1. Mumu liaka mashimbu jetu analise ni mashimbu akwo?

TULI ha mashimbu waze alisa chinji ni mashimbu akunyima. Yehova kali ni kukunga mbunga yinene ya atu “a ku mavungu eswe, ni ku minyachi yeswe, ni kuli atu eswe, ni ku malimi eswe,” ngwe chize achambile kulu mu Mbimbiliya. Ayo kali “vungu lia ndundo” lia atu akuwahilila kuhiana tununu nake waze ali “nikumulingila [Zambi] mwalwa ni ufuku.” (Usolwelo 7:9, 15; Izaia 60:22) Kanda kuchipwa kama atu apwahaha waze akuzanga Zambi ni atu ni akwo.

2. Zango lika akusolola atu waze keshi usepa ni Zambi? (Tala chizulie ha uputukilo.)

² Alioze Mbimbiliya yambile kulu ngwo ha matangwa jetu, atu waze keshi usepa ni Zambi, te mapwa ni zango lize kulialitele, chekwamba zango lia kuzo. Postolo Paulu yasoneka ngwenyi ha matangwa akusula, atu kumakapwa ‘akwa kulizanga ene, akwa kuzanga mbongo,’ nawa “kakuzanga kuheha, kazangile Zambi.” (2 Timoteu 3:1-4) Zango lino lia kuzo linalise ni zango lia Zambi. Zango liacho lia kuzo kulishi kuneha  uwahililo kuli mutu, chipwe ngwe mwene manyonga ngwenyi mulimunehena uwahililo. Alioze, linapihisa wika hashi heswe ni kukalisa mwono wa atu.

3. Yika mulilongesa ha mutwe uno? Mumu liaka?

³ Postolo Paulu kanyingikine ngwenyi zango lino lipi mulikoka chinji ni kupinjisa akwa-Kristu. Kashika, yaatoweza ngwenyi katamba “kukondoloka” hanji kwehuka atu waze akusolola zango lia kuzo. (2 Timoteu 3:5) Chipwe chocho, kutuchi kuhasa pundu lume kwehuka atu jacho. Mba kuchi mutuhasa kulifunga ku ndako jipi ja atu waze twatunga no ni kuvwisa Yehova kuwaha, Zambi ya zango? Tutalenu kulisa chili hakachi ka zango lize Zambi anafupu hanga tusolole ni lize anasoneka ha 2 Timoteu 3:2-4. Hanyima mba mutunyonga ha mwono wetu, tumone chize mutupwa ni kusolola zango lize mulitukwasa kupwa ni uwahililo hamwe ni chiseke.

4. Mumu liaka hi chipi ko kulizanga yetwene?

⁴ Paulu kasonekene ngwenyi: ‘Atu kumakapwa akwa kulizanga ene.’ Shina chino chinalumbunuka ngwo kutwatambile kulizanga yetwene? Ka, mumu chalita mutu kulizanga mwene. Yehova che atutangile. Yesu ngwenyi: “Ukazange mwenyembo we ngwe chize wakulizanga yena mwene.” (Marku 12:31) Kwamba pundu, kutushi kuhasa kuzanga akwetu nyi kutwalizangile yetwene. Mbimbiliya yakutulweza nawa ngwo: “Chatamba malunga kuzanga akwo-mapwo chizechene ngwe mijimba yo-ene. Yoze mazanga mukwo-pwo, kanalizange iye mwene, mumu niumwe kechi kupwa ni kole ha musunya wenyi mwene nilimwe tangwa, alioze maulela, maufunga.” (A-Efwesu 5:28, 29) Kashika, twatamba kupwa ni ndambu ya zango hali yetwene.

5. Yika mutuhasa kwamba hali atu waze akulizanga chinji ene?

⁵ Kulizanga yetwene chize tunatange ha 2 Timoteu 3:2 hi chipema ko. Zango liacho lili zango lipi. Nyi mutu malizanga chinji mwene, malinyonga chinji mwene kuhiana chize chamutamba kunyonga. (Tanga A-Roma 12:3.) Malisa chinji mbunge mwene kuhiana akwo. Muze yimwe muyipiha, mahana akwo mulonga ni kulisambisa mwene. Sango jimwe jakuhanjika hakutwala ku Mbimbiliya ngwo, mutu wacho kalifwa ni kashitu avuluka ngwo chisekele yoze wakulivunga hanga evwe chivukuminya, aku masolola mbimbo jenyi kuli akwo. Atu jacho keshi kupwa ni uwahililo wamwenemwene.

