1, 2. Mumu liaka mwono musono muuhasa kukaliwa kuli atu ja Zambi? (Tala yizulie ha uputukilo.)

MANDOTOLO anji hamwe ni yikwashi jo kakuwuka atu waze ali ni misongo yize yakusambuluka kuli atu akwo. Ayo kakulihulumba chinji hali mieji waze anawuku, mumu kakuzanga kwaakwasa. Chipwe chocho, ayo no katamba kulifunga hanga misongo yize anawuku yichine kwaakwata. Amu tuli Yela ja Yehova ni yetu tuli mu ponde yoyene. Anji akuli yetu twatwama, ni kukalakala hamwe ni atu waze akwete ndako ni yitanga yize yalisa chinji ni ya Zambi. Chino muchihasa kutupinjisa chinji.

² Ha matangwa wano akusula, atu waze keshi kuwayila Zambi kakulengulula shimbi hakutwala ku chipi ni chipema. Postolo Paulu kasolwele yitanga yo yipi muze asonekene mukanda wa Timoteu. Paulu yamba ngwenyi, yitanga yino yipi te muyisoloka chinji ha matangwa akusula. (Tanga 2 Timoteu 3:1-5, 13.) Chipwe ngwe yitanga yacho yipi yakutuvwisa yikola ku mbunge, nihindu mutuhasa kupianguka hakwimbulula kunyonga, kuhanjika ni kupwa cha atu waze twatunga no. (Yishima 13:20)  Mu mutwe uno, mutumonamo chize yitanga yacho yalisa ni yitanga ya atu ja Zambi. Mutumona nawa yize mutuhasa kulinga hanga tulifunge ku yitanga yino yipi muze tunayi ni kukwasa atu hanga anyingike Yehova.

3. Atu a mutapu uka anatongola ha 2 Timoteu 3:2-5?

³ Paulu kasonekene ngwenyi, ha matangwa akusula kumukukapwa “miaka yikalu.” Chocho yatongola ndako jipi 19 jize te atu masolola chinji ha matangwa jetu. Ndako jacho jalifwa ni jize Paulu atongwele mu A-Roma 1:29-31, alioze jize atongwola mu mukanda wa Timoteu jili ni maliji waze kutuchi kwaawana mu Yisoneko yikwo ya Ngregu ya akwa-Kristu. Paulu kaputukile ni maliji akwamba ngwo, “mumu atu kumakapwa.” Maliji wano kanasolola ngwo, malunga ni mapwo te mapwa ni ndako jino jipi. Alioze hi atu eswe ko akwete ndako jipi jize Paulu atongwele. Akwa-Kristu kali ni ndako jalisa chinji ni ndako jacho.—Tanga Malakia 3:18.

4. Ku nyonga lie, yitanga yika akusolola mutu yoze wakulizata?

⁴ Muze Paulu ambile ngwenyi atu makapwa ni kulizanga ene ni kuzanga mbongo, yawezelako nawa ngwenyi, atu kumakapwa akwa-kulizelula, akwa-kushililika ni akwa-kulizata. Atu waze akwete ndako jino kanji-kanji kakunyonga ngwo, kahiana akwo mumu lia chize akusoloka, yize mahasa kulinga, yize akwete, hanji yiteli yize ali nayo ku mwono wo. Atu jacho kakuzanga wika hanga aakomoke kuli akwo. Umwe mukwa-mana yasoneka hakutwala kuli mutu yoze wakulizata ngwenyi: “Mu mbunge yenyi mwatwama chimwe chihela kuze akuya ni kufulamana hanga alihalise mwene.” Atu amwe hanambe ngwo, kulizata chapwa chipi chinji, kashika chipwe mutu yoze wakulizata keshi kuzanga kumona akwo malizata.

5. Kuchi tuvumbi twa Yehova ashishika no alizachile?

⁵ Yehova keshi kuzanga kulizata chize anasolola mu Mbimbiliya ngwe, “meso akulizelula.” (Yishima 6:16, 17) Kwamba umwenemwene kulizata chakuhandununa mutu kusuku ni Zambi. (Samu 10:4) Kulizata chili ndako ya Ndiapu. (1 Timoteu 3:6) Alioze umwenemwene uli ngwo, chipwe tuvumbi ashishika a Yehova no kalizachile. Chakutalilaho, Mwanangana Uzia wa mu Yunda kashishikile ha miaka yinji. Alioze Mbimbiliya yinambe ngwo: “Muze hatakama, mbunge yenyi yiyilifuza alinge uhenge, mba yavulumuna Yehova Zambi yenyi.” Uzia kayile mu tembele ni kwocha insensu, chuma chize iye te katambile kulinga. Kulutwe, ha amwe mashimbu, Mwanangana washishika Hezekia, neye yalizata.—2 Sango ja Mianangana 26:16; 32:25, 26.

