1. Mumu liaka chili chipema kulinga chihanda mu ululikiso wa Yehova?

 CHILI chipema kulinga chihanda mu ululikiso wa Yehova ha mashimbu wano akalu a matangwa a kusula. Muze yuma hano hashi yinayi ni kupihia chinji, Yehova kanatwehe usoko wa ku ufulielo walinunga muze muli mandumbu a malunga ni a mapwo. (Samu 133:1) Yehova nawa kakutukwasa kupwa ni usoko ukolo uze wawahilila. (Efwe. 5:33–6:1) Iye kakutwaha mana waze tunafupiwa hanga tuhase kukumba kusakalala ni kupwa ni uwahililo.

2. Yika twatamba kulinga, mba mumu liaka?

² Twatamba kusa tachi mba tununge ni kulingila Yehova ni ushishiko. Mumu liaka? Mumu ha mashimbu amwe, yize akwetu akwamba hanji akulinga muyihasa kutulemeka ku mbunge. Chikwo nawa, mutuhasa kuhonga mumu lia uhenge uze twakulinga, chipi-chipi nyi uhenge wacho twakuufunyina ha yisuho yinji. Mutuhengwola yikuma yitatu tumone chize twatamba kunyongonona, (1) muze umwe ndumbu matwamba yuma yipi, (2) muze yoze twalimbata nenyi malinga yuma yize muyitulemeka ku mbunge, ni (3) muze mutuhonga mumu lia uhenge uze twakulinga. Yikuma yino ye mutushimutwina ha mutwe uno. Mutushimutwina nawa yize mutulilongesa hali atu atatu ashishika waze anatongola mu Mbimbiliya.

NYONGONONA MUZE UMWE NDUMBU MAKWAMBA YUMA YIPI

3. Kapinda muka yetu eswe twatamba kushimbwila?

³ Kapinda. Mandumbu jetu amwe mahasa kupwa ni yitanga yimwe yize yetu kutushi kuzanga. Akwo, hanji hanatulingi chuma chize chatulemekene ku mbunge, hanji lume kutulinga yuma chakuhona kusolola zango. Makulwana a mu chikungulwila no mahasa kuhengesa. Yuma yino twatongola, yakutwala amwe kunyonga  ngwo ululikiso uno hi wa Yehova ko. Shimbu anunge ni kulingila Yehova hamuwika ni mandumbu jo, ayo kakwecha kuhanjika ni mandumbu waze aalemeka ku mbunge ni kwecha lume kukunguluka. (Zefa. 3:9) Shina kulinga chino chili kusolola mana? Tutalenu yize mutuhasa kulilongesa kuli umwe mutu yoze anatongola mu Mbimbiliya wapalikile mu yuma ngwe yino.

4. Kapinda muka apalikile postolo Paulu?

⁴ Chilweza cha mu Mbimbiliya. Postolo Paulu kanyingikine ngwenyi, mandumbu jenyi kali yihenge. Ngwe chilweza, mandumbu amwe mu chikungulwila cha Yerusaleme, te keshi kutayiza ngwo iye kali kambaji. (Yili. 9:26) Ha kupalika cha amwe mashimbu, mandumbu amwe kahanjikile yuma yipi hali Paulu hanga apihise lufuma wenyi. (2 Kori. 10:10) Tangwa limwe, Paulu yamona umwe mukulwana wa mu chikungulwila kanakwate chiyulo chipi chize te muchihukanyisa mandumbu akwo. (Ngala. 2:11, 12) Chikwo nawa, Marku, umwe wa kuli masepa a Paulu, yamuvwisa chinyengo. (Yili. 15:37, 38) Paulu kachi kechele yuma yino hanga yimuhandunune ni mandumbu waze amulemekene ku mbunge, alioze kakachilingile. Iye yanunga ni kumona mandumbu jenyi ni nyonga lipema ni kulihana chinji mu mulimo wa Yehova. Yika yakwashile Paulu mba anyongonone ha chikuma chino?

