Iye Kachi Kanungine ni Utayizo wa Zambi
TWAKULINGILA Yehova nawa twakuzanga kupwa ni utayizo hamwe ni yiwape yenyi. Alioze kuchi mutuhasa kupwa ni utayizo wa Zambi? Ha mashimbu waze asonekene Mbimbiliya, atu amwe kalingile shili yinene, chipwe chocho yanunga ni utayizo hanji vumbi lia Zambi. Akwo kapwile ni yitanga yipema alioze kusongo lia mwono wo yatokesa utayizo wa Zambi. Hachino, mutuhasa kulihula ngwetu, “Yika Yehova akufupa kuli hita umwe wa kuli yetu?” Chilweza cha Rehoboame, umwe mwanangana wa mu Yunda, muchihasa kutukwasa tuwane kumbululo.
UPUTUKILO UPI
Solomone, tato ya Rehoboame, kapwile mwanangana mu Izalele ha miaka 40. (1 Mianangana 11:42) Muze tato te hafwa, Rehoboame yakatuka ku Yerusaleme ni kuya ku Shekeme hanga apwe mwanangana. (2 Sango ja Mianangana 10:1) Shina kapwile ni kwivwa woma wa kupwa mwanangana yoze te masulaho? Solomone kamunyingikine mumu lia mana jenyi anji. Hachino, Rehoboame te kanafupiwa kusolola nyi te kali lume ni mana akuhwisa milonga yikalu.
A-Izalele waze te akumwesa lamba yatuma hako hanga alweze Rehoboame yize ayo azangile hanga iye alinge ngwo: “Tatenu kanga yilemu atulemene. Kashika lelwisenu kama ungamba ukalu wa tatenu ni kanga yenyi yilemu yize atulemene, mba mutunuvumbika.”—2 Sango ja Mianangana 10:3, 4.
Rehoboame kapwile ni chiyulo chikalu chakukwata. Nyi te matayiza yize atu azangile, kachi iye, asoko jenyi ni waze apwile ku zuwo lia wanangana te mahasa kutokesa yuma yipema yize apwile nayo. Alioze, nyi te malituna kulinga yize atu amwichile, ayo te mahasa kulimika nenyi. Mba chiyulo chika iye akwachile? Chitangu yahanjika ni makulwana waze akwashile tato. Ayo yamulweza hanga apanjike yize atu anambe. Alioze Rehoboame yahanjika ni akweze-ni-akwo chocho yakwata chiyulo cha kumwesa atu lamba. Yaalweza ngwenyi: “Tata walemesene kanga yenu alioze ami munguwezelaho. Tata wanulambile ni shikote, alioze ami mungunulamba ni tuvwanda.”—2 Sango ja Mianangana 10:6-14.
Wamona longeso lize mutuhasa kulilongesaho? Musono, tuli ni makulwana anji waze akulingila Yehova ha miaka yinji, nawa waze mahasa kutukwasa hanga tukwate yiyulo yipema. Nyi twaapanjika mutupwa ni mana.—Yombi 12:12.
“O YAPANJIKA LIJI LIA YEHOVA”
Rehoboame yakunga maswalale jenyi hanga ase jita ni atu waze alimikine nenyi. Alioze, Yehova yatuma profeta Shemaia hanga aalweze ngwenyi: “Kanda nuyako. Kanda nwasa jita ni akwenu A-Izalele. Mutu mweswe ahiluke ku zuwo lienyi mumu chuma chino chinakatuka kuli yami. O yapanjika liji lia Yehova, yahiluka kwo nikulita ni liji lia Yehova.”1 Mianangana 12:21-24. *—Tala maliji mushi lia lifwo.
—Shina chapwile chashi Rehoboame kupanjika Yehova? Yika te atu manyonga hali mwanangana wo mwaha? Iye kaalwezele ngwenyi te maalamba “ni tuvwanda,” alioze haliapwila iye kechi kulinga nichimwe hali atu jacho waze alimikine nenyi! (Tesa nawa ni 2 Sango ja Mianangana 13:7) Chipwe chocho, yeswayo atu anyongene hali iye, mwanangana ni maswalale jenyi “yapanjika liji lia Yehova, yahiluka kwo nikulita ni liji lia Yehova.”
Longeso lika mutwandaho? Chikwete ulemu mashimbu eswe kwononokena Zambi, chipwe ngwe atu matuseha mumu lia kuchilinga. Zambi kakutuwahisa muze mutumwononokena.—Shimbi Yamuchiali 28:2.
Shina Rehoboame kamuwahishile hamukunda wa kwononoka chenyi? Rehoboame kanungine ni kuyula vungu lia Yunda ni Mbenjamine, nawa yakwata chiyulo cha kutunga yihunda yaha mu njiza jacho. Yihunda yimwe iye ‘ya yikolesa chikolo.’ (2 Sango ja Mianangana 11:5-12) Chahiana ulemu, ha shimbu limwe yononokena shimbi ja Yehova. Amu atu mu wanangana wa minyachi 10 aputukile kuwayila mahamba, anji akuli ayo yafuna ku Yerusaleme hanga akwase Rehoboame ni uwayilo wamwenemwene. (2 Sango ja Mianangana 11:16, 17) Alioze wanangana wa Rehoboame wakolele chinji mumu kwononokene kuli Yehova.
