1-2. (a) Kulihi Paulu apwile muze asonekenene A-Efwesu mukanda? (b) Yihula yika mutukumbulula ha mutwe uno?

 CHIPWE muze apwile mu zuwo lia ususu mu Roma, postolo Paulu kasele tachi hanga akolweze mandumbu jenyi. Amu kakapwile nawa ni uhashi wa kuya ni kwameneka, iye yaasonekena mikanda. Umwe wa ku mikanda yacho, kausonekenene mandumbu mu Efwesu ha mwaka 60 hanji 61 M.J.—Efwe. 1:1; 4:1.

² Ha miaka kumi kunyima, Paulu kapalikishile mashimbu hamwe ni mandumbu mu Efwesu, ha kwambujola ni kulongesa sango jipema. (Yili. 19:1, 8-10; 20:20, 21) Iye kazangile chinji mandumbu jacho, kashika afupile kwakwasa hanga anunge ni kushishika kuli Yehova. Mba mumu liaka Paulu aasonekenene mukanda ni kutongola maliji wano aali, milima ni pangu? Yika yetu eswe mutuhasa kulilongesa ha chiyulo chino Paulu aehele? Tutalenu makumbululo a yihula yino.

KUKATUKA MU MILIMA NI KUYA MU PANGU

3. Maliji aka Paulu azachishile mu mukanda wenyi kuli A-Efwesu?

³ Paulu kasonekenene A-Efwesu ngwenyi: “Kunyima, yenu nwapwile milima, alioze haliapwila nuli pangu.” (Efwe. 5:8) Hano, Paulu kazachishile kalisa yoze watwama ha milima ni pangu, hanga asolole haze A-Efwesu ahetele ni yitanga yize kuyalitele. Tutalenu mumu liaka Paulu ambile ngwenyi, A-Efwesu chitangu kapwile mu “milima.”

4. Mu mutapu uka A-Efwesu apwile mu milima ya ku spiritu?

⁴ Uwayilo wa mahuza. Muze te kanda achipwa Akwa-Kristu, mandumbu mu Efwesu kapwile ni uwayilo weka ni weka; nawa te kakulinga chinji yuma ya tufuta-futa. Mu mbonge ya Efwesu,  mwapwile tembele ya kazambi wa pwo Ngregu avuluka ngwo Ndiana; nawa atu anji te kakumona chihela chacho ngwe chimwe cha ku yihela shimbiali yilemu ya hano hashi. Atu te kakuya mu tembele yacho hanga awayile tuzambi two. Kulinga ni kulanjisa tuponya a kazambi Ndiana, wapwile mungoso uze te wakuneha mbongo jinji. (Yili. 19:23-27) Chikwo nawa, mbonge yacho te kayinyingika ngwo atu jamo kakulinga chinji yuma ya tufuta-futa.—Yili. 19:19.

5. Yuma yika A-Efwesu apwile ni kulinga yize yasolwele ngwo kapwile mu milima ku yitanga?

⁵ Upangala hanji utanji. Atu mu Efwesu te kakulinga chinji yuma ya upangala, nawa te keshi kwivwa sonyi ja kuyilinga. Atu anji te kakuhanjika chinji yuma ya upangala ni ya utanji. Hi wika ko mu yiheho, alioze ni ha yiwanyino ya mayingeleja. (Efwe. 5:3) A-Efwesu anji te “hanatokesa mana” a kulinga yuma yipema. Maliji wano kanalumbunuka ngwo, ayo te keshi ‘kwivwa yikola ha yuma yipi yize apwile ni kulinga.’ (Efwe. 4:17-19) Muze te kanda achinyingika Yehova, ni kulilongesa hakutwala ku chipi ni chipema, shimbi yo ya mbunge te kuyishi kwahisa muze apwile ni kulinga yuma yipi. Ayo nawa te keshi kulihulumba nyi yuma yize akulinga yakuvwisa Yehova yikola ku mbunge nyi ka. Kashika Paulu ambile ngwenyi, ‘kunyonga cho chapwile mu milima; kapwile kusuku ni mwono uze Zambi akuhana.’

6. Mumu liaka Paulu ambile ngwenyi, haliapwila A-Efwesu te hapwa “pangu”?

⁶ Chipwe chocho, atu amwe mu mbonge ya Efwesu, katuhukile mu milima. Paulu yamba ngwenyi, ha shimbu lino o te hapwa “pangu mukulinunga ni Mwene.” (Efwe. 5:8) Ayo kasakwile kutwama kulita ni Liji lia Yehova lize liakutusongwela ngwe pangu. (Samu 119:105) A-Efwesu wano kechele yuma yeswe yize te yakulinga chihanda ku uwayilo wa mahuza, upangala ni utanji. Hachino, ayo yapwa akwa-kwimbulula Zambi, ni kusa tachi hanga evwise Yehova kuwaha ha kumuwayila ni mbunge yeswe.—Efwe. 5:1.