5. Yika yakwashile Paulu mba ahone kulihandununa ni mandumbu jenyi? (A-Kolosu 3:13, 14) (Tala nawa chizulie.)

⁵ Paulu te kakuzanga chinji mandumbu jenyi eswe. Zango lize apwile nalio hali ayo, liamukwashile ahone kulihulikila ha uhenge wo ha kulihulikila ha yitanga yo yipema. Zango liakwashile nawa Paulu kukaula yuma yize mwene asonekene ha A-Kolosu 3:13, 14. (Tanga.) Tala chize Paulu achilingile muze akonekenene sepa lienyi Marku. Chipwe ngwe Marku kahichikile Paulu mu wenyi utangu wa mishionaliu, nihindu Paulu kakamufungilile toto. Ha kupalika cha amwe mashimbu, muze Paulu asonekenene A-Kolosu mukanda hanga aatakamise, iye yachichimieka Marku ha kupwa “chishina chinene cha utakamiso.” (Kolo. 4:10, 11) Mba muze apwile mu zuwo lia ususu ku Roma, Paulu yeta Marku hanga aye ni kumukwasa. (2 Timo. 4:11) Chochene, Paulu kakonekenene mandumbu jenyi ni kununga ni kupwa no hamuwika. Yika mutuhasa kulilongesa kuli iye?

6-7. Yika muyitukwasa mba tununge ni kuzanga mandumbu jetu, chipwe ngwe kakuhengesa? (1 Yoano 4:7)

⁶ Longeso. Yehova kanazange hanga tununge ni kuzanga mandumbu jetu. (Tanga 1 Yoano 4:7.) Nyi umwe ndumbu matulinga yuma yize kuyalitele, twatamba kunyingika ngwetu, iye katulingile yuma yacho ku tachi, nawa ngwetu, iye kanase tachi hanga alinge yuma kulita  ni manyonga ja Yehova. (Yishi. 12:18) Yehova kakuzanga tuvumbi twenyi ashishika chipwe ngwe kakuhengesa. Iye kananungu ni kupwa sepa lietu; keshi kutufungila toto. (Samu 103:9) Yetu twakuwahilila chinji ha chize Yehova akutukonekena, kashika twatamba kumwimbulula ha kukonekena akwetu!—Efwe. 4:32–5:1.

⁷ Chili chilemu kunyingika ngwetu, tunakundama ku songo lia hano hashi. Kashika, twatamba kusa tachi hanga tulikate ni mandumbu jetu. Mutuhasa kushimbwila kwoka cha yihungumiona ni kutusa mu mazuwo a ususu mumu lia ufulielo wetu. Nyi yino muyilingiwa, mutufupiwa chinji ukwaso wa mandumbu jetu kuhiana kunyima. (Yishi. 17:17) Talenu yize yalingiwile kuli Josep, a umwe mukulwana wa mu chikungulwila ku Espanha. Iye ni mandumbu akwo, kaasele mu zuwo lia ususu mumu lia kulituna kunjila ku uswalale. Josep yamba ngwenyi: “Mu zuwo lia ususu, amu kutwakapwile ni utuswilo niumwe, chapwile chashi kuvwila akwetu uli. Twafupiwile kulengulula uhenge wa akwetu ni kwakonekena. Yino yatukwashile kununga hamuwika ni kutufunga. Twapwile mukachi ka funge akwo waze te keshi kulingila Yehova. Tangwa limwe, kwoko yilingusengunuka; kashika te chishi kuhasa nawa kulinga yuma ukawami. Umwe ndumbu, yaputuka kungukwasa ha kungukosela mazalo ni kungulingila yuma yikwo. Namwene zango liamwenemwene ha mashimbu jacho akalu.” Chilweza chino chatukwasa kuhwisa kawashi-washi kapinda mweswayo mutupwa nenyi ni mandumbu jetu.

