YEHOVA kakwashile postolo Paulu kusoneka yitanga livwa yize twakusolola ni ukwaso wa spiritu yisandu. (A-Ngalashia 5:22, 23) Yitanga yino kakuyivuluka ngwo, ‘muhuko ya spiritu.’ * (Tala maliji mushi lia lifwo.) Muhuko uno unalingi chihanda cha “utu waha” uze akwa-Kristu atamba kuzala. (A-Kolosu 3:10) Ngwe chize mutondo wakufupiwa meya mba wime mihuko, chizechene nawa mba mutu apwe ni yitanga yino yipema, katamba kwecha spiritu yisandu hanga yisongwele mwono wenyi.— Samu 1:1-3.

Ha yitanga yacho livwa, Paulu kaputukile ni zango. Mumu liaka zango likwete ulemu? Mumu Paulu kambile ngwenyi, nyi kuchishi zango, nguli “wamokomoko.” (1 A-Korindu 13:2) Mba zango yika linalumbunuka, nawa kuchi mutuhasa kupwa nalio, ni kulisolola hita tangwa?

Chipwe ngwe chapwa chikalu kulumbununa zango, alioze Mbimbiliya yinasolola chize mutu ukwete zango akunyonga ni yize akulinga. Chakutalilaho, mutu mukwa-zango kakwete ‘uhomboloji ni utu’ nawa ‘kakuwahilila mu umwenemwene.’ Nyi mutu mapwa ni zango, iye ‘malihumikiza mu yuma yeswe, mafuliela yuma yeswe, matalatala yuma yeswe, manyongonona mu yuma yeswe.” Iye kakuzanga chinji akwo, kakunyonga hali ayo, nawa kapwa sepa yoze washishika. Alioze nyi mutu keshi zango, iye kakusolola ukwa, kulizata, kuhanjika yuma ya sonyi, chipululu, nawa keshi kukonekena akwo. Etu kutwazangile kupwa ni ndako jino, alioze tunazange kupwa ni zango lize “kulishi kufupa yuma yalio-liene.”—1 A-Korindu 13:4-8.

“Zambi iye zango.” (1 Yoano 4:8) Milimo ni yitanga yenyi yeswe, yakutwaha ushindakenyo wa zango lienyi. Yehova kasolwele zango lienyi linene hakutuma Yesu hano hashi hanga amone lamba ni kufwa hamukunda wa yetu. Postolo Yoano yamba ngwenyi: ‘Zambi hanatusololwela zango lienyi hakutuma Mwanenyi wa wika hano hashi, hanga tukapwe a mwono muli iye. Zango liacho lili ngwe, hi yetu ko twazangile Zambi, alioze iye watuzangile, watumine Mwanenyi kupwa kuka ha milonga yetu.’ (1 Yoano 4:9, 10) Hachino, Zambi mahasa kukonekena shili yetu yeswe ni kutwaha kutalatala cha mwono wa mutolo mumu lia zango lienyi.

Yesu kasolwele ngwenyi kakuzanga chinji atu, kashika ahanyine mwono wenyi ngwe chitapo hanga alinge upale wa Zambi. Postolo Paulu kanatulweze ngwenyi: “Mu upale unowene hanatusela ku usandu ku kulambula cha mujimba wa Yesu Kristu kamuwika kunahu.” (A-Hepreu 10:9, 10) Kukushi mutu niumwe yoze mahasa kusolola zango lia mutapu au. Yesu ngwenyi: “Zango liahiana lino niumwe keshi nalio, kachi umwe matumbika mwono wenyi hali tusendo twenyi.” (Yoano 15:13) Shina atu akwa-shili mahasa kwimbulula zango lize Yehova ni Yesu asolwele? Ewa! Alioze tutalenu chize mutuhasa kuchilinga.

