1, 2. Kuchi Yehova akutusolwela mbunge yenyi ya uhanyi?

YEHOVA kali umwe Zambi chihanyi. Yuma yeswe tukwete yakukatuka kuli iye. Yuma yipema yeswe yili hano hashi ya iye, nawa kakuyizachisa hanga atukwase ku mwono wetu. (Samu 104:13-15; Hagaia 2:8) Mbimbiliya yakutulweza chize ha mashimbu amwe, Yehova akuzachisa yuma yacho mu jila yakukomwesa hanga akwase atu jenyi.

² Chakutalilaho, Yehova kahanyine vungu lia A-Izalele kulia chize te avuluka ngwo manaa ni meya muze apwile mu puya ha miaka 40. (Kutuhuka 16:35) Hachino, ayo yapwa ni yeswe yize te yinafupiwa ku mwono wo. (Nehemia 9:20, 21) Kulutwe lia matangwa, Yehova yahana profeta Elisha uhashi wakwokesa maji akehe a tuliwa yoze te washishika. Chawana chino cha Zambi chakwashile pwo wacho kufweta mikuli yize apwile nayo ni kusala ni mbongo jakulikwasa najo ni  mwanenyi. (2 Mianangana 4:1-7) Ni ukwaso wa Yehova, Yesu neye kahanyine kulia kuli atu ni kuhana mbongo kuli waze te anajifupu.—Mateu 15:35-38; 17:27.

3. Yika mutushimutwina ha mutwe uno?

³ Yehova mahasa kuzachisa chuma cheswacho anazange hanga akwase yitangiwa yenyi. Chipwe chocho, kakwita tuvumbi twenyi ahane yuma yeswayo alinayo hanga akwase milimo ya mu ululikiso wenyi. (Kutuhuka 36:3-7; tanga Yishima 3:9.) Mumu liaka Yehova akuzanga ngwenyi tumufunyishine yuma yize akutwaha? Kuchi tuvumbi twa Yehova ku shakulu apwile ni kukwasa milimo yenyi? Kuchi ululikiso wa Zambi musono wakuzachisa milambu ya mbongo yize atu akuhana? Mutwe uno muukumbulula yihula yacho.

4. Yika twakusolola kuli Yehova muze twakukwasa mulimo wenyi?

⁴ Twakuhana yuma kuli Yehova mumu twakumuzanga nawa twakusakwilila chinji ha yeswe yize akutulingila. Twakwivwa kuwaha nyi twanyonga ha yuma yeswe yize Yehova akutulingila. Ni Mwanangana Ndawichi che evwile muze alumbunwine yuma yize yapwile ni kufupiwa hakutunga tembele. Ndawichi ngwenyi yuma yeswe tukwete yakukatuka kuli Yehova, nawa ngwenyi twakuhana Yehova yuma yize iye hanatwehe.—Tanga 1 Sango ja Mianangana 29:11-14.

5. Kuchi Mbimbiliya yakutulongesa ngwo kuhana ni mbunge yeswe chili chihanda cha uwayilo wamwenemwene?

⁵ Twakuhana nawa yuma kuli Yehova mumu ayi yili jila ya kumuwayilamo. Mu umwe usolwelo, postolo Yoano yevwa tuvumbi twa Yehova a mu malilu kanambe ngwo: “Yenu kunwatela, Mwene wetu kanda Zambi yetu, kutambula uhenya ni ulemu ni tachi, mumu yenu nwatangile yuma yeswe, ni mumu ha upale wenu yapwile, yatangiwile.” (Usolwelo 4:11) Kwamba pundu, Yehova katela kumwaha uhenya ni ulemu, kashika ndo tumuwayile ni mbunge yeswe. Yehova katumine Mose hanga alweze vungu lia A-Izalele apwe ni kulinga yiwanyino katatu ha mwaka. Jila yimwe apwile ni kuwayilamo Yehova ha yiwanyino yacho te kumwaha yuma. Atu kaalwezele ngwo “kanda asoloka mokomoko kumeso ja Yehova.” (Shimbi Yamuchiali 16:16) Ni musono nawa, kuhana chili chilemu chinji ha kuwayila Zambi. Hakulinga chocho, twakusolola ngwetu twakulemesa ni kukwasa milimo ya mu ululikiso wa Yehova.