SHILI NI KULIKONYEKA YA ROHOBOAME
Muze wanangana wa Rehoboame wakolele, iye yalinga chimwe chuma chipi. Yalitwamina kwononokena shimbi ya Yehova chocho yaputuka kuwayila tuzambi a mahuza! Mba mumu liaka alingile chocho? Shina naye yoze te Ka-Amone mwe wamushinjilile kukwata chiyulo chacho? (1 Mianangana 14:21) Yetu kutwachinyingikine, alioze tunanyingika ngwetu, vungu lieswe liakawile chilweza chenyi chipi. Kashika Yehova echele Mwanangana Shishake wa mu Engitu hanga atambule yihunda yinji mu wanangana wa Yunda. Chino chalingiwile chipwe ngwe Rehoboame kakolesele chinji yihunda yacho!—1 Mianangana 14:22-24; 2 Sango ja Mianangana 12:1-4.
Yuma yapihile chinji muze Shishake ni maswalale jenyi alukukilile Yerusaleme, ha mashimbu akuyula cha Rehoboame. Ha chikuma chino, profeta Shemaia yalweza Rehoboame ni alemu jenyi lusango yoze wakatukile kuli Zambi ngwo: “Enu hinwangwehuka, kashika ni yami nawa hinanwehuka ni kunukunjika mu kwoko lia Shishake.” Yika Rehoboame alingile ha fumbo liacho? Iye katayijile fumbo ni mbunge yeswe! Mbimbiliya yinambe ngwo: “Alemu ja Izalele hamuwika ni mwanangana yalikehesa ni kwamba ngwo, Yehova mukwa ululi.” Hachino, Yehova yapulula Rehoboame, chocho Yerusaleme yahona kuyinongesa.—2 Sango ja Mianangana 12:5-7, 12.
Kulutwe lia yino, Rehoboame yanunga ni kuyula mu wanangana wa Yunda. Muze te kanda achifwa, iye yahana yawana yinji kuli ana jenyi a malunga. Iye kota kachilingile hanga apwe ni shindakenyo ngwo, ayo kechi kulimika ni ndumbo Abija, yoze te masulaho ngwe mwanangana. (2 Sango ja Mianangana 11:21-23) Ha kulinga chino, Rehoboame kasolwele mana anji kuhiana muze apwile mukweze.
REHOBOAME KAPWILE MUTU MUPEMA NYI MUTU MUPI?
Chipwe ngwe Rehoboame kalingile yimwe yuma yipema, nihindu Mbimbiliya yinambe hakutwala ku kuyula chenyi ngwo: “Rehoboame walingile chipi.” Mumu liaka? Mumu kakasele “mbunge yenyi kufupa Yehova.” Hachino, Yehova yecha kuwahilila nenyi.—2 Sango ja Mianangana 12:14.
Rehoboame kakapwile ni usepa upema ni Yehova, alioze Ndawichi kapwile nawo
Yika twalilongesa ku mwono wa Rehoboame? Twalilongesa ngwetu, iye kwononokene kuli Zambi ha amwe mashimbu. Nawa kalingile yimwe yuma yipema hali tuvumbi twa Yehova. Alioze iye kakapwile ni usepa upema ni Yehova, nawa kakazangile kumuvwisa kuwaha ku mbunge. Kashika echele kulinga yuma yipema ni kuputuka kuwayila tuzambi a mahuza. Muhasa kulihula ngwenyi: ‘Muze Rehoboame atayijile fumbo lia Yehova, shina kachilingile mumu lia kulikonyeka ha uhenge wenyi ni kuzanga kuvwisa Zambi kuwaha? Nyi kachilingile hamukunda wa yize akwo te akumwita hanga alinge?’ (2 Sango ja Mianangana 11:3, 4; 12:6) Hakupalika cha mashimbu iye yalinga nawa yuma yipi. Iye te kalisa chinji ni kako Mwanangana Ndawichi! Tunanyingika pundu ngwetu, Ndawichi kavulumwine. Alioze yalikonyeka ha uhenge wenyi. Nawa iye te kakuzanga chinji Yehova hamwe ni uwayilo wamwenemwene ku mwono wenyi weswe.—1 Mianangana 14:8; Samu 51:1, 17; 63:1.
Mutuhasa kulilongesa yuma yinji ha lusango yono wa mu Mbimbiliya. Chapwa chipema atu kukwasa asoko jo ni kulingila akwo yuma yipeme. Alioze, mba tupwe ni utayizo wa Yehova, twatamba kumuwayila mu mutapu uze iye akuzanga ni kupwa ni usepa upema ni iye.
Mba tuchilinge twatamba kuzanga chinji Yehova. Ngwe chize twakusa kunyi ha kahia hanga kahone kujima, twakufunga zango lietu kuli Zambi ha kulilongesa Liji lienyi hita tangwa, kupukuna ha yize twakulilongesa ni kununga ni kulemba kuli iye. (Samu 1:2; A-Roma 12:12) Hachino, zango liacho mulitulingisa hanga tuvwise Yehova kuwaha ha yuma yeswayo mutulinga. Mulitulingisa nawa hanga tulikonyeke muze mutuvulumuna ni kwita ukonekeno kuli Yehova. Nyi twachilinga, kutuchi kupwa ngwe Rehoboame, alioze mutununga ni kushishika mu uwayilo wamwenemwene.—Yundase 20, 21.
^ kax. 9 Amu Solomone ahonene kushishika kuli Zambi, chocho iye yamwamba ngwenyi wanangana te mulihandununa mu yihanda yaali.—1 Mianangana 11:31.