1-2. Yiwape yika mutu akupwa nayo hanyima lia kumupapachisa?

 TWAKUWAHILILA chinji muze akutupapachisa ni kulinga chihanda mu usoko wa Yehova. Waze hanapapachisa; nawa ali ni usepa upema ni Yehova, matayiza maliji wano a Ndawichi, anambe ngwo: “Kawaha yoze hiwamutongola yena ni kumukundamisa kuli yena, akatwame mu yiize ye.”—Samu 65:4.

² Yehova kakusakula kanawa atu waze malinga chihanda mu usoko wenyi. Ngwe chize twamona ha mutwe wapalika, Yehova kakukoka wika atu waze anazange kupwa ni usepa ukolo ni iye. (Tia. 4:8) Muze mulihana kuli Yehova ni kukupapachisa, chino muchikukwasa kupwa ni usepa upema ni iye. Chikwo nawa, muhasa kupwa ni shindakenyo ngwe, muze makupapachisa Yehova ‘makwaha yiwape ya kulumbama.’—Mala. 3:10; Jere. 17:7, 8.

3. Chiteli chika chilemu akupwa nacho Akwa-Kristu waze akulihana kuli Yehova ni kwapapachisa? (Chilumbununyi 5:4, 5)

³ Alioze, upapachiso uli wika uputukilo. Hanyima lia kukupapachisa, yena mwene watamba kusa tachi hanga ulinge yize muhasa ha kununga ni kushishika kuli Yehova chipwe muze mupalika mu yipikalo ni mu yeseko. (Tanga Chilumbununyi 5:4, 5.) Amu uli kambaji ka Yesu, musa tachi hanga ukaule chilweza chenyi ni malongeso jenyi. (Mateu 28:19, 20; 1 Petu. 2:21) Kashika mutwe uno, muukukwasa kuchilinga.

‘NUNGA NI KUKAULA’ YESU CHIPWE MUZE MUPALIKA MU YIPIKALO NI MU YESEKO

4. Mu mutapu uka tumbaji twa Yesu anafupiwa kumbata “mutondo wa lamba”? (Luka 9:23)

⁴ Kanda unyonga ngwe hanyima lia kukupapachisa, kuuchi keza kapalika mu yipikalo. Kwamba umwenemwene, Yesu kasolwele kuli tumbaji twenyi ngwenyi, ayo te mambata mutondo wa lamba;  nawa ngwenyi te machilinga “tangwa ha tangwa.” (Tanga Luka 9:23.) Shina hano Yesu kazangile kwamba ngwenyi, tumbaji twenyi te mamona lamba mashimbu eswe? Ka, hi chocho ko. Iye te kanashindakenya wika ngwenyi, kuchizako yiwape yize tumbaji twenyi mapwa nayo, ayo te mapalika mu yipikalo. Yimwe ya ku yipikalo yacho te muyipwa yikalu chinji.—2 Timo. 3:12.

5. Yiwape yika Yesu alakenyene kuli waze akulihana chinji mu mulimo wa Zambi?

⁵ Muchihasa kupwa ngwe unapalika mu yihungumiona mu usoko, hanji wecha yuma yize muyikuyukisa ku musunya hanga use Wanangana wa Zambi ha chihela chitangu. (Mateu 6:33) Ha chikuma chino, muhasa kupwa ni shindakenyo ngwe Yehova kananyingika yuma yeswe yize hiwamulingila. (Hepre. 6:10) Kota hiwanyingika ngwe maliji wano a Yesu kali amwenemwene, anambe ngwo: ‘Nyi umwe mahichika zuwo, mandumbu jenyi a malunga ni a mapwo, naye, tato, ana hanji minda mumu hali yami ni ha sango jipema, kumakatambula 100 lia yisuho haliapwila ha mwaka uno, mazuwo, mandumbu a malunga ni a mapwo, anaye, ana, ni minda hamwe ni yihungumiona ni ha mwaka uze muwizaho mwono wa mutolo.’ (Marku 10:29, 30) Pundu lume, yiwape yize wazuka yili yinji kuhiana yuma yeswe yize wechele hanga ulihane mu mulimo wa Zambi.—Samu 37:4.