6. Yiwape yika yakwiza mumu lia kuzanga Zambi?

⁶ Atu amwe alilongesa chinji ya Mbimbiliya kakutayiza ngwo Paulu chitangu kavulukile zango lino lipi, mumu liakuneha yitanga yipi yize avulukile hanyima. Alioze Zambi kanazange tupwe ni zango lize liakuneha yitanga yipema. Zango liacho lia kwenda hamuwika ni uwahililo, sambukila, kulihumikiza, utu, upeme, kushishika, kushimbika ni kusuula. (A-Ngalashia 5:22, 23) Mukwa-kwimba masamu yasoneka ngwenyi:  “Kawaha atu waze akwete Zambi yo Yehova.” (Samu 144:15) Yehova kali Zambi wa chiseke, kashika ni atu jenyi ndo apwe ni uwahililo. Kulisa ni atu waze alizanga chinji ene ni kunyonga wika ha yize atamba kutambula, tuvumbi twa Yehova kakuwahilila chinji kuhana yuma kuli akwo.—Yilinga 20:35.

7. Yihula yika muyitukwasa tutale kanawa ha zango tukwete hali Zambi?

⁷ Kuchi mutuhasa kunyingika nyi tunalizange chinji yetwene kuhiana Zambi? Uchinyongenu ha utowezo uno wa mana: “Kanda nulinga nichimwe mu spiritu ya kulitachika, hanji ya ulemu wamokomoko, alioze ni mbunge ya kulikehesa, mweswe anyonge ngwenyi, mukwetu kanguhiana. Kanda nutala mweswe wa kuli yenu ku yuma yenyi mwene, alioze mweswe wa kuli yenu akatale ku yuma ya akwo nawa.” (A-Fwilipu 2:3, 4) Haliapwila lihulenu ngwenu: ‘Shina nakukaula chiyulo chino? Kutala ngunesejeka kulinga yize Zambi anazange? Shina nakuwana kama jila yakukwashilamo akwetu mu chikungulwila ni mu mulimo wa kwambujola?’ Hi chashi ko kuhana mashimbu ni tachi jetu. Hanji ndo tukalakale chinji ni kulituna yimwe yuma yize twazanga chinji. Alioze mutuwahilila chinji nyi twanyingika ngwetu Mwenya yuma yeswe kanatuvwila kuwaha!

8. Yika akwa-Kristu amwe akulinga mumu lia kuzanga Zambi?

⁸ Akwa-Kristu amwe kakwecha kulinga milimo yize te muyanehena mbongo jinji, mumu kakuzanga Zambi nawa kanafupu kumulingila chinji. Ndotolo Ericka yakokolola kukalakala mulimo wenyi wa undotolo hanga alinge upionelu. Aye ni mukwo-lunga hanakalakala mu yifuchi yinji. Ndumbu  Ericka ngwenyi: “Twawana yiwape yinji hakuya ni kukwasa waze akuhanjika limi lieka ni kutunga usendo waha.” Ericka ni haliapwila uchili ndotolo, alioze kanazachisa mashimbu ni tachi jenyi ku kulongesa atu hali Yehova ni kukwasa mandumbu jenyi. Mwene ngwenyi, ayi “yakumunehena chiseke chinji ku mwono wenyi.”

9. Mumu liaka mutu wakuzanga chinji mbongo keshi kupwa ni uwahililo?

⁹ Paulu kasonekene ngwenyi atu makapwa ‘akwa kuzanga mbongo.’ Miaka yimwe kunyima, umwe pionelu wa ku Irlanda yahanjika ni umwe lunga hali Zambi. Lunga wacho yatuhwisa mbongo mu mboloso ni kwamba ngwenyi: “Au mwe zambi yami.” Atu anji che akwivwa chipwe tuhu keshi kuchitayiza. Kakuzanga chinji mbongo ni yuma yize akulanda. Alioze Mbimbiliya yakutoweza ngwo: “Yoze unase mbunge ku prata kechi kuyuka ni prata; yoze unase mbunge ku kwoka cha upite kechi kuyuka ni kulumbama.” (Chilumbununyi 5:10) Mutu wakuzanga mbongo keshi kwivwa ngwenyi mbongo jinasu. Kakufupa wika hanga joke ni kukalakala chinji awane mbongo jikwo. Achi chakumunehena “yikola yinji.”—1 Timoteu 6:9, 10.

