1, 2. Kuchi Ndawichi asolwele ngwenyi te kashishika kuli Zambi? (Tala chizulie chili hauputukilo.)

SAULU, ni maswalele 3,000 kayile ni kufupa Ndawichi mu puya ya Yundeya hanga amushihe. Alioze ha umwe ufuku, Ndawichi ni atu jenyi yawana chimwe chihela kuze te Saulu ni maswalele jenyi anahwimina. Ayo eswe te hapomba kulu, kashika Ndawichi ni Abishai yayako hakehe-hakehe yapalika maswalale ndo kuli Saulu. Abishai yalinyenyeta ni Ndawichi ha kwamba ngwenyi: Ngweche ‘ngumupalakenye hashi ni kunga lie kamuwika, chichi kumulamba kaali.’ Iye yamba kuli Abishai ngwenyi: “Kanda umwonwona, mumu iya mahasa kusamba nyi masa kwoko lienyi lia kulimika ni yoze Yehova hanamuwayisa?” Chocho, Ndawichi yamba ngwenyi: “Yehova angukanjise kusa kwoko liami liakulimika ni yono Yehova hanamuwayisa ni maji!”—1 Samuele 26:8-12.

² Ndawichi kanyingikine yize te atamba kulinga hanga ashishike kuli Yehova. Aye te kananyingika nawa ngwenyi katamba kushishika kuli Saulu, nawa te katambile chipwe kumunyongena  upi. Mumu liaka? Mumu Zambi te hanasakula kulu Saulu ngwe mwanangana mu Izalele. Musono, chizechene ngwe ku mashimbu akunyima, Yehova kanazange hanga tuvumbi twenyi eswe ashishike kuli atu waze iye haneche hanga apwe ni poko ya kuyula.—Tanga Mika 6:8.

3. Kuchi Abishai ashishikile kuli Ndawichi?

³ Abishai te kakuvumbika Ndawichi mumu te kananyingika ngwenyi Zambi te hanamusakula hanga apwe mwanangana. Muze Ndawichi apwile mwanangana, iye kavulumwine kumeso ja Yehova. Iye kalingile utanji ni pwo lia Uriya, nawa Ndawichi yalweza Joabe ngwo te alinge cheswe chize mahasa hanga Uriya akafwe mu jita. (2 Samuele 11:2-4, 14, 15; 1 Sango ja Mianangana 2:16) Joabe kapwile ndumbu lia Abishai, kota Abishai kevwile sango hakutwala ku yize Ndawichi alingile, chipwe chocho iye yanunga ni kuvumbika Ndawichi. Nawa, Abishai kapwile kasongo wa maswalale, ha chino, iye kachi kazachishile uhashi wacho hanga apwe mwanangana, alioze kakachilingile. Alioze iye kanungine ni kupwa kavumbi ka Ndawichi nawa kamufungile kuli akwa-kole jenyi.—2 Samuele 10:10; 20:6; 21:15-17.

4. (a) Kuchi Ndawichi apwile chimwe chilweza cha kushishika kuli Zambi? (b) Yilweza yikwo yika mutulilongesa?

⁴ Ndawichi kashishikile kuli Yehova ku mwono wenyi weswe. Muze te uchili mukweze, iye kashihile Ngoliate, yoze te wa kuchoka Yehova ni A-Izalele. (1 Samuele 17:23, 26, 48-51) Muze Ndawichi apwile mwanangana profeta wa Yehova Natane yamufumba ha mukunda wa shili yize alingile. Hohene, Ndawichi yatayiza ngwenyi kavulumwine nawa yalikonyeka. (2 Samuele 12:1-5, 13) Hakupalika cha mashimbu, muze Ndawichi te hapwa kashinakaji, iye yahana yuma yinji ya ndando hanga akwase kutunga tembele ya Yehova. (1 Sango ja Mianangana 29:1-5) Chochene, chipwe ngwe Ndawichi kavulumwine ku mwono wenyi, iye kakechele kushishika kuli Yehova. (Samu 51:4, 10; 86:2) Mu mutwe uno, mutulilongesa chilweza cha Ndawichi ni atu akwo waze atwamine no ku mashimbu akunyima ni chize mutuhasa kushishika kuli Yehova, kuhiana mutu mweswao. Mutulilongesa nawa yitanga yikwo yize muyihasa kutukwasa hanga tushishike.