6. Mumu liaka watamba kununga ni kwasa jita ni “usolo wa musunya” hanyima lia kukupapachisa?

⁶ Hanyima lia kukupapachisa, yena mununga ni kwasa jita ni “usolo wa musunya.” (1 Yoa. 2:16) Mumu nihindu uchili chihenge yoze wakatukile ku munyachi wa Alama. Ha mashimbu amwe, muhasa kulivwa ngwe chize alivwile postolo Paulu yoze wambile ngwenyi: “Mu mbunge yami, ami nakuzanga shimbi ya Zambi, alioze ngunamono shimbi yeka mu mujimba wami yize yinase jita ni shimbi ya kunyonga chami, ni kunguneha ku ufunge ku shimbi ya shili yize yili mu mujimba wami.” (Roma 7:22, 23) Yena muhasa kuhonga ku mbunge mumu lia uhenge uze wakulinga. Alioze nyi weuluka chilakenyo chize walingile kuli Yehova muze walihanyine kuli iye, muchikukwasa kupwa ni tachi ja kukumba cheseko cheswacho muchisoloka ku mwono we. Umwenemwene uli ngwo, chilakenyo chize walingile kuli Yehova, muchikukwasa chinji muze unapalika mu yeseko. Mu mutapu uka?

7. Mu mutapu uka kulihana che kuli Yehova muchikukwasa kununga ni kushishika kuli iye?

⁷ Muze walihanyine kuli Yehova, walitunyine yena mwene. Maliji wano kanalumbunuka ngwo, yena muopwa ni kulituna kulinga yuma yize muyivwisa Yehova chinyengo. (Mateu 16:24) Kashika muze mupalika mu umwe kapinda, kuuchi kukisa mashimbu ha kunyonga chinji yize mulinga. Yena munyingika lume yize watamba kulinga—kununga ni kushishika kuli Yehova. Mununga ni kusa tachi hanga uvwise Yehova kuwaha. Kulinga chino, muchikupwisa ngwe Yombi, yoze chipwe ngwe kapalikile mu yuma yikalu ku mwono wenyi, yamba ngwenyi: “Ndo kufwa chami chichi kwecha ungunu wami.”—Yombi 27:5.

8. Kuchi kupukuna ha kulemba cha kulihana che kuli Yehova muchikukwasa kununga ni kukumba yeseko?

⁸ Kupukuna ha yilemba yize walingile kuli Yehova muze walihanyine kuli iye, muchikukwasa kupwa ni tachi ja kukumba cheseko cheswacho muchisoloka ku mwono we. Ngwe chilweza, shina muzanga kusolola zango lia ulo kuli mutu yoze hanambate? Ka, kuuchi kulinga chocho! Mumu walakenyene kuli Yehova ngwe, kuuchi kulinga yuma ya mutapu au. Nyi musa tachi hanga manyonga api ahone kunjila mu mbunge ye, chino muchikukwasa hanga kulutwe uhone kulipinjisa ha manyonga jacho. Nyi mulinga chino, ‘mwehuka jila ya yingulungulu.’—Yishi. 4:14, 15.

9. Kuchi kupukuna ha kulemba cha kulihana che kuli Yehova, muchikukwasa nawa kusa yuma ya ku ufulielo kulutwe ku mwono we?

⁹ Mba yika mutwamba nyi muwana umwe mulimo upema, alioze mulimo wacho muukukwika  kuya ku kukunguluka? Yena kuuchi kuyambashana ha yize mulinga mumu muze te kanda uchiwana mulimo wacho, watesele ngwe kuuchi kwecha chuma nichimwe hanga chikukwike kuya ku kukunguluka cheswe. Hachino, kuuchi kutayiza chipwe hakehe mulimo wacho, uze hanyima muukupinjisa ku ufulielo. Kupukuna ha chilweza cha Yesu muchihasa kutukwasa ha chikuma chino. Iye kapwile ni kusa tachi hanga evwise Yehova kuwaha mashimbu eswe. Kashika chizechene ngwe Yesu, ni yetu nawa tunazange kuvwisa Yehova kuwaha mashimbu eswe.—Mateu 4:10; Yoa. 8:29.

10. Kuchi Yehova makukwasa hanyima lia kukupapachisa hanga ‘ununge ni kukaula’ Yesu?

¹⁰ Kwamba umwenemwene, yeseko ni yihungumiona muyikwaha uhashi wa kusolola ngwe ‘unanungu ni kukaula’ Yesu. Kashika, muhasa kupwa ni shindakenyo ngwe Yehova makukwasa kuchilinga. Mbimbiliya ha 1 A-Korindu 10:13, yinambe ngwo: “Zambi kashishika, kashika kechi katayiza akanweseke kuhiana chize munuhasa. Alioze, muze cheseko muchiza, iye makanulweza jila ya kutuhukamo hanga nukahase kunyongonona.”

