ACHINYONGA ha tangwa lize wevwile chiseke chinji ku mwono we. Shina liapwile tangwa lia umbachiso we, nyi tangwa lize mwane mutangu asemukine? Nyi hanji tangwa lia upapachiso we? Tangwa liacho liapwile tangwa lilemu nawa lia chiseke chinji ku mwono we. Ha tangwa liacho, mandumbu je kevwile chiseke chinji hali yena muze wasolwele zango lie kuli Zambi ni mbunge ye yeswe, ni mwono we weswe, ni kunyonga che cheswe!—Marku 12:30.

Yena wakupwa ni chiseke chinji ha kulingila Yehova chize muze watambwile upapachiso. Chipwe chocho, akwa-kwambujola amwe keshi nawa ni chiseke chize apwile nacho ku uputukilo. Mumu liaka chino chinalingiwa? Yitela yika tulinayo yakununga ni kulingila Yehova ni chiseke cheswe?

Sango ja Wanangana jakutunehena chiseke chinji. Mumu liaka? Mumu Yehova hanalakenya ngwenyi Wanangana muukanongesa hano hashi hapi ni kuneha paraisu. Zefania 1:14 unatulweze: “Tangwa linene lia Yehova linakundama, linakundama fuji-fuji.” Alioze nyi twanyonga ngwetu tunashimbwila chinji kuhiana, mutuhasa kutokesa chiseke tulinacho. Chino muchihasa kutukokolola ha kulingila Zambi.—Yishima 13:12.

Kupwa hamuwika ni mandumbu jetu, chakutukwasa kununga ni kuwayila Yehova ni chiseke cheswe. Yitanga yipema ya Yela ja Yehova kota ye yatukokele mu uwayilo wa umwenemwene ni kutukwasa kuwayila Zambi ni chiseke cheswe. (1 Petulu 2:12) Ha chino, yika muyihasa kulingiwa nyi umwe ndumbu hanji pangi mamwaha fumbo ha mukunda wakwehuka shimbi ja Zambi? Chino muchihasa kuhongesa amwe mu chikungulwila ni kutokesa chiseke cho.

Kuzanga chinji mbongo necho muchihasa kutokesa chiseke chetu. Kuchi chenacho? Hashi hano ha Satana hakufupa tutayize ngwetu twatamba kulanda yuma yize pundu kutwafupile ku mwono wetu. Kashika twiwulukenu maliji a Yesu: “Niumwe mahasa kulingila miata aali: mumu hanji mavwila kole umwe, mazanga mukwo; hanji makakaminya kuli umwe, malelesa mukwo. Kunwahashile kulingila Zambi ni kulingila upite hamuwika.” (Mateu 6:24) Kutuchikuhasa kulingila Yehova ni chiseke nawa ha shimbu lioliene mutuzanga kupwa ni yuma yeswe ya hano hashi.

Kulingila Yehova hi chikalu ko kuli waze akumuzanga. (1 Yoano 5:3) Twiwulukenu ngwetu, Yesu kambile ngwenyi: “Tweyenu kuli yami, yenu eswe nwakukilikita nikulemewa, ni yami kumungunuhwimisa. Lilemenu ku kanga yami, lilongesenu kuli yami; mumu nguli mukwa kushimbika, mukwa kulikehesa mu mbunge; mba kumunuwana uhwimino ku mbunge jenu. Mumu kanga yami yashi, ni chiteli chami chilelu.” (Mateu 11:28-30)  Kupwa mukwa-Kristu wamwenemwene chili uhwimino nawa chakutunehena chiseke. Kashika tuli ni yitela yipema yakupwa ni chiseke mu mulimo wa Yehova. Haliapwila tushimutwinenu wika yitela yitatu.—Habakuke 3:18.

Twakulingila Zambi yetu wa uwahililo, Yoze watwehele mwono. (Yilinga 17:28; 1 Timoteu 1:11) Tunanyingika ngwetu mwono tuli nawo wambala wa Zambi. Kashika, tunungenu ni kumuwayila ni chiseke cheswe, chipwe ngwe twatambwile kulu upapachiso.

Kaula lusango wa ndumbu Héctor, yoze wakalakalile ngwe kalayi wa mbonge ha miaka 40. “Chipwe ngwe hapwa kashinakaji” nihindu iye machiwahilila ha kulingila Yehova. (Samu 92:12-14) Yikola ya mukwo-pwo yakokolwele tachi jenyi mu mulimo wa Zambi, chipwe chocho, Héctor nihindu machinunga kupwa ni chiseke. Iye yamba ngwenyi: “Chipwe ngwe chili chinyengo hakumona chize yikola ya mukwetu-pwo yinayi ni kwoka nawa ni chize chili chikalu kumufunga, nihindu kuchechele hanga yipikalo yino yinguchize chiseke mu mulimo wa Zambi wamwenemwene. Ha kunyingika ngwami, mwono nguli nawo uli wambala wa Yehova, yoze watangile mutu ha chimwe chitela, kashika nakumuzanga ni mbunge yeswe nawa nakumukalakalila ni mbunge yami yeswe. Nakulikolweza hanga ngukilikite mu mulimo wa kwambujola, nawa nakulikolweza hanga kutalatala cha Wanangana chipwe helu lia yuma yeswe ku manyonga jami nguhone kutokesa chiseke chami.”