6. Mumu liaka chili chipema kupwa ni mbunge yakuhana? (Tala chizulie ha uputukilo.)

⁶ Chinalite yetu kupwa ni kuhana hi kutambwola wika ko. (Tanga Yishima 29:21.) Uchinyongenu umwe kanuke yoze ahana mbongo kuli yisemi jenyi mba aye manda jimwe ha mbongo jacho ni kulanjila yisemi jenyi chawana. Kuchi yisemi jenyi mevwa ha chawana chacho? Hanji nyongenu umwe mukweze pionelu yoze watwama ni yisemi jenyi, maaha jimwe mbongo hanga afwetele zuwo hanji alande kulia. Ewa, yisemi jenyi te keshi kushimbwila ngwo malinga chino, alioze ayo  matambula chawana chacho. Mumu liaka? Mumu yino yili jila yize asolwelamo ngwenyi kanasakwilila chinji ha yeswe yize yisemi jenyi akumulingila. Ni Yehova neye kananyingika ngwenyi chinalite kuli yetu kuhana yimwe yuma ha upite wetu.

7, 8. Kuchi atu ja Yehova ku shakulu atwaha chilweza chakuhana milambu (a) kulita ni milimo yize analingi? (b) hanga tukwase milimo ya Zambi?

⁷ Twakulilongesa mu Mbimbiliya ngwo, atu ja Yehova te kakuhana yawana hanga akwase milimo yenyi. Ha mashimbu amwe te kakuhana yuma kulita ni mulimo uze analingi. Chakutalilaho, Mose yakolweza A-Izalele hanga ahane yuma yakutunga nayo tabernakulu. Mwanangana Ndawichi neye yalinga chochene hakutunga tembele. (Kutuhuka 35:5; 1 Sango ja Mianangana 29:5-9) Ha mashimbu a kuyula cha Mwanangana Njoashe, asasendote yalulieka tembele ha kuzachisa mbongo jize atu ahanyine. (2 Mianangana 12:4, 5) Ku sekulu yitangu, akwa-Kristu yevwa ngwo mandumbu jo a ku Yundeya kafupiwile ukwaso hamukunda wa kapunga munene wapalikileko. Chocho, hita mukwa-Kristu yanda cheswacho ahashile ni kuchituma kuli mandumbu jo.—Yilinga 11:27-30.

⁸ Atu ja Yehova nawa kahanyine mbongo kuli mandumbu jo waze te akusongwela milimo ya Zambi. Chakutalilaho, mu Shimbi ya Mose, A-Levi te keshi ni yihinga ngwe chize apwile nayo minyachi yikwo. Kashika, A-Izalele eswe te kakuhana kuli A-Levi yihanda ya ku kumi lia upite wo. (Kwalula 18:21) Chizechene nawa, mapwo amwe ha mashimbu ja Yesu kazachishile yize apwile nayo hanga akwase Yesu ni apostolo jenyi.—Luka 8:1-3.

9. Ku shakulu, yawana kuli te yakukatuka?

⁹ Yawana yacho te yakukatuka kweka ni kweka. A-Izalele waze ahanyine yawana yakutungila nayo tabernakulu kota kahanyine yuma ya ndando yize ejile nayo ku Engitu. (Kutuhuka 3:21, 22; 35:22-24) Ku sekulu yitangu, amwe akwa-Kristu kalanjishile yikwata yo, ngwe minda, mazuwo ni kuhana mbongo jacho kuli apostolo. Mba apostolo yazachisa mbongo jacho hanga akwase mandumbu waze te anafupiwa ukwaso. (Yilinga 4:34, 35) Akwa-Kristu akwo kapwile ni kutulika jimwe mbongo ni kujihana hanga ajizachise ku milimo ya Zambi. (1 A-Korindu 16:2) Kashika, atu eswe, pichi ni yiswale kapwile ni kuhanako yimwe yuma.—Luka 21:1-4.

10, 11. (a) Kuchi mutuhasa kwimbulula kuhana cha tuvumbi twa Yehova aku shakulu? (b) Kuchi nwakwivwa hakutwala ku kukwasa milimo ya Wanangana?

¹⁰ Musono, ni yetu mahasa kutulweza hanga tuhane yimwe ku mulimo uze analingi. Hanji chikungulwila chinazange kutungulula Zuwo lia Wanangana chipwe kutunga lieka. Hanji mutango wa mu chifuchi chenu  newo unafupiwa kuutungulula. Mutuhasa nawa kukwasa milimo ya kukunguluka cha mambonge. Hanji nawa mandumbu a ku yihela yeka kamona umwe luyinda nawa kanafupiwa ukwaso. Mbongo jetu mujihasa kukwasa a mishionaliu, pionelu alipwila, tulayi a mambonge, ni waze akukalakala ku chishina chinene ni ku ma Mbetele a hashi heswe. Chikungulwila chenu kota necho chakutuma mbongo ja kukwasa kutunga Mazuwo a Yikungululo Yinene ni Mazuwo a Wanangana a mandumbu a ku yihela yeka.

