1. Yika yakutuvwisa chinji kuwaha?

TWAKWIVWA chinji kuwaha hakunyingika chize tuvumbi twa Zambi anatemuna pangu lio! Ha mwaka wapalika, Yela ja Yehova kanakasongwela malongeso a Mbimbiliya kuhiana 10,000,000. Nawa atu anji waze akuzanga umwenemwene kayile ha Chiwanyino cha Kwiwuluka Kufwa cha Yesu ni kulilongesa hakutwala ku chitapo cha zango lia Yehova.—1 Yoano 4:9.

2, 3. (a) Yika yize kuyishi kutukinda kutemuka “ngwe temo”? (b) Yika mutushimutwina ha mutwe uno?

² Hashi heswe, Yela ja Yehova kakuhanjika malimi alisa. Alioze chino kuchishi kutukinda kuhalisa Yehova mu usoko umuwika uze walinunga. (Usolwelo 7:9) Kashika chipwe ngwe twakuhanjika limi lieswalio hanji twatwama kweswako, nihindu mutuhasa kutemuka “ngwe temo.”—A-Fwilipu 2:15.

³ Mulimo wetu wa kwambujola, kulinunga chetu cha Ukristu ni nyonga liakukwasa akwetu kawashi-washi, yeswe yakuhalisa Yehova. Kuchi mutuhasa kutemuna pangu lietu mu yihela yino yitatu?—Tanga Mateu 5:14-16.

4, 5. (a) Kuchizako mulimo wa kwambujola, kuchi mutuhasa nawa kutemuna pangu lietu? (b) Yuma yika yipema mutuzuka ha kusolola umbovu? (Tala chizulie ha uputukilo.)

⁴ Kwambujola ni kutayisa tumbaji yapwa jila yilemu ya kutemushilamo pangu lietu. (Mateu 28:19, 20) Ha mwaka 1925, chikuma “Pangu mu Milima” chambile ngwo ku matangwa akusula kukushi niumwe yoze makahasa kushishika kuli Mwene nyi “kasele tachi hanga atemune pangu lienyi.” Yichinunga ngwo: “Mutu wacho katamba kuchilinga ha kwambujola sango lipema kuli atu a hashi heswe, ni kulitakamisa mwene ku pangu liacho.” (Kaposhi wa Kutalila 1 wa Junho 1925) Kuchizako mulimo wetu wa kwambujola, yitanga yetu nawa yakuhalisa Yehova. Atu anji kakutumona muze tunambujola. Muze mutwaatala ni chiseke ni kwaameneka ni vumbi lieswe, chino cha kwaakwasa apwe ni nyonga lipema hali yetu ni hali Zambi yoze twakuwayila.

⁵ Yesu kalwezele tumbaji twenyi ngwenyi: ‘Ha kunjila mu zuwo, nukaameneke.’ (Mateu 10:12) Ku chihela kuze Yesu apwile ni kwambulwila sango lipema, atu te kakwete chako cha kuzumbula atu waze te kanyingikine. Musono ku yihela yinji, chako chacho kuchishiko. Atu anji kakwivwa uli nyi mamona mutu yoze kanyingikine mangongwela ku zuwo lio. Alioze nyi mutusolola uwahililo hamwe ni umbovu, ayo mahasa kulivwa kanawa hanga atuzumbule. Mandumbu waze akwambujola ha mbunga ni temba hanamono ngwo maliji wano kali amwenemwene. Nyi unalingi mulimo wacho, mba atu alivwe kanawa ni kwiza ku temba hanga ande mikanda watamba kusehejela ni kwaameneka ni vumbi lieswe. Chino muchihasa kutukwasa tuputuke kuhanjika ni atu jacho hakutwala ku Wanangana!