Yehova kahanyine chitapo cha ukuule hanga chipwe chashi kuli yetwe kupwa ni mwono wa chiseke.  Ha chino, “Zambi wazangile akwa hashi, wechele Mwanenyi wa wika, hanga mweswawo mamufuliela, kechi katoka, alioze akapwe ni mwono wa mutolo.” (Yoano 3:16) Ewa, nyi mutusolola ufulielo ha chawana cha chitapo cha Zambi, iye mahasa kukonekena shili yetu ni kutwaha mwono wa mutolo. Chino che chitela chingunu twatamba kusakwila! Nawa kusakwila chetu ha chitapo muchitukwasa kuwayila Yehova ni chiseke.

Umwe ndumbu avuluka ngwo Jesús, wapwile mu Mexico, kambile ngwenyi: “Ami napwile kapinji wa mulimo wami, napwile ni kuhondangana chinji ndo ufuku, chipwe ngwe niumwe wapwile ni kungushinjila wakuhi. Napwile ni kulinga chino hanga ngupwe ni mbongo jinji. Mba, muze nalilongesele hakutwala kuli Yehova ni chize iye ahanyine Mwanenyi azanga chinji hali atu. Yinguzanga chinji kumulingila. Kashika nahanyine mwono wami kuli Yehova, mba muze nakumbanyishine miaka 28 ku mulimo wami wa ku musunya, yingukwata chiyulo chakutuhuka kako, ni kuputuka mulimo wa kwambujola wa mashimbu eswe.” Che chize Jesús aputukile kulingila Yehova ni chiseke.

 Mwono wetu walinanga wakutunehena chiseke chinji. Unewuluka kuchi wapwile mwono we muze te kanda uchipwa chela cha Yehova? Postolu Paulu kewulwile akwa-Kristu a ku Roma ngwo ayo te kapwile “ndungo ja shili” alioze yatusula hanga apwe “ndungo ja ululi.” Amu te hanapu ni mwono walinanga, mahasa kutambula mwono wa mutolo. (A-Roma 6:17-22) Ni yetu twakukaula shimbi ja Yehova, kashika twakutusuka ku yuma yipi ya hano hashi. Chino chakutunehena chiseke chinji!

Tala chilweza cha Jaime, yoze te keshi kutayiza ngwo Zambi kwatwamako, nawa te mulimo wenyi kulilamba ni akwo. Jaime yaputuka kukunguluka ni Yela ja Yehova yakomoka ha zango lize awanyinemo. Mba eche mwono wenyi ukulu, Jaime yeta kuli Yehova amukwase kufuliela ngwenyi Yehova kwatwamako. Jaime yamba ngwenyi, “Hakehe-hakehe, yingunyingika ngwami Tata wa mu malilu nawa Zambi ya keke kwatwamako. Kukaula shimbi jingunu ja Yehova chakungufunga. Nyi chakalumwine mwono wami kachi te hingunafu ngwe chize hanafu masepa waze nakolele no. Miaka ya chiseke chinji ku mwono wami yili yize nakulingila Yehova.”

Kuchi twatamba kwivwa muze tunashimbwila kuhwa cha hano hashi hapi? Twiwulukenu ngwetu tunalingi upale wa Yehova nawa tunashimbwila mwono wa mutolo. ‘Mba kanda tukokoloka ha kulinga yuma yipema; mumu ha mwaka wacho kumutukacha nyi kutwakokolokele.’ (A-Ngalishia 6:8, 9) Ni ukwaso wa Yehova, tunyongononenu ni kusa tachi hanga tupwe ni yitanga yize muyitukwasa kupalika mu “luyinda munene,” ni kununga kuwayila Yehova ni chiseke cheswe.—Usolwelo 7:9, 13, 14; Tiangu 1:2-4.

Mutuhasa kufuliela ngwetu Yehova mawahisa kunyongonona chetu mumu iye kanyingika mulimo uze twakulinga ni zango lize twakusolola ha jina lienyi. Nyi twanunga ni kumulingila ni chiseke cheswe, mutupwa ngwe Mwanangana Ndawichi, yoze wambile ngwenyi: “Hingunasela Yehova ku meso jami matangwa eswe. Kashika mbunge yami kuyinevu chiseke, ni ulemu wami kuunawahilila. Musunya wami muutwama ni ufulielo nguu.”—Samu 16:8, 9.