¹¹ Tulieswe mutuhasa kuhana yimwe hanga tukwase milimo yize analingi mu ululikiso wa Yehova ha matangwa wano akusula. Yawana keshi kuyisolola yoze wayihana. Nyi twasa mbongo mu kasha ya yawana ku Zuwo lia Wanangana hanji kutuma ha internet mu jw.org, kutwatambile kulweza atu unji wa mbongo jize twahana. Alioze kuchi nyi wanyonga ngwe mbongo unazange kuhana jili jikehe chinji? Nyingika ngwe mbongo jeswe twakutambula mu ululikiso wetu jakwiza jikehe-jikehe kujishi kwiza jinji ha chisuho chimuwika. Ni mandumbu waze keshi ni mbongo jinji no kakwimbulula akwa-Kristu atangu a mu Masendonya. Ayo kapwile ni ‘uswale unji’ alioze yaliumba ni kulemba ngwo aatayize kuhana, chocho yachilinga ni mbunge yeswe.—2 A-Korindu 8:1-4.

12. Kuchi ululikiso wakusa tachi hanga uzachise kanawa mbongo jize atu akulambula?

¹² Chizavu cha Tusongo chashishika ni kukanyama ha chize akuzachisa mbongo jize twakuhana. (Mateu 24:45) Atu amu chizavu chacho kakulemba ni kululieka kanawa mwakuzachishila mbongo jacho. (Luka 14:28) Ku mashimbu akunyima, malunga ashishika waze te akufunga mbongo kapwile ni kusa shindakenyo ngwo mbongo jacho kanajizachisa wika ku uwayilo wa Yehova. Chakutalilaho, Ezera yafuna ku Yerusaleme ni upite amuhele mwanangana wa Persia, ngwe oru, prata ni ukwo wa ndando yinji uze haliapwila te muufwika mbongo kuhiana tununu lukama a dolar. Ezera kamwene yawana yacho ngwenyi yinakatuka kuli Yehova. Mba yasako shimbi ya chize te atamba kuyimbata mu yifuchi yipi yize apwile ni kupalika. (Ezera 8:24-34) Hakupalika cha miaka, postolo Paulu yatambwola mbongo jakukwasa najo mandumbu mu Yundeya. Yasa shindakenyo ngwenyi mbongo jacho ndo ajitwale kuli waze te akusolola “kululama mu yuma yeswe, hi kumeso ja Mwene wika ko, alioze kumeso ja atu nawa.” (Tanga 2 A-Korindu 8:18-21.) Ni musono nawa, ululikiso wetu wakwimbulula Ezera ni Paulu hakuzachisa kanawa mbongo jize atu akulambula.

13. Mumu liaka ululikiso wetu unalumuna yimwe yuma ha miaka yino?

¹³ Usoko muuhasa kwalumuna chize akuzachisa mbongo hanga achine kujihwisa jeswe. Hanji mahasa nawa kuwana jila ya kwashiwishilamo mwono wo hanga akalakale chinji milimo ya Yehova. Ayi ye ululikiso wa Yehova wakulinga. Ha miaka yino kuli milimo yinji, mba mashimbu amwe tunazachisa mbongo jinji kuhiana jize tunatambula. Kashika, ululikiso unesejeka kuwana jila ya kufungilamo mbongo ni kwashiwisa milimo hanga tuhase kumanununa milimo yinji ni mbongo jize mandumbu akuhana.

14-16. (a) Yawana nwakuhana kuchi akuyizachisa? (b) Kuchi milimo yinalingiwa mu ululikiso wa Yehova yakukwasa hita mutu?

¹⁴ Mandumbu waze hashimbula chinji mu umwenemwene, kanambe ngwo, haliapwila tunatambula yiwape yinji mu ululikiso wetu kuhiana kunyima. Haliapwila tuli ni jw.org ni JW Broadcasting. Tuli nawa ni Mbimbiliya ya Yisoneko Yisandu mu malimi anji, (Tradução do Novo Mundo). Ha mwaka 2014/2015, kwapwile Kukunguluka cha Yifuchi cha matangwa atatu chakwamba ngwo “Liangenu Kufupa Wanangana wa Zambi!” Mu yihela yinene ya kwashila konda ya mu mambonge 14 a hashi heswe. Atu eswe waze apwileko kanakawahilila chinji.

