1-3. (a) Kuchi mutuhasa kupwa ni ushindakenyo ngwetu mutuhasa kupwa masepa ja Zambi? (b) Yika mutulilongesa ha mutwe uno?

MU MBIMBILIYA, Apalahama kanamuvuluka ngwo sepa lia Zambi yisuho yitatu. (2 Sango ja Mianangana 20:7; Izaia 41:8; Tiangu 2:23) Iye wika anatongola mu Mbimbiliya ngwo sepa lia Zambi. Shina chino chinalumbunuka ngwo Apalahama mwe wapwile wika sepa lia Zambi? Ka. Mumu Mbimbiliya yinasolola ngwo yetweswe mutuhasa kupwa masepa ja Zambi.

² Mu Liji lia Zambi munazale too ni malunga ni mapwo ashishika waze te akuvumbika Yehova, kumufuliela ni kupwa masepa jenyi apema. (Tanga Samu 25:14.) Ayo eswe kanalingi chihanda cha “mbunga yinene ya yela” yize Paulu atongwele. Atu jacho eswe kapwile masepa ja Zambi.—A-Hepreu 12:1.

³ Tuhengwolenu kanawa masepa atatu ja Yehova waze anasolola mu Mbimbiliya: (1) Rute, mwana-pwo washishika wa ku Moape, (2) Hezekia, umwe mwanangana washishika wa A-Yunda, nawa (3) Mukwa-kulikehesa Maria, naye ya Yesu. Yika mutuhasa kulilongesa ha yize yaakwashile kupwa masepa ja Zambi?

4, 5. Chiyulo chika chikalu chize Rute akwachile, nawa mumu liaka chapwile chikalu? (Tala chizulie chili hauputukilo.)

⁴ Noemi, hamwe ni atembwa-anenyi, Rute ni Orpa, kanakatuka ku Moape ni kuya ku Izalele. Mu jila Orpa yakawata chiyulo cha kufuna ku zuwo lienyi ku Moape. Alioze Noemi yakwata chiyulo cha kuya ku Izalele, ku limbo lienyi. Mba chiyulo chika Rute makwata? Iye yakwata chiyulo chikalu chinji ku mwono wenyi. Shina te iye mafuna ku Moape kuli asoko jenyi, nyi te maya hamwe ni naye-weno Noemi, ni kulinga wenyi wa kuya ku Mbeteleme?—Rute 1:1-8, 14.

⁵ Asoko ja Rute te katunga mu Moape. Kachi te chamutela kufuna kuli asoko jenyi, hanga o amufunge. Aye te kananyingika atu, limi ni ndako ja ku Moape. Noemi kakalakenyene Rute ngwenyi mawana yuma yacho ku Mbeteleme. Nawa Noemi yevwa woma ngwenyi te kechi kuhasa kumuwanyina lunga hanji zuwo. Kashika Noemi yamulweza ngwenyi funa kwe ku Moape. Ngwe chize twamona, Orpa “yahiluka kuli atu jenyi ni kuli tuzambi twenyi.” (Rute 1:9-15) Alioze Rute katayijile kuhiluka kuli atu jenyi ni kuli tuzambi twenyi.

6. (a) Chiyulo chika cha mana Rute akwachile? (b) Mumu liaka Mboaze ambile kuli Rute ngwenyi, kanafupu kuswama mushi lia mapulwa ja Yehova?

⁶ Chino chinasolola ngwo Rute kalilongesele hakutwala kuli Yehova kupalikila kuli mukwo-lunga hanji Noemi. Aye kalilongesele ngwenyi Yehova kalisa chinji ni tuzambi aku Moape. Iye yanyingika ngwenyi, katamba kuzanga Yehova ni kumuwayila. Kashika, Rute akwachile chiyulo cha mana. Yamba kuli Noemi ngwenyi: “Atu je kumapwa atu jami, Zambi ye kumapwa Zambi yami.” (Rute 1:16) Mbunge jetu jakuwahilila chinji, muze twakunyonga ha zango lize Rute apwile nalio hali Noemi. Alioze chuma chize chakutukomwesa chinji chili zango lia Rute hali Yehova. Chino nawa chakomwesene Mboaze, yoze kulutwe lia matangwa yachichimieka Rute hakumwamba ngwenyi, ‘weza ni kuswama mushi lia mapulwa ja Yehova.’ (Tanga Rute 2:12.) Maliji wano Mboaze azachishile mahasa kutwiwulula chize umwe mwana-kajila anafupa ufunge mu mapulwa ja naye. (Samu 36:7; 91:1-4) Chizechene nawa, Yehova kafungile Rute ni zango lieswe ni kumuwahisa ha mukunda wa ufulielo wenyi. Kashika, Rute kakevwile chinyengo ha mukunda wa chiyulo chize akwachile.

