1. Yipikalo yika yimwe twatamba kukumba, alioze mumu liaka Yehova akuvwila kuwaha tuvumbi twenyi ashishika? (Tala yizulie ha uputukilo.)

MWONO ha matangwa wano unakale chinji. Chakutalilaho, mandumbu jetu anji kanapinji ni misongo yipi. Eka, waze hakola kali ni kufunga asoko jo waze hashinakajiwa. Nihindu akwo achili ni kupinda mba awane yakulikwasa nayo mu usoko wo. Nawa tunanyingika ngwetu anji akuli yenu nunapinji ni unji wa yipikalo yacho ha shimbu limuwika! Yino yinafupiwa shimbu, tachi ni mbongo jinji. Alioze nunafuliela ngwenu Yehova manukwasa. Nawa nunanyingika ngwenu yuma muyikawaha, mumu che Zambi anatulakenya. Ufulielo uno wakuvwisa chinji Yehova kuwaha!

2. Kuchi Izaia 40:29 yinatutakamisa, alioze manyonga aka api mutuhasa kupwa no?

² Shina wakwivwa ngwe, yipikalo yize uli nayo kuuchi kuhasa kuyikumba? Nyi che wakwivwa, nyingika ngwe kuushi ukawe. Amwe tuvumbi twa Zambi ashishika ku shakulu no che anyongene. (1 Mianangana 19:4; Yombi  7:7) Yika yaakwashile mba anunge ni kunyongonona? Ayo kafulielele ha tachi ja Yehova. Mbimbiliya yinambe ngwo, Zambi “kakuhana ngolo kuli mukwa kulezumuka.” (Izaia 40:29) Chaluyinda, amwe tuvumbi twa Zambi musono kakunyonga ngwo jila yipema ya kuhwishilamo yipikalo yo, yili kwecha kuwayila Yehova ha limwe shimbu. Ayo kakunyonga ngwo kuwayila Yehova chili ngwe kumbata yilemu yize kuyishi kuneha yiwape. Hachino, kakwecha kutanga Mbimbiliya, kuya ku kukunguluka, ni kwambujola. Yino ye Satana anashimbwila hali tuvumbi twa Zambi.

3. (a) Kuchi mutuhasa kulifunga hanga Satana ahone kutuhongesa? (b) Yika mutushimutwina ha mutwe uno?

³ Ndiapu keshi kuzanga hanga tutakame. Nawa kananyingika ngwenyi twakupwa ni tachi nyi mutuhondangana mulimo wa Yehova. Kashika muze muhonga ku mujimba ni mu manyonga, kanda uhichika Yehova. Kundama kuli iye. Mbimbiliya yinambe ngwo: “Mwene, kumakanupwisa angunu ni kunutakamisa.’ (1 Petulu 5:10; Tiangu 4:8) Mu mutwe uno, mutuhengwolamo Izaia 40:26-31 hanga tunyingike uhashi uze Yehova akwete wakutwaha tachi. Mutushimutwina yikuma yaali yize muyitukinda kuhondangana mulimo wa Yehova, nawa mutumona chize kukaula shimbi ja Mbimbiliya muchihasa kutukwasa kunyongonona.

4. Longeso lika mutuwana ha Izaia 40:26?

⁴ Tanga Izaia 40:26. Kukushi niumwe mutu yoze mahasa kwalula tutongonoshi eswe waze ali mwilu. Akwa-mana kakwamba ngwo tutongonoshi waze twakumona mahasa kupwa unji wa tununu 400 a tununu. Chipwe chocho Yehova kanyingika jina lia hita katongonoshi. Yika yino yinatulongesa hali Yehova? Nyi Yehova kanyingika jina lia hita katongonoshi, achinyonga chize akwivwa hali yena! Ena wakumuwayila, hi ku tachi ko, alioze mumu wakumuzanga. (Samu 19:1, 3, 14) Tata yetu wa zango kanakunyingika kanawa. Mbimbiliya yinambe ngwo, ‘chipwe kambu ja ku mutwe we’ iye kakujalula jeswe. (Mateu 10:30) Yehova kanazange tunyingike ngwetu, “iye kananyingika matangwa ja mutu mungunu.” (Samu 37:18) Chochene, Yehova kananyingika lamba lieswe twakumona, nawa mahasa kutwaha tachi jize mutufupiwa hanga tukumbe lamba liacho.

