1. Manyonga aka akupinda no amwe tuvumbi twa Yehova?

 CHAPWA chipema chinji kunyingika yize anambe ha Samu 149:4, ngwo: “Yehova kakuwahilila ni atu jenyi.” Alioze, amwe kakuhonga ku mbunge ni kuputuka kulihula ngwo: ‘Shina yami nguli lume ni utayizo wa Yehova?’ Tuvumbi twa Yehova anji ashishika ku shakulu, ha mashimbu amwe no kapwile ni manyonga ngwe wano.—1 Samue. 1:6-10; Yombi 29:2, 4; Samu 51:11.

2. Aya ali ni utayizo wa Yehova?

² Mbimbiliya yakusolola pundu ngwo atu chipwe ngwe kali yihenge, nihindu mahasa kuvwisa Yehova kuwaha ni kupwa ni utayizo wenyi. Kuchi mutuhasa kuchilinga? Mutuchilinga ha kusolola ngwetu twakufuliela muli Yesu ni kutupapachisa. (Yoa. 3:16) Nyi twachilinga, mutusolola ku mbunga ngwetu twalikonyeka ku shili yetu ni kulinga chilakenyo kuli Yehova hanga tulinge upale wenyi. (Yili. 2:38; 3:19) Yehova kakuwahilila chinji muze twakulinga yuma yino hanga tukundame kuli iye. Nyi twasa tachi hanga tumanunune chilakenyo chize twalingile, mutupwa ni utayizo wa Yehova ni kupwa masepa jenyi.—Samu 25:14.

3. Yihula yika mutukumbulula ha mutwe uno?

³ Mumu liaka atu amwe akunyonga ngwo, keshi ni utayizo wa Yehova? Yika Yehova akulinga yize yakusolola ngwo, tuli ni utayizo wenyi? Kuchi mutuhasa kupwa ni shindakenyo ngwetu, tuli ni utayizo wa Yehova?

MUMU LIAKA ATU AMWE AKUNYONGA NGWO KESHI NI UTAYIZO WA YEHOVA?

4-5. Shindakenyo yika twatamba kupwa nayo chipwe mutulivwa ngwe kutushi ni ulemu?

⁴ Anji a kuli yetu, twakulivwa ngwe kutushi ni ulemu chize ku wanuke wetu. (Samu 88:15) Ndumbu Adrián yamba ngwenyi: “Yami te nakunyonga mashimbu eswe ngwami, kuchishi ni ulemu  niumwe. Yuma yimwe yize ngunewuluka yili kulemba chize nalingile hanga asoko jami akanjile mu Paraisu. Alioze yami mwene te nakunyonga ngwami, chishi ni utayizo wa kunjilamo.” Tony, umwe ndumbu yoze alelele kuli yisemi waze hi Yela ja Yehova ko, yamba ngwenyi: “Yisemi jami te kanda achingulweza kama ngwo kakunguzanga, nawa ngwo kakuwahilila chinji ha kupwa ni yami. Chino te chakungutwala kunyonga ngwami, chishi kulinga chuma nichimwe chize chakwevwisa kuwaha.”

⁵ Nyi ha mashimbu amwe mutulivwa ngwe kutushi ni ulemu niumwe, twiwulukenu ngwetu Yehova mwene mwe watusakwile hanga tumuwayile, hi mutu mukwo ko. (Yoa. 6:44) Yehova kananyingika yitanga yetu yipema, kananyingika mbunge yetu, chikwo nawa, chize iye akutumona chinalise ni chize yetu ene twakulimona. (1 Samue. 16:7; 2 Sango 6:30) Kashika, mutuhasa kufuliela ha maliji a Yehova akwamba ngwo yetu eswe tuli alemu.—1 Yoa. 3:19, 20.