5. Longeso lika twalilongesa hakutwala ku upi wa Abishai?

⁵ Muze Abishai azangile kushiha Saulu, te kanazange kushishika kuli Ndawichi. Alioze amu Ndawichi anyingikine ngwenyi te hi chipema ko kushiha “yoze Yehova hanamuwayisa ni maji,” kakechele hanga Abishai ashihe mwanangana. (1 Samuele 26:8-11) Chilweza chino chinatwehe limwe fumbo lilemu: Muze mutufupa kukwata chiyulo cha kunyingika yoze twatamba kusolwela chitangu ushishiko, yetu twatamba kunyonga hakutwala ku shimbi ja Mbimbiliya jize mujihasa kutukwasa ha chikuma chacho.

6. Chipwe ngwe chili umwenemwene kushishika kuli asoko ni masepa jetu, mumu liaka twatamba kukanyama?

⁶ Chili umwenemwene kushishika kuli mutu yoze twakuzanga, ngwe masepa hanji umwe usoko. Alioze amu tuli akwa-shili, mbunge yetu muyihasa kutwonga. (Jeremia 17:9)  Kashika nyi mutu yoze twakuzanga malinga upi ni kwecha umwenemwene, yetu twatamba kwiwuluka ngwetu chili ni ulemu unji kushishika kuli Yehova kuhiana kuli mutu mweswao.—Tanga Mateu 22:37.

7. Kuchi umwe pangi ashishikile kuli Zambi ha limwe shimbu likalu?

⁷ Nyi umwe mutu mu usoko we mamusosolola mu chikungulwila, yena muhasa kusolola kuli Yehova ngwenyi unashishika kuli Iye. Chakutalilaho, limwe tangwa naye ya Anne, yoze asosolwele yasanyika Anne ku telefone ni kumwamba ngwe kanazange hanga aye ni kumutala. ^[1] ( Tala maliji ali mushi.) Naye ya Anne yamba ngwenyi te keshi nawa ni chiseke mumu asoko jenyi te keshi kuhanjika nenyi nawa. Chino chalingishile Anne kwivwa yikola ku mbunge, aye yamukumbulula ha kumusonekena umwe mukanda. Muze te anasoneka mukanda, Anne yapukuna ha jimwe shimbi ja Mbimbiliya. (1 A-Korintu 5:11; 2 Yoano 9-11) Ha mukanda wacho, aye yalumbununa ni umbovu weswe kuli naye yoze wahichikile usoko muze alingile shili chakuhona kulikonyeka. Anne yalweza naye ngwenyi, aye mapwa wika ni chiseke nyi mafunyina kuwayila Yehova.—Tiangu 4:8.

8. Yitanga yika muyitukwasa kushishika kuli Zambi?

⁸ Tuvumbi twa Zambi ha mashimbu a Ndawichi kapwile akwa-kulikehesa, yimbovu nawa akwa-hamu. Tutalenu chize yitanga yacho muyihasa kutukwasa kushishika kuli Yehova.

9. Mumu liaka Abenere azangile kushiha Ndawichi?

⁹ Mwana wa Saulu Jonata ni kapitau wa chilombo cha Izalele, Abenere, kamwene chize Ndawichi atwalile mutwe wa Ngoliate kuli Mwanangana Saulu. Jonata yapwa sepa lia Ndawichi nawa yanunga ni kushishika kuli iye. (1 Samuele 17:57–18:3) Alioze abenere kakachilingile. Kwamba pundu, hakupalika cha mashimbu aye yakwasa Saulu, yoze te unafupu kushiha Ndawichi. (1 Samuele 26:1-5; Samu 54:3) Jonata ni Abenere ayo eswe aali kanyingikine ngwo Zambi te kanazange hanga Ndawichi asuleho ngwe mwanangana mu Izalele. Alioze muze Saulu te hafwa, Abenere kakazangile nawa kukwasa Ndawichi. Ha chino, aye yazanga kupwisa Isheboshete mwana wa Saulu ngwe mwanangana. Hakupalika cha mashimbu, kota Abenere kazangile kulipwisa  mwanangana mwene, nawa kota chino che chamulingishile hanga alinge utanji ni umwe wa kuli mapwo ja Mwanangana Saulu. (2 Samuele 2:8-10; 3:6-11) Mumu liaka Jonata ni Abenere manyonga jo alisele hakutwala kuli Ndawichi? Mumu Jonata kashishikile kuli Yehova nawa kalikehesele alioze Abenere kakachilingile.

10. Mumu liaka Absalome kakashishikile kuli Zambi?

¹⁰ Absalome, mwana wa Mwanangana Ndawichi, kakashishikile kuli Zambi mumu aye te hi mukwa-kulikehesa ko. Aye kazangile kupwa mwanangana, kashika anjile “temba-lia-jita ni tuvwalu ni makumi atano amalunga akamutetekela.” (2 Samuele 15:1) Iye nawa kongele A-Izalele anji hanga ashishike kuli iye. Aye yafupa nawa kushiha tato, chipwe ngwe te kananyingika ngwenyi Yehova te hanasakula kulu Ndawichi hanga apwe mwanangana mu Izalele.—2 Samuele 15:13, 14; 17:1-4.

