1. Muze Alama ni Eva te halinga shili, yika Yehova asolwele hakutwala kuli mukwa-kole wetu?

ALAMA, te kananyingika ngwo tupela keshi kuhanjika. Kashika muze evwile ngwo kapela kahanjika ni Eva, kota Alama kanyingikine ngwenyi chimwe chitangiwa cha spiritu che chahanjikile nenyi. (Uputukilo 3:1-6) Alama ni Eva te keshi kunyingika chitangiwa chacho cha spiritu. Chipwe chocho, Alama yasakula kulichinga ni yono chilambala ni kulimika ni Tato wa zango. (1 Timoteu 2:14) Hazehene, Yehova yaputuka kusolola yuma yinji hakutwala kuli mukwa-kole yono mupi ni kulakenya ngwenyi makamwonona liakulu. Alioze Yehova yatoweza ngwenyi chitangiwa cha spiritu chize chahanjikile kupalikila muli kapela te muchilimika ni atu eswe waze akuzanga Zambi.—Uputukilo 3:15.

2, 3. Mumu liaka Yehova kakatongwele chinji Satana muze Mesaya te kanda achiza?

² Yehova kanda achitulweza jina lize alukile mungelo yoze walimikine nenyi. * (Tala maliji mushi lia lifwo.) Chize haze alimikine ni Yehova mu Endene kwapalikile miaka 2,500, mba Yehova  yasolola iya te chingalwe wacho. (Yombi 1:6) Chocho, yamunyingika ni chisanyiko “Satana,” chize chinalumbunuka ngwo “Chimika.” Mu Yisoneko ya Hepreu kanamuvuluka ha mikanda yitatu wika, 1 Sango ja Mianangana, Yombi ni Zekaria. Mumu liaka mukwa-kole yono kakamutongwele chinji muze Mesaya te kanda achiza?

³ Mu Yisoneko ya Hepreu Yehova kakalumbunwine yuma yinji hakutwala kuli Satana ni yize alingile. Mumu nyonga lize asonekene nalio Yisoneko ya Hepreu liapwile hanga atu anyingike Mesaya ni kumukaula. (Luka 24:44; A-Ngalashia 3:24) Muze Mesaya ahetele, Yehova yamuzachisa hamwe ni tumbaji twenyi hanga asolole yuma yinji hakutwala kuli Satana ni angelo waze alichingile nenyi. * (Tala maliji mushi lia lifwo.) Chino chinalite, mumu Yehova makazachisa Yesu ni akwa-Kristu akuwayisa hanga anongese Satana ni andemoniu jenyi.—A-Roma 16:20; Usolwelo 17:14; 20:10.

4. Mumu liaka kutwatambile kwivwila Ndiapu woma?

⁴ Postolo Petulu kalumbunwine Satana kanda Ndiapu ngwe ‘ndumba yoze unahuza,’ alioze Yoano yamuvuluka ngwe “kapela” nawa “Ndragau.” (1 Petulu 5:8; Usolwelo 12:9) Chipwe chocho, kutwatambile kwivwila Ndiapu woma. Mumu ndundo jenyi jili ni haze jinasulila. (Tanga Tiangu 4:7.) Yetu kakutufunga kuli Yehova, Yesu, ni angelo ashishika. Ni ukwaso wo, mutuhasa kukumba mukwa-kole wetu. Kashika twatamba kunyingika kumbululo lia yihula yilemu yitatu: (1) Ndundo ja mutapu uka Satana akwete? (2) Miheto yika Satana akuzachisa hanga apiangule atu? (3) Nawa yuma yika yize iye kechi kuhasa kulinga? Tukumbululenu yihula jacho mba tumone malongeso waze mutulilongesaho.

5, 6. Mumu liaka manguvulu ja atu kechi kuhasa kutwaha yuma yeswe yize tunafupiwa?

⁵ Angelo anji kalichingile ni Satana ha kulimika ni Zambi. Muze Sanga lia Meya te kanda lichiza, Satana yapiangula amwe akuli ayo ha kulinga utanji ni mapwo. Mbimbiliya ya kuchisolola mu maliji a chilayi muze yakwamba ngwo, Ndragau amuholwele hamwe ni yihanda yitatu ya tutongonoshi. (Uputukilo 6:1-4; Yundase 6; Usolwelo 12:3, 4) Muze angelo jacho ahichikile usoko wa Zambi, chocho yazanga hanga Satana apwe mwata wo. Kashika kutwatambile kunyonga ngwetu angelo wano yihulia kali mu ululikiso wa muvundangenye. Satana hanalulieka unguvulu uze kushi kumoneka ha kwimbulula Wanangana Zambi. Mwene hanalipwisa mwanangana, nawa hanalulieka kanawa andemoniu, hanehe ndundo, nawa hanaapwisa akwa-kuyula a hashi.—A-Efwesu 6:12.

