MUTWE WAKULILONGESA 23
“Jina Lienu Lipwe Lisandu”
“Yehova, jina lie lia mutolo.”—SAMU 135:13.
MWASO 10 Halisa Yehova, Zambi Yetu!
CHIKUMA CHILEMU *
1-2. Yikuma yika yize yili ni ulemu unji kuli Yela ja Yehova?
CHIKUMA chilemu chinatale hali yetu musono, chili kukalila wata wa Yehova. Yetu Yela ja Yehova twakuzanga kuhanjika ni atu ha chikuma chino chilemu. Tunyingikenu ngwetu, kupwisa jina lia Zambi lisandu kuchalisele ni kukalila wata wenyi.
2 Yetu eswe hitwanyingika ngwetu, jina lia Zambi twatamba kulipwisa lisandu. Hitwanyingika nawa ngwetu, chili chilemu kukalila wata wa Yehova ni kusolola ngwo Iye mwe wanyingika kuyula kanawa. Kashika, twatamba kulemesa chinji yikuma yino yaali.
3. Jina lia Yehova linatale ha yuma yika?
3 Jina lia Yehova linatale ha yuma yinji. Linatale ni ha chize akuyula. Kashika, nyi twapwisa jina lia Yehova lisandu, mutusolola ngwo tunatayiza ngwetu, Yehova mwe wakuyula kanawa. Jina lia Yehova linatale ha chize akuyula ngwe Mukwa-Ndundo Jeswe.—Tala mushete unambe ngwo, “ Yuma Yinatale ha Chikuma Chilemu.”
4. Yika mukanda wa Samu 135:13 unambe hakutwala ku jina lia Zambi? Yihula yika mutukumbulula ha mutwe uno?
4 Jina lia Yehova lili lilemu chinji. (Tanga Samu 135:13.) Mumu liaka jina lia Zambi lili lilemu chinji? Kuchi mahuza atangu apihishile jina lia Zambi? Kuchi Zambi makapwisa jina lienyi lisandu? Kuchi mutuhasa kukwasa kukalila jina lienyi? Yihula yino ye mutukumbulula ha mutwe uno.
ULEMU WA JINA LIA MUTU
5. Yika atu amwe mahasa kulihula hakwivwa ngwo twatamba kupwisa jina lia Zambi lisandu?
5 “Jina lienu lipwe lisandu.” (Mateu 6:9) Yesu kambile ngwenyi, chino chili chikuma chilemu twatamba kuvulwoka mu yilemba yetu. Yika maliji wano a Yesu analumbunuka? Kupwisa chuma chisandu chinalumbunuka kuchipemesa. Atu amwe mahasa kulihula ngwo, ‘Jina lia Zambi hilinapu kulu lisandu, lipema, lialinanga. Mba kuchi mahasa kulipemesa nawa?’ Tutalenu chitangu yize jina lia mutu linalumbunuka mba tuwane kumbululo lia chino chihula.
6. Yika yakulemesa jina lia mutu?
6 Jina lia mutu kulialumbunukine wika chize akulisoneka hanji chize akulivulwoka. Mbimbiliya yinambe ngwo: “Lufuma mupema kanapeme kuhiana upite unene.” (Yishi. 22:1; Chilu. 7:1) Mumu liaka jina lili lilemu chinji kuhiana upite? Lili lilemu mumu linatale ha lufuma wa mutu ni yize akwo akunyonga muze mevwa jina lienyi. Kashika, ulemu wa jina kuwatalile wika ha chize akulivuluka hanji ha chize akulisoneka. Alioze, unatale ha yize atu akunyonga muze mevwa jina liacho.
7. Kuchi atu akupihisa jina lia Zambi?
7 Muze atu akuhanjika mahuza hakutwala kuli Yehova, kakupihisa lufuma wenyi. Kulinga chino, chakupihisa nawa jina lienyi. Jina lia Zambi kalipihishine chisuho chitangu mu munda wa Endene. Tutalenu yize mutulilongesa ha chize apihishile jina liacho.
CHIZE APIHISHILE JINA LIA ZAMBI HA CHISUHO CHITANGU
8. Yika Alama ni Eva anyingikine? Yihula yika mutuhasa kulihula?
8 Alama ni Eva kanyingikine pundu ngwo, Zambi jina lienyi Yehova. Kanyingikine nawa yuma yilemu yinatale ha jina lienyi. Kanyingikine ngwo iye mwe waatangile ni kwaha chihela chipema haze te atwama. (Uputu. 1:26-28; 2:18) Alioze, chipwe ngwe kapwile angunu, shina kanungile ni kupukuna ha yuma yipema yize Yehova aahele? Shina kanungine ni kukolesa zango lio hali Yehova ni kulemesa jina lienyi? Kumbululo lili ha yize alingile muze aesekele kuli mukwa-kole ya Zambi.