NYONGONONA MUZE YOZE WALIMBATA NENYI MAKULEMEKA KU MBUNGE

8. Kapinda muka akupwa nenyi waze alimbata?

⁸ Kapinda. Malo eswe kakwete yipikalo. Mbimbiliya yakusolola zwalala ngwo, waze alimbata “kumakapwa ni yipikalo ku mwono wo.” (1 Kori. 7:28) Mumu liaka? Mumu ulo wakuchinga atu aali yihenge waze akwete yitanga yalisa, akuzanga yuma yalisa, nawa akwete manyonga alisa. Waze alimbata mahasa kukatuka ku minyachi yalisa hanji kwalela mu mutapu walisa. Kashika ha kupalika cha mashimbu, akuputuka kumona yitanga hali umwe ni mukwo yize kakamwene muze te kanda achilimbata. Yimwe ya ku yitanga yacho, muyihasa kuneha yipikalo yinji mu ulo. Amwe waze alimbata, shimbu ase tachi hanga ahwise kapinda wacho hamuwika, kakulisuma mulonga ha kapinda yoze unasoloka mu ulo wo, chipwe ngwe eswe aali kali ni chihanda ku kapinda wacho. Akwo kakunyonga ngwo, mba ahwise kapinda wacho, katamba kulihandununa hanji kulilakula. Shina kulinga yuma yino, muchihwisa lume kapinda yoze ali nenyi? b Ka, kechi kuhwa. Tutalenu umwe mutu anatongola mu Mbimbiliya yoze wanyongonwene chipwe ngwe kapwile mu ulo muze mwapwile milonga yinji.

9. Kapinda muka amwene Abigale?

⁹ Chilweza cha mu Mbimbiliya. Abigale kalimbachile ni Nabale, yoze Mbimbiliya yakwamba ngwo, kapwile mukwa-kuvutuka; keshi vumbi. (1 Samue. 25:3) Kota chapwile chikalu chinji kuli Abigale kutwama ni lunga wa mutapu au. Iye kachi kafupile uhashi hanga alihandunune ni lunga wacho. Uhashi wacho wasolokele muze Ndawichi yoze te mapwa mwanangana mu Izalele azangile kushiha Nabale mumu lia kumuhona vumbi hamwe ni malunga waze apwile no. (1 Samue. 25:9-13) Abigale kachi kachinyine ni kwecha Ndawichi hanga ashihe Nabale, alioze iye kakachilingile. Shimbu achine, yakwasa Ndawichi hanga ahone kushiha Nabale. (1 Samue. 25:23-27) Mba mumu liaka Abigale alingile chocho?

10. Yika yakwashile Abigale kunyongonona mu ulo ukalu uze apwile?

 ¹⁰ Abigale te kakuzanga Yehova, kashika apwile ni kuvumbika shimbi jenyi hakutwala ku ulo. Iye kota kanyingikine yize Yehova ambile kuli Alama ni Eva muze alingile ulo utangu. (Uputu. 2:24) Abigale kanyingikine ngwenyi, kuli Yehova, ulo wapwa usandu. Amu azangile kuvwisa Yehova kuwaha, chino kota che chamutwalile alinge yeswe yize ahashile, hanga alamwine atu eswe waze apwile ku zuwo lio hamwe ni mukwo-lunga. Iye kalingile yuma kafuji-funji hanga akwike Ndawichi ahone kushiha Nabale. Iye nawa ketele ukonekeno ha chuma chize kakalingile. Kwamba umwenemwene, Yehova kazangile chinji pwo yono wa hamu yoze wapwile ni kulihana hanga akwase akwo. Yika waze alimbata mahasa kulilongesa ha chilweza cha Abigale?

11. (a) Yika Yehova anashimbwila hali waze alimbata? (A-Efwesu 5:33) (b) Yika walilongesa ha tachi jize Carmen asele hanga afunge ulo wenyi? (Tala nawa chizulie.)