7. Yika muyihasa kukwasa atu waze akuyambashana ha kuhana mwono wo kuli Yehova?

⁷ Atu anji kakulilongesa hakutwala kuli Yehova, alioze keshi kukwata chiyulo cha kufupa uswamino muli iye. Ayo kakuyambashana ha kuhana mwono wo kuli Yehova ni kwaapapachisa. Nyi che wakwivwa, nyonga kanawa hakutwala ku kuyambashana che. Mutu mweswe kakuwayila umwe zambi hanji chuma chikwo. (Yoshua 24:15) Chiyulo cha mana chili kusakula kuwayila Zambi wamwenemwene. Muze muhana mwono we hanga uwayile Yehova, yena musolola ngwenyi unafuliela ngwenyi aye makapwa uchinyino we. Nawa iye makukwasa hanga ununge ni kumuwayila chipwe ngwe muupwa ni yipikalo yeswayo. Chino che Zambi alingile hali Rute.

8. Lumbununa chihela chize Hezekia akolele.

⁸ Ku chihela chize Hezekia anakakolela te chalisa chinji ni kuze Rute akolele. Iye kapwile wa ku vungu lia Zambi. Alioze A-Izalele  eswe te keshi kununga ni kushishika kuli Zambi. Tato ya Hezekia, Mwanangana Ahaze kapwile chilianyi. Aye kakapwile ni kuvumbika tembele ya Zambi nawa kakolwezele atu hanga awayile tuzambi akwo. Ahaze kochele nawa amwe mandumbu ja Hezekia ni mwono ni kwaahana ngwe yitapo kuli tuzambi a mahuza. Hezekia kakolele mukachi ka atu waze te akulinga upi unji!—2 Mianangana 16:2-4, 10-17; 2 Sango ja Mianangana 28:1-3.

9, 10. (a) Mumu liaka te muchihasa kupwa chashi kuli Hezekia kupwa ni yitanga yipi? (b) Mumu liaka kutwatambile kwivwa uli ni kulimika ni Yehova? (c) Mumu liaka kutwatambile kunyonga ngwetu ku chihela kuze twakolele mukuhasa kutupwisa mutu mweswao mutufupa kupwa?

⁹ Chilweza chipi cha Ahaze te muchihasa kupinjisa mwanenyi Hezekia kupwa mupi hanji kwivwila Yehova uli. Musono, amwe waze ali mu yipikalo yikehe kuhiana yize Hezekia amwene kakunyonga ngwo kali ni chitela cha kwivwa uli ni “kulimika ni Yehova” hanji kwivwila ululikiso wenyi kupihia. (Yishima 19:3) Akwo kakunyonga ngwo yitanga yipi ya asoko jo muyihasa kwaalingisa hanga apwe ni ndako jipi hanji kwimbulula yitanga yipi ya yisemi jo. (Ezekiele 18:2, 3) Kutala manyonga jacho kali lume amwenemwene?

¹⁰ Mwono wa Hezekia unasolola ngwo kumbululo lia chihula chacho lili ka! Hi chipema ko kwivwila Yehova uli. Iye keshi kuneha yuma yipi hali atu. (Yombi 34:10) Chili chamwenemwene ngwo, yisemi mahasa kulongesa ana jo kulinga yuma yipema hanji yipi. (Yishima 22:6; A-Kolosu 3:21) Alioze chino kuchalumbunukine ngwo yitanga ya asoko jetu muyihasa kutupwisa mutu mweswao mutufupa kupwa kulutwe lia matangwa. Mumu liaka? Mumu Yehova hanatwehe chawana chize chakutukwasa kusakula chipi ni chipema. (Shimbi Yamuchiali 30:19) Kuchi Hezekia azachishile chawana chacho chilemu?