9. Kulita ni Uputukilo 2:16, 17 ni 3:1-5, yika Yehova alwezele Alama ni Eva? Mba yika Satana ahulile hanga aapiangule?
9 Tanga Uputukilo 2:16, 17 ni 3:1-5. Satana yazachisa kapela hanga ahule Eva ngwenyi: “Kuma, Zambi hanambe ngwenyi, kanda nulia ku mitondo yeswe ya mu munda nyi?” Chihula chino Satana ahulile Eva, chapwile ngwe muheto. Kashika, Eva yaputuka kunyonga yuma yipi hali Zambi. Alioze, Zambi kaalwezele hanga alie mihuko yeswe yapwile mu munda, kuchizako mihuko ya mutondo umuwika. Alama ni Eva te mahasa kulia mihuko yinji yalisa. (Uputu. 2:9) Kwamba pundu, Yehova kali chihanyi munene. Chipwe chocho, kalwezele Alama ni Eva ahone kulia mihuko ya mutondo umuwika. Kashika, chihula cha Satana chapwile cha mahuza. Chihula cha Satana chasolwele kuli Eva ngwe Zambi hichihanyi ko. Kota Eva yaputuka kuyambashana ngwenyi, shina Zambi kananguswekela yimwe yuma yipema nyi?
10. Kuchi Satana apihishile lufuma wa jina lia Zambi? Yika nawa yalingiwile?
10 Muze Satana ahulile chihula chino, Eva te machononokena Yehova. Kakumbulwile Satana kanawa, hakumulweza yize Zambi ambile, ni kuwezelako ngwenyi, chipwe ku mutondo te katambile kukwatako. Eva kanyingikine ngwenyi, nyi mehuka Zambi, mafwa. Alioze Satana yamwamba ngwenyi, “kufwa kunuchi kufwa.” (Uputu. 3:2-4) Hano, Satana yasolola pundu mahuza jenyi. Yapihisa lufuma wa jina lia Zambi, ni kusolola kuli Eva ngwe Zambi kali mukwa-mahuza. Chocho, Satana yapwa Ndiapu hanji chilamikiji. Eva kamwongele hakutayiza yize Satana amulwezele. (1 Timo. 2:14) Yajikijila chinji muli Satana kuhiana Yehova. Kashika Eva akwachile chiyulo chipi. Yehuka kwononokena Yehova, ha kulia muhuko uze amukanjishile, nawa yauhana kuli Alama.—Uputu. 3:6.
11. Yika yisemi jetu atangu te atamba kulinga?
11 Tuchinyongenu hakehe ha yize te Eva mahasa kukumbulula Satana. Tunyongenu ngwe Eva kakumbulwile maliji wano: “Yami chakunyingikine, nanyingika wika Tata Yehova, nakumuzanga ni kumujikijila. Iye mwe watuhele yuma yeswe tuli nayo hano. Yena uli iya mba umwambe yuma yipi? Katuka ku meso jami!” Yehova te mevwa kuwaha chinji ha kwivwa maliji a mutapu au kuli mwanenyi wa pwo! (Yishi. 27:11) Alioze, Eva kakasolwele zango lingunu hali Yehova, chipwe Alama. Kuhona zango lingunu hali Tato, che chatwalile Alama ni Eva ahone kukalila jina lia Tato, Yehova.
12. Kuchi Satana atwalile Eva hanga akakajane, yika nawa Alama ni Eva kakalingile?
12 Ngwe chize twamona, Satana kahulile yuma yize yatwalile Eva hanga ayambashane. Satana kaputukile kupihisa lufuma wa Yehova ha kutela Eva muheto hanga akakajane hakutwala ku utu wa Yehova. Hachino, Alama ni Eva yahona kukalila lufuma ni jina lia Yehova ku yuma ya mahuza yize Satana ambile. Yapanjika Satana ni kulichinga ku uhulia wenyi. Chipwe musono, Satana machinunga ni kuta miheto yacho. Nihindu kakwamba yuma ya mahuza hakutwala ku jina lia Yehova. Atu waze akutayiza mahuza a Satana, chakupwa chashi kwapiangula hanga ahone kujikijila ha wata wa Yehova.
