, Satana yaliongela Yehova ngwo kali mutu mupi. Yehova ‘kakushimbwila’ shimbu lize, eswe makapwisa jina lienyi lisandu. Yino muyikaneha yiwape yinji kuli waze ‘akushimbwila kuli iye ni mbunge yeswe.’—Izaia 30:18.

¹⁷ Yesu neye kakwete nyonga lia kushimbwila ni mbunge yeswe. Muze apwile hano hashi, kanakashishika ndo ku kufwa chenyi. Ha mwaka 33, iye yasolola ulemu wa chitapo chenyi kuli Yehova mu malilu. Alioze kanakashimbwila ndo ha mwaka 1914 mba  aputuke kuyula ngwe Mwanangana. (Yilinga 2:33-35; A-Hepreu 10:12, 13) Chipwe chocho, Yesu machinunga ni kushimbwila ndo ku songo lia Kanunu Umuwika wa Kuyula chenyi shimbu akwa-kole jenyi eswe kanda achaanongesa. (1 A-Korindu 15:25) Wano kali mashimbu anji akushimbwila. Kutushi ni kuyambashana ngwetu, kushimbwila chikwete ulemu unji kuhiana.

18, 19. Yika muyitukwasa mba tupwe ni mbunge ya kushimbwila?

¹⁸ Chochene, Yehova kanazange hanga tupwe yihumikiji, ni kushimbwila muli iye ni mbunge yeswe. Yika muyitukwasa mba tuchilinge? Twatamba kwita spiritu yisandu ya Zambi. Mumu uhumikizo uli muhuko wa spiritu yisandu ya Zambi. (A-Efwesu 3:16; 6:18; 1 A-Tesalonika 5:17-19) Kashika eta kuli Yehova hanga akukwase kunyongonona ni uhumikizo weswe!

¹⁹ Iwuluka nawa yize yakwashile Apalahama, Yosefwe, ni Ndawichi mba ashimbwile ni mbunge yeswe kumanunuka cha yilakenyo ya Yehova. Ufulielo ni ujikijilo wo muli Yehova ye yaakwashile. Ayo kakanyongene wika hali ene ni ha yize te akuzanga. Muze mutunyonga chize yuma yalingiwile ku mwono wo, chino muchitukwasa hanga tupwe ni mbunge ya kushimbwila.

20. Mbunge ya mutapu uka twatamba kupwa nayo?

²⁰ Chipwe ngwe mutupinda ni yeseko, nihindu twatamba kupwa ni mbunge ya ‘kushimbwila.’ Ha mashimbu amwe mutuhasa kulihula ngwetu, “Yehova, ndo mwiji muka?” (Izaia 6:11) Ni ukwaso wa spiritu yisandu ya Zambi, mutuhasa kwimbulula profeta Jeremia ni kwamba ngwetu: “Yehova iye chihanda chami,” kashika ‘muli iye mungusolola mbunge ya kushimbwila.’—Lungungu wa Jeremia 3:21, 24.