1, 2. (a) Kuchi mutuhasa kwivwa nyi susumuku mwono wetu walumuka? (Tala chizulie ha uputukilo.) (b) Kulita ni Samu 131, yika muyihasa kutukwasa hanga tupwe ni sambukila ku mbunge?

MUZE te hakalakala ku Mbetele ha miaka kuhiana 25, ndumbu Lloyd ni ndumbu Alexandra yaatuma mu munda. Kuuputukilo, kevwile yinyengo. Lloyd yamba ngwenyi: “Nanyongene ngwami chichi kakatuka ha Mbetele ni kuhika mulimo uze te nakulinga. Kuuputukilo namwene ngwe chashi, alioze hakupalika cha mashimbu, napwile ni kwivwa ngwe katumbila.” Ha mashimbu amwe, Lloyd te kakwete nyonga lialita ha yize yalingiwile ku mwono wo, alioze ha mashimbu akwo te kakunenganyana.

² Ha mashimbu amwe mwono wetu muuhasa kwalumuka susumuku, nawa mutuhasa kuzakalala chinji ku mbunge ni kuhonga. (Yishima 12:25) Nyi muchikaliwa kutayiza kwalumuka chimwe, yika mutuhasa kulinga mba tulihumikize? (Tanga Samu  131:1-3.) Tutalenu chize amwe tuvumbi twa Yehova, a ku shakulu ni a ha matangwa jetu, ahashile kulihumikiza muze mwono wo walumukine susumuku.

3. Kuchi mwono wa Yosefwe walumukine susumuku?

³ Tunyongenu ha chilweza cha Yosefwe. Iye mwe mwana yoze te Yakomba akuzanga chinji. Hachino mandumbu jenyi yamuvwila chipululu. Muze apwile ni miaka 17, yamulanjisa mu undungo. (Uputukilo 37:2-4, 23-28) Ha miaka 13 yamona lamba linji mu Engitu, chitangu ngwe kapinji mba kulutwe yamusa mu zuwo lia ususu. Yosefwe kapwile kusuku ni tato yoze te wakumuzanga chinji. Yuma yino kachi yamuhongesele ni kupihilila chinji, alioze ka. Mba yika yamukwashile?

4. (a) Yika Yosefwe alingile muze apwile mu zuwo lia ususu? (b) Kuchi Yehova akumbulwile kulemba cha Yosefwe?

⁴ Muze Yosefwe te anamono lamba mu zuwo lia ususu, kota kalihulikilile ha chize Yehova apwile ni kumukwasa. (Uputukilo 39:21; Samu 105:17-19) Iye kota kanyongene nawa ha uprofeto uze alotele muze te uchili kanuke ni kunyingika ngwenyi Yehova kapwile hamwe nenyi. (Uputukilo 37:5-11) Kota kapwile ni kulemba chinji kuli Yehova ha kumulweza yeswe yize te yili mu mbunge yenyi. (Samu 145:18) Chocho Yehova yakumbulula yilemba ya Yosefwe ni kumukolweza ngwenyi kapwile “hamwe nenyi” mu hita yipikalo yize apwile nayo.—Yilinga 7:9, 10. * (Tala maliji mushi lia lifwo.)

5. Kuchi “sambukila ya Zambi” muyihasa kutukwasa tununge ni kumuwayila?

⁵ Yipikalo yeswayo mutumona, mutuhasa kupwa ni “sambukila ya Zambi” yize ‘yakufunga mbunge jetu’ ni kulihumikiza. (Tanga A-Fwilipu 4:6, 7.) Nyi mutulipikala ni kuzakalala ku mbunge, “sambukila ya Zambi” muyihasa kutukwasa tununge ni kumuwayila chakuhona kuhonga. Haliapwila mutulilongesa yilweza ya mandumbu jetu ha matangwa wano waze apalikile mu yuma yacho.

6, 7. Kuchi kulemba muchihasa kutukwasa tupwe nawa ni sambukila ya ku mbunge? Hana chilweza.

⁶ Ryan ni Juliette kevwile yinyengo yinji, muze alwezele ngwo mecha mulimo wa pionelu walipwila. Ryan yamba ngwenyi: “Hazehene yitulemba kuli Yehova hanga tumulweze chikuma chacho. Yitunyingika ngwetu, lino liapwile shimbu lipema liakusolola ufulielo wetu kuli Yehova. Mandumbu anji mu chikungulwila chetu te aha mu umwenemwene, kashika twalembele kuli Yehova hanga atukwase tusolole chilweza chipema.”