¹⁵ Atu anji kanasakwilila chinji ha yiwape yize anatambula mu ululikiso wa Yehova. Chakutalilaho, a lunga ni pwo akukalakala ku Azia yasoneka ngwo: “Twakuzachila mu mbonge yikehe. Kashika, ha mashimbu amwe twakwivwa ngwe tuli ukawetu ni kuvulama utohwe wa milimo ya Yehova. Alioze, muze twakutala JW Broadcasting twakwiwuluka ngwetu tuli ni mandumbu anji hashi heswe. Mandumbu anji kanawahilila chinji ni JW Broadcasting. Nyi hatala programa ya kakweji, kakwivwa ngwe kanakundama ku Chizavu cha Tusongo. Haliapwila kanevu kuwaha chinji kupwa mu ululikiso wa Zambi kuhiana kunyima.”

¹⁶ Hashi heswe kanatungu hanji kutungulula Mazuwo a Wanangana 2,500. Akwa-chikungulwila cha Hondura kambile ngwo kapwile wika ni kulota Zuwo lia Wanangana, alioze haliapwila hapwa nalio. Ayo yasoneka ngwo: “Tunevu kuwaha chinji kupwa mu usoko unene wa Yehova ni kupwa ni mandumbu apema hashi heswe.” Atu anji no che akwamba nyi matambula Mbimbiliya ni mikanda yikwo mu limi lio, hanji muze mandumbu maakwasa nyi mapwa mu umwe luyinda, chipwe muze mamona  yiwape yakwambulwila ha mbunga mu chihela cho.

17. Kuchi tunanyingika ngwetu Yehova mwe unakwase ululikiso wenyi?

¹⁷ Atu waze hi Yela ja Yehova ko kakukomoka ha milimo yeswe tunalingi ku mbongo jize akuhana atu chawana. Mwata umwe wa milimo yaya ni kutala makina waze twakufwambwishila mikanda. Yakomoka chinji hakwivwa ngwo milimo yeswe kanayilingi kuli atu waze alihana ene chakuhona kwaafweta, ha kuzachisa mbongo jize atu akuhana chawana, ni chakuhona kulinga mingoso yakuwanyinako mbongo. Mwata wacho yamba ngwenyi, yeswe yize twakulinga te kuyatambile kulingiwa. Yitumutayiza! Mumu kwamba pundu, yino yeswe yakulingiwa ku ukwaso wa Yehova.—Yombi 42:2.

18. (a) Yiwape yika twakutambula muze mutukwasa milimo ya Wanangana? (b) Kuchi mutuhasa kulongesa ana ni alongi jetu hanga apwe ni kuhana?

¹⁸ Yehova kakutusa vumbi ni kutukwasa mu mulimo unene wa Wanangana uze tuli nawo. Kakutulakenya ngwenyi nyi twalinga chocho, matwaha yiwape yinji. (Malakia 3:10) Nawa kanatulakenya ngwenyi nyi twapwa yihanyi, yuma muyenda kanawa ku mwono wetu. (Tanga Yishima 11:24, 25.) Nawa ngwenyi, mutuwahilila chinji hakuhana, mumu “chinawaha kutambula alioze shinaho kuhana.” (Yilinga 20:35) Kupalikila ku yize twakuhanjika ni ku yitanga yetu, mutuhasa kulongesa ana ni alongi jetu chize atamba kuhana yawana ku milimo ya Zambi ni kuzuka yiwape yinji.

19. Yika mutwe uno watukolweza kulinga?

¹⁹ Yuma yeswe tuli nayo yambala ya Yehova. Nyi mutumufunyishinayo, mutusolola ngwetu twakumuzanga nawa twakusakwilila ha yeswe yize akutulingila. (1 Sango ja Mianangana 29:17) Muze A-Izalele ahanyine yawana hanga atunge nayo tembele, ayo yawahilila ‘mumu ahanyine ni mbunge yeswe, alambwile Yehova ni mbunge yingunu.’ (1 Sango ja Mianangana 29:9) Kashika, tupwenu yihanyi hanga tuwahilile ku mwono muze mutufunyishina Yehova yuma yize iye hanatwehe.