7. Mu mutapu uka yuma yize tunapalika musono yinalifu ni ya Akwa-Kristu mu Efwesu?

⁷ Chizechene nawa, ni yetu muze te kanda tuchililongesa umwenemwene, twapwile mu milima ya yitanga yipi ni ya uwayilo wa mahuza.  Amwe a kuli yetu te twakulinga yiwanyino ya matangwa akunanga ya mayingeleja a mahuza. Akwo kapwile ni kulinga yuma yinji ya upangala. Alioze, muze twalilongesele shimbi ja Yehova hakutwala ku chipi ni chipema, yitwalumuna yitanga yetu ni kuputuka kutwama kulita ni chize Yehova akuzanga. Chino chatunehena yuma yinji yipema. (Iza. 48:17) Alioze haliapwila tunapalika mu yimwe yuma yikalu. Kashika, twatamba kusa tachi hanga tupwe kusuku ni milima yize twahichikile kunyima, ni ‘kununga ni kwenda ngwe ana a pangu.’ Mba kuchi mutuhasa kuchilinga?

TUHUKA MU MILIMA

8. Kulita ni A-Efwesu 5:3-5, yika A-Efwesu atambile kwehuka?

⁸ Tanga A-Efwesu 5:3-5. Mba apwe kusuku ni milima ya yitanga yipi, Akwa-Kristu mu Efwesu katambile kwehuka ndako jeswe jize kujishi kuvwisa Yehova kuwaha. Yino yachingile kwehuka yitanga ya upangala ni kwehuka kuhanjika yuma yeswe ya luchisa. Paulu kewulwile Akwa-Kristu mu Efwesu ngwenyi, nyi kanazange kupwa “ni chihinga mu Wanangana wa Kristu ni wa Zambi,” katambile kwehuka yuma yacho.

9. Mumu liaka twatamba kwehuka chuma cheswacho chize chinatale ha upangala hanji utanji?

⁹ Ni yetu twatamba kukeya hanga tuhone kulinga “milimo ya ku milima yize kuyishi kwima mihuko.” (Efwe. 5:11) Kwamba umwenemwene, nyi mutu matala, mapanjika hanji mahanjika-hanjika chinji yuma ya upangala, chakupwa chashi mutu wacho kulinga yuma yipi. (Uputu. 3:6; Tia. 1:14, 15) Mu chifuchi chimwe, mandumbu anji kalingile chizavu mu yimwe jila ya kuhanjikila ha internet hanga apwe ni kuhanjika kanawa. Ku uputukilo, yuma yize apwile ni kuhanjika yapwile wika ya ku ufulielo. Alioze chaluyinda, ha kupalika cha mashimbu, lusango yalumuka; yaputuka kuhanjika yuma ya luchisa ni ya upangala. Kulutwe, anji a kuli mandumbu jacho yamba ngwo, lusango wacho wa yuma ya luchisa mwe waatwalile mba alinge yuma ya upangala.

10. Yika Satana akulinga hanga atwonge? (A-Efwesu 5:6)

¹⁰ Hano hashi ha Satana, mashimbu eswe haneseka kutwonga hanga tutayize ngwetu, yuma yize Yehova akutulweza ngwo yili ya upangala nawa ya luchisa, hi chipi ko kuyilinga. (2 Petu. 2:19) Yino kuyishi kutukomwesa! Mumu mana waze Satana akuzachisa chize ku shakulu, kali akuyambanganyisa atu hanga ahone kunyingika chipi ni chipema. (Iza. 5:20; 2 Kori. 4:4) Kashika, yinema ni yiheho yinji yize akusolola ha TV ni ha internet, yakukolweza atu hanga ahone kukaula shimbi ja Yehova! Satana kanazange tutayize ngwetu, yitanga ya luchisa ni ya upangala yize atu anji akulinga musono, yili yipema, nawa ngwo, nyi twayilinga kuyichi kutunehena upi niumwe.—Tanga A-Efwesu 5:6.

11. Kuchi yize yalingiwile kuli Angela yinasolola ngwo, twatamba kusa tachi hanga tukaule chiyulo chize chili ha A-Efwesu 5:7? (Tala nawa chizulie.)