⁶ Satana kakuzachisa ululikiso wenyi hanga asongwele manguvulu ja atu hano hashi. Mutuhasa kupwa ni shindakenyo ha maliji wano, mumu kasolwele kuli Yesu “mawanangana eswe a yifuchi ya hashi,” ni kwamba ngwenyi:  “Mungukwaha chiyulo chino cheswe ni uhenya wacho, mumu hanangukunjikacho; mba kuli mweswawo mungupala, mungumwahacho.” (Luka 4:5, 6) Chipwe chocho, manguvulu anji kakulingila atu jo yuma yipema, nawa miata waze akwete mbunge yipema kakuzanga kukwasa atu. Alioze, kukushi nguvulu wa atu niumwe yoze matwaha yuma yeswe yize tunafupiwa.—Samu 146:3, 4; Usolwelo 12:12.

7. Kuchizako manguvulu, kuchi Satana akupiangula atu hakuzachisa uwayilo wa mahuza ni misongo ya hano hashi? (Tala chizulie ha uputukilo.)

⁷ Satana ni andemoniu kakuzachisa uwayilo wa mahuza ni mingoso ya hano hashi hanga apiangule “yifuchi yeswe ya hashi,” hanji atu eswe. (Usolwelo 12:9) Satana kakuzachisa uwayilo wa mahuza hanga amwange mahuza hakutwala kuli Yehova, nawa kakusa tachi hanga asweke jina lia Zambi. (Jeremia 23:26, 27) Hachino, atu a mbunge jipema waze akunyonga ngwo kanawayila Zambi, kumana kakuwayila andemoniu. (1 A-Korindu 10:20; 2 A-Korindu 11:13-15) Satana nawa kakuzachisa mingoso ya hano hashi hanga amwange mahuza, waze akwamba ngwo, mbongo ni yikumba ye yakuneha uwahililo kuli atu. (Yishima 18:11) Atu waze akukaula mahuza jacho kakuzachisa mwono wo ni kukalakalila “Upite” alioze hi Zambi ko. (Mateu 6:24) Chipwe ngwe atu jacho te kakuzanga Zambi, acho mazanga chinji upite chocho zango lio kuli Zambi mulihwa.—Mateu 13:22; 1 Yoano 2:15, 16.

8, 9. (a) Malongeso aka aali waze mutulilongesa ha yitanga ya Alama, Eva ni angelo waze yihulia? (b) Mumu liaka chili chilemu kuli yetu kunyingika ngwetu Satana mwe unasongwela hano hashi?

⁸ Kuli malongeso aali alemu waze mutulilongesa ha yitanga ya Alama, Eva ni angelo waze yihulia. Litangu, mutulilongesa ngwetu kuli majila aali waze yetu twatamba kusakula yimwe. Mutuhasa kupwa sali lia Yehova hanji sali lia Satana. (Mateu 7:13) Liamuchiali, mutulilongesa ngwetu waze akulichinga ni Satana kakuzuka yiwape ya mashimbu akehe. Alama ni Eva kapwile ni uhashi wa kusakula ene kulinga yize yalita hanji yize kuyalitele. Nawa andemoniu kakwete jimwe ndundo hali manguvulu a hano hashi. (Uputukilo 3:22) Alioze kusakula sali lia Satana chakuneha chinji lamba. Kuchishi kuneha yiwape niyimwe!—Yombi 21:7-17; A-Ngalashia 6:7, 8.

⁹ Mumu liaka chili chipema yetu kunyingika ngwetu Satana mwe unasongwela hano hashi? Chakutukwasa hanga tupwe ni nyonga lialita hali manguvulu a hano hashi ni kutulingisa hanga twambujole sango lipema. Tunanyingika ngwetu Yehova kakuzanga hanga tuvumbike manguvulu. (1 Petulu 2:17) Iye kanatushimbwila hanga twononokene shimbi jo nyi kujishi kulimika ni shimbi jenyi. (A-Roma 13:1-4) Alioze tunanyingika nawa ngwetu twatamba kwehuka kukwasa yizavu ya mafwefwe hanji manguvulu a hano hashi. (Yoano 17:15, 16; 18:36) Amu tunanyingika ngwetu, Satana kakusa tachi hanga asweke jina lia Yehova ni kupihisa lufuma Wenyi, kashika twakusa tachi hanga tulongese atu umwenemwene hakutwala kuli Zambi. Twakwivwa kuwaha hakutuvuluka ha  jina lienyi ni kulizachisa. Nawa zango lietu hali Zambi linahiane zango lia upite hanji yikumba.—Izaia 43:10; 1 Timoteu 6:6-10.