10. Yika Mbimbiliya yinambe hakutwala ku upite ni uswale?

¹⁰ Kwamba pundu, tulieswe twatamba kupwa ni mbongo. Mumu jakutufunga ku yuma yimwe. (Chilumbununyi 7:12) Shina mutuhasa kuwahilila nyi tuli wika ni yuma yize yafupiwa ku mwono? Ewa. (Tanga Chilumbununyi 5:12.) Agure mwana wa Jake yasoneka ngwenyi: “Kanda ungwaha chipwe uswale chipwe upite.” Chili chashi kunyingika mumu liaka lunga wacho echile hanga ahone kupwa chiswale. Iye ngwenyi kachinyine kumweseka hanga eye, mumu kwiya chakusaula Zambi. Mba mumu liaka echile ahone kupwa pichi? Mwene yasoneka ngwenyi: “Hanji mungukuta mba mungulikala yena ngwami, Yehova iya?” (Yishima 30:8, 9) Ewa, hanji tunanyingika atu waze asa chinji mbunge ku upite kuhiana Zambi.

11. Yika yize Yesu ambile hakutwala ku mbongo?

¹¹ Mutu wakuzanga chinji mbongo keshi kuhasa kuvwisa Zambi kuwaha. Yesu ngwenyi: “Niumwe mahasa kulingila miata aali: mumu hanji mavwila kole umwe, mazanga mukwo; hanji makakaminya kuli umwe, malelesa mukwo. Kunwahashile kulingila Zambi ni kulingila upite hamuwika.” Yamba nawa ngwenyi: “Kanda nutulika upite hano hashi, haze ndulu ni ngengeya kuyakuvungula; haze eji kakulokola mazuwo nikwiya. Alioze litulikilenu upite mwilu, muze chipwe ndulu chipwe ngengeya kuyishi kuvungula, ni eji keshi kulokola mazuwo chipwe keshi kwiya.”—Mateu 6:19, 20, 24.

12. Kuchi kwashiwisa mwono muchihasa kutukwasa kulingila Zambi? Hana chilweza.

¹² Tuvumbi twa Yehova anji kakusa tachi hanga ashiwise mwono wo. Hakulinga chino, kali ni mashimbu akulingila Yehova nawa kali ni uwahililo. Jack, wa ku Estados Unidos, kalanjishile zuwo lienyi linene ni mingoso yenyi hanga alinge upionelu ni mukwo-pwo. Iye yalumbununa ngwenyi: “Chapwile chikalu kuhichika zuwo lietu lipema ni chihela chetu chize chapwile mu mbonge.” Alioze ha miaka yinji te kakuhonga hakufuna ku zuwo mumu lia yipikalo ya ku milimo yenyi. Mba yamba ngwenyi:  “Mukwetu-pwo, pionelu wa shimbu lieswe, te kakuwahilila mashimbu eswe. Kapwile ni kwamba ngwenyi, ‘Mwata wa milimo yami mupema chinji!’ Haliapwila ni yami nguli pionelu, eswe tunalingila Mutu umuwika, Yehova.”

13. Yika muyihasa kutukwasa tulihengwole hakutwala ku chize twakumona mbongo?

¹³ Muze mutunyonga ha chize twakumona mbongo, twatamba kulihula ni umwenemwene ngwetu: ‘Kutala mwono wami unasolola ngwo nakutayiza yize Mbimbiliya yakwamba ha mbongo? Shina kuwana mbongo che chuma chilemu mu mwono wami? Nakusa chinji mbunge ku upite kuhiana usendo wami ni Yehova ni kuli akwetu? Shina nafuliela pundu ngwami Yehova mangwaha yize yinafupiwa kuli yami?’ Nyingikenu ngwenu Zambi kechi kavwisa sonyi waze amufuliela!—Mateu 6:33.

14. Mbunge yika yipema twatamba kusolola hakutwala ku kuheha?

¹⁴ Mbimbiliya yinambe nawa ngwo ha matangwa akusula atu makapwa ‘akwa kuzanga kuheha.’ Hitwamona ngwo hi chipi ko kupwa ni nyonga lipema ha chize twakulimona yetwene ni chize twakumona mbongo, kashika, hi chipi ko nawa kupwa ni chiseke ku mwono mujila yipema. Atu amwe kakunyonga ngwo katambile kulinga yimwe yize muyanehena chiseke, alioze Yehova kazangile chocho hali yetu. Mbimbiliya yakukolweza tuvumbi twa Zambi ashishika ngwo: “Yako ukalie mbolo ye ni uwahililo, nwako vinyu ye ni mbunge ya chiseke.”—Chilumbununyi 9:7.