6. Yika yakukwasa alunga ni pwo waze hashinakajiwa anunge ni kwambujola?

⁶ Alunga ni pwo waze hapwa tushinakaji mu Inglaterra mumu lia misongo, ayo keshi kuhasa nawa kuya ni kwambujola ku zuwo ni zuwo. Kashika akusa meza a mikanda haze lia zuwo lio. Amu atwama hakamwihi ni shikola, ayo kakusa mikanda helu lia meza hanga yisoloke kanawa kuli yisemi waze akwiya ni kwanda ana jo ku shikola. Yisemi amwe kakwanda mikanda yacho, kuchingako ni mikanda, Yihula Yize Akweze Akuhula, Volume 1 ni 2. (Os Jovens Perguntam— Respostas Práticas, Volume 1 e 2.) Umwe pangi pionelu neye kakwambujola hamwe no. Yisemi jacho kakumona ngwo pangi wacho kakwete zango nawa ngwo alunga ni pwo wano kakuzanga chinji kukwasa akwo. Chino yichikwasa umwe chisemi kuputuka kulilongesa Mbimbiliya.

7. Kuchi muhasa kukwasa yilambala waze ali mu mbonge yenu?

⁷ Musono, atu anji kanachina mu yifuchi yo nawa kanayi ni kutwama mu yifuchi yeka ngwe yilambala. Yika muhasa kulinga hanga ukwase yilambala waze ali mu mbonge yenu alilongese hakutwala kuli Yehova? Chitangu, muchilita kulilongesa chize akumeneka mu limi lio. Kusulaho, muhasa kuzachisa aplicativo JW Language, hanga unyingike maliji waze  malingisa atu amane ni kuputuka kuhanjika ne. Mba, himwaasolwela yinema ni mikanda yize yili mu limi lio ha jw.org.—Shimbi Yamuchiali 10:19.

8, 9. (a) Kuchi kukunguluka chetu cha hakachi ka poso chakutukwasa? (b) Kuchi yisemi mahasa kukwasa ana jo alulieke makumbululo waze akuhana ha kukunguluka?

⁸ Yehova kakutwaha pundu yize tunafupiwa hanga twambujole kanawa sango lipema. Chakutalilaho, yize twakulilongesa ha Kukunguluka Mwono ni Mulimo Wetu yakutukwasa chinji hanga tuhase kufuna ni kumeneka atu waze twahanjikile no ni kuputuka malongeso a Mbimbiliya.

⁹ Muze atu akwo akwiza ku kukunguluka chetu, kanji-kanji ayo kakukomoka chinji hakumona twanuke mahana makumbululo ha kukunguluka. Kashika muhasa kulongesa ana je hanga apwe ni kuhana kumbululo ha kuzachisa maliji jo. Atu amwe hananyingika umwenemwene mumu lia kwivwa twanuke malumbununa ufulielo wo mu mutapu washi kukatuka ku mbunge yo.—1 A-Korindu 14:25.

10. Yika muyihasa kukwasa asoko hanga alinunge?

¹⁰ Muze twakusa tachi hanga tufumbe asoko jetu hakukalakala no hamuwika ni sambukila, acho twakuhalisa Yehova. Chakutalilaho, nyi uli chisemi sako tachi hanga nupwe ni kulinga Uwayilo wa mu Usoko hita poso. Asoko anji kakuzachisa TV JW Broadcasting, mba mashimutwina yize mahasa kulilongesa ku mwono wo. Iwuluka ngwe usongwelo uze muhana kuli kanuke muuhasa kulisa ni uze muhana kuli mukweze. Chipwe chocho, sako tachi hanga ukwase hita mutu mu usoko we ayuke ha uwayilo wenu wa mu usoko.—Samu 148:12, 13.

11-13. Kuchi mutuhasa kukwasa chinji chikungulwila chetu hanga chilinunge?

