“Muze aputukile kungusosomba kuli musonyami, yingumupelekenya mu kota, te ngunazange lume kumushiha.”—Paulo.

“Muze te akungulinga cheswacho chuma ku zuwo, napwile ni kutenuka chinji ni kupalula malonga ni mandoho, chuma cheswacho mungukewuka.”—Marco.

Kwamba pundu, hanji yetu kutushi kulinga yino twevwa helu. Alioze, ha mashimbu amwe hanji twakwivwa uli unji. Chino chakulingiwa mumu twahingile shili ya lunga mutangu, Alama. (Roma 5:12) Atu amwe kali ngwe Paulo ni Marco, keshi kuhasa kulihumikiza muze anevu uli. Akwo kakwecha hanga manyonga jo api aapiangule. Eka keshi kuhasa kulihumikiza muze ali ni usolo wa kulinga utanji, kunwa walwa unji hanji makanya.

Nyi mutwecha hanga manyonga api ni usolo yitusongwele, mutupihisa mwono wetu. Alioze kuli chuma chize muchihasa kutukwasa hanga twehuke yitanga yino. Chuma chika? Chihanda cha muhuko wa spiritu yisandu, kusuula. (Ngala. 5:22, 23) Mutwe uno muukumbulula yihula yitatu: (1) Kusuula yika chinalumbunuka? (2)  Mumu liaka kusuula chili ni ulemu? (3) Kuchi mutuhasa kupwa akwa-kusuula? Mba mutulilongesa yize twatamba kulinga muze muchipwa chikalu kupwa akwa-kusuula.

Mutu yoze uli ni chitanga chino, kusuula, keshi kulinga yuma chamulingila. Kakulihumikiza hanga ahone kuhanjika hanji kulinga yuma yize muyivwisa Zambi kupiha.

Yesu kasolwele yize kusuula chinalumbunuka. Mbimbiliya yinambe ngwo: “Muze amutukile, katukanyine. Muze evwile lamba, komishine; alioze walikunjikile ku moko ja Zambi yoze wakupatula ni ululi.” (1 Petu. 2:23) Muze Yesu apwile ha mutondo wa lamba kasolwele ngwenyi, kali mukwa-kusuula muze amusosombele kuli akwa-kole jenyi. (Mateu 27:39-44) Kasolwele ngwenyi kali mukwa-kusuula muze mangana a yingeleja A-Yunda amuhulile yuma yize kuyalitele hanga aakumbulule chipi. (Mateu 22:15-22) Kahichikile chilweza chipema muze A-Yunda afupile kumwasa mawe! Shimbu afunyise upi ha upi, “Yesu yaswama, yatuhuka mu Tembele.”—Yoa. 8:57-59.

Shina mutuhasa kwimbulula chilweza cha Yesu? Ewa, mutuhasa. Postolo Petulu kasonekene ngwenyi: “Kristu nawa wanuvwilile lamba, nikunuhichikila [chilweza], hanga nukakaule mu ngano jenyi.” (1 Petu. 2:21) Chipwe ngwe tuli yihenge, nihindu mutuhasa kupwa akwa-kusuula hanga tukaule chilweza cha Yesu. Mumu liaka chili chilemu kupwa akwa-kusuula?

Nyi tunazange kuvwisa Yehova kuwaha, twatamba kupwa akwa-kusuula. Chipwe ngwe twakulingila Yehova ha miaka yinji, nyi kutwakanyamine  ha yize twakuhanjika ni yize twakulinga mutuhasa kupihisa usepa wetu ni iye.

Tunyongenu ha chilweza cha Mose. Mbimbiliya yinambe ngwo: “Ha kushimbika [hanji kusuula] iye wahianyine atu eswe apwile hashi.” (Kwa. 12:3) Chipwe ngwe Mose kalihumikijine ha miaka yinji muze A-Izalele apwile ni kulinyenyeta, nihindu tangwa limwe kakahashile kulihumikiza. Iye kevwile uli unji muze A-Izalele alinyenyetele ha kuhona meya. Yamba kuli A-Izalele ni uli weswe ngwenyi: “Enu akwa kukolema, panjikenu haliapwila. Kumanyi, tunutuhwishile meya a mu liwe lino nyi?”—Kwa. 20:2-11.

Mose kakahashile kulihumikiza ha tangwa liacho. Iye kakachichimiekene Yehova ha mukunda wa meya waze atuhukile mu liwe. (Samu 106:32, 33) Ha mukunda wa chino, Yehova kakamwechele hanga anjile mu chifuchi cha chilakenyo. (Kwa. 20:12) Mose kota kalinyengene chinji ndo ha kufwa chenyi ha mukunda wa yize ambile ha kuhona kusuula.—Shimbi 3:23-27.