6. Yika kachi yapwishile Ndawichi mukwa-kulizata? Alioze mumu liaka anungine ni kulikehesa?

⁶ Atu amwe kakulizata mumu kali apema, kaanyingika kuli atu anji, kakwimba miaso kanawa, kakwete tachi hanji kakwaakomoka kuli akwo. Ndawichi kapwile ni yuma yeswayi, alioze kapwile mukwa-kulikehesa ku mwono wenyi weswe. Chakutalilaho, muze Ndawichi ashihile Ngoliate, Mwanangana Saulu yalweza Ndawichi hanga ambate mwanenyi. Alioze Ndawichi yamba ngwenyi: “Yami iya, hanji mwono wami ni munyachi wa tata mu Izalele kuchi wapwa mba ngukapwe tato-weno wa mwanangana?” (1 Samuele 18:18) Yika yakwashile Ndawichi mba apwe mukwa-kulikehesa? Iye  kanyingikine ngwenyi, kapwile ni yitanga, utotombo, ni yiteli yeswayo, mumu Zambi kapwa mukwa-kulikehesa nawa te kakumufunga kanawa. (Samu 113:5-8) Ndawichi kanyingikine ngwenyi chuma cheswacho chipema apwile nacho chakatukile kuli Yehova.—Tesa nawa ni 1 A-Korindu 4:7.

7. Yika muyitukwasa kusolola ngwetu tuli akwa-kulikehesa?

⁷ Ngwe Ndawichi, atu ja Yehova musono kakusa tachi hanga alikehese. Twakwivwa kuwaha ha kunyingika ngwetu Yehova mwene, Mukwa-Ndundo-Jeswe, kapwa mukwa-kulikehesa. (Samu 18:35) Twakuzanga kukaula maliji wano: “Zalenu mbunge ja keke, ni utu, ni mbunge ja kulikehesa, ni kushimbika, ni uhomboloji.” (A-Kolosu 3:12) Nawa tunanyingika ngwetu, “zango kulishi kulisangala, kulishi kulifuza.” (1 A-Korindu 13:4) Muze atu mamona ngwo twakulikehesa, no mazanga kunyingika Yehova. Chizechene ngwe yitanga yipema ya pwo mukwa-Kristu muyihasa kukwasa mukwo-lunga yoze hi mukwa-Kristu ko akundame kuli Yehova, atu mahasa kukundama kuli Zambi hamukunda wa kulikehesa cha tuvumbi twenyi.—1 Petulu 3:1.

8. (a) Kuchi musono atu amwe akunyonga hakutwala ku kuhona kwononokena yisemi? (b) Yika Mbimbiliya yinalweza ana hanga alinge?

⁸ Paulu katongwele chize atu te matwama ni akwo ha matangwa akusula. Yasoneka ngwenyi ana te kechi kwononokena yisemi jo. Musono, mikanda yinji, yinema, ni programa ja ha TV yakusolola ngwo hi chipi ko nyi ana mahona kwononokena yisemi jo. Alioze umwenemwene uli ngwo, kuhona kwononoka chakupihisa usoko, atu eswe kanachinyingika. Atu kananyingika umwenemwene wacho liakulu. Chakutalilaho, mu Ngresia ku shakulu, mutu yoze malamba yisemi jenyi te keshi kupwa nawa ni ulemu kumeso ja atu. Mu shimbi ya A-Roma, mutu yoze malamba tato te kakumuzangamisa ngwe chize te akulinga chingalwe yoze washiha mutu. Mu Yisoneko ya Hepreu ni ya Ngregu yinakolweza ana hanga alemese ni kuvumbika yisemi jo.—Kutuhuka 20:12; A-Efwesu 6:1-3.