Paulu kanatukolweza ngwenyi: “Pwenu akwa kwimbulula Zambi, se nuli ana a zango. Endenu mu zango, chizechene ngwe Kristu watuzangile; hali yetu walikunjikile mwene.” (A-Efwesu 5:1, 2) ‘Kwenda mu zango” yika chinalumbunuka? Chinalumbunuka ngwo twatamba kusolola zango kuli akwetu matangwa eswe. Kutwatambile kwamba wika ngwo twakwaazanga. Alioze twatamba kusolola zango liacho ha yize twakulinga. Yoano yasoneka ngwenyi: “Anami akepe, kanda tuzanga ni liji, chipwe ni limi; alioze ni yitanga ni umwenemwene.” (1 Yoano 3:18) Chakutalilaho, twakwambujola “sango lipema lia Wanangana” mumu twakuzanga Yehova ni enyembo jetu. (Mateu 24:14; Luka 10:27) Yetu nawa ‘twakwenda mu zango’ muze twakusolola uhomboloji, keke, ni kukonekena akwetu. Twakukaula chiyulo chino cha Mbimbiliya chakwamba ngwo: ‘Chizechene ngwe Yehova hananukonekena, chocho ni yenu nawa likonekenenu.’—A-Kolosu 3:13.

Nyi mutuhana chiyulo hanji kufumba akwetu, chino kuchalumbunukine ngwo kutushi ni zango. Chakutalilaho, yisemi amwe mba aholese mwana yoze unalilila chimwe chuma kakulinga yeswayo mwana anazange. Alioze chisemi yoze wakuzanga mwanenyi chinji nyi mwana malinga chocho, kakumwaha fumbo lialita. Chizechene nawa, Zambi iye zango, ‘mumu Yehova kakufumba mweswe yoze akuzanga.’ (A-Hepreu 12:6) Kashika zango mulitukwasa kufumba akwetu. (Yishima 3:11, 12) Twiwulukenu ngwetu, yetweswe tuli yivulumunyi, kanji-kanji kutushi kuhasa kusolola zango kuli akwetu. Chipwe chocho, tulieswe mutuhasa kusa tachi hanga tusolole zango kuli akwetu. Kuchi mutuhasa kuchilinga? Tutalenu majila atatu waze matukwasa kusolwelamo zango.

Jila yitangu, eta ukwaso wa spiritu yisandu ya Yehova yize yakuneha zango. Yesu kambile ngwenyi, Yehova ‘kakuhana spiritu yisandu kuli waze mamwita yo.’ (Luka 11:13) Kashika, mutuhasa kulemba ni kwita spiritu yisandu hanga yitukwase kupwa ni zango. (A-Ngalashia 5:16) Chakutalilaho, nyi uli mukulwana mu chikungulwila, eta spiritu yisandu hanga yikukwase kupwa ni zango muze unahane chiyulo cha Mbimbiliya kuli akwenu. Nyi uli chisemi eta spiritu yisandu ya Zambi hanga yikukwase kufumba ana je ni zango, hi ni ufwatulo ko.

Jila yamuchiali, nyonga chize Yesu asolwele zango chipwe muze te akumutuka. (1 Petulu 2:21, 23) Nyi umwe mutu makutuka hanji kukulinga yuma yipi, lihule ngwe ‘Nyi Yesu yika te malinga?’ Umwe ndumbu wa pwo yoze avuluka ngwo Leigh hananyingika ngwenyi kulihula chino, chakumukwasa kunyonga shimbu kanda alinga chuma nichimwe. Yamba ngwenyi: “Limwe tangwa umwe yoze te nakalakala nenyi yatuma yimwe mesage ni maliji waze te anahanjika yuma yipi hakutwala kuli yami ni ha mulimo wami.” Chino changwehele uli unji! Alioze yingulihula ngwami, ‘Kuchi munguhasa kwimbulula Yesu hakutwama ni mutu wamutapu au?’ Muze hi nanyonga ha chize Yesu te malinga, yingukwata chiyulo chakuhona kusa mbunge ku yuma yacho. Kulutwe, yingunyingika ngwami, kumana mukwetu kanapinda ni misongo yipi nawa kapwile ni kulivwila-vwila uli. Chocho yingunyingika ngwami, kumana muze asonekene mesage kakanyingikine yize te anasonekaho. Kupukuna ha chize Yesu te akusolola zango, chipwe muze te akumutuka changukwashile hanga ni yami ngusolole zango kuli mukwetu yoze nakalakala nenyi.” Nyi mutwimbulula Yesu, mutusolola zango kuli akwetu mashimbu eswe.