5. Kuchi mutuhasa kupwa ni shindakenyo ngwetu Yehova kali ni uhashi wa kututakamisa?

⁵ Tanga Izaia 40:28. Yehova kali Chishina cha kahia keswe mu chifuchi. Achitala chilweza cha kahia kaze Yehova atangile nako tangwa. Mukwa-mana David Bodanis ngwenyi, hita segundu tangwa lia kutuhwisa kahia tununu a tununu akutuwika cha mbomba atomika. Mukwa-mana mukwo yalula ngwenyi unji wa kahia kaze kakutuhuka ku tangwa ha segundu yimuwika atu mahasa kukazachisa hashi heswe ha miaka 200,000! Chochene, Yehova mwe watangile tangwa ni kahia kacho, kashika mahasa kutwaha tachi jize tunafupu hanga tukumbe yipikalo yetu.

6. Mu mutapu uka kanga ya Yesu yili yilelu, nawa kuchi chino chinakwata hali yetu?

 ⁶ Tanga Izaia 40:29. Kuwayila Yehova chakutunehena uwahililo unji. Yesu kalwezele tumbaji twenyi ngwenyi: “Lilemenu ku kanga yami.” Yawezela nawa ngwenyi: “Kumunuwana uhwimino ku mbunge yenu. Mumu kanga yami yashi, ni chiteli chami chilelu.” (Mateu 11:28-30) Chino chili umwenemwene! Mumu ha mashimbu amwe, mutuhasa kuhona tachi muze tunayi ni kwambujola hanji ku kukunguluka. Alioze muze twakufuna ku zuwo kuchi twakwivwa? Twakuhwima ku mbunge nawa twakupwa ni tachi ja kukumba yipikalo. Kwamba pundu, kanga ya Yesu yilelu.

7. Hana chilweza chize chinasolola umwenemwene wa Mateu 11:28-30.

⁷ Tutalenu chilweza cha umwe ndumbwetu wa pwo. Iye kakwete musongo wa kuhonga nawa kakuyiza chinji mutwe. Hachino, ha mashimbu amwe te chapwa chikalu kuli iye kuya ku kukunguluka. Alioze, tangwa limwe muze alikolwezele kuya ku kukunguluka, iye yasoneka ngwenyi: “Pande hanjikile jambile hakutwala ku kulema ku mbunge. Pande jacho kajihanjikile kanawa yijingukwata ku mbunge chocho yinguputuka kulila. Yingwiwuluka ngwami kukunguluka che chihela natamba kupwa.” Iye kanakawahilila chinji ha tachi jize asele hanga aye ku kukunguluka!

8, 9. Muli te Paulu anatalikisa ha kusoneka ngwenyi: “Muze mungulela, hohene mungupwa ni tachi”?

⁸ Tanga Izaia 40:30. Mutuhasa kunyingika yuma yinji, chipwe chocho, kutuchi kuhasa kuyilinga wika ku tachi jetu. Lino lie longeso yetweswe twatamba kulilongesa. Postolo Paulu te kakwete uhashi wakulinga yuma yinji, alioze kakahashile kulinga yuma yeswe yize te akuzanga. Muze alwezele Yehova chize te anevwu, Yehova yamulweza ngwenyi: ‘Tachi jami kakujipwisa jingunu mu ulelu.’ Paulu kanyingikine yize Yehova amulwezele. Kashika ambile ngwenyi: “Muze mungulela, hohene mungupwa ni tachi.” (2 A-Korindu 12:7-10) Yika iye ambile kwamba?

