YETU ESWE tunanyingika ngwetu, ‘ha matangwa wano akusula,’ Yehova kanasongwela ni kufunga atu jenyi ku ufulielo. (2 Timo. 3:1) Mba yika twakulinga muze Yehova anatusongwela? Mwono wetu uli ngwe wa A-Izalele muze apwile mu puya. Muze apwile ni kwivwa chitavwi chinembi, kapwile ni kulinga yimwe.

Yehova kalwezele Mose hanga alinge yitavwi yaali ya prata. Yitavwi yacho, yapwile yakutambika nayo chikungulwila hanga chikatuke. (Kwa. 10:2) Asasendote, kapwile ni kwimba yitavwi yacho mu milali yalisa hanga atu anyingike yize te atamba kulinga. (Kwa. 10:3-8) Musono, atu ja Zambi no kakutambula usongwelo mu mutapu weka ni weka. Chino chakutwiwulula yitavwi yize apwile ni kwimba ku mashimbu akunyima. Mutulilongesa mitapu yitatu yize apwile ni kwimbilamo yitavwi yacho. Chitangu, muze akutusanyika hanga tukunguluke, chamuchaali, muze tulayi akwasanyika hanga atambule usongwelo, chamuchitatu, muze twakutambula usongwelo waha mu chikungulwila.

Mu puya, minyachi ya A-Izalele yapwile ni kusa mbalaka jo hakamwihi ni tabernakulu. Alioze, kapwile a kuhandununa mu yizavu yiwana. Ha mashimbu amwe, Yehova kapwile ni kutambika “akwa chikungulwila eswe” hanga alikungulwile ku chikolo cha tabernakulu. (Kwa. 10:3) Asasendote kapwile ni kwimbisa yitavwi yeswe yaali ha shimbu limuwika hanga atambike A-Izalele. Eswe kapwile ni kwivwa kanawa kwimba chacho. Waze apwile hakamwihi ni tabernakulu kapwile ni kuheta kawashi. Waze apwile kusuku, kapwile ni kusa tachi jinji mba ahete. Chipwe ngwe amwe kapwile kusuku, akwo hakamwihi, nihindu Yehova te kakuzanga hanga eswe alikungulule hamuwika apanjike usongwelo wenyi.

Musono, kutushi kulikungulwila mu tabernakulu. Alioze, kakutusanyika hanga tulikungulule ni atu ja Zambi. Twakulinga chino, muze twakuya ku kukunguluka cha mambonge ni kukunguluka chikwo, kuze akutulongesela usongwelo wa Yehova ni shimbi jenyi jilemu. Hashi heswe, atu ja Yehova kakulilongesa yuma yimuwika. Tuvumbi ja Yehova eswe waze akuya ku kukunguluka, kakupwa mukachi ka chizavu cha atu awahilila. Amwe katwama hakamwihi, akwo kusuku. Chipwe chocho, chili chiwape chinene kupwa ha kukunguluka chino.

Mba yika mutwamba hali mandumbu waze atwama ku yihela kusuku kuze kukushi kupwa kukunguluka chacho? Tunasakwilila chinji ha yisaji yaha yize tuli nayo, mumu yakukwasa mandumbu hanga ahase kukaula kukunguluka ha TV. Chakutalilaho, muze umwe ndumbu wa kuchishina chinene ayile ni kumeneka mutango wa ku Benin, mandumbu a mu mbonge ya Níger yize yatwama mu puya ya Saara, no kahashile kukaula katalilo wacho. Atu 21 yatala kukunguluka chacho ha TV. Hapwile mandumbu  a malunga ni a mapwo ni atu akwo. Chipwe ngwe kapwile kusuku, nihindu ayo kalivwile ngwe kali hakachi ni atu 44.131 waze apwile ha kukunguluka chacho. Umwe ndumbu yasoneka ngwenyi: “Tunasakwila chinji ha kutukwasa hanga tukaule kukunguluka chino. Yino yinasolola ngwo, nwakutuzanga chinji.”

Muze asasendote apwile ni kwimba chitavwi chimuwika, “miata, e akwa lutwe a tununu,” kapwile ni kuya ku mbalaka ya kulikungulwila. (Kwa. 10:4) Kuzekwene, Mose kapwile ni kwaha usongwelo ni fumbo lia Yehova. Yino yapwile ni kwakwasa hanga afunge kanawa minyacho yo. Nyi te uli umwe wa kuli miata jacho, kachi wapwile ni kusa tachi hanga upwe ha kukunguluka chacho.