11. Yika yapwishile Hezekia umwe mwanangana mupema wa A-Yunda?

¹¹ Chipwe ngwe tato kapwile umwe mwanangana mupi wa A-Yunda, alioze Hezekia kapwile ni yitanga yipema. (Tanga 2 Mianangana 18:5, 6.) Aye kakasakwile kukaula chilweza chipi cha tato. Ha chino, aye yasakula kupanjika kanawa aprofeta ja Yehova, ngwe Izaia, Mika, ni Hozeia. Aye  yasa shindakenyo ha yiyulo ni usongwelo wo. Chino chamukwashile kuhwisa milonga yize tato anehene. Aye yalulieka tembele, yeta kuli Yehova hanga akonekene atu shili yo, ni kunongesa mahamba mu chifuchi cheswe. (2 Sango ja Mianangana 29:1-11, 18-24; 31:1) Hakupalika cha mashimbu, mwanangana wa A-Asuria Senakeribe yaya ni kwasa jita ni Yerusaleme, Hezekia yasolola hamu ni ufulielo wenyi. Aye yajikijila ku ukwaso wa Yehova ni kutakamisa atu jenyi. (2 Sango ja Mianangana 32:7, 8) Ha chimwe chikuma Hezekia yalinangamisa, alioze Yehova yamufumba, aye ni kulikehesa cheswe yatayiza. (2 Sango ja Mianangana 32:24-26) Chochene, Hezekia kali chilweza chipema chize yetu mutwimbulula. Aye kakechele hanga yitanga ya asoko jenyi yipihise mwono wenyi. Alioze yasolola ngwo kapwile sepa lia Yehova.

12. Ngwe Hezekia, kuchi akwa-Kristu anji musono anasolola ngwo kanazange kupwa masepa ja Yehova?

¹² Musono hashi hanapihia chinji nawa heshi zango, kashika ana anji kanakola chakuhona zango ni ufunge wa yisemi jo. (2 Timoteu 3:1-5) Chipwe ngwe akwa-Kristu anji musono kanakatuka kuli asoko waze akwete yitanga yipi, ayo kakusakula kukolesa usepa wo ni Yehova. Ngwe Hezekia, ayo kakusolola ngwo yitanga ya asoko jo yatambile kwaasongwela ku mwono wo hakutwala ku chize makapwa kulutwe lia matangwa. Zambi hanatwehe chawana chakusakula kumuwayila ni kumuhalisa, ngwe chize alingile Hezekia.

13, 14. Mumu liaka Chiteli chize Maria atambwile chapwile ngwe chikalu, alioze kuchi iye akumbulwile ha yize Gabriele ambile?

¹³ Muze Hezekia te hafwa yikupalika miaka yinji, umwe mwana-pwo mukwa-kulikehesa, yoze te avuluka ngwo Maria yapwa ni usepa upema ni Yehova, nawa ni chimwe chiteli chilemu. Aye te mapwa kafumba ni kusema mwana wa Zambi ni kumulela! Yehova kazangile ni kujikijila muli Maria hakumwaha chiteli chino cha uhaliso. Alioze, kuchi iye evwile muze Yehova amwehele chiteli chacho?

¹⁴ Twakuhanjika chinji hakutwala ku chiteli chize Maria atambwile. Shina aye kevwile woma? Chakutalilaho, mungelo Gabriele kambile ngwenyi aye te mapwa kafumba chakuhona kulimona ni lunga. Alioze Gabriele kakalumbunwine kuli asoko ni enyembo jenyi ngwenyi Maria te mapwa kafumba. Ha chino, kuchi ayo te manyonga? Kuchi iye te mahasa kulumbununa kuli Yosefwe ngwo kakalingile utanji? Chikwo nawa, aye kapwile ni chiteli chinene cha kulela mwana wa Zambi ngwe mutu! Kutushi kunyingika yipikalo yeswe yize Maria apwile nayo, alioze tunanyingika yuma yize iye alingile muze Gabriele ahanjikile nenyi. Aye yamba ngwenyi:  “Nguli ndungo ya Mwene, chikapwe kuli yami nikulita ni liji lie.”—Luka 1:26-38