¹¹ Satana kanazange hanga masepa jetu apwe atu waze keshi kutukolweza kulinga upale wa Yehova. Chino che chatwalile Paulu mba atoweze A-Efwesu ngwenyi: “Kanda nulikata” ni waze akulinga yuma yipi kumeso ja Zambi. (Efwe. 5:7) Musono, yetu twatamba kukeya chinji kuhiana mandumbu jetu mu Efwesu. Mumu liaka? Mumu musono, kutushi kupwa wika ni masepa waze mutulimona no meso ni meso, alioze ni ha internet nawa. Angela, a yoze watwama mu Ásia, kanyingikine ngwenyi, internet hanji ngwetu rede social, muyihasa kuneha ponde yinene. Mwene yamba ngwenyi: “Jila yino yapwa ngwe limwe umbu akutela, lize muhasa kuholokelamo chakuhona kunyingika. Yami nahetele ha shimbu lize te chishi kupalako  nawa ha kulikata ni masepa waze te keshi kulemesa shimbi ja Zambi. Ha kupalika cha mashimbu, yinguputuka kunyonga ngwami hi chipi ko kupwa ni mwono uze Yehova keshi kuzanga.” Alioze makulwana kasolwele zango ha kukwasa Angela hanga alumune yitanga yenyi. Iye yanunga ni kwamba ngwenyi: “Haliapwila nakuzalisa manyonga jami ni yuma ya ku ufulielo hi ko ni yuma yize yili ha rede social hanji ha internet.”

12. Yika muyitukwasa mba tukakaminye ku shimbi ja Yehova ja chipi ni chipema?

¹² Kanda tukaula kunyonga cha hano hashi chize chakusolola ngwo, kulinga yuma ya upangala chili chipema. Yetu tunanyingika ngwetu, manyonga wano kali a mahuza. (Efwe. 4:19, 20) Kashika, chili chilemu kulihula ngwe, shina nakusa tachi hanga nguhone kupwa chinji hamuwika ni akwa-milimo-ni-akwetu, alongi-ni-akwetu ni atu akwo nawa waze keshi kulemesa shimbi ja Yehova? Shina nguli ni hamu lia kukalila shimbi ja Yehova chipwe ngwe atu akwo keshi kujitayiza, hanji kungumona ngwe najingala? Ngwe chize anasolola ha 2 Timoteu 2:20-22, twatamba nawa kukeya muze tunasakula masepa mu chikungulwila. Twatamba kunyingika ngwetu, mandumbu amwe mu chikungulwila hanji kechi kutukwasa hanga tununge ni kushishika kuli Yehova.

“NUNGENU NI KWENDA NGWE ANA A PANGU”

13. Yika chinalumbunuka kununga “ni kwenda ngwe ana a pangu”? (A-Efwesu 5:7-9)

¹³ Paulu kakolwezele Akwa-Kristu mu Efwesu, hi wika ko kutuhuka mu milima, alioze nawa anunge “ni kwenda ngwe ana a pangu.” (Tanga A-Efwesu 5:7-9.) Yika chino chinalumbunuka? Mu maliji akehe, chinalumbunuka ngwo mashimbu eswe, twatamba kusolola ngwetu tuli Akwa-Kristu ha yuma yeswe yize mutulinga. Jila yimwe yize muyitukwasa kuchilinga yili kutanga, ni kulilongesa Mbimbiliya ni ukwaso wa mikanda yetu. Kuchizako yino, chili chilemu kusa shindakenyo ha chilweza ni ha malongeso ja Yesu, lie “pangu lia hashi.”—Yoa. 8:12; Yishi. 6:23.

14. Kuchi spiritu yisandu yakutukwasa?

¹⁴ Nyi tunazange kununga ni kwenda “ngwe ana a pangu,” tunafupiwa nawa ukwaso wa spiritu yisandu. Mumu liaka? Mumu hano hashi,  chili chikalu kununga ni kwehuka yitanga ya luchisa. (1 Tesa. 4:3-5, 7, 8) Kashika, spiritu yisandu muyitukwasa hanga tulimike ni manyonga api a hano hashi, waze anachingi malongeso a akwa-mana a hano hashi, ni manyonga waze kalitele ni a Yehova. Spiritu yisandu muyitukwasa nawa ‘kusolola utu mu yuma yeswe ni kupwa akwa-ululi.’—Efwe. 5:9.