10-12. (a) Kuchi Satana ahashile kuzachisa jimwe nguna hanga apiangule amwe angelo? (b) Yika twalilongesa ha yize alingile angelo jacho?

¹⁰ Satana kakuzachisa mana eka ni eka hanga apiangule akwo. Mba ayo alinge yuma yize iye akuzanga, Satana ha mashimbu amwe kakuzachisa jimwe nguna hanga aapiangule, nawa ha mashimbu akwo kakweevwisa woma.

¹¹ Satana kapiangwile angelo anji ha kuzachisa jimwe nguna. Kota iye te kakwaatala ha mashimbu anji hanga anyingike yize te mazachisa hanga aapiangule. Angelo amwe kalile nguna jacho, ha kulinga utanji ni mapwo. Ayo yasema ana yindululu waze te akulinga upi kuli atu eswe. (Uputukilo 6:1-4) Kuchizako utanji uze azachishile hanga apiangule angelo, Satana kota kaalakenyene nawa ngwenyi mapwa ni ndundo hali atu eswe. Hachino, kota Satana kafupile kukinda kumanunuka cha uprofeto wa Yehova hakutwala ku ‘munyachi wa pwo.’ (Uputukilo 3:15) Alioze Yehova kakamwechele hanga achilinge. Iye yaneha Sanga lia Meya, lize liapihishile nyonga lize apwile nalio Satana ni andemoniu.

¹² Yika twalilongesa ha chino? Twalilongesa ngwetu utanji ni kulizata yapwa nguna jipi jize Satana akuzachisa. Angelo waze alichingile ni Satana kalingile miaka yinji mu malilu hamwe ni Zambi! Chipwe chocho, anji akuli ayo yakaula usolo wo upi, nawa usolo wacho yiukola mu mbunge yo. Twatamba kwiwuluka mashimbu eswe ngwetu, chipwe ngwe twakulingila Yehova ha miaka yinji, nihindu usolo upi muhasa kuputuka kutanda miji mu mbunge yetu. (1 A-Korindu 10:12) Kashika hita shimbu twatamba kuhengwola yize yili mu mbunge yetu ni kwehuka manyonga a utanji hamwe ni kulizata!— A-Ngalashia 5:26; tanga A-Kolosu 3:5.

13. Nguna jikwo jika jize Satana akuzachisa, nawa kuchi mutuhasa kujehuka?

¹³ Nguna jikwo jize Satana akuzachisa jili kulinga yuma ya yipupu hanji ya wanga. Musono, iye kakulingisa atu hanga azange  yitanga ya andemoniu ha kuzachisa uwayilo wa mahuza hamwe ni yiheho. Yinema ni yiheho yikwo ya eletroniku muyihasa kusolola yipupu ngwe yuma yipema. Mba kuchi mutuhasa kwehuka nguna jacho? Kutwatambile kushimbwila ngwetu ululikiso wa Yehova utusakwile yiheho yize yalita ni kutala. Alioze twatamba kufumba shimbi yetu ya mbunge hanga tuhase kukwata yiyulo yize yalita ni shimbi ja Yehova. (A-Hepreu 5:14) Nawa nyi zango lietu kuli Zambi “kulishi ulembekese,” chino muchitukwasa kukwata yiyulo ya mana. (A-Roma 12:9) Mumu yuma yize chilembekese akwamba keshi kuyilinga. Kashika muze tunasakula yiheho, tulihulenu ngwetu: ‘Shina nakukaula shimbi jojene nakulweza akwetu hanga akaule? Yika manyonga alongi jami a Mbimbiliya ni atu akwo waze nakulongesa nyi mamona yiheho yize nakutala?’ Muze mutukaula shimbi jize twakulongesa akwetu hanga akaule, muchipwa chashi yetu kwehuka nguna ja Satana.—1 Yoano 3:18.