15. Mumu liaka ufulielo wa Maria uli ulemu?

¹⁵ Ufulielo wa Maria unasoloka pundu! Aye katayijile kulinga yuma yeswe yize amwichile, ngwe umwe ndungo. Kafulielele ngwenyi Yehova te mamukwasa ni kumufunga. Mba kuchi Maria apwile ni ufulielo wacho ukolo? Yetu kutushi kusemuka ni ufulielo. Alioze mutuhasa kupwa ni ufulielo nyi mutuufupa, ni kwita kuli Zambi hanga atukwase ha tachi jize tunase. (A-Ngalishia 5:22; A-Efwesu 2:8) Maria kahondanganyine chinji hanga akolese ufulielo wenyi. Kuchi tunachinyingika? Tutalenu chize iye apanjikile nawa ni yize ahanjikile.

16. Yika yinasolola ngwo Maria kapwile kupanjika kanawa?

¹⁶ Chize Maria apanjikile. Mbimbiliya yakwamba ngwo twatamba ‘kulipupwisa kwivwa, alioze kupwa makoke kuhanjika.’ (Tiangu 1:19) Maria kapwile mukwa kwivwa kanawa. Mbimbiliya yinasolola ngwo iye kapanjikile kanawa yuma yeswe yize evwile, chipi-chipi yuma yize iye alilongesele hakutwala kuli Yehova. Iye kasele shimbu hanga apukune ha yuma yacho yilemu. Chakutalilaho, yino yalingiwile ha kusemuka cha Yesu, muze tufunga mapanga ahanjikile ni Maria hakutwala ku sango jize alwezele kuli mungelo. Kulutwe lia matangwa, muze Yesu apwile ni miaka 12, aye yamba chimwe chuma chize chakomwesene Maria. Ha yikuma yino yaali, Maria yapanjika, yewuluka ni kunyonga kanawa hakutwala ku yuma yize evwile.—Tanga Luka 2:16-19, 49, 51.

17. Yika mutuhasa kulilongesa kuli Maria ha chize iye ahanjikile?

¹⁷ Yize Maria ahanjikile. Mbimbiliya kuyishi kwamba chinji yuma yize Maria ahanjikile. Alioze lusango munene wa Maria kali ha Luka 1:46-55. Maliji wano kakusolola ngwo, Maria kanyingikine kanawa Yisoneko ya Hepreu. Kuchi tunachinyingika? Mumu maliji a Maria kanalite ni maliji akulemba cha Hana naye ya Samuele. (1 Samuele 2:1-10) Chino chinasolola ngwo, kota Maria Katongwele Yisoneko yisuho 20 muze te anahanjika. Chino chinasolola nawa ngwo, iye te kakuzanga kuhanjika hakutwala ku umwenemwene uze alilongesele kuli Sepa lienyi munene Yehova.

18. Milali yika mutuhasa kwimbulwilamo ufulielo wa Maria?

¹⁸ Chizechene ngwe Maria, ha amwe mashimbu Yehova mahasa kutwaha umwe mulimo uze mutumona ngwetu uli ukalu kuulinga. Kashika twimbululenu chilweza chenyi, ni kulikehesa cheswe tutayizenu mulimo weswawo, ni kujikijila muli Yehova ngwetu matukwasa. Mutuhasa nawa kwimbulula ufulielo wa Maria muze mutupanjika kanawa Yehova, ni kupukuna ha yize twakulilongesa hali iye ni upale wenyi. Kashika ni chiseke cheswe tuhanjikenu ni akwetu ha yize tunalilongesa hakutwala kuli Yehova.—Samu 77:11, 12; Luka 8:18; A-Roma 10:15.

19. Nyi mutwimbulula yilweza ya ufulielo yize yili mu Mbimbiliya, yika mutuhasa kutambula?

¹⁹ Chinasoloka pundu ngwo, Rute, Hezekia, Maria, kapwile masepa ja Yehova, ngwe chize apwile Apalahama. Ayo kanalingi chihanda cha, ‘mbunga yinene ya yela’ waze atambwile chiwape chakupwa masepa ja Zambi. Mutuhasa kununga ni kwimbulula yilweza ya ufulielo wo. (A-Hepreu 6:11, 12) Nyi mutulinga chino, mutukatambula chiwape chakupwa masepa ja Yehova ku miaka ya mutolo!