¹¹ Chipwe ngwe uli mukweze, nihindu muhasa kukwasa hita ndumbu mu chikungulwila yoze unafupiwa ukwaso. Jila yimwe yakuchilingila yili kulikata ni mandumbu waze hapwa tushinakaji. Ahule yize yakwaakwasa mba anunge ni kulingila Yehova miaka yinji. Ayo mahasa kukulongesa yuma yilemu. Hachino yenweswe munuwana utakamiso! Nawa yetweswe, chipwe ngwe, tuli akweze hanji tushinakaji, mutuhasa kutambula kanawa ngeji waze akwiza ha kukunguluka chetu ku Zuwo lia Wanangana. Muhasa kwaameneka, kwaevwisa kuwaha, kwaakwasa awane chihela haze matwama ni kwaanyingikisa kuli mandumbu akwo. Akwasenu hanga alivwe ngwe kali ku zuwo lio.

¹² Nyi makusakula hanga usongwele kukunguluka chakuya mu munda, muhasa kukwasa tushinakaji hanga anunge ni kutemuna pangu lio. Sako shindakenyo hanga unyingike nyi ayo kali ni njiza yipema muze makalakalila. Ase hanga akalakale hamwe ni akweze. Tushinakaji ni mandumbu waze akwete misongo kanji-kanji kakuhona uwahililo, mumu keshi kwambujola nawa ngwe chize apwile ni kulinga. Alioze ayo malivwa kanawa nyi manyingika ngwo twakulipikala hali ayo nawa tunanyingika yize akupalika ku mwono. Chipwe ngwe kali tushinakaji hanji hashimbula chinji mu umwenemwene, nihindu utu wetu muuhasa kwaakolweza hanga anunge ni kwambujola ni mbunge yeswe.—Ulevi 19:32.

¹³ A-Izalele te kakuwahilila ha kuwayila Yehova hamuwika. Mukwa-kwimba masamu yasoneka ngwenyi: “Talenu cho kupema, cho kuwaha, muze mandumbu matwama hamuwika ni mbunge yimuwika!” (Tanga Samu 133:1, 2.) Iye katesele kulinunga ni maji, waze akululieka chikowa nawa akwete vumba lipema. Chizechene nawa, mutuhasa kululieka hanji kuhuzulula mandumbu jetu hakupwa yimbovu ni kwaevwisa kuwaha. Chino chakukwasa chinji mandumbu mu chikungulwila hanga alinunge. Kutala muhasa kusa shimbu hanga unyingike kanawa mandumbu je mu chikungulwila?—2 A-Korindu 6:11-13.

14. Kuchi muhasa kutemuna pangu lie ha mukala haze watwama?

¹⁴ Mutuhasa kutemuna pangu lietu ku chihela kweswako tuli. Yitanga yetu ya utu muyihasa kukwasa enyembo jetu hanga alilongese hakutwala kuli Yehova. Lihule ngwe: ‘Yika enyembo jami akunyonga hali yami? Shina zuwo liami nakulikomba ni kulilulieka kanawa? Kutala zuwo liami lia kupemesa ha mukala haze natwama? Shina enyembo jami kakungusela mbunge?’ Achihula Yela akwo chize yitanga ya utu ni yilweza yo yipema yakukwata hali asoko jo, enyembo, akwa-milimo-ni-akwo ni alongi-ni-akwo.—A-Efwesu 5:9.

15. Mumu liaka twatamba kununga ni kulawola?

¹⁵ Nyi tunazange kununga ni kutemuna pa ngu lietu, twatamba kunyingika ha mashimbu waze tuli. Ha yisuho yinji, Yesu kalwezele tumbaji twenyi ngwenyi: ‘Nungenu ni kulawola.’ (Mateu 24:42; 25:13; 26:41) Nyi twanyonga ngwetu “luyinda munene” kanashimbula chinji, mutuhasa kuvulama mulimo uze tukwete wa kukwasa akwetu hanga anyingike Yehova. (Mateu 24:21) Hachino, shimbu pangu lietu litemuke chinji, hakehe-hakehe mulihasa kuhwa hanji kukekema.

16, 17. Yika mutuhasa kulinga mba tununge ni kulinga yuma ni matambu?

