Versu jino, jinasolola yitanga livwa yize akwa-Kristu atamba kupwa nayo. Yinambe ngwo: “Mihuko ya spiritu, zango, ni uwahililo, ni sambukila, ni kulihumikiza, ni utu, ni upeme, ni kushishika [hanji ufulielo], ni kushimbika, ni kusuula.” Alioze, chino kuchalumbunukine ngwo, spiritu yisandu ya Zambi yakutukwasa kupwa wika ni yitanga yino.

Tutalenu yize Paulu asonekene ha versu jitangu. Yasoneka ngwenyi: “Yitanga ya musunya yinasoloka ngwetu, utanji, ni luchisa, ni upangala, ni kukombelela mahamba, ni kupanda, ni kole, ni vunda, ni ukwa, ni ufwatulo, ni kulitachika, ni kulimanangana, ni kulihandununa, ni lufwachinda, ni ungalwe, ni kuzengewa, ni kuhungumuka ni yipi, ni yuma yeswe ya kulifwa ni yino.” (Ngala. 5:19-21) Liji “yuma yeswe ya kulifwa ni yino,” linasolola ngwo, Paulu te mahasa kutongola yitanga yikwo ya musunya, ngwe yize anavuluka ha A-Kolosu 3:5. Chizechene nawa, muze Paulu asonekene yitanga livwa yipema, yamba ngwenyi: “Kulimika ni yuma ngwe yino shimbi yakuhi niyimwe.” Mu limi lia Ngregu, liji “yuma ngwe yino” mulihasa kulumbununa nawa ngwo, “yuma yeswe ya kulifwa ni yino.” Yino yeswe yinasolola ngwo, Paulu te mahasa kutongola yitanga yikwo yipema ya “mihuko ya spiritu.”

Mutuhasa kunyingika kanawa yikuma yino nyi twayitesa ni yize Paulu asonekenene A-Efwesu ngwenyi: “Yitanga ya pangu yinasoloka ni upeme weswe ni ululi ni umwenemwene.” (Efwe. 5:8, 9) Chochene, “upeme” ni ululi ni umwenemwene, yili yihanda ya “yitanga ya pangu,” alioze yili nawa yihanda ya “mihuko ya spiritu.”

Paulu nawa kakolwezele Timoteu hanga akaule “ululi, ni uwayilo, ni ufulielo, ni zango, ni utunu, ni kushimbika,” yino yili yitanga yikwo yisambano. (1 Timo. 6:11) Ha yitanga yino yisambano, (zango, ni kushimbika) ye wika yili mukachi ka “mihuko ya spiritu.” Alioze, Timoteu te katamba kupwa ni ukwaso wa spiritu yisandu, mba apwe ni yitanga yikwo, ngwe: ululi, uwayilo ni utunu.—Tala nawa A-Kolosu 3:12; 2 Petulu 1:5-7.

Hachino, mutuhasa kwamba ngwetu, mukanda wa A-Ngalashia 5:22, 23, kuusolo kulumbununa yitanga yeswe yize akwa-Kristu atamba kupwa nayo. Spiritu yisandu ya Zambi muyihasa kutukwasa kupwa ni yihanda livwa ya “mihuko ya spiritu.” Alioze, kuli nawa yitanga yikwo yize twatamba kupwa nayo hanga tukole ku ufulielo ni kuzala “mutu mwaha, yoze hanamutange mu ululi ni usandu wamwenemwene nikulita ni Zambi.”—Efwe. 4:24