⁹ Paulu te kanyingika ngwenyi kwapwile yimwe yize te keshi kuhasa kulinga ku tachi jenyi wika. Te kanafupiwa ukwaso wa umwe yoze ukwete ndundo jinji. Spiritu yisandu ya Zambi te muyihana ndundo kuli Paulu muze malela. Nawa te muyimukwasa chinji lume. Spiritu ya Zambi nawa te muyihana Paulu ndundo ja kulinga yuma yize te iye kechi kuhasa kulinga ni tachi jenyi wika. Yino muyihasa kulingiwa ni kuli yetu. Muze Yehova matwaha spiritu yenyi yisandu, mutupwa ni tachi!

10. Kuchi Yehova akwashile Ndawichi kukumba yipikalo yenyi?

¹⁰ Ndawichi mukwa-kwimba masamu kamwene chize spiritu yisandu ya Zambi yamuhele tachi ha yisuho yinji. Yamba ngwenyi: “Ku tachi je nakupalika ndusu mu mbunga ya tujita; ku tachi ja Zambi yami nakutumbuka chipanga.” (Samu 18:29) Ngwe chikalakala chisuku chize chikalu kunyina, ha mashimbu amwe yipikalo yetu yakupwa yinji yize kutuchi kuhasa kukumba yetwene. Twakufupiwa ukwaso wa Yehova.

11. Kuchi spiritu yisandu ya kutukwasa kukumba yipikalo yetu?

¹¹ Tanga Izaia 40:31. Pupa hanji tela keshi kushimbula chinji mu tetela ha kuzachisa wika tachi jenyi. Ndundo ja fuji yasasaminya ye yakukwasa pupa kuhumuka chinji mwilu. Chino chakukwasa pupa kuhumuka tando jinji chakuhona kukisa tachi jenyi. Hachino nyi mupalika mu yipikalo yinji,  nyonga hali pupa. Eta kuli Yehova hanga akwehe tachi kupalikila ku ‘chikwashi, ye spiritu yisandu.’ (Yoano 14:26) Kashika, ha shimbu lieswalio ha tangwa, mutuhasa kwita kuli Yehova hanga atwehe spiritu yenyi. Kanji-kanji twakufupiwa kwita ukwaso wa Yehova nyi kutushi ni kulivwashana ni umwe ndumbwetu mu chikungulwila. Mba mumu liaka yuma ya mutapu au yakulingiwa mu chikungulwila?

12, 13. (a) Mumu liaka ha mashimbu amwe akwa-Kristu akuhona kulivwashana? (b) Yize yalingiwile kuli Yosefwe yika yinatulongesa hali Yehova?

¹² Kuhona kulivwashana chakulingiwa mumu yetweswe tuli yihenge. Ha mashimbu amwe, mutuhasa kupihilila ha yize akwetu matwamba hanji matulinga, ni akwetu no mahasa kupihilila ni yetu. Chino muchihasa kupwa cheseko chikalu kukumba. Alioze yino yakutwaha uhashi wa kushishika kuli Yehova. Mu mutapu uka? Ha kunyingika kukalakala hamuwika ni mandumbu jetu ni kulivwashana. Mumu Yehova kakwaazanga chipwe ngwe kali yihenge, ni yetu nawa che twatamba kulinga.

¹³ Yehova keshi kukinda tuvumbi twenyi kupalika mu yeseko. Tunachinyingika ha yize yalingiwile ku mwono wa Yosefwe. Muze Yosefwe te uchili kanuke, mambumbu akuli naye mukwo yamuvwila chipululu. Ayo yamulanjisa mu undungo, chocho yamutwala ku Engitu. (Uputukilo 37:28) Yehova kamwene pundu yize te yinalingiwako, nawa kutushi ni kuyambashana ngwetu kevwile yikola ha kumona chize anahungumiona sepa lienyi, kanda kavumbi kenyi Yosefwe. Chipwe chocho, Yehova kakakinjile yipikalo yacho. Kulutwe, muze Yosefwe amuliongelele ngwo kamba kulisumbakenya kutachi ni Pwo lia Potifwa ni kumusa mu kamenga, nihindu Yehova kakayikinjile. Alioze shina Zambi kawuchikile Yosefwe? Ka. Mbimbiliya yinambe ngwo, “Yehova wapwile hamwe nenyi. Cheswacho alingile, Yehova wachiwahishile.”—Uputukilo 39:21-23.