¹⁶ Musono, twatamba kununga ni kulawola kuhiana ku mashimbu akunyima. Mumu hano hashi yuma yinayi ni kupiha chinji. Chipwe chocho tunanyingika ngwetu songo mulikeza ha shimbu lize Yehova hanatese. (Mateu 24:42-44) Hachino, twatamba kulihumikiza ni kulihulikila ku mwono wetu wa kulutwe lia matangwa. Kashika tanga Mbimbiliya hita tangwa, nawa kanda ulitwamina kulemba kuli Yehova nilimwe tangwa. (1 Petulu 4:7) Lilongese ku yilweza ya mandumbu waze akuwayila Yehova ha miaka yinji. Chakutalilaho, muhasa kutanga sango ja ku mwono, jakwamba ngwo “Miaka Makumi Shimbiali Yakununga ni Kukwata Hina lia Ka-Yunda,” ha Kaposhi wa Kutalila wa 15 ya Abril 2012, mafwo 18-21.

¹⁷ Lihulikile chinji mu mulimo wa Yehova. Lingila akwenu yuma yipema, nawa palikisa mashimbu hamwe ni mandumbu je amu ufulielo. Nyi walinga chocho muwahilila, nawa muchisoloka ngwe mashimbu kanapalika kafuji-fuji. (A-Efwesu 5:16) Tuvumbi twa Yehova hanalingi yuma yinji hakupalika cha miaka kulakaji. Alioze musono, tuli ni milimo yinji kuhiana ku mashimbu akunyima. Mulimo wa Yehova unoke chinji kuhiana. Kashika pangu lietu linatemuka kweswe!

18, 19. Kuchi makulwana amu chikungulwila akutukwasa hanga tulingile Yehova ni mbunge yeswe? Hana chilweza.

¹⁸ Chipwe ngwe twakulinga uhenge unji, nihindu Yehova kakututayiza hanga tumuwayile. Mba atukwase, iye hanatwehe “yawana kuli atu,” chekwamba makulwana amu chikungulwila. (Tanga A-Efwesu 4:8, 11, 12.) Kashika muze makumeneka kuli makulwana amu chikungulwila, watamba kuwahilila ha mashimbu waze uli no ni kulilongesa ha mana ni yiyulo yo.

¹⁹ Chakutalilaho, alunga ni pwo mu Inglaterra kapwile ni kapinda mu ulo wo, chocho yeta ukwaso kuli makulwana aali amu chikungulwila. Pwo yamba ngwenyi, te kakumona mukwo-lunga ngwe keshi kuzanga kupwa ni yiteli mu mulimo wa Yehova. Lunga ngwenyi te kakulivwa ngwe keshi kulongesa kanawa, ni kutayiza ngwenyi te keshi kulinga chinji uwayilo wa mu usoko. Makulwana yaakwasa hanga anyonge ha chilweza cha Yesu. Ayo yakolweza lunga hanga embulule mutapu uze te Yesu akutwama ni tumbaji twenyi. Yakolweza nawa pwo hanga apwe ni kulihumikiza kuli mukwo-lunga. Makulwana yahana nawa yimwe yiyulo ya chize ayo mahasa kulinga uwayilo wa mu usoko hamwe ni ana jo. (A-Efwesu 5:21-29) Lunga yasa tachi hanga apwe mwata mupema mu usoko. Makulwana yamukolweza hanga achine kuhonga ni kununga kujikijila ku spiritu ya Yehova. Zango ni yitanga ya utu yize makulwana wano asolwele yakwashile chinji asoko jacho!

20. Yika mukazuka nyi wanunga ni kutemuna pangu lie?

²⁰ “Kawaha mweswawo wakuvwila woma Yehova nikwenda mu majila jenyi.” (Samu 128:1) Mukawahilila chinji nyi mununga ni kutemuna pangu lie. Kashika kwasa akwenu anyingike Zambi, sako tachi ukwase asoko je ni mandumbu mu chikungulwila hanga alinunge, nawa nunga ni kulawola. Nyi wachilinga, akwenu mamona chilweza che chipema nawa mazanga kuhalisa Tata yetu, Yehova.—Mateu 5:16.