Yika twalilongesa ha chilweza cha Mose? Twalilongesa ngwetu, chipwe ngwe twakulingila Yehova ha miaka yinji, kutwatambile kuhona akwetu vumbi chipwe ngwe matuvwisa kupiha. (Efwe. 4:32; Kolo. 3:12) Kwamba umwenemwene, muze mutu anayi ni kukola, chakupwa chikalu kulihumikiza ha mashimbu amwe. Alioze twiwulukenu chilweza cha Mose. Kutwatambile kutokesa ushishiko wetu ha mukunda wa kuhona kusuula. Kuchi mutuhasa kupwa ni chitanga chino chilemu?

Lemba hanga wite spiritu yisandu. Mumu liaka? Mumu kusuula, chili chihanda cha muhuko wa spiritu yisandu ya Zambi, nawa Yehova kakuhana spiritu yenyi kuli waze akumwita. (Luka 11:13) Yehova mahasa kutwaha tachi jize tunafupu kupalikila mu spiritu yenyi yisandu. (Fwili. 4:13) Iye mahasa nawa kutukwasa hanga tupwe ni yihanda yikwo ya muhuko wa spiritu yize muyitukwasa hanga tukolese kusuula chetu, ngwe zango.—1 Kori. 13:5.

Ehuka yuma yize muyihasa kupihisa kusuula che. Chakutalilaho, kanda unjila mu ma site waze akusolola yuma ya sonyi hanji yuma yipi, chipwe kuyitala ha TV. (Efwe. 5:3, 4) Kwamba pundu, twatamba kwehuka yuma yeswayo yize muyitutwala hanga tulinge yuma yize kuyalitele. (Yishi. 22:3; 1 Kori. 6:12) Achinyonga hachino, nyi mutu kananyingika ngwenyi, kakwete usolo wa kulinga utanji, katambile kutala hanji kutanga yuma yize muyimutwala kulinga utanji.

 Muchihasa kupwa chikalu kukawula chiyulo chino. Alioze, nyi mutulikolweza, Yehova matwaha tachi hanga tupwe akwa-kusuula. (2 Petu. 1:5-8) Matukwasa hanga tupwe ni manyonga ni yitanga yipema. Paulo ni Marco waze twatongola helu, kahashile kwalumuna yitanga yo. Ayo kalilongesele chize mahasa kupwa akwa-kusuula. Tutalenu chilweza cha ndumbu mukwo, muze apwile ni kwendesa mashinyi, kapwile ni kuzwela ni akwo mu tapalo. Yika yamukwashile kupwa mukwa-kusuula? Iye yamba ngwenyi: “Napwile ni kulemba mashimbu eswe. Napwile ni kulilongesa mikanda yetu yize yakuhanjika hakutwala ku kusuula, ni kupachika mu mutwe yisoneko yize yakuhanjika ha chikuma chino. Hikwapalika miaka yinji chize haze naputukile kwalumuna ndako yami, nihindu ha hita tangwa muze nakuhinduka, nakuliamba yami mwene ngwami: ‘Musono ngunazange kulihumikiza.’ Nyi ngunazange kulinga chimwe chuma, nakukatuka ku zuwo ha mandemba, chino chakungukwasa nguhone kuzwela ni atu mutapalo.”

Ha mashimbu amwe chakupwa chikalu kupwa mukwa-kusuula. Muze chino muchilingiwa, hanji mutuhasa kwivwa sonyi ja kulemba kuli Yehova. Alioze, lino lie shimbu twatamba kulemba chinji. Kashika, lemba kuli Yehova haze hene. Mwite ukonekeno, nawa mwite hanga akukwase. Sako tachi hanga uhone kufunyina uhenge wacho. (Samu 51:9-11) Nyi muwita kuli Yehova ni mbunge yeswe, makumbulula yilemba ye. (Samu 102:17) Postolo Yoano kanatwiwulula ngwenyi: Manyinga ja mwana wa Zambi “kakutupemesa ku shili yeswe.” (1 Yoa. 1:7; 2:1; Samu 86:5) Twiwulukenu nawa ngwetu, Yehova kakuzanga hanga tupwe ni kukonekena akwetu mashimbu eswe. Kashika, pwako ni shindakenyo ngwo, nyi wakonekena akwenu, Yehova neye makukonekena.—Mateu 18:21, 22; Kolo. 3:13.

Yehova kevwile chinyengo chinji muze Mose echele kupwa mukwa kusuula ha mashimbu waze apwile mu puya. Chipwe chocho Yehova yamukonekena. Mbimbiliya yakwamba ngwo, Mose kali chilweza chipema cha ufulielo. (Shimbi 34:10; Hepre. 11:24-28) Yehova kakechele hanga Mose anjile mu chifuchi cha chilakenyo, alioze, makamutambula ni uwahililo mu Paraisu hano hashi ni kumwaha mwono wa mutolo. Yehova nawa makahana mwono wa mutolo kuli waze eswe akusa tachi hanga apwe akwa-kusuula.—1 Kori. 9:25.