14. Kuchi twakuyuka nyi twehuka ufwatulo?

¹⁴ Chilweza chikwo chili cha Ndawichi. Atu anji kanda achipalika kama mu yipikalo ngwe yize amwene Ndawichi. Chipwe chocho, Ndawichi kakatenukine. Yasoneka ngwenyi: ‘Litwamine utenu; china ufwatulo;  kanda ulifwita, mumu chakutwala wika ku yitanga yipi.’ (Samu 37:8) Chitela chilemu cha ‘kulitwamina’ utenu, hanji kwecha ufwatulo, chili ngwo tunazange kwimbulula Yehova. Iye “kalingile ni yetu nikulita ni milonga yetu” mumu kakutukonekena. (Samu 103:10) Kuli yikuma yikwo yipema yize muyitukwasa kwecha ufwatulo. Chakutalilaho, ufwatulo muuhasa kukunehena misongo yinji ku mwono. Muuhasa kupihisa liayi ni chisela, nawa muuhasa kupwa ni chikenja. Nawa, muze tuli ni ufwatulo, kutuchi kuhasa kunyonga kanawa. Mutuhasa kuhanjika hanji kulinga yuma yize muyilemeka akwetu ku mbunge, nawa yino muyihasa kutunehena yinyengo ha mashimbu anji. Kashika chili chipema kuhwima mbunge. Mbimbiliya yinambe ngwo: “Mbunge yingunu kuyakuhana mwono ku mujimba.” (Yishima 14:30) Mba, yika mutuhasa kulinga muze akwetu matulemeka ku mbunge, nawa kuchi mutuhasa kuhwisa milonga ni kupwa ni sambukila ni mandumbu jetu? Tukaulenu chiyulo cha mana cha mu Mbimbiliya.

15, 16. Yika twatamba kulinga nyi umwe matulemeka ku mbunge?

¹⁵ Tanga A-Efwesu 4:26. Kutushi kushimwoka muze atu waze keshi kuwayila Yehova matulinga yuma yipi. Alioze nyi ndumbwetu Chela cha Yehova hanji usoko wetu matwamba, chipwe kutulinga umwe upi, twakwivwa yikola yinji ku mbunge. Yika muyilingiwako nyi kutwavulamine yuma yacho? Shina mutufunga ufwatulo, chipwe ha miaka yinji? Nyi mutukaula chiyulo cha mana cha mu Mbimbiliya cha kuhwisa milonga ni kawashi? Ni twashimbula chinji kuwana ndumbwetu hanga tuhanjike nenyi, muchikaliwa kuneha sambukila.

¹⁶ Mba kuchi mutwamba, nyi unevu yikola ku mbunge ha yize umwe ndumbu akulingile nawa kuushi kuhasa kuyivulama? Yika mulinga hanga unehe sambukila? Chitangu, lemba kuli Yehova. Mwite hanga akukwase uhanjike kanawa ni ndumbwe. Iwuluka ngwe ndumbwe neye kali umwe wakuli masepa ja Yehova. (Samu 25:14) Zambi kakumuzanga. Yehova kakutwama kanawa ni masepa jenyi, nawa kanashimbwila hanga ni yetu tulinge chochene. (Yishima 15:23; Mateu 7:12; A-Kolosu 4:6) Chamuchiali, nyonga kanawa ha yize muya ni kuhanjika ni ndumbwe. Kanda umulamikiza ha yize yalingiwangako. Kota walimbenjanga wika hanji kuhona kunyingika kanawa yize yalingiwangako. Tayiza ni mbunge yeswe ngwo ni yena kuwalinganga upi. Muhasa kuputuka lusango ha kwamba ngwenyi, “Nalipupwisanga kunyonga ngwami wangutuka, alioze muze wahanjikanga ni yami zau, nevwanga ngwami . . . ” Nyi kunwalivwashanyine ni ndumbwe ha yize nwahanjika, nunga wika ni kwesejeka. Lembelako ndumbwe. Eta kuli Yehova hanga amuwahise ni kukukwasa hanga ulihulikile wika ha yitanga yenyi yipema. Chocho mupwa ni shindakenyo ngwenyi Yehova mevwa kuwaha ha tachi jize unase hanga ulivwashane ni ndumbwe, yoze neye sepa lia Zambi.