CHIZE MUHASA KUNUNGA NI KUKAULA YESU

11. Jila yika yipema yize muyitukwasa kununga ni kukaula Yesu? (Tala nawa chizulie.)

¹¹ Yesu kalingilile Yehova ni mbunge yeswe, ni kulemba kuli iye mashimbu eswe. (Luka 6:12) Nyi muzanga kununga ni kukaula Yesu hanyima lia kukupapachisa, chili chilemu kununga ni kulinga yuma yize muyikukundamisa chinji kuli Yehova. Mbimbiliya yakwamba ngwo: “Chipwe ngwe hitwasenya kulutwe, nihindu tunungenu ni kwenda mu jila yacho.” (Fwili. 3:16) Hita shimbu, muwivwa ya kulitakananayo ya mandumbu a malunga ni a mapwo waze asele tachi hanga alihane chinji mu mulimo wa Yehova. Ayo hanji kayile ku Shikola ya Akwa-Kwambujola  Wanangana hanji kwalukila ku chihela kuze te kunafupiwa ukwaso. Nyi muopwa ni uhashi, yino yili yuma yipema yize muhasa kutesa kulinga ku mwono we. Tuvumbi twa Yehova nihindu kakusa tachi hanga awane majila a kwambulwilamo chinji sango jipema. (Yili. 16:9) Mba yika mutwamba nyi haliapwila kuushi uhashi wa kuchilinga? Kanda ulitesa ni mandumbu waze akulingila chinji Yehova ha kunyonga ngwe kuushi ni ulemu. Chuma chilemu chili kununga ni kunyongonona. (Mateu 10:22) Kashika, kanda wiza kavulama ngwe Yehova kakuwahilila chinji ha yize muhasa kulinga kulita ni yize yinalingiwa ku mwono we ni uhashi uze uli nawo. Kulinga chino, che muchikukwasa mba ununge ni kukaula Yesu hanyima lia kukupapachisa.—Samu 26:1.

12-13. Yika mulinga nyi wanyingika ngwe zango lie mu mulimo wa kwambujola linayi ni kutepuluka? (1 A-Korindu 9:16, 17) (Tala nawa mushete, “ Nunga ni Kuzomboka.”)

¹² Yika mulinga nyi ha kupalika cha mashimbu munyingika ngwe, yilemba hanji mulimo we wa kwambujola kuyishi nawa kanawa? Chikwo nawa, hanji kuushi kuzanga kutanga chinji Mbimbiliya ngwe chize wapwile ni kulinga. Nyi chino muchilingiwa hanyima lia kukupapachisa, kanda unyonga ngwe kuushi nawa ni spiritu yisandu ya Yehova. Mumu lia kupwa yihenge, kutushi kuhasa kupwa ni manyonga waze-ene mashimbu eswe. Nyi zango lie mu mulimo wa kwambujola mulitepuluka, sako mashimbu hanga unyonge ha chilweza cha postolo Paulu. Iye kapwile ni kusa tachi hanga embulule Yesu, alioze Paulu kanyingikine ngwenyi, ha mashimbu amwe te keshi kuhasa kulinga yize anazange. (Tanga 1 A-Korindu 9:16, 17.) Kashika, ambile ngwenyi: ‘Chipwe ngwe mungulinga mulimo wacho . . . hi ku zango liami ko, chipwe chocho, hanangwehe chiteli chacho.’ Mu maliji akwo, Paulu kazangile kulinga mulimo wenyi wa kwambujola chipwe ngwe te malivwa cheswacho.

¹³ Chizechene nawa, kanda ukwata yiyulo yize yinakatuka wika ha chize unevu. Sako tachi  hanga ulinge yize yalita chipwe ngwe mu mbunge ye kuwazangile kuyilinga. Nyi walinga yuma yize yalita, ha kupalika cha mashimbu manyonga je malumuka ni kupwa apema. Chipwe chocho, kununga ni kulinga yuma ya ku ufulielo, ngwe longeso lia wika, kulemba, kuya ku kukunguluka ni kwambujola ye muyikukwasa kununga ni kukaula Kristu hanyima lia kukupapachisa. Chikwo nawa, muze mandumbu mamona kunyongonona che mu mulimo wa Yehova, no mawana utakamiso unji ha chilweza che.—1 Tesa. 5:11.

“NUNGENU NI KULIHENGWOLA . . . NUNGENU NI KUSOLOLA CHIZE NWAPWA”

14. Kuhengwola chika twatamba kulinga tangwa ni tangwa ku mwono wetu; nawa mumu liaka? (2 A-Korindu 13:5)

¹⁴ Chuma chikwo chize muchikukwasa hanyima lia kukupapachisa, chili kulihengwola mashimbu eswe hanga unyingike chize uli ku ufulielo. (Tanga 2 A-Korindu 13:5.) Tangwa ni tangwa, muchilita kusa amwe mashimbu hanga uhengwole ndako jize ukwete. Ngwe chilweza, muhasa kuhengwola nyi wa kulemba matangwa eswe, wa kulilongesa Mbimbiliya, wa kuya ku kukunguluka ni kwambujola sango jipema. Fupa majila waze makukwasa kuyuka chinji ha kulinga yuma yino. Lihule ngwe: ‘Shina nakuhasa kulumbununa kuli akwetu umwenemwene uze hi ukalu ko? Kutala munguhasa kulinga chimwe hanga nguzange chinji kwambujola sango jipema? Yilemba yami yinalite ni yize nakwita ni kusolola ngwami, ngunajikijila muli Yehova ni mbunge yami yeswe? Shina nakuya ku kukunguluka cheswe? Nyi nakuyako, yika munguhasa kulinga hanga ngupwe ni kulihulikila ha malongeso ni kuhana makumbululo a utakamiso?’