11. Kuchi mutuhasa kuyuka ha sango ja Mbimbiliya jize jinahanjika hali Abenere, Absalome ni kuli Baruke?

¹¹ Mutu nyi keshi kulikehesa nawa kanafupu kupwa ni ulemu unji, chakupwa chikalu chinji kushishika kuli Zambi. Chochene, yetu twakuzanga chinji Yehova, nawa tusolo kuzanga kupwa ni kuzo hamwe ni yitanga yipi ngwe Abenere ni Absalome. Kashika twatamba kulifunga hanga twehuke kuputuka kuzanga chinji mbongo hanji mulimo uze muutuvwisa ngwe tuli atu alemu. Chino nyi chalingiwa muchipihisa usepa wetu ni Yehova. Kumashimbu akunyima Baruke, mukwa-kusoneka wa Jeremia, kafupile kupwa ni chuma chize te keshi nacho, ha chino aye yatokesa chiseke chize apwile nacho mu mulimo wa Zambi. Alioze Yehova yalweza Baruke ngwenyi: “Ngunapuzula chize natungile; ngunatukula chize natumbile, ngwami chifuchi cheswe. Mba yena unalifupila yuma yilemu yena mwene nyi? Kanda uyifupa.” (Jeremia 45:4, 5) Baruke kapanjikile yize Yehova ambile. Chizechene ngwe Baruke ni yetu twatamba kupanjika Yehova, mumu kwasala hakehe hanga onwone chifuchi chino chipi cha Satana.

12. Solola mumu liaka tushi kuhasa kushishika kuli Zambi nyi twapwa ni kuzo?

¹² Daniele umwe ndumbu mu Mexico, katambile kukwata chiyulo chakusakula yoze te masolwela ushishiko. Iye te kanazange kulimbata ni umwe mwana-pwo yoze te keshi kuwayila Yehova. Daniele yamba ngwenyi: “Te nakumutumina mensage chipwe muze te hi napwa kulu pionelu.” Mba hi yanyingika  ngwenyi kapwile ni kulinga wika yuma ya kuzo yize te anazange. Iye te keshi kushishika kuli Yehova, nawa te katamba kulikehesa. Ha chino, yahanjika ni umwe mukulwana amu chikungulwila hakutwala kuli mwana-pwo wacho. Daniele yamba ngwenyi: “Iye yangukwasa hanga ngunyingike ngwo, mba ngushishike kuli Zambi, changutamba kwecha kumutumina mensage. Ha kulemba chinji ni masoji mu meso, mba hi ngulinga chize angulwezele. Hi nguputuka kuwahilila chinji ni mulimo wa kwambujola.” Haliapwila Daniele hanalimbate ni umwe pwo yoze wakuwayila Yehova, nawa kanakalakala ngwe kalayi wa mbonge.

13. Kuchi Natane anungine ni kushishika kuli Zambi ni kuli Ndawichi muze Ndawichi avulumwine?

¹³ Nyi twashishika kuli Yehova, mutuhasa nawa kushishika kuli akwetu ni kuwana jila yipema yakwaakwashilemo. Profeta Natane kanungine ni kushishika kuli Yehova ni kuli Ndawichi. Muze Ndawichi alingile utanji ni pwo liambala ni kushiha mukwo-lunga, Yehova yatuma Natane hanga ahane chiyulo kuli Ndawichi. Natane kapwile ni hamu ni kwononokena kuli Yehova. Alioze iye nawa kapwile ni mana hakuhanjika ni Ndawichi ni zango lieswe. Iye kazangile kukwasa Ndawichi hanga anyingike unene wa shili yize alingile. Ha chino, iye yamutela chishima cha umwe lunga pichi yoze weyile panga umuwika wika, yoze apwile nenyi umwe lunga chiswale. Muze Ndawichi evwile chocho, aye yevwa uli unji ha yize pichi wacho alingile. Mba hi Natane yamwamba ngwenyi: ‘Lunga wacho yena!’ Ndawichi yanyingika ngwenyi kuma kavulumwine ku meso ja Yehova.—2 Samuele 12:1-7, 13.