YEHOVA KANAPWISA JINA LIENYI LISANDU
13. Kuchi Ezekiele 36:23 anashindakenya ha sango jilemu ja mu Mbimbiliya?
13 Shina Yehova kechele hanga mahuza wano anunge chakuhona kulinga nichimwe? Ka, hi chocho ko! Mbimbiliya yinasolola yize Yehova akulinga hanga apemese jina lienyi ku mahuza waze Satana ahanjikile mu munda wa Endene. (Uputu. 3:15) Kwamba umwenemwene, mutuhasa kwamba ngwetu, sango jilemu ja mu Mbimbiliya jili jino: Yehova kakupwisa jina lienyi lisandu kupalikila mu Wanangana wenyi, uze anayulu kuli mwanenyi nawa muukaneha sambukila ni ululi hano hashi. Sango jili mu Mbimbilya jakutukwasa kunyingika chize Yehova makapwisa jina lienyi lisandu.—Tanga Ezekiele 36:23.
14. Kuchi Yehova anapwisa jina lienyi lisandu hamukunda wa yize yinakalingiwa mu munda wa Endene?
14 Satana kanase tachi jinji hanga upale wa Yehova uhone kumanunuka. Chipwe chocho kechi kuhasa kuukinda. Mbimbiliya yakusolola yize Yehova akulinga ni kushindakenya ngwo kukushi niumwe ngwe iye. Tunanyingika ngwetu, Yehova kakupihilila ha uhulia wa Satana ni hali atu waze ali sali lienyi. (Samu 78:40) Alioze, Yehova kakukumba mahuza wano ni mana, uhomboloji ni ululi. Yehova kali Zambi ya ndundo, kakusolola nawa ndundo jenyi mu majila anji. Zango lienyi liakusoloka ha yuma yeswe akulinga. (1 Yoa. 4:8) Kwamba pundu, Yehova machinunga ni kupwisa jina lienyi lisandu.
Satana kalwezele Eva yuma ya mahuza hakutwala kuli Yehova, chipwe musono kananungu ni kuchilinga (Tala maparagrafu 9-10, 15) *
15. Kuchi Satana anapihisa jina lia Zambi musono, yika nawa yakulingiwa kuli atu?
15 Ni musono, Satana machinunga ni kupihisa jina lisandu lia Zambi. Iye kanongo atu hanga atayize ngwo, Zambi keshi ndundo, ululi ni zango. Chakutalilaho, Satana kakwonga atu hanga atayize ngwo, Zambi hi Sakatanga ko. Chipwe ngwe atu kakutayiza ngwo Zambi katwamako, nihindu Satana kakwonga hanga atayize ngwo shimbi ja Zambi jili jikalu chinji. Iye kakulongesa atu ngwo, Yehova kali Zambi mupi, kakwete mbunge yipi, kakwocha atu mu chitende cha kahia. Muze atu akutayiza mahuza wano, chakupwa chashi kulituna wata wa Yehova. Shimbu kanda achimunongesa, Satana manunga ni kupihisa lufuma wa jina lia Yehova, ni kweseka kukupiangula hanga upwe sali lienyi. Shina mahasa kukupiangula?
CHIKUMA CHINO CHINATALE HALI YETWESWE
16. Yuma yika muhasa kulinga yize Alama ni Eva kakalingile?
16 Chipwe ngwe tuli yihenge, nihindu Yehova kakutwaha uhashi wa kupwisa jina lienyi lisandu. Kwamba pundu, muhasa kulinga yize Alama ni Eva kakalingile. Chipwe ngwe twatwama ni atu waze akuchoka ni kupihisa jina lia Yehova, nihindu, uli ni uhashi wakupwa sali lienyi ni kwambujola umwenemwene ngwo, Yehova kali musandu, mukwa-ululi, mupema, nawa kakwete zango. (Iza. 29:23) Muhasa kusolola ngwo uli sali lienyi ha kukwasa atu anyingike ngwo Yehova mwe wakuyula ni ululi, iye mwe makaneha sambukila ni uwahililo kuli atu eswe hano hashi.—Samu 37:9, 37; 146:5, 6, 10.
17. Kuchi Yesu anyingikishine jina lia Tato kuli atu?
17 Muze twakukalila jina lia Yehova, twakwimbulula Kristu. (Yoa. 17:26) Yesu kanyingikishine jina lia Tato kuli atu. Kakapwile wika kuvuluka jina lia Zambi, alioze, kapwile nawa kulongesa atu hanga anyingike chize Yehova apwa. Chakutalilaho, A-Fwariseu kapwile ni kulongesa atu yuma yize yakusolola ngwe Yehova kali mukalu, keshi kuzanga atu, kali kusuku chinji nawa keshi keke. Alioze, Yesu kakalongesele chocho, kapwile ni kukwasa atu hanga anyingike ngwo Tato kali mutu mwashi, chihomboloji, mukwa-zango nawa mukwa-kukonekena. Yesu kembulwile kanawa yitanga ya Tato. Hachino, te muchipwa chashi atu kunyingika chize Yehova apwa.—Yoa. 14:9.