6. Kuchi postolo Paulu alivwile hakutwala ku shili yize alingile kunyima?

⁶ Muze te kanda tuchililongesa umwenemwene, amwe a kuli yetu twalingile yuma yimwe yize yakutupinjisa ndo musono. (1 Petu. 4:3) Chipwe mandumbu akwo waze akulingila Yehova ni ushishiko ha miaka yinji, ha mashimbu amwe no kakupinda ni ulelu wo. Mba yena, shina ha mashimbu amwe wakulivwa ngwe Yehova kakukonekenene ha yize walingile? Nyi che wakulivwa, chili chilemu kwiuluka ngwe chipwe tuvumbi a Yehova ashishika ku shakulu, no kapinjile ni manyonga ngwe wano. Chakutalilaho, postolo Paulu muze apwile ni kunyonga ha uhenge wenyi te keshi kulivwa kanawa. (Roma 7:24) Tunanyingika ngwetu, Paulu kalikonyekene ku shili yenyi mba yamupapachisa. Chipwe chocho, mwene te kakuliamba ngwenyi, kapwile ‘mukehe kuhiana hakachi ka apostolo,’ nawa ngwenyi, chivulumunyi “mutangu.”—1 Kori. 15:9; 1 Timo. 1:15.

7. Yika twatamba kwiuluka mashimbu eswe hakutwala ku shili yize twalingile kunyima?

⁷ Yehova kanalakenya ngwenyi, nyi twalikonyeka ku shili yetu, iye matukonekena. (Samu 86:5) Kashika, nyi mutulikonyeka ni mbunge yeswe ha shili yize twalinga, mutuhasa kupwa ni shindakenyo ngwetu ukonekeno wa Yehova uli wamwenemwene.—Kolo. 2:13.

8-9. Kuchi mutuhasa kukumba manyonga a kwamba ngwo kutushi kuvwisa Yehova kuwaha?

⁸ Yetu eswe tunazange kusa tachi hanga tulingile Yehova. Alioze, amwe kakulivwa ngwe kechi kuhasa kulingila Yehova chuma nichimwe mba apwe ni utayizo wenyi. Ndumbu wa pwo Amanda, yamba ngwenyi: “Kanji-kanji nakunyonga ngwami, kulingila Yehova ni mbunge yeswe chinalumbunuka kulinga yuma yinji kuhiana yize munguhasa. Hachino, nakulinga yuma yize chishi ni uhashi wa kuyilinga. Muze chishi kuyilinga, yami mwene nakulivwila uli ni kunyonga ngwami ni Yehova che ananguvwila.”

⁹ Kuchi mutuhasa kwehuka manyonga akwamba ngwo, kutushi kulinga yuma yize yakuvwisa Yehova kuwaha? Chuma muchitukwasa chili kwiuluka ngwetu, Yehova keshi kutwita tulinge yuma yize kutuchi kuhasa, nawa iye hi mukalu ko. Yehova kakulemesa chuma cheswacho mutuhasa kulinga, chahiana ulemu nyi twachilinga ni mbunge yimuwika. Chikwo nawa, muhasa kupukuna ha yilweza ya mu Mbimbiliya ya atu waze alingilile Yehova ni mbunge yimuwika. Tutalenu chilweza cha Paulu. Iye kalingile mulimo wa Zambi ha miaka yinji, kalingile wenyi wa tununu a tununu twa kilometru ni kukwasa kwazulula yikungulwila yinji. Alioze muze yuma ku mwono wenyi yalumukine, ni kumukwika kwambujola chinji ngwe chize apwile ni kulinga kunyima, shina Yehova kechele kulemesa yize te akulinga? Ka. Paulu kanungine ni kulinga yize te mahasa, chocho Yehova yamuwahisa. (Yili. 28:30, 31) Chizechene nawa, yize mutulingila Yehova ku mwono wetu muyihasa kwalumuka ha kupalika  cha mashimbu. Alioze chuma chilemu chili nyonga lize liakututwala mba tulinge mulimo wa Yehova. Haliapwila, tutalenu majila waze Yehova akusolwelamo ngwenyi, tuli ni utayizo wenyi.

KUCHI YEHOVA AKUSOLOLA NGWENYI TULI NI UTAYIZO WENYI?