¹¹ Longeso. Yehova kanashimbwila hanga lunga ni pwo anunge ni kutwama hamuwika chipwe ngwe umwe wa kuli ayo mapinjisa yuma mu ulo wo. Yehova nawa kakuwahilila muze akumona umwe mu ulo masa tachi hanga ahwise yipikalo yize yilimo, ni kusolola zango ni vumbi. (Tanga A-Efwesu 5:33.) Tutalenu chilweza cha Carmen. Hanyima lia tukweji asambano chize haze alimbachile, iye yaputuka kulilongesa Mbimbiliya ni Yela ja Yehova, mba yamupapachisa. Alioze Carmen, kafupile kunyongonona chinji ha miaka 50, ha kusa tachi hanga afunge ulo wo ni kusolola zango ni vumbi kuli mukwo-lunga. Iye yamba ngwenyi: “Mukwetu-lunga kakazangile chipwe hakehe, muze napwile Chela cha Yehova. Iye kaputukile kuvwila Yehova ukwa. Ha mashimbu amwe, te kakungutuka ni kungulweza ngwenyi mangwecha. Ha kupalika cha miaka, yingunyingika kanawa chize mukwetu-lunga te akulivwa, chocho yinguputuka kuhanjika nenyi mu mutapu walita ni kumusa vumbi. Kunyingika ngwo, ulo uli usandu kuli Yehova, che changukwashile kusa tachi mba ngufunge ulo wami. Mumu lia kuzanga Yehova, chakafupile majila akulihandununa ni mukwetu-lunga.” c Nyi uli ni yipikalo mu ulo, muhasa kupwa ni shindakenyo ngwe Yehova makukwasa kunyongonona.

NYONGONONA CHIPWE MUZE MUHONGA MUMU LIA UHENGE UZE WAKULINGA

12. Kapinda muka mutuhasa kupwa nenyi nyi twalinga shili yinene?

¹² Kapinda. Hanji muzanga kwecha yuma yeswe mumu walinga shili yinene. Mbimbiliya yakusolola ngwo, uhenge uze twakulinga muuhasa “kutumakuna mbunge” ni kupihilila ku spiritu. (Samu 51:17) Ndumbu Robert, kasele tachi ha miaka yinji hanga apwe kavumbi mu  chikungulwila. Alioze, iye yalinga shili yinene, mba yamona ngwenyi kevwisa Yehova yikola ku mbunge. Yamba ngwenyi: “Shimbi yami ya mbunge, yapwile ni kungupinjisa chinji, te nakulivwa ngwe nguli mu wina. Nalembele kuli Yehova ni kulila. Napwile ni kunyonga ngwami, Yehova kechi kungupanjika nawa. Te nakulihula ngwami, kuchi Yehova mangupanjika se yami namuvwisa chinyengo? Nyi twalinga shili yinene, mbunge yetu muyihasa kulemenena ni kuputuka kunyonga ngwetu, Yehova katwehuka, nawa ngwetu, kuchalitele kumuwayila. (Samu 38:4) Nyi ngwe muputuka kunyonga chocho, sako mashimbu hanga upukune hali umwe mutu mu Mbimbiliya yoze wanyongonwene chipwe ngwe kalingile shili yinene.

13. Uhenge uka Petulu alingile, mba ha uhenge wacho unene uli?

¹³ Chilweza cha mu Mbimbiliya. Ha ufuku, muze Yesu te kanda achifwa, Petulu kalingile uhenge weka ni weka, uze wamutwalile mba alinge umwe uhenge unene. Chitangu, Petulu kasolwele ngwe kanahiane akwo, ni kwamba ngwenyi, iye te manunga ni kushishika kuli Yesu chipwe ngwe apostolo akwo machina. (Marku 14:27-29) Hanyima, muze apwile mu munda wa Ngetesemane, Petulu kakahashile kununga ni kulawola ha mashimbu anji. (Marku 14:32, 37-41) Kulutwe, muze mbunga yinene yejile ni kukwata Yesu, Petulu yachina. (Marku 14:50) Alioze mba ahianyise, yalikala Yesu katatu keswe. Yalishinga ngwenyi, kamunyingikine. (Marku 14:66-71) Kuchi Petulu alivwile muze anyingikine ngwenyi, kalinga uhenge unene? Iye kevwile yikola yinji ku mbunge, chocho yaputuka kulila. Iye kota kalivwile ngwe kafwa mu mukunyi, mumu lia yuma yize alingile. (Marku 14:72) Kevwile nawa yikola yinji ku mbunge muze akwa-kole ashihile sepa lienyi Yesu. Petulu kota kanyongene ngwenyi katelele chipwe hakehe!