18. Kuchi mutuhasa kusolola ngwetu tunakalila jina lia Yehova?
18 Ni yetu mutuhasa kwimbulula Yesu hakulongesa atu hanga anyingike ngwo, Yehova kali mukwa-zango nawa mupema. Mutuhasa kulongesa atu hakutwala ku yize tunanyingika hali Yehova ni kusolola chize apwa. Nawa mutuhasa kwimbulula Yehova, chipwe ngwe tuli yihenge. (Efwe. 5:1, 2) Matangwa eswe twatamba kusolola mu yitanga yetu chize Yehova apwa. Nyi twalinga chino, mutupwisa jina lienyi lisandu, nawa mutukwasa atu hanga anyingike ngwo jina lia Zambi lili lisandu. Twakukalila jina lia Zambi, ha kukwasa atu hanga anyingike umwenemwene hakutwala kuli Zambi ni chize apwa. * Twakusolola nawa ngwetu, mutuhasa kununga ni kushishika kuli Yehova chipwe ngwe tuli yihenge.—Yombi 27:5.
Tukwasenu alongi jetu a Mbimbiliya hanga anyingike ngwo, Yehova kali mukwa- zango, nawa mupema (Tala maparagrafu 18-19) *
19. Kuchi Izaia 63:7, anatukwase kumona ha yize twatamba kushindakenya chinji muze tunalongesa atu?
19 Kuli yuma yikwo mutuhasa kulinga hanga tupwiswe jina lia Yehova lisandu. Muze twakulongesa atu Mbimbiliya, twakushindakenya ha wata wa Zambi hanji kusolola ngwo iye mwe uli ni ulite wa kuyula mu malilu ni hashi. Alioze, chipwe ngwe twakulongesa atu shimbi ja Zambi, chikuma chilemu chili kwakwasa hanga azange Yehova, Tata yetu ni kushishika kuli iye. Kashika, muze unalongesa shindakenya chinji ha yitanga ya Yehova. Shindakenya ha utu wa Yehova ni yize jina lienyi linalumbunuka. (Tanga Izaia 63:7.) Nyi twalinga chino, mutukwasa atu hanga azange Yehova, anunge ni kushishika kuli iye ni kumwononokena.
20. Yika mutukalilongesa ha mutwe muhataho?
20 Yika mutuhasa kulinga mba yitanga ni malongeso jetu yihalise Yehova ni kukoka atu anji kuli iye? Chihula chino mutukachikumbulula ha mutwe muuhataho.
MWASO 2 Jina Lie Yehova
^ kax. 5 Chikuma chika chilemu chinatale hali angelo ni atu? Mumu liaka chikuma chino chili chilemu? Kuchi chikuma chino chinatale hali yetu? Kunyingika kumbululo lia yihula yino, muchitukwasa kukolesa usepa wetu ni Yehova
^ kax. 18 Ku mashimbu akunyima, mikanda yetu yapwile ni kusolola ngwo jina lia Yehova kuliafupiwile kulikalila; mumu kukushi niumwe wakwamba ngwo, Zambi keshi ni ulite wa kupwa ni jina lino, Yehova. Alioze, ha makwa 2017, ha kukunguluka cha mwaka yitupwa ni ulumbunwiso waha unatale ha chikuma chino. Kasongo wa kukunguluka yamba ngwenyi: “Chili chashi, hi chipi ko kwita mu yilemba hanga tukalile jina lia Yehova, mumu jina lienyi liatamba kupwa ni lufuma mupema.”—Tala programa ya Janeiro 2018 ha jw.org®. Njila ha MIKANDA > JW BROADCASTING®.
^ kax. 62 ULUMBUNWISO WA YIZULIE: Ndiapu kapihishile jina lia Zambi hakulweza Eva ngwo, Zambi kali mukwa-mahuza. Ha kupalika cha mashimbu, Satana yalumba malongeso a mahuza akwamba ngwo, Zambi kali mukalu, nawa hi iye ko watangile atu.
^ kax. 64 ULUMBUNWISO WA YIZULIE: Umwe ndumbu kanashindakenya ha yitanga ya Zambi muze analongesa Mbimbiliya.