10. Kuchi mutuhasa ‘kwivwa’ Yehova matulweza ngwenyi tuli ni utayizo wenyi? (Yoano 16:27)

¹⁰ Kupalikila mu Mbimbiliya. Mashimbu eswe Yehova kakufupa uhashi wa kusolola kuli tuvumbi twenyi ngwenyi, kakwazanga ni kuwahilila ha yize akulinga. Mbimbiliya yakuhanjika ha yisuho yaali haze Yehova alwezele Yesu ngwenyi, kali Mwanenyi yoze azanga, nawa uli ni utayizo wenyi. (Mateu 3:17; 17:5) Shina muzanga kwivwa Yehova mamba yuma ya mutapu au hali yena? Musono, Yehova keshi kuhanjika ni yetu kukatuka mu malilu, alioze kakuchilinga kupalikila mu Mbimbiliya. Mutuhasa ‘kwivwa’ Yehova matulweza ngwenyi, tuli ni utayizo wenyi muze mututanga maliji a Yesu mu Evanjelu. (Tanga Yoano 16:27.) Yesu kembulwile utu wa Tato ni ungunu weswe. Kashika, muze mututanga maliji a zango a Yesu waze ahanjikile kuli atu yihenge, mutuhasa kunyonga ngwetu, Yehova mwe unahanjika maliji jacho kuli yetu.—Yoa. 15:9, 15.

11. Mumu liaka nyi tunapalika mu yipikalo kuchalumbunukine ngwo kutushi ni utayizo wa Yehova? (Tiangu 1:12)

¹¹ Kupalikila mu yize akutulingila. Yehova kakuzanga chinji kutukwasa, ngwe chakutalilaho, ha kutwaha yize mutufupiwa ku musunya. Ha mashimbu amwe, Yehova mahasa kwecha hanga tupalike mu yimwe yipikalo ngwe chizechene chalingiwile kuli Yombi. (Yombi 1:8-11) Alioze kupalika mu yipikalo, kuchalumbunukine ngwo kutushi ni utayizo wa Yehova. Shimbu tunyonge chocho, yipikalo yakutukwasa kusolola zango ni ujikijilo wetu muli Yehova. (Tanga Tiangu 1:12.) Kashika, ha mashimbu jacho a yipikalo, mutuhasa kumona zango ni ukwaso wa Yehova uze akutwaha hanga tunyongonone.

12. Yika walilongesa ha chilweza cha ndumbu Dmitrii?

¹² Talenu yize yalingiwile kuli ndumbu Dmitrii yoze watwama mu Ásia. Iye katokesele mulimo, chocho yalinga tukweji anji chakuhona kuwana mulimo. Hachino, yatesa kulihana chinji mu mulimo wa kwambujola ha kusolola ngwenyi, kanajikijila muli Yehova. Tukweji yapalika, chipwe chocho kawanyine mulimo. Kulutwe yaputuka kuyiza chinji, ha mashimbu amwe te keshi kuhasa kukatuka ha muhela. Hachino, yaputuka kulivwa ngwe keshi lunga mupema; nawa keshi chisemi  mupema ni kulihula nyi te uchili ni utayizo wa Yehova. Ha ufuku umwe, mwanenyi wa pwo yaya ndo ni kuze te anapombo, yamutwalila lifwo haze te hali hakusoneka mukanda wa Izaia 30:15, unambe ngwo: “Mu uhwimino ni ufulielo mumukapwa tachi jenu.” Mwanenyi yamba ngwenyi: “Tata, shimbu lieswalio mulivwa ngwe unahongo iwuluka chisoneko achi.” Dmitrii yanyingika ngwenyi, ni ukwaso wa Yehova asoko jenyi kapwile ni kulia chakumbana, mazalo ni chihela cha kutwama. Iye yamba ngwenyi: “Chuma natambile kulinga wika chili kuhwima mbunge ni kununga kujikijila kuli Zambi yami.” Nyi unapalika mu yuma ngwe yino, nunga ni kufuliela ngwe Yehova makufunga ni kukukwasa hanga unyongonone.