15-16. Yika walilongesa ha chilweza cha Robert hakutwala ku kwehuka yeseko?

¹⁵ Chuma chikwo chilemu chili kunyingika ulelu we. Ndumbu Robert kanatulweze yimwe yize yinalumbununa kanawa chikuma chino. Iye yamba ngwenyi: “Muze napwile ni miaka 20, napwile ni kulinga mulimo wa shimbu likehe. Tangwa limwe, umwe mukwa-mulimo-ni-mukwetu wa pwo, yangusanyika hanga nguye ku zuwo lienyi hanyima lia mulimo. Iye yangulweza ngwenyi, te mutupwa ukawetu; nawa mutuheha chinji. Ku uputukilo, yingukwata-kwata mu miji, alioze muze nanyongene kanawa, mba yingumulumbunwina mumu liaka kuchatambile kuyako.” Robert kahashile kukumba cheseko chacho, kashika muchilita kumuchichimieka. Alioze, ha kupalika cha mashimbu muze hanyonga ha yize yalingiwileko, Robert yanyingika ngwenyi, kachi kalingile yuma mu jila yalisa. Yamba ngwenyi: “Muze angusanyikine, kachi nalitunyine hazehene chakuhona kukwata-kwata mu miji ngwe chize alingile Yosefwe kuli pwo lia Potifwa. (Uputu. 39:7-9) Kwamba umwenemwene, nakomokene  muze nanyingikine ngwami, chapwile chikalu kuli yami kulituna. Chino changukwashile kumona ngwami, ngunafupiwa kusa tachi hanga ngukolese usepa wami ni Yehova.”

¹⁶ Chizechene ngwe Robert, chili chilemu ni yena kuhengwola kanawa manyonga je. Chipwe muze muukumba chimwe cheseko, lihule ngwe, shina nashimbula chinji ha kulituna cheseko chacho? Nyi mumona ngwe unafupiwa kululieka yimwe kanda ulihisa, shimbu ulihise, wahilila ha kulianga kunyingika ulelu we. Lemba kuli Yehova hakutwala ku ulelu wacho, ni kulinga yuma yize muyikukwasa kukolesa zango lie ha kwononokena Yehova.—Samu 139:23, 24.

17. Kuchi Robert ahalishile jina lia Yehova?

¹⁷ Mutuhasa kulilongesa chuma chikwo ha chilweza cha Robert. Iye yanunga ni kwamba ngwenyi: “Hanyima lia kulituna kuya ku zuwo lia mukwa-mulimo-ni-mukwetu, iye yangwamba ngwenyi, ‘Chochene, wahasa kukumba cheseko!’ Mba yami yingumuhula ulumbunwiso wa maliji jacho. Iye yangulumunwina ngwenyi, umwe sepa lienyi yoze wapwile Chela cha Yehova, kamulwezele ngwenyi, akweze eswe Yela ja Yehova kapwa ni mwono wa nongwena, nawa ngwenyi nyi mukusoloka uhashi wa kulinga yuma yipi, ayo kakuyilinga. Hachino, iye yalweza sepa lienyi ngwenyi, meseka chikuma chacho hali yami. Ngunakawahilila chinji ha kunyingika ngwami, nahalisa jina lia Yehova.”

18. Yika watesa kulinga hanyima lia kukupapachisa? (Tala nawa mushete, “ Mitwe Yaali Yize Muzanga Chinji.”)

¹⁸ Kulihana kuli Yehova ni kukupapachisa, chakusolola ngwo unazange kuhalisa jina lia Yehova, chipwe ngwe mukulingiwa yuma yeswayo. Kashika, muhasa kupwa ni shindakenyo ngwe Yehova kananyingika kanawa yipikalo ni yeseko yeswe yize unakumbu. Yehova mawahisa tachi jize unase hanga ununge ni kushishika kuli iye. Muhasa kupwa ni shindakenyo ngwe kupalikila mu spiritu yisandu, Yehova makwaha tachi jize mufupiwa. (Luka 11:11-13) Ni ukwaso wa Yehova, yena muhasa kununga ni kukaula Yesu hanyima lia kukupapachisa.