17. Kuchi Yehova akutukwasa hanga tululieke usepa wetu ni iye muze hi twalinga shili? Nawa mumu liaka twatamba kutayiza ukwaso wacho?

¹⁷ Amwe keshi kuwayila kanawa Yehova mumu kalingile shili yinene. Kulisuma  mulonga chakuchiza sambukila, chiseke ni kuhwisa tachi. Mwanangana Ndawichi kapinjile ni manyonga api, chocho yamba ngwenyi: “Muze naholele yifwaha yami yazeketele, mumu ha mikuma yami tangwa lieswe. Mwalwa ni ufuku kwoko lie liangulemene.” Ni hamu lieswe Ndawichi kalingile yize Yehova akuzanga hanga tuvumbi twenyi alinge. “Natayile shili yami kuli yena,” iye yasoneka ngwenyi, “mba yena wakonekenene uhenge wa shili yami.” (Samu 32:3-5) Nyi walingile shili yinene, Yehova kali hakamwihi hanga akukonekene. Iye kanazange akukwase hanga ululieke usepa we ni iye. Alioze watamba kutayiza ukwaso uze hanase kupalikila muli makulwana amu chikungulwila. (Yishima 24:16; Tiangu 5:13-15) Kashika nyi walinga shili kanda ushimbula chinji kuliwana ni makulwana! Mumu mwono we wa mutolo unatale ha chino. Alioze nyi muchilisuma mulonga ha shili yize hanakukonekena yo kulu, yika watamba kulinga?

18. Kuchi chilweza cha Paulu muchikwasa waze akwivwa ngwe katelele kuwayila Yehova?

¹⁸ Kwapwile amwe mashimbu waze postolo Paulu ahonene utakamiso mumu lia shili yize alingile kunyima. Yamba ngwenyi: “Ami nguli mukepe wahiana eswe a kuli apostolo, chatelele akanguvuluke ngwo, postolo, mumu yami nahungumionene chikungulwila cha Zambi.” Hachino, Paulu yawezela nawa ngwenyi: “Alioze ku vumbi lia Zambi nguli chize nguli.” (1 A-Korindu 15:9, 10) Yehova kanyingikine ngwenyi, Paulu te chihenge. Chipwe chocho katayijile Paulu chize apwile, nawa yazanga hanga Paulu achinyingike. Nyi walikonyeka ni mbunge yeswe ha yize walingile ni kuyilweza kuli Yehova ni kuli makulwana nyi muchilita, acho Yehova makukonekena pundu. Nyi hiwalinga chocho, fuliela ngwenyi Yehova kakukonekena, nawa tayiza ukonekeno wacho!—Izaia 55:6, 7.

19. Chisoneko chika cha ha mwaka 2018, nawa mumu liaka chinafupiwa?

¹⁹ Amu tunakundama ku songo lia yuma ya mwakono, mutuhasa kushimbwila kupalika mu yipikalo yinji. Alioze twiwulukenu ngwetu, Yehova yoze ‘wakuhana ngolo kuli mukwa kulezumuka, makawezela tachi kuli waze keshi ndundo.’ (Izaia 40:29; Samu 55:22; 68:19) Ha mwaka uno wa 2018, mutupwa ni kwiwuluka umwenemwene uno ulemu hita shimbu mutukunguluka mu Zuwo lia Wanangana ni kutala maliji a chisoneko chetu cha mwaka: “Waze matwaminyina Yehova kumakaahuzulula tachi jo.”—Izaia 40:31.