13. Aya Yehova mahasa kuzachisa hanga asolole ngwo tuli ni utayizo wenyi, nawa mumu liaka?

¹³ Kupalikila muli mandumbu jetu. Yehova mahasa kuzachisa mandumbu jetu hanga asolole ngwenyi tuli ni utayizo wenyi. Chakutalilaho, iye mahasa kukwolweza umwe ndumbu hanga atulweze maliji a utakamiso waze tunafupiwa ha shimbu liacho. Yino ye yalingiwile kuli umwe ndumbu wa pwo mu Ásia muze te anasakalala. Iye katokesele mulimo wenyi, nawa yaputuka kuyiza chinji. Ha mashimbu waze-ene, mukwo-lunga yalinga shili yinene yamuchiza chiteli cha ukulwana. Iye yamba ngwenyi: “Chakanyingikine mumu liaka yuma yino yeswe yapwile ni kulingiwa. Hachino, yinguputuka kunyonga ngwami hanji nalingile chuma chipi; kashika Yehova keshi kuwahilila nawa ni yami.” Ndumbu yono yalemba kuli Yehova ni kumwita hanga asolole kuli iye nyi chamwenemwene te machimuzanga. Mba yika Yehova alingile? Iye yanunga ni kwamba ngwenyi: “Makulwana a mu chikungulwila kahanjikile ni yami ni kungulweza ngwo, Yehova kakunguzanga.” Ha kupalika cha mashimbu, iye yeta nawa ukwaso kuli Yehova. Mwene ngwenyi: “Tangwa lizeliene  nalembele kuli Yehova, yingutambula mukanda uze wakatukile kuli mandumbu mu chikungulwila. Muze te ngunatange mukanda wacho wa utakamiso, yingulivwa ngwami Yehova kangupanjikile.” Chochene, kanji-kanji Yehova kakusolola ngwenyi tuli ni utayizo wenyi, kupalikila mu maliji a utakamiso waze akwetu akutulweza.—Samu 10:17.

14. Jila yikwo yika yize Yehova akusolwelamo ngwenyi tuli ni utayizo wenyi?

¹⁴ Yehova kakusolola nawa utayizo wenyi hali yetu, ha kuzachisa mandumbu jetu hanga atwehe yiyulo muze mutuyifupa. Chakutalilaho, Yehova kazachishile postolo Paulu hanga asonekene yikungulwila mikanda 14 yize tunawane mu Mbimbiliya. Mu mikanda yacho, Paulu kaselemo yiyulo ya tachi, alioze ya zango. Mba mumu liaka Yehova alwezele Paulu hanga ase yiyulo yino mu mikanda yacho? Mumu Yehova kali Tata mupema, iye ‘kakufumba ana jenyi waze akuzanga.’ (Yishi. 3:11, 12) Kashika, muze mututambula chiyulo chize chinakatuka mu Mbimbiliya, kuchalumbunukine ngwo kutushi nawa ni utayizo wa Yehova, kwamba pundu muchisolola ngwo kakutuzanga. (Hepre. 12:6) Yika nawa yakusolola ngwo tukwete utayizo wa Yehova?

YUMA YIKWO YIZE YAKUSOLOLA NGWO TULI NI UTAYIZO WA YEHOVA

15. Kuli aya Yehova akuhana spiritu yisandu; nawa mumu liaka chino muchihasa kutukwasa?

¹⁵ Yehova kakuhana spiritu yisandu kuli waze iye akutayiza. (Mateu 12:18) Lihule ngwe, ‘Shina nakusa tachi hanga ngusolole chimwe chitanga cha muhuko wa ku spiritu ku mwono wami?’ Shina unahase kumona ngwe musono wakulihumikiza kuhiana chize wapwile shimbu te kanda uchipwa Chela cha Yehova? Muze mununga ni kusa tachi hanga upwe ni yitanga yipema ya spiritu yisandu ya Yehova, muchikukwasa kupwa ni shindakenyo ngwe uli lume ni utayizo wa Yehova!—Tala mushete, “ Muhuko wa Spiritu Uli . . . ”