15. Yika chinalumbunuka “kuzanga kuheha”?

¹⁵ Mukanda wamuchiali wa Timoteu 3:4 unahanjika hali waze akuzanga kuheha chakuhona kuzanga Zambi ku mwono wo. Versu yino kuyambile ngwo atu makazanga chiseke kuhiana Zambi, ka. Chino muchilumbunuka ngwe kakuzanga Zambi hakehe. Alioze versu yinambe ngwo, “kazangile” Zambi. Mutu umwe walilongesa chinji yasoneka ngwenyi versu yino “kuyishi ni kulumbununa ngwo atu jacho kakwete limwe zango hali Zambi. Alioze yinalumbununa ngwo keshi kuzanga lume Zambi.” Uno uli utowezo ulemu kuli atu waze akuzanga chinji kuheha. Mbimbiliya yakulumbununa atu jacho ngwo, mwono wo wakuya “mu jila yo” ya kuheha.—Luka 8:14.

16, 17. Chilweza chika asele Yesu hakutwala ku kuheha?

¹⁶ Yesu kasolwele mbunge yipema yize twatamba kupwa nayo hakutwala ku kuheha. Aye yaya ku “umbachiso” ni ku “chiteleka chinene.” (Yoano 2:1-10; Luka 5:29) Ku umbachiso ayile, vinyu yiyikeha, mba yalinga chikomokeso cha kwalumuna meya apwe vinyu. Shimbu likwo, muze te atu anakumika Yesu ha kulia ni kunwa, aye yalumbununa ngwenyi atu jacho te keshi mbunge yipema.—Luka 7:33-36.

 ¹⁷ Nihindu, Yesu te keshi kumona kuheha ngwe chili chilemu chinji ku mwono wenyi. Aye yasa Yehova kulutwe ni kusa tachi hanga akwase atu. Yaliecha mwene afwe hanga alamwine atu. Yesu yalweza waze azangile kumukaula ngwenyi: “Kunwawaha muze manuchoka, ni muze manuhungumiona, ni muze manulamikiza ungulungulu, mumu lia yami. Wahililenu, likwizenu, mumu kwononona chenu chinene mu malilu: mumu chocho ahungumionene aprofeta waze aliangile.”—Mateu 5:11, 12.

18. Yihula yika muyitukwasa tuhengwole zango lietu hakutwala ku kuheha?

¹⁸ Yika muyihasa kutukwasa hanga tutale kanawa zango lize tukwete hakutwala ku kuheha? Twatamba kulihula ngwetu: ‘Shina kuheha chili chilemu chinji ku mwono wami kuhiana kukunguluka ni mulimo wa kwambujola? Kutala munguhasa kulituna yuma yize nakuzanga chinji hanga ngulingile Zambi? Hakusakula kuheha, shina nakunyonga ha chize Yehova akumona kuheha chacho nyi?’ Ewa, twatamba kwehuka kulinga yize twanyingika ngwetu yili yipi ni yize nawa mutumona ngwetu muyivwisa Zambi kupiha, mumu twamuzanga nawa tunafupu kumuvwisa kuwaha.—Tanga Mateu 22:37, 38.

19. Aya waze kechi kuhasa kupwa ni uwahililo wamwenemwene?

¹⁹ Hashi ha Satana haneha lamba kuli atu anji ha miaka 6,000. Haliapwila, ha matangwa wano akusula, hashi hanazala too ni atu waze akulizanga ene, akuzanga chinji mbongo ni kuheha. Kakunyonga wika ha yize akuzanga ni kusa chinji mbunge ha kulinga upale wo. Alioze atu amutapu au keshi kupwa ni uwahililo wamwenemwene ku mwono wo! Mbimbiliya yinambe ngwo: “Kawaha yoze uli ni Zambi ya Yakomba kumukwasa; kutalatala chenyi chili muli Yehova Zambi yenyi.”—Samu 146:5.

20. Kuchi kuzanga Zambi chakukunehena uwahililo?

²⁰ Tuvumbi twa Yehova kakumuzanga chinji, kashika hita mwaka atu anji kakumunyingika ni kumuzanga. Chino chinasolola ngwo Wanangana wa Zambi unayulu, mba kwasala hakehe hanga unehe yiwape chinji yipema! Nyi mutulinga yize Yehova akuzanga, mutumuvwisa kuwaha, mba ni yetu nawa mutupwa ni uwahililo wamwenemwene. Eswe waze akuzanga Yehova kumakanunga ni kuwahilila ku miaka yeswe. Mutwe muusulaho, mutuhengwola yitanga yimwe yize yakwiza mumu lia zango lipi. Mba mutumona chize yitanga yacho yalisa ni yitanga yipema ya tuvumbi twa Yehova.