9. Yika muyikwasa ana mba ononokene yisemi jo?

⁹ Yika muyihasa kukwasa ana hanga ononokene yisemi jo, chipwe ngwe haze atwama akwo keshi kuchilinga? Muze ana manyonga ha yuma yeswe yipema yize yisemi jo akwaalingila, ayo katamba kwaasakwilila ni kwoononokena. Nawa ana kanafupiwa kunyingika ngwo Zambi, Tata ya atu eswe, kanaashimbwila hanga ononokene yisemi jo. Nyi ana mamba yuma yipema hali yisemi jo, makwasa masepa jo hanga no avumbike yisemi jo. Alioze nyi yisemi keshi ni zango lia utu hali ana jo, muchihasa kupwa chikalu ana kwoononokena. Chikwo nawa nyi ana manyingika ngwo yisemi jo kakwaazanga ni mbunge yeswe, chino muchaakwasa kwoononokena chipwe ha mashimbu akalu.  Mukweze Austin yamba ngwenyi: “Ha mashimbu amwe te nakweseka kwehuka shimbi ja yisemi jami, alioze ayo kasele usongwelo walita ni kungulumbunwina yitela ya mumu liaka ausele, yino yatukwashile kupwa ni usepa upema. Yangukwashile nawa kwononokena yisemi jami. Te nakumona chize yisemi jami akulihulumba hali yami, chocho yingufupa kweevwisa kuwaha.”

10, 11. (a) Yitanga yika yipi yinasolola ngwo atu keshi zango hali akwo? (b) Zango lia mutapu uka akwa-Kristu amwenemwene akusolwela akwo?

¹⁰ Nawa Paulu katongwele yitanga yikwo yize yakusolola ngwo atu keshi ni zango hali akwo. Muze hatongola ana kuhona “kwononoka kuli yisemi,” yatongola kaleleso. Maliji wano kanalite mumu atu waze akwete kaleleso keshi kulemesa yuma yize akwo akwaalingila. Paulu nawa ngwenyi atu te mahona ushishiko. Ayo te keshi kulivwashana ni akwo, chino chinalumbunuka ngwo te kechi kuzanga kupwa ni sambukila ni akwo. Ayo te mapwa akwa-kushililika ni kukunjika akwo, hakwaambila yuma yipi chipwe kuyambila Zambi. Nawa te mapwa yilamikiji, waze akulamikiza akwo yuma ya saki hanga apihise wika lufuma wo. *—Tala maliji mushi lia lifwo.

¹¹ Tuvumbi twa Yehova kalisa ni atu anji hano hashi, mumu ayo kakusolwela akwo zango liamwenemwene. Maliji wano kali amwenemwene. Mumu Yesu kambile ngwenyi mu Shimbi ya Mose, mwapwile yimwe yahiana kuzanga akwetu, yili shimbi ya kuzanga Zambi. (Mateu 22:38, 39) Nawa Yesu yamba ngwenyi, akwa-Kristu amwenemwene te maanyingika ha kulizanga umwe ni mukwo. (Tanga Yoano 13:34, 35.) Chikwo nawa akwa-Kristu amwenemwene te mazanga akwa-kole jo.—Mateu 5:43, 44.

12. Kuchi Yesu asolwele zango hali akwo?

¹² Yesu kasolwele ngwenyi kakuzanga atu ni mbunge yeswe. Iye kachilingile ha kuya mu mbonge ni mbonge hanga alweze atu sango lipema lia Wanangana wa Zambi. Kawukile tupuputa, yilema, akwa-mbumba ni tunaye. Iye nawa kahindwishile afu. (Luka 7:22) Yesu nawa kahanyine mwono wenyi hanga alamwine atu, chipwe ngwe atu anji te keshi kumuzanga. Yesu kembulwile zango lia Tato ni ungunu weswe. Kashika Yela ja Yehova hashi heswe, akwimbulula Yesu ni kusolwela akwo zango.

13. Kuchi zango lize twakusolwela akwetu liakwakwasa kuzanga kunyingika Yehova?

¹³ Nyi mutusolola kuli atu ngwetu twaakwazanga, chino muchaakwasa hanga afupe kunyingika Yehova. Chakutalilaho, umwe lunga mu Tailândia kayile ku kukunguluka cha mambonge nawa kakomokene muze amwene chize mandumbu analizange umwe ni mukwo. Muze hafuna ku zuwo, yeta longeso lia Mbimbiliya kuli Yela ja Yehova, chocho yaputuka kulilongesa kaali ha poso. Hachino yaputuka kwambujola kuli asoko jenyi eswe. Hakupalika cha tukweji asambano wika, lunga wacho yahanjika pande jenyi yitangu mu Zuwo lia Wanangana. Shina twakusolwela lume akwetu zango? Achilihule ngwe: ‘Shina nakusa tachi hanga ngukwase atu mu usoko wami, mu chikungulwila, ni mu munda? Kutala nakumona akwetu ngwe chize Yehova akwaamona?’

14, 15. Yitanga yika yipi atu anji akusolola? Kuchi atu amwe alumwine yitanga yo?