16. Aya Yehova akuzachisa hanga ambujole sango jipema; nawa kuchi wakulivwa? (1 A-Tesalonika 2:4)

¹⁶ Yehova kakuhana mulimo ulemu wa kwambujola sango jipema kuli atu waze iye akutayiza. (Tanga 1 A-Tesalonika 2:4.) Ndumbu Jocelyn kayukile chinji ha kwambujola sango jipema kuli akwo. Tangwa limwe, Jocelyn yahinduka ni yikatashi, te kanaleme ku mbunge. Iye yamba ngwenyi: “Chakapwile ni kwivwa tachi nijimwe; nawa napwile ni kulivwa ngwe chishi ulemu. Alioze ha mashimbu jacho te ngunalingi upionelu, nawa lino liapwile tangwa liami lia kuya ni kwambujola. Hachino, yingulemba kuli  Yehova ni kuya mu munda.” Ha chimene chizechene, Jocelyn yanyingika Mary, umwe pwo wa yitanga yipema yoze watayijile kulilongesa Mbimbiliya. Ha kupalika cha amwe tukweji, Mary yamba ngwenyi, muze Jocelyn angongwele ku zuwo lienyi, iye te kanalembe kuli Yehova ni kumwita ukwaso. Yika Jocelyn alilongesele ha chikuma chino? Iye yamba ngwenyi: “Nalivwile ngwe Yehova kanangulweze ngwenyi, ‘Yena uli ni utayizo wami.’” Tunanyingika ngwetu, hi atu eswe ko matayiza sango jize twakwambujola, alioze mutuhasa kupwa ni shindakenyo ngwetu, Yehova kakuwahilila chinji muze twakusa tachi hanga tulianyine sango jipema ni akwetu.

17. Yika walilongesa hali ndumbu Vicky hakutwala ku ukuule? (Samu 5:12)

¹⁷ Yehova kahanyine ukuule hanga akwase atu waze iye akutayiza. (1 Timo. 2:5, 6) Mba yika mutwamba nyi mbunge yetu yakutuhisa ngwetu kutushi ni utayizo wa Yehova, chipwe ngwe twakufuliela chinji ha ukuule nawa hanatupapachisa? Twiulukenu ngwetu, kutuchi kuhasa kujikijila mashimbu eswe ha manyonga jetu, alioze mutuhasa kujikijila hali Yehova. Kuli Yehova, atu eswe waze akufuliela ha ukuule kakwamona ngwe angunu, nawa kanalakenya kwawahisa. (Tanga Samu 5:12; Roma 3:26) Ndumbu wa pwo avuluka ngwo Vicky, kayukile ha kunyonga chinji ha ulemu wa ukuule. Iye yamba ngwenyi: “Hanyima lia kulinga chino, yingumona ngwami Yehova kakungusolwela zango ha miaka yinji. Alioze kuli yami, chapwile ngwe ngunalweze Yehova ngwami, ‘Yena kuuchi kuzanga mutu ngwe yami. Ukuule wa Mwane kuuchi kuhasa kufuka shili yami yeswe.’” Muze Vicky anyongene ha chawana chino chilemu cha ukuule, iye yaputuka kulivwa ngwe Yehova kakumuzanga. Ni yetu nawa, nyi mutupukuna ha ukuule, mutuhasa kulivwa ngwetu Yehova kakutuzanga ni kupwa ni utayizo wenyi.

18. Shindakenyo yika mutupwa nawo nyi mutununga ni kuzanga Yehova?

¹⁸ Tunanyingika ngwetu, chipwe ngwe mutusa tachi hanga tukaule yiyulo yeswe twalilongesa ha mutwe uno, nihindu ha mashimbu amwe mutuhasa kuhona utakamiso ni kuyambashana ha utayizo wa Yehova. Nyi yino muyilingiwa kuli yena, iwuluka ngwe Yehova kakutayiza ‘waze akununga ni kumuzanga.’ (Tia. 1:12) Kashika, nunga ni kukundama chinji kuli Yehova; nawa fupa kunyingika majila eswe waze iye akuzachisa hanga asolole ngwenyi uli ni utayizo wenyi. Kanda wiza kavulama maliji wano anambe ngwo: Yehova “katwamine kusuku ni mweswe wa kuli yetu.”—Yili. 17:27.