14. Yika yakwashile Petulu kunyongonona ni kununga kulingila Yehova? (Tala ha chifukilo.)

¹⁴ Kuli yuma yinji yize yakwashile Petulu kunyongonona ni kununga kulingila Yehova. Chitangu, iye kakalihandunwine ni akwo; kanungile hamwe ni mandumbu jenyi ni kufupa ukwaso ni utakamiso wo. (Luka 24:33) Chikwo nawa, hanyima lia kumuhindwisa, Yesu yasoloka kuli Petulu, kota kamukolwezele chinji ha mashimbu jacho. (Luka 24:34; 1 Kori. 15:5) Mba hanyima, shimbu azwelese Petulu mumu lia uhenge uze alingile, Yesu yamuhwimisa mbunge ha kumulweza ngwenyi, te matambula nawa yiteli yinji. (Yoa. 21:15-17) Petulu kanyingikine ngwenyi, kalingile uhenge unene, alioze kakechele kulinga yize yalita. Mumu liaka? Mumu kapwile ni shindakenyo ngwenyi, Yesu kakamwehukile. Chikwo nawa, tumbaji akwo kanungine ni kukwasa Petulu. Yika mutuhasa kulilongesa ha chilweza chenyi?

15. Shindakenyo yika Yehova anazange hanga tupwe nayo? (Samu 86:5; A-Roma 8:38, 39) (Tala nawa chizulie.)

 ¹⁵ Longeso. Yehova kanazange hanga tunyingike ngwetu, iye kakutuzanga, nawa kakutukonekena. (Tanga Samu 86:5; A-Roma 8:38, 39.) Kwivwa yikola ku mbunge muze mutulinga shili, hi chipi ko, chakutukwasa. Alioze kutwatambile kunyonga ngwetu, kutwatelele nawa zango ni ukonekeno wa Yehova. Shimbu tunyonge chocho, twatamba kafuji-fuji kufupa ukwaso wenyi. Robert, yoze hitwatongola, kanalumbununa mumu liaka kufupa ukwaso chapwile chilemu kuli iye. Yamba ngwenyi: “Yami nalingile shili mumu te nakunyonga ngwami, nguli mukolo ku ufulielo, nawa munguhasa kwehuka cheseko cheswacho muchisoloka ku mwono wami. Kukatuka ha shimbu lize nafupile ukwaso wa makulwana, yingulivwa ngwami Yehova kakunguzanga, nawa ngwami, iye te kanazachisa mandumbu wano hanga amusolwele zango liacho. Makulwana a mu chikungulwila kakanguhichikile ukawami. Ayo kangukwashile hanga ngupwe ni shindakenyo ngwami, ni Yehova neye kanguhichikile ukawami.” Ni yetu nawa mutuhasa kupwa ni shindakenyo ngwetu, Yehova kakutuzanga ni mbunge yeswe, nawa kakutukonekena muze twakulikonyeka ku shili yize twalinga, kufupa ukwaso ni kusa tachi hanga tuhone kufunyina shili yacho. (1 Yoa. 1:8, 9) Nyi mutupwa ni shindakenyo ngwetu, Yehova kakutuzanga nawa kanafupu kutukonekena, kutuchi kwecha kumuwayila chipwe muze mutulinga shili.

16. Mumu liaka unazange kununga ni kunyongonona mu mulimo wa Yehova?

¹⁶ Yehova kakulemesa chinji tachi jize twakusa hanga tumulingile ha mashimbu wano akalu a matangwa a kusula. Kashika ni ukwaso wa Yehova, mutuhasa kunyongonona chipwe ngwe mutupalika mu yuma yikalu. Mutuhasa kununga ni kuzanga mandumbu jetu eswe ni kwakonekena chipwe muze matulinga yuma yize muyituvwisa yikola ku mbunge. Chikwo nawa, mutuhasa kusolola zango ni vumbi lietu kuli Yehova muze mutusa tachi hanga tuhwise kapinda mweswawo mutupwa nenyi mu ulo wetu. Mba nyi mutulinga shili yinene, mutuhasa kufupa ukwaso wa Yehova, kutayiza zango ni ukonekeno wenyi ni kununga kumulingila. Kulinga yuma yino, muchitukwasa kupwa ni shindakenyo ngwetu, nyi ‘kutwahongele kulinga yipema’ mutukazuka yiwape yinji.—Ngala. 6:9.