14. Kuchi yena muhasa kusolola ushishiko kuli Yehova ni kuli sepa hanji usoko?

¹⁴ Ni yena nawa muhasa kushishika chitangu kuli Yehova, ni kuli mandumbu je, hakwaasolwela zango. Chakutalilaho, yena hanji muhasa kunyingika ngwe umwe ndumbu kalinga yimwe shili yinene. Ena muhasa kuzanga kushishika kuli iye, chipi-chipi nyi kali sepa hanji usoko we. Alioze yena nawa unanyingika ngwenyi chili ni ulemu unji kushishika kuli Yehova. Chizechene ngwe Natane, ononokena kuli Yehova, alioze solola zango kuli ndumbwe. Mulweze ngwenyi aye katamba kufupa ukwaso kuli makulwana amu chikungulwila nawa katamba kuhanjika no kawashi-washi. Nyi kachilingile yena watamba kulweza makulwana chikuma chacho. Ni walinga chocho, yena mununga ni kushishika kuli Yehova. Nawa chino muchisolola ngwo wakuzanga ndumbwe, mumu makulwana mahasa kumukwasa hanga apwe nawa ni usepa upema ni Yehova. Ayo mamufumba ni kumusolwela zango.—Tanga Ulevi 5:1; A-Ngalishia 6:1.

15, 16. Mumu liaka Hushai afupiwile hamu mba ashishike kuli Zambi?

¹⁵ Hushai kapwile umwe sepa washishika wa Ndawichi. Muze atu te anazange kupwisa Absalome mwanangana, Hushai kafupile kupwa ni hamu mba anunge ni kushishika kuli  Ndawichi ni kuli Zambi. Aye kanyingikene ngwenyi Absalome te kaneza mu Yerusaleme hamwe ni maswalale jenyi nawa ngwenyi Ndawichi te hatuhuka kulu mu mbonge. (2 Samuele 15:13; 16:15) Mba yika Hushai alingile? Shina iye te mehuka Ndawichi ni kukwasa Absalome? Ka. Chipwe ngwe Ndawichi te hapwa kashinakaji nawa atu anji kazangile kumushiha, nihindu Hushai kanungine ni kushishika kuli iye mumu Yehova te hanasakula Ndawichi hanga apwe mwanangana. Kashika Hushai ayile ku Mulundu wa Olevwe ni kulitakana ni Ndawichi.—2 Samuele 15:30, 32.

¹⁶ Ndawichi yatuma Hushai hanga aye ku Yerusaleme ni kulionga ngwe kanalipwisa sepa lia Absalome hanga iye alweze Absalome ni ukununuko weswe apanjike chiyulo chenyi chakuhona kukaula chiyulo cha Ahitofele. Hushai kapwile ni hamu nawa kasele mwono wenyi mu ponde hanga ononokene Ndawichi ni kununga ni kushishika kuli Yehova. Ndawichi kalembele ngwenyi Yehova te makwasa Hushai, nawa chino che chalingiwile. Absalome yapanjika chiyulo cha Hushai hi cha Ahitofele ko.—2 Samuele 15:31; 17:14.

17. Mumu liaka tunafupiwa hamu mba tushishike?

¹⁷ Yetu tunafupu hamu mba tushishike kuli Yehova ni kumwononokena, chakuhona kulinga yuma yize asoko, atu waze twakalakala no, hanji manguvulu mazanga hanga tulinge. Chakutalilaho, Taro yoze watwama mu Japão, muze te uchili mukweze aye kapwile ni kulinga yuma yeswe yize te mahasa hanga evwise yisemi jenyi kuwaha. Iye kapwile ni kwononokena ni kushishika kuli ayo, hi wika ko mumu ha yize te akulinga, alioze mumu te kakwaazanga chinji. Alioze, muze aputukile kulilongesa Mbimbiliya ni Yela ja Yehova, yisemi jenyi yafupa hanga iye eche kulilongesa Mbimbiliya. Chino chamwehele yinyengo yinji, nawa chapwile chikalu chinji kuli iye kwaalweza ngwenyi hakwata chiyulo chakuya ni kukunguluka. Taro yamba ngwenyi: “Ayo kevwile uli unji ha miaka yinji yangukanjisa kuya ni kwaameneka ku zuwo. Yingulemba hanga ngwite hamu lia kununga ni chiyulo chami. Haliapwila hinazeyesa chiyulo cho, nawa ngunahase kwaameneka mashimbu eswe.”—Tanga Yishima 29:25.

18. Kuchi yena wayuka ha longeso lino?

¹⁸ Ngwe Ndawichi, Jonata, Natane, ni Hushai ni yetu mutuhasa kwivwa chiseke chize chakwiza ha kushishika kuli Yehova. Yetu kutwatambile kupwa ngwe Abenere ni Absalome waze kakasolwele ushishiko. Tunanyingika ngwetu tuli yihenge nawa twakulinga yuma yize kuyalitele. Alioze tusololenu kuli Yehova ngwetu kushishika kuli iye chili ni ulemu unji ku mwono wetu.