15. Yika muyitukwasa kutambula spiritu yisandu? (A-Efwesu 5:19, 20)

¹⁵ Jila yimwe yize muyitukwasa kutambula spiritu yisandu yili yilemba. Yesu kambile ngwenyi: Yehova mahana ‘spiritu yisandu kuli waze mamwita yo.’ (Luka 11:13) Chikwo nawa, muze twakuhalisa Yehova ha kukunguluka, twakutambula spiritu yisandu. (Tanga A-Efwesu 5:19, 20.) Yuma yize spiritu yisandu muyilinga muli yetu, ye muyitukwasa hanga tutwame mu mutapu uze muuvwisa Yehova kuwaha.

16. Yika muyitukwasa kukwata yiyulo yipema? (A-Efwesu 5:10, 17)

¹⁶ Muze tunazange kukwata chiyulo chilemu, muchilita kunyingika upale wa Yehova, mba mutulinga yuma kulita ni upale wacho. (Tanga A-Efwesu 5:10, 17.) Muze mutuwana shimbi ja mu Mbimbiliya jize jinakwate ha chikuma chetu, muchipwa ngwe twawana yize Yehova ananyongo ha yize tunambe kulinga. Mba nyi twakaula shimbi ja Yehova jize twawana, muchitukwasa kukwata yiyulo yipema.

17. Kuchi mutuhasa kuzachisa kanawa mashimbu jetu? (A-Efwesu 5:15, 16) (Tala nawa chizulie.)

¹⁷ Paulu kahanyine nawa chiyulo kuli mandumbu mu Efwesu hakutwala ku chize mazachisa mashimbu jo. (Tanga A-Efwesu 5:15, 16.) “Chingulungulu” hanji ngwetu, mukwa-kole yetu Satana, kanazange tulihulikile chinji ha yuma ya hano hashi hanga tuhone kupwa ni mashimbu a kulingila Yehova. (1 Yoa. 5:19) Chakuhona kunyingika, Mukwa-Kristu mahasa kuputuka kulihulikila chinji ha kufupa mbongo, kuya ku shikola ni ku mulimo, shimbu afupe uhashi wa kulingila chinji Yehova. Nyi yino muyilingiwa kuli Mukwa-Kristu, yili yilayi yize yinasolola ngwo haputuka kunyonga  ngwe akwa-hashi. Tunanyingika ngwetu, mbongo, kulilongesa ku shikola ni yuma yikwo ya ku musunya hi yipi ko. Alioze, yuma yino yeswe kuyatambile kupwa ha chiheta chitangu ku mwono wetu. Nyi tunazange kununga ni kwenda “ngwe ana a pangu,” ‘twatamba kuzachisa kanawa mashimbu jetu’ ha kulihulikila ha yuma yize yahiana ulemu.

18. Yika Donald alingile mba azachise kanawa mashimbu jenyi?

¹⁸ Fupa uhashi weswawo musoloka hanga ulingile chinji Yehova. Yino ye alingile Donald yoze watwama mu África do Sul. Iye yamba ngwenyi: “Nasele mashimbu hanga ngupukune ha chize te ngunazachisa mwono wami, mba yingulemba kuli Yehova ni mbunge yeswe ha kumwita hanga angukwase kukalakala chinji mu mulimo wa kwambujola. Namwichile nawa hanga angukwase kuwana mulimo uze muungwaha mashimbu akukalakala chinji mu munda. Ni ukwaso wa Yehova, yino ye yalingiwileko lume. Yami ni mukwetu-pwo, yituputuka kukalakala hamuwika mu mulimo wa shimbu lieswe.”

19. Kuchi mutuhasa kununga ni kwenda “ngwe ana a pangu”?

¹⁹ Mukanda uze Paulu asonekenene mandumbu mu Efwesu, waakwashile kununga ni kushishika kuli Yehova. Mukanda uno, muuhasa kutukwasa ni yetu. Ngwe chize twamona, muuhasa kutwaha mana a kusakula masepa ni yiheho yize mutulinga ni kutala. Unatukolweza nawa tununge ni kulilongesa Mbimbiliya hanga pangu lia umwenemwene linunge ni kusongwela mwono wetu. Chikwo nawa, unasolola ulemu wa spiritu yisandu yize yakutukwasa kupwa ni yitanga yipema. Nyi twakaula yiyulo ya Paulu yize yili mu mukanda uno, muchitukwasa kukwata yiyulo yipema hanji ngwetu, yiyulo yize yinalite ni upale wa Yehova. Kulinga yuma yino, muchitukwasa kutuhuka mu milima ya hano hashi ni kununga mu pangu!