Musono, makulwana a mu chikungulwila hi “miata” ko. Keshi kupinjisa mapanga jambala ja Zambi. (1 Petu. 5:1-3) Alioze, kakusa tachi jinji hanga afunge kanawa mapanga wano. Kashika, muze makulwana a mu chikungulwila akwasanyika aye ku shikola hanga aafumbe, ngwe ku Shikola ya Mulimo wa Wanangana, kakuya kawashi-washi. Ku shikola yacho, makulwana kakwafumba hanga alinge kanawa milimo yo mu chikungulwila. Chino chakukwasa yikungulwila hanga yitatuke mu ufulielo. Hanji kanda uchiya kama ku shikola yacho ya makulwana. Alioze, wakuyuka chinji ha ukwaso uze akukwaha kuli makulwana waze hanayi ku shikola yacho.

Ha mashimbu amwe, asasendote kapwile ni kwimba chitavwi cha kutoweza. Hachino, A-Izalele te kakunyingika ngwo, Yehova kanazange hanga atutuluke. (Kwa. 10:5, 6) Chipwe chocho, A-Izalele kapwile ni kulilulieka hanga akatuke kanawa. Alioze, kapwile ni kusa tachi jinji mba achilinge. Kota A-Izalele amwe te keshi kuzanga kwaluka mashimbu eswe. Mumu liaka?

Kota amwe kapwile ni kunyonga ngwo, yitavwi ya kututuluka kakuyimba mashimbu eswe, nawa chasusumuku. Ha yisuho yikwo, lelwa liapwile ni kumana “chize ku chingoloshi ndo” ha chimenemene. Ha yisuho yimwe lelwa liapwile ni kushimbula matangwa aali, kakweji umuwika, chipwe mwaka. (Kwa. 9:21, 22) Ha yisuho yingahi A-Izalele atutulwokele? Mukanda wa Kwalula kapitulu 33, unasolola unji wa 40 a yihela kuze A-Izalele apwile ni kutuliela.

Ha mashimbu amwe, A-Izalele amwe kapwile ni kutuliela ha yihela haze hali yizulie. Chino chapwile ni kwevwisa kuwaha, mumu kapwile ni kwenda mu “puya yeswe yinene yakola woma.” (Shimbi 1:19) Chino chapwile ngwe cheseko kuli ayo. Mumu te mahasa kunyonga ngwo, nyi makatuka ha chihela chacho, kuze maya kechi kuwana chizulie chikwo.

Muze yizavu yitangu yapwile ni kukatuka, yizavu yikwo yize yapwile ni kusala kota yapwile ni kulinyenyeta mumu lia kushimbwila. Eswe kapwile ni kwivwa chitavwi cha utowezo, alioze hi esweko te atamba kukatuka ha shimbu limuwika. Muze apwile ni kwimba chitavwi chitangu cha utowezo, minyachi ya Yunda, Yisaka ni Zapulone yize yapwile ku chivumbuko ye yapwile ni kukatuka chitangu. (Kwa. 2:3-7; 10:5, 6) Muze minyachi yino yitatu te yakukatuka, mba asasendote memba chitavwi chamuchiali cha utowezo. Chapwile utowezo hanga minyachi yitatu ya ku sule neyo yikatuke. Asasendote kapwile ni kwimba yitavwi ya utowezo ndo haze A-Izalele eswe makatuka.

Muze yuma yimwe yakwalumuka mu ululikiso wa Yehova, muchihasa kupwa chikalu kuyitayiza. Ha kwalumuka cha yuma mu ululikisa wa Yehova, muhasa kulivwa ngwe unatoko. Hanji hiunejilila ni yimwe yuma ni kunyonga ngwo, kuyatambile kwalumuka. Alioze, muze halumuna yuma yacho, muhasa kwivwa ngwe kakusa mu cheseko. Nawa muhasa kumbata mashimbu anji mba wijilile ni yuma yacho. Chipwe chocho, nyi mutusa tachi hanga tukaule usongwelo waha, Zambi matuwahisa. Ha matangwa ja Mose, Yehova kanakasongwela tununu ja atu a malunga, mapwo ni twanuke mu puya. Nyi kakaafungile ni kwasongwela kuli Yehova, kachi A-Izalele eswe kanakanongena mu puya. Ha mashimbu wano akusula, Yehova kanatusongwela ku ufulielo. Ni ukwaso wa Yehova, twakuhasa kujikiza ku ufulielo ni kutambula yiwape yinji! Kashika, muze mwivwa chitavwi cha utowezo, linga ngwe chize A-Izalele ashishika apwile ni kulinga. Kaula usongwelo: Kanda ulaluka!