⁷ Kuchi Yehova akumbulwile kulemba cho? Ryan yamba ngwenyi: “Muze twalembele, hazehene manyonga api ni kuzakalala chize twapwile nacho kuuputukilo yichihwa. Sambukila ya Zambi yiyifunga mbunge ni manyonga jetu. Chocho yitunyingika ngwetu, nyi mutupwa ni mbunge yipema Yehova manunga ni kutuzachisa.”

8-10. (a) Kuchi spiritu ya Zambi muyihasa kutukwasa muze tuli ni yipikalo? (b) Kuchi Yehova mahasa kutukwasa nyi mutulihulikila mu mulimo wenyi?

⁸ Spiritu ya Zambi muyihasa kutukwasa tulihumikize, ni kutusongwela mu versu ja Mbimbiliya jize mujitukwasa tumone  yuma yize yikwete ulemu ku mwono wetu. (Tanga Yoano 14:26, 27.) Tutalenu yize yalingiwile kuli Philip ni Mary, alunga ni pwo waze te hi makumbanyisa miaka 25 mu mulimo wa ku Mbetele. Ha tukweji awana, ayo yafwisa a naye eswe aali ni usoko wo mukwo, chocho yaputuka nawa kufunga tato ya Mary yoze te wakuyiza matachi.

⁹ Philip yamba ngwenyi: “Te nakwivwa ngwe yuma yeswe yinende kanawa, alioze, kuma chimwe te chinanguhono. Hachino, yinguwana chisoneko cha A-Kolosu 1:11 ha longeso lia Kaposhi wa Kutalila. Te nakunyongonona, alioze kwamba umwenemwene te hi cha ku mbunge ko. Nafupiwile kunyongonona ni ‘uhomboloji hamwe ni uwahililo.’ Versu yacho yangwiwulwile ngwo uwahililo wami kuuchi kwiza hamukunda wa chize mwono wami uli, alioze ha ukwaso wa spiritu ya Zambi.”

¹⁰ Amu Philip ni Mary alihulikilile mu milimo wa Yehova, iye yaawahisa mu milali yinji. Ha amwe mashimbu muze te hakatuka ku Mbetele, yaputuka malongeso a Mbimbiliya anji kuli atu waze te akuzanga kulilongesa ha yisuho yinji ha poso. Mary yamba ngwenyi: “Alongi jacho e apwile ni kutwaha uwahililo ni kusolola ngwo Yehova kanatulweze ngwenyi yeswe muyenda kanawa.”

11, 12. (a) Yuma yika yize Yosefwe alingile mba Yehova amuwahise? (b) Kuchi Yehova awahishile Yosefwe?

¹¹ Nyi mwono wetu walumuka susumuku, muchihasa kupwa chashi mashimbu eswe kulihulikila wika ha yipikalo yetu. Yino kachi ye yalingiwile kuli Yosefwe. Alioze, aye yasa tachi alinge yimwe hakutwala ku yipikalo yenyi. Ngwe chize Yosefwe te akukilikita ku zuwo lia Potifwa, che alingile nawa ha hita mulimo uze te akumwaha kuli kalayi wa zuwo lia ususu.—Uputukilo 39:21-23.

¹² Tangwa limwe, Yosefwe yamutongola hanga atale funge aali waze te akukalakala mu chota cha Falau. Yosefwe yaasolwela umbovu, chocho no yamuzanga chinji ni kumulweza yipikalo yo yeswe ni yuma yipi yize alotele. (Uputukilo 40:5-8) Yosefwe kakanyingikine nichimwe, kumana lusango wacho te mamutusula mu zuwo lia ususu. Hakupalika cha miaka yiali, yamuchiza mu zuwo lia ususu ni kupwa mukwa-kuyula mulemu chinji mu Engitu. Falau wika mwe wahianyine Yosefwe!—Uputukilo 41:1, 14-16, 39-41.

13. Yika mutuhasa kulinga mba Yehova atuwahise, chipwe ngwe mukulingiwa yuma yesweyo?

¹³ Ngwe Yosefwe, ni yetu mutuