1-2. Yika mutu atamba kulinga shimbu kanda achimupapachisa?

 HA KUPALIKA cha miaka yitano, atu kuhiana kanunu umuwika kaapapachishile ni kupwa Yela ja Yehova. Anji a kuli ayo, kali ngwe kambaji Timoteu; ‘yoze waputukile kulilongesa umwenemwene chize ku wanuke wenyi.’ (2 Timo. 3:14, 15) Akwo, kalilongesele hakutwala kuli Yehova muze te hakola, eka kalilongesa umwenemwene ku ushinakaji. Umwe pwo yoze te wakulilongesa Mbimbiliya ni Yela ja Yehova, kamupapachishile ni miaka 97!

² Nyi uli longi wa Mbimbiliya hanji yisemi je kali Yela ja Yehova, shina unanyongo kukupapachisa? Chino chili chiyulo chipema chize muhasa kukwata! Alioze, shimbu kanda achikupapachisa, chili chilemu kuhana mwono we kuli Yehova. Mutwe uno, muulumbununa kanawa chikuma chino cha kulihana kuli Yehova. Mutumona nawa mumu liaka kuwatambile kwivwa woma wa kulihana kuli Yehova ni kukupapachisa muze hiwajama kulu ni kuchilinga.

KULIHANA KULI YEHOVA YIKA CHINALUMBUNUKA?

3. Hana yimwe yilweza ya mu Mbimbiliya ya atu waze alihanyine kuli Yehova.

³ Kulita ni Mbimbiliya, mutu yoze malihana kuli Yehova, chekwamba kamusakula hanga alinge umwe mulimo usandu. A-Izalele kapwile atu waze te hanalihane kuli Yehova. Alioze mukachi ko, atu akwo kapwile ni kulihana kuli Yehova hanga alinge umwe mulimo walipwila. Ngwe chilweza, Arone kapwile ni kuzachisa chilayi chisandu cha kulihana chenyi, “chipenya cha oru” chize chapwile ha kapusa wenyi. Chipenya chino cha oru chapwile ni kusolola ngwo, Arone kamusakwile hanga alingile Yehova mu  jila yalipwila. (Levi 8:9) A-Nazireu no kalihanyine kuli Yehova mu yimwe jila yalipwila. Liji Nazireu, linakatuka mu limi lia Hepreu linambe ngwo nazirʹ, lize linalumbunuka kulihana hanji kulihandununa. A-Nazireu katambile kwecha kulinga yuma yimwe yize apwile ni kukanjisa mu Shimbi ya Mose.—Kwa. 6:2-8.

4. (a) Kulihana kuli Yehova yika chinalumbunuka? (b) “Kulituna yena mwene” yika chinalumbunuka? (Tala nawa chizulie.)

⁴ Nyi walihana kuli Yehova, acho wasakula kupwa kambaji ka Yesu. Hachino, kukatuka ha tangwa liacho, kulinga upale wa Zambi muchipwa chuma chilemu ku mwono we. Mba kulihana kuli Yehova yika chinalumbunuka? Yesu kambile ngwenyi: “Nyi mutu kanazange kungukaula, alitune iye mwene.” (Mateu 16:24) Liji lia Ngregu lize analumbununa ngwo, “alitune iye mwene,” linalumbunuka nawa “mutu mwene kwamba ngwenyi, ka.” Muze mulihana kuli Yehova, mufupiwa kwamba ngwe, ka ha yuma yize iye keshi kuzanga. (2 Kori. 5:14, 15) Chino chinachingi kwamba ngwe ka ha “yitanga ya musunya” ngwe upangala hanji utanji. (Ngala. 5:19-21; 1 Kori. 6:18) Shina kwononokena Yehova muchikalisa mwono we? Ka, chichi kukalisa mwono we nyi muzanga Yehova, ni kupwa ni shindakenyo ngwe kukaula shimbi jenyi muchiyukisa mwono we. (Samu 119:97; Iza. 48:17, 18) Ndumbu Nicholas, yamba ngwenyi: “Twatamba kumona shimbi ja Yehova ngwe yikalakala ya zuwo lia ususu yize yakutukwika kulinga yuma yize tunazange, hanji yikalakala ya chipanga muze akupichila ndumba yize muyitufunga hanga ndumba ahone kutukwata muze mutuya ni kwatala.”

5. (a) Kuchi mutu akulihana kuli Yehova? (b) Kalisa muka uli ha kulihana kuli Yehova ni upapachiso? (Tala nawa chizulie.)

⁵ Kuchi mulihana kuli Yehova? Muchilinga ha kulemba kuli iye. Mu kulemba chacho, yena mulakenya kuwayila wika iye; nawa kulinga  upale wenyi muchipwa chuma chilemu ku mwono we. Kwamba umwenemwene, mulakenya Yehova ngwenyi, mumuzanga “ni mbunge ye yeswe, ni mwono we weswe, ni kunyonga che cheswe ni tachi je jeswe.” (Marku 12:30) Kulemba chacho muchilinga ku tenga ha kuhanjika wika ni Yehova. Chikwo nawa, makupapachishila ha mbunga hanga usolole kuli atu akwo ngwe, hiwalihana kuli Yehova. Kulihana che kuli Yehova chili chilakenyo chilemu, kashika muchilita kusa tachi hanga uchimanunune ha kulinga yize iye mashimbwila hali yena.—Chilu. 5:4, 5.

MUMU LIAKA WATAMBA KULIHANA KULI YEHOVA?

6. Yika yakutwala mutu mba alihane kuli Yehova?

⁶ Chikuma chitangu chinakutwale mba ulihane kuli Yehova, chili zango lize ukwete hali iye. Lino hi zango ko lia helu-helu lize mulihasa kuhwa ha shimbu lieswalio. Alioze, lili zango lize linakatuka ha ‘chinyingi chamwenemwene’ ni “malinjekela a uspiritu,” chekwamba, yuma yize walilongesa hali Yehova ni upale wenyi. Yino ye yinakutwale mba uzange Yehova mashimbu eswe. (Kolo. 1:9) Longeso lia Mbimbiliya liakukwasa kupwa ni shindakenyo ngwe, (1) Yehova kali mutu wamwenemwene, (2) Mbimbiliya yili Liji lia Zambi, ni (3) Yehova kakuzachisa ululikiso wenyi hanga alinge upale wenyi.

7. Yika mutu atamba kulinga shimbu kanda achilihana kuli Yehova?

⁷ Waze akulihana kuli Yehova kakupwa ni chinyingi cha Mbimbiliya chize chakwakwasa kutwama kulita ni Shimbi jenyi. Ayo kakusa tachi hanga alianyine ni akwo yuma yize akulilongesa mu Mbimbiliya. (Mateu 28:19, 20) Zango lio kuli Yehova liakwoka, kashika kakuzanga kumuwayila ni mbunge yeswe. Shina ni yena che wakulivwa? Nyi muzanga Yehova mu jila yino,  kuuchi kulihana kuli iye hanga uvwise kuwaha longeshi we wa Mbimbiliya hanji yisemi je; chipwe kuchilinga mumu ngwo masepa je kanaapapachisa.

8. Yika muyikukwasa mba ukwate chiyulo cha kulihana kuli Yehova? (Samu 116:12-14)

⁸ Muze munyonga ha yuma yeswe yize Yehova hanakulingila, mba mulivwa ngwe watamba kuhana mwono we kuli iye. (Tanga Samu 116:12-14.) Mbimbiliya yakwamba ngwo, Yehova mwe wakutwaha “chawana cheswe chipema ni chawana cheswe chingunu.” (Tia. 1:17) Chawana chinene chize Yehova hanahane kuli atu, chili chitapo cha Mwanenyi, Yesu Kristu. Achinyonga ha chino: chitapo cha Yesu chakukwasa hanga upwe ni usepa upema ni Yehova. Chikwo nawa, Yehova kanakwehe uhashi wa kutwama ku miaka yeswe. (1 Yoa. 4:9, 10, 19) Kulihana kuli Yehova yili jila yize musolwelamo ngwe unamusakwilila hi wika ko ha ukuule, alioze ni ha yiwape yeswe yize hanakwehe. (Shimbi 16:17; 2 Kori. 5:15) Yino ye yili ha longeso 46, ha chikuma 4, mu mukanda Wahilila ku Mwono ku Miaka Yeswe! haze hali chinema cha minutu yitatu chinambe ngwo, Hana Yawana ye Kuli Yehova.

SHINA HIWALILULIEKA HANGA UHANE MWONO WE KULI YEHOVA NI KUKUPAPACHISA?

9. Mumu liaka mutu niumwe katambile kwivwa ngwe kanamushinjila hanga alihane kuli Yehova?

⁹ Hanji unalivu ngwe kanda uchipwaho ni kuhana mwono we kuli Yehova ni kukupapachisa. Hanji unafupiwa kwalumuna yimwe hanga ukaule shimbi ja Yehova, ni kusa mashimbu hanga ukolese ufulielo we. (Kolo. 2:6, 7) Hita longi wa Mbimbiliya kakukola ku ufulielo mu jila yalisa. Chikwo nawa, hi akweze eswe ko kakwapapachisa ni miaka yimuwika. Chili chilemu kunyingika yuma yize unafupu kwalumuna ku mwono we ni kusa tachi hanga ulinge yize muhasa chakuhona kulitesa ni akwenu.—Ngala. 6:4, 5.

10. Yika mulinga nyi unalivu ngwe kanda uchipwaho ni kulihana kuli Yehova ni kukupapachisa? (Tala nawa mushete, “ Kanakulele kuli Yisemi Yela ja Yehova?”)

¹⁰ Chipwe munyingika ngwe kanda uchipwaho ni kulihana kuli Yehova, nihindu nunga ni nyonga liacho. Eta ukwaso kuli Yehova hanga walumune yize unafupiwa ku mwono we. (Fwili. 2:13; 3:16) Muhasa kupwa ni shindakenyo ngwe, Yehova mevwa kulemba che ni kukukwasa.—1 Yoa. 5:14.

MUMU LIAKA AMWE AKUYAMBASHANA HA KUHANA MWONO WO KULI YEHOVA NI KWAPAPACHISA?

11. Kuchi Yehova matukwasa kununga ni kushishika kuli iye?

¹¹ Atu amwe waze hanalilulieka hanga alihane kuli Yehova ni kwapapachisa, nihindu kakuyambashana ha chikuma chino nyi mahasa kuchilinga nyi ka. Ayo mahasa kulihula ngwo, mba nyi hanyima lia kungupapachisa ngulinga shili yinene ni kungusosolola mu chikungulwila? Nyi yino ye yakukuvwisa woma muhasa kupwa ni shindakenyo ngwe Yehova makwaha yeswayo mufupiwa ‘hanga wende mu jila yenyi ni kumuvwisa kuwaha.’ (Kolo. 1:10) Iye nawa makwaha tachi jize mufupiwa hanga ulinge yuma yalita. Yehova hanakwase atu anji anunge ni kumwononokena. (1 Kori. 10:13) Kashika, kanji-kanji mandumbu akehe wika e akusosolola mu chikungulwila. Yehova kakutwaha yeswayo mutufupiwa hanga tununge ni kushishika kuli iye.

12. Yika muhasa kulinga hanga wehuke kulinga shili yinene?

¹² Yetu eswe twakupalika mu cheseko cha kulinga yuma yipi. (Tia. 1:14) Alioze, yena muhasa kusakula yize mulinga muze muopwa mu cheseko chacho. Kwamba umwenemwene, yena mwene mwe uli ni ulite wa yize mulinga ku mwono we. Atu amwe kakwamba ngwo, chili chikalu kusongwela manyonga jetu ni kumona yize mutulinga. Alioze, wano kali  mahuza mumu yena muhasa kusongwela usolo ni manyonga je. Kashika, ha shimbu lieswalio muopwa mu cheseko, yena mwene muhasa kusakula kwecha kulinga yuma yacho yipi. Mba uchilinge, atu akwo mahasa kukukwasa. Ngwe chilweza, lemba kuli Yehova mashimbu eswe, linga-linga longeso lia wika mashimbu eswe, yako ku kukunguluka cheswe. Zachisa uhashi weswawo muopwa nawo hanga wambujole ufulielo we kuli akwenu. Nyi walinga yuma yino yeswe, muopwa ni tachi jize mufupiwa hanga ununge ni kushishika kuli Yehova. Chikwo nawa, kanda wiza kavulama ngwo Yehova manunga ni kukukwasa ha chikuma chino.—Ngala. 5:16.

13. Chilweza chika chipema chize Yosefwe anakatusela?

¹³ Muchipwa chashi kununga ni kushishika kuli Yehova, nyi mulianga kululieka yize mukalinga muze kanda uchipalika mu cheseko. Mbimbiliya yakuhanjika hali atu anji waze alingile chocho. Chizechene ngwe yetu, atu jacho no kapwile yihenge. Ngwe chilweza, muze pwo lia Potifwa afupile mashimbu eswe kulisumbakenya ni Yosefwe, Yosefwe kanyingikine pundu yize malinga ha chikuma chacho. Mbimbiliya yakutulweza ngwo, Yosefwe ‘kakamupanjikile.’ Yosefwe mwene yamba ngwenyi: “Kuchi munguhasa kulinga ungulungulu upwa haha ni kuvulumuna Zambi?” (Uputu. 39:8-10.) Chinasoloka zwalala ngwo, Yosefwe kanyingikine yize malinga shimbu te kanda achimweseka kuli pwo lia Potifwa. Kashika, ahashile kulinga yuma yize yalita muze apwile mu cheseko.

14. Kuchi mutuhasa kwehuka yeseko?

¹⁴ Kuchi muhasa kwimbulula Yosefwe ni kwehuka yeseko yize muyisoloka ku mwono we? Muhasa kutesa haliapwila yize mukalinga muze mupalika mu cheseko. Kanda ukukuma ha kulituna kulinga yuma yize Yehova keshi kuzanga, chipwe kunyonga chinji ha yuma yacho. (Samu 97:10; 119:165) Nyi wachilinga, muhasa kukumba cheseko cheswacho muchisoloka ku mwono we mumu mukanyingika yize mulinga.

15. Kuchi mutu mahasa kusolola ngwenyi kanafupu Yehova ni mbunge yeswe? (A-Hepreu 11:6)

¹⁵ Muchihasa kupwa ngwe uli ni shindakenyo ngwe hiwawana umwenemwene, nawa ngwe unazange kulingila Yehova ni mbunge yeswe. Alioze hanji unalivu ngwe, kanda uchipwaho ni kuhana mwono we kuli Yehova ni kukupapachisa. Hachino, muhasa kulinga yuma ngwe yize Mwanangana Ndawichi alingile. Iye kaliumbile kuli Yehova ngwenyi: “Zambi hengula muli yami unyingike mbunge yami. Ungweseke,  unyingike manyonga jami. Umone kachi muuli ungulungulu umwe muli yami, ungusongwele kama mu jila ya mutolo.” (Samu 139:23, 24) Yehova kakuwahisa atu waze ‘akumufupa ni mbunge yeswe.’ Tachi jize unase hanga ulihane kuli Yehova ni kukupapachisa, jinasolola pundu ngwo, yino ye unazange kulinga.—Tanga A-Hepreu 11:6.

NUNGA NI KUKUNDAMA KULI YEHOVA

16-17. Kuchi waze analele kuli yisemi Yela ja Yehova mahasa kukundama kuli Yehova? (Yoano 6:44)

¹⁶ Yesu kambile ngwenyi, Yehova mwe wakukoka tumbaji twenyi mu umwenemwene. (Tanga Yoano 6:44.) Nyonga ha ulemu uze maliji wano ali no ni chize anakwate ku mwono we. Yehova kakumona chuma chipema mu mbunge ya hita mutu yoze akukoka mu umwenemwene. Yehova kakumona ngwo hita ndumbu kali mulemu kuli iye. (Shimbi 7:6) Maliji wano kanatale ni hali yena; Yehova kakukulemesa.

¹⁷ Muchihasa kupwa ngwe kanakulele kuli yisemi Yela ja Yehova. Hanji mulivwa ngwe unalingila Yehova mumu yisemi je che analingi hi ko ngwo Yehova mwe wakusakula. Alioze Mbimbiliya yinambe ngwo: “Kundamenu kuli Zambi, mba iye makakundama kuli yenu.” (Tia. 4:8; 1 Sango 28:9) Nyi muputuka kusa tachi hanga ukundame kuli Yehova, neye malinga chihanda chenyi hanga akundame kuli yena. Yehova kakukulemesa chinji hi wika ko mumu lia kupwa mukachi ka mandumbu. Iye kakukundama kuli mutu ni mutu chipwe kuli waze analele kuli yisemi Yela ja Yehova. Muze umwe mutu akusa tachi hanga akundame kuli Yehova, Iye kakulinga yize yili ha Tiangu 4:8.—Tala nawa 2 A-Tesalonika 2:13.

18. Yika mutulilongesa ha mutwe uze muuhataho? (Samu 40:8)

¹⁸ Nyi walihana kuli Yehova ni kukupapachisa, acho unembulula Yesu. Iye kazangile kulinga chuma cheswacho amwichile kuli Tato ku nyonga lienyi mwene. (Tanga Samu 40:8; Hepre. 10:7) Ha mutwe uze muuhataho, mutumona yize muyihasa kukukwasa kununga ni kulingila Yehova ni ushishiko hanyima lia kukupapachisa.