Sango jinasolola ngwo, Yesu kamusele ngwe Sasendote wa Lutwe, muze amupapachishile ha mwaka 29 M.J. Kuchi tunachinyingika? Yesu kalisolwele ngwe chitapo ku chilumbilo cha “upale wa Zambi” muze amupapachishile. (Ngala. 1:4; Hepre. 10:5-10.) Chino chinalumbunuka ngwo, muze Yesu amupapachishile, kalihanyine hanga alinge upale wa Tato, che kwamba, kahanyine mwono wenyi. Chilumbilo chino cha chilayi, chaputukile muze Yesu amupapachishile. Ku mashimbu akunyima, chilumbilo chapwile ni ulemu unji mu tembele. Kashika, mutuhasa kwamba ngwetu, tembele ya ku spiritu yaputukile muze Yesu amupapachishile. Tembele yacho, yinalumbunuka yuma yeswe yize Yehova akulinga kupalikila mu chitapo cha ukuule wa Yesu hanga atu amuwayile mu jila yalita.—Mateu 3:16, 17; Hepre. 5:4-6.

Ku mashimbu akunyima, mu tembele mwapwile sasendote wa lutwe, kashika, mu tembele yinene ya ku spiritu nemo mwatamba kupwa sasendote wa lutwe. Yesu kamuwahishile kuli Yehova ni spiritu yisandu ni tachi hanga amanunune mulimo wacho. (Yili. 10:37, 38; Marku 1:9-11) Shindakenyo yika tuli nayo yize yinasolola ngwo, Yesu kamutongwele hanga apwe sasendote wa lutwe muze amupapachishile? Chilweza cha Arone ni asasendote akwo waze amuhingile, muchitukwasa kukumbulula chihula chino.

Shimbi ya Mose yapwile ni kwamba ngwo, mu tabernakulu, sasendote wa lutwe mwe wika watamba kunjila mu chipatulo cha Muma Musandu Mwahiana, ni cha muma Musandu Mwahiana mu tembele. Chikalakala cha hina che chapwile ni kuhandununa muma Musandu ni muma Musandu mwahiana. Sasendote wa Lutwe, kapwile wika ni kupalika sali lia chikalakala cha hina ha tangwa lia kufuka shili. (Hepre. 9:1-3, 6, 7) Arone ni malunga akwo ashishika, kapwile ni kupalika chikalakala cha hina hanga anjile Muma Musandu Mwahiana muze te haatongola hanga apwe asasendote a lutwe. Chizechene nawa, Yesu kamutongwele kuli Yehova hanga apwe Sasendote wa Lutwe muze te kanda achifwa, mba te ahase kupalika “ku chikalakala cha hina, chenacho musunya wenyi” ni kuya mu malilu. Musunya wa Yesu, wapwile ngwe chikwiko hanji chikalakala cha hina. Chitangu, Yesu te katamba kupwa Sasendote wa Lutwe mba aye mu malilu. (Hepre. 10:20) Kashika postolo Paulu ambile hakutwala kuli Yesu ngwenyi: “Kristu se kapwa sasendote mukwa lutwe . . . , ku mbalaka yinene yahiana ni yingunu yahiana, kayitungile ni moko, alioze hanjila mwilu mwene.”—Hepre. 9:11, 24.

Shina kuli umwe kalisa yoze unasolola tangwa lize usendo waha aukolesele ni lize waputukile? Kukushi kalisa. Mumu liaka? Mumu Yesu kahilukile mu malilu, hanga asolole ulemu wa mujimba wenyi kuli Zambi ha mukunda wa yetu. Yesu kalingile yuma yitatu hanga akolese usendo waha. Yuma yacho yakwashile nawa hanga usendo waha uputuke. Yuma yika yenayo?

Chitangu, Yesu yalisolola ku meso ja Yehova; chamuchiali, yasolola ulemu wa chitapo chenyi kuli Yehova; chamuchitatu, Yehova yatayiza ndando ya manyinga a Yesu. Shimbu te kanda achilinga yuma yino yitatu, usendo waha te kanda uchiputuka.

Mbimbiliya kuyishi kusolola shimbu lize Yehova atayijile ulemu wa chitapo cha Yesu. Kashika, kutwanyingikine tangwa lize akolesele usendo waha ni tangwa lize waputukile. Tunanyingika wika ngwetu, Yesu kahilukile mu malilu muze te hikwasala matangwa kumi hanga Pentekoste yiputuke. (Yili. 1:3) Ha mashimbu aze enene, Yesu yasolola ulemu wa chitapo chenyi kuli Yehova, chocho, Yehova yatayiza. (Hepre. 9:12) Chino chasolokele zwalala ha Pentekoste ya mwaka 33. (Yili. 2:1-4, 32, 33) Kwamba pundu, usendo waha te hiwaputuka.

Kashika, mutuhasa kwamba ngwetu, usendo waha kaukolesele, nawa waputukile muze Yehova atayijile ulemu wa manyinga a Yesu. Hazehene, usendo waha yiuputuka, nawa Sasendote wetu wa Lutwe, Yesu, yapwa Chitakanyishi.—Hepre. 7:25; 8:1-3, 6; 9:13-15.