Jila yamuchitatu, kupwa ni zango lize liakufupa kusa yuma ya akwenu kulutwe. Zango lino lie liakusolola kanawa tuvumbi amwenemwene a Yesu. (Yoano 13:34, 35) Yesu kapwile ni zango liacho, nawa kahichikile chilweza chingunu. Kuchi achilingile? Muze ejile hano hashi, “kechele lufuma wenyi mweswe” mumu lia yetu ni ‘kwononoka ndo ku kufwa.’ (A-Fwilipu 2:5-8) Nyi mutwimbulula zango lingunu lia Yesu, manyonga ni mbunge yetu muyipwa  ngwe ya iye, nawa mutusa yuma ya akwetu kulutwe hi ya yetwene ko.

Kuli yiwape yinji ha kusolola zango. Tutalenu yilweza yaali:

• TUKWETE MANDUMBU HASHI HESWE: Hamukunda wa zango lize tukwete kuli umwe ni mukwo, tunanyingika ngwetu mandumbu jetu a malunga ni a mapwo mu hita chikungulwila hano hashi, nyi mutuyako matutambula kanawa. Chili chiwape chinene kunyingika ngwe kakukuzanga kuli “mandumbu je waze ali hano hashi”! (1 Petulu 5:9) Mutuhasa kuwana wika zango liacho mukachi ka tuvumbi twa Zambi.

• SAMBUKILA: “Kulihumikiza umwe kuli mukwo mu zango.” Yino yakutukwasa hanga ‘tulifunge ni muya wa sambukila.’ (A-Efwesu 4:2, 3) Twakupwa ni sambukila yacho ku yikungululo yetu ya yikungulwila, ya mbonge ni ya mambonge. Shina kuuchi kutayiza ngwe kupwa ni sambukila yamutapu au hano hashi halihandununa chili chiwape? (Samu 119:165; Izaia 54:13) Muze mutupwa ni sambukila ni akwetu, mutusolola ngwetu twakwaazanga ni mbunge yeswe, nawa mutuvwisa kuwaha Tata yetu wamu malimu.—Samu 133:1-3; Mateu 5:9.

Paulu kasonekene ngwenyi: “Zango kuliakukolesa.” (1 A-Korindu 8:1) Yika chino chinalumbunuka? Mu mukanda 1 A-Korindu kapitulu 13, uze amwe akuvuluka ngwo “Mwaso wa Zango,” Paulu kalumbunwine chize zango liakukolesa. Zango kulishi kufupa yuma yalio-liene. Liakutukwasa hanga tulihulumbe hali akwetu. (1 A-Korindu 10:24; 13:5) Mutu yoze ukwete zango kapwa chihomboloji, kakulinga upeme nawa kakulihulumba hali akwo. Mutu wacho kakukwasa asoko hanga apwe ni zango ni kulivwashana mu yikungulwila.—A-Kolosu 3:14.

Kuli majila anji akusolwelamo zango kuli akwetu, alioze zango lietu hali Zambi likwete ulemu unji kuhiana. Mumu liaka? Mumu zango lietu hali iye liakutununga! Atu aku yihela yeswe, minyachi, ni malimi kakuwayila Yehova hamuwika ni kumulingila “ni mbunge yimuwika.” (Zefania 3:9) Kashika tusenu tachi hanga tusolole hita tangwa chitanga chino chilemu chize chinakatuka ha muhuko wa spiritu yisandu ya Zambi.