¹⁴ Ha matangwa akusula, atu nawa kakusolola yitanga yikwo yipi yize twatamba kwehuka. Chakutalilaho, anji keshi kuzanga yuma yipema. Ayo kakuvwila kole yuma yipema ni kulimika nayo. Atu amutapu au keshi uhumikizo, kapwa asasu. Amwe kapwa akwa-kulipupula. Ayo kakulinga yuma chakuhona kunyonga, nawa keshi kulihulumba ha chize yitanga yo muyikwata kuli akwo.

¹⁵ Atu anji waze te apwa ngwe tushitu a yilianyi hanalumuna yitanga yo. Kwalumuka chino chakukomwesa, hanachambe mu uprofeto wa Mbimbiliya. (Tanga Izaia 11:6, 7.) Ha uprofeto wacho twakuwanaho tushitu amu yambu, ngwe tungunga ni ndumba waze anatwame ni sambukila hamwe ni tushitu amu yihunda, ngwe ana-mapanga ni yimbembe a ngombe. Mba mumu liaka te mapwa ni sambukila yacho? Uprofeto unanungu ngwo: “Mumu hashi muhakazala ni chinyingi cha Yehova ngwe meya akufuka kalunga-lwiji.” (Izaia 11:9) Tushitu keshi kuhasa kulilongesa hakutwala kuli Yehova, kashika maliji wano kanatale ha kwalumuka cha yitanga ya atu.

16. Kuchi Mbimbiliya yakukwasa atu kwalumuna yitanga yo?

¹⁶ Mandumbu jetu anji kapwile asasu ngwe tungunga alioze haliapwila kali akwa-sambukila. Muhasa kutanga yilweza yimwe ha mutwe wakwamba ngwo, “Mbimbiliya  Yakwalumuna Mwono wa Atu,” mu site jw.org. Atu jacho anazange kunyingika ni kuwayila Yehova keshi ngwe waze akwete uwayilo wa kumeso, alioze kakulikala tachi jawo. Atu a mutapu au kakuzanga kuwayila Zambi, alioze yitanga yo yakusolola ngwo keshi kuchilinga. Alioze, anji akuli atu ja Yehova kapwile asasu, haliapwila ‘kanazale utu waha, uze hanautange mu ululi ni usandu wamwenemwene kulita ni Zambi.’ (A-Efwesu 4:23, 24) Muze atu malilongesa hakutwala kuli Zambi, ayo manyingika ngwo katamba kukaula shimbi jenyi. Chino muchaakwasa hanga alumune yize afuliela, chize akunyonga, ni yize akulinga. Hi chashi ko kwaalumuna yuma yacho, alioze spiritu ya Zambi yakukwasa waze anazange lume kumuvwisa kuwaha.

17. Kuchi mutuhasa kwehuka kutupiangula kuli atu waze akwete yitanga yipi?

¹⁷ Chili chashi kumona kulisa hakachi ka atu waze akuwayila Zambi ni waze keshi kumuwayila. Twatamba kukanyama hanga yitanga yipi ya atu waze keshi kuwayila Zambi yihone kutupiangula. Tunazange kukaula usongwelo wa Yehova ha kukondoloka kuli atu waze ali ni yitanga anatongola ha 2 Timoteu 3:2-5. Kwamba umwenemwene, kutuchi kuhasa kwehuka atu eswe waze ali ni yitanga yino yipi. Mumu twakukalakala no, twakulilongesa no ku shikola, akwo twatunga no. Alioze kutwatambile kunyonga hanji kupwa ni yitanga ngwe ya ayo. Mba yika muyihasa kutukwasa? Mutuhasa kukolesa usepa wetu ni Yehova ha kulilongesa Mbimbiliya ni kusakula masepa jetu mukachi ka atu waze akumuzanga.

18. Kuchi yuma yize twakuhanjika ni kulinga yakukwasa akwetu azange kunyingika Yehova?

¹⁸ Tunazange kukwasa akwetu hanga no anyingike Yehova. Kashika fupa majila akwambulwilamo sango lipema, ni kwita ukwaso kuli Yehova hanga wambe yuma yipema ha shimbu lialita. Twatamba kulinyingikisa kuli akwetu ngwetu, tuli Yela ja Yehova. Chocho, yitanga yetu yipema muyihalisa Zambi hi yetwene ko. Yehova kanatulongesa ngwenyi, “chatutamba kwenda ni mana ni ululi ni uwayilo, ni kulikala utanganyanyi ni usolo wa hano hashi.” (Titu 2:11-14) Nyi mutwimbulula Yehova ni kulinga yize anazange, akwetu no machimona. Chocho, amwe mahasa kwamba ngwo: “Tutayize kuya ni yena mumu hitwevwa lufuma ngwo, Zambi kwali hamwe ni yenu.”—Zekaria 8:23.