14. Kuchi Satana akweseka kutuvwisa woma, nawa kuchi mutuhasa kumana ngu?

¹⁴ Satana nawa kakweseka kutuvwisa woma ni kutuchikimisa hanga tuhone kushishika kuli Yehova. Chakutalilaho, kakuzachisa manguvulu hanga akanjise mulimo wetu wa kwambujola. Iye mahasa kuzachisa atu waze twakalakala no hanji waze twalilongesa no hanga atukekune mumu lia kukaula shimbi ja Mbimbiliya. (1 Petulu 4:4) Satana nawa mahasa kuzachisa asoko jetu waze akutuzanga chinji alioze hi Yela ko hanga atukanjise kuya ku kukunguluka. (Mateu 10:36) Yika mutulinga mba tumane ngu ha cheseko chino cha Satana? Yipikalo yacho kuyatambile kutukomwesa, mumu tunanyingika ngwetu Satana kanase jita ni yetu. (Usolwelo 2:10; 12:17) Chikwo nawa, twatamba kwiwuluka ngwetu chikuma chilemu chili ngwo: Satana kambile ngwenyi twakuwayila wika Yehova muze tuli kanawa alioze nyi yuma muyipiha ku mwono wetu mutumwehuka. (Yombi 1:9-11; 2:4, 5) Kashika twatamba kwita Yehova hanga atwehe tachi. Mumu tunanyingika ngwetu Yehova kechi katwehuka nilimwe tangwa.—A-Hepreu 13:5.

15. Shina Satana mahasa kutushinjila tulinge yuma yize yetwene kutwazangile kulinga? Lumbununa.

¹⁵ Satana kechi kuhasa kushinjila atu hanga alinge yuma yize ene kazangile kulinga. (Tiangu 1:14) Atu anji hano hashi keshi kunyingika ngwo kali sali lia Satana. Alioze muze mutu malilongesa umwenemwene, katamba kusakula nyi mapwa sali lia Yehova nyi lia Satana. (Yilinga 3:17; 17:30) Nyi mutwononokena shimbi ja Zambi, Satana kechi kuhasa kupihisa ushishiko wetu.—Yombi 2:3; 27:5.

16, 17. (a) Yika nawa yize Satana ni andemoniu kechi kuhasa kulinga? (b) Mumu liaka kutwatambile kwivwa woma wa kulemba kuli Yehova ni liji mwilu?

¹⁶ Kuli yuma yikwo yize Satana ni andemoniu keshi kuhasa kulinga. Chakutalilaho, Mbimbiliya kuyishi kwamba ngwo ayo kananyingika yize yatwama mu manyonga hanji mu mbunge yetu. Yehova ni Yesu e wika mahasa kunyingika yize yili mu mbunge yetu. (1 Samuele 16:7; Marku 2:8) Kutala twatamba kwivwa woma ngwetu nyi mutuhanjika hanji kulemba ni liji mwilu, Ndiapu ni andemoniu mevwa yize tunambe nawa mazachisa sango jacho hanga alimike ni yetu? Ka! Mumu liaka? Tunyongenu ha chilweza chino: Kutushi kwivwa woma wa kulinga yuma yipema mu mulimo wa Yehova mumu ngwo Ndiapu mahasa kutumona. Chizechene nawa, kutwatambile kwivwa woma wa kulemba ni liji mwilu mumu ngwo Ndiapu mahasa kutwivwa. Chikwo nawa, Mbimbiliya yakwamba ngwo tuvumbi twa Zambi kalembele ni liji mwilu ha yisuho yinji, nawa kanda tuchitangamo ngwetu ayo kevwile woma ngwo Ndiapu te mapanjika yize anambe. (1 Mianangana 8:22, 23; Yoano 11:41, 42; Yilinga 4:23, 24) Nyi mutusa tachi hanga tuhanjike ni kulinga yize Zambi akuzanga, mutuhasa kupwa ni shindakenyo ngwetu, Yehova kechi kwecha Satana hanga atulinge upi nilimwe tangwa.—Tanga Samu 34:7.

¹⁷ Tunafupiwa kunyingika kanawa mukwa-kole wetu, alioze kutwafupiwile kumuvwila woma. Chipwe ngwe tuli yihenge, nihindu ni ukwaso wa Yehova mutuhasa kukumba Satana! (1 Yoano 2:14) Nyi mutulimika nenyi, iye matuchina. (Tiangu 4:7; 1 Petulu 5:9) Musono, chinasoloka ngwe Satana kanalimika chinji ni akweze. Kuchi ayo mahasa kukumba yeseko ya Ndiapu? Mutulilongesa chikuma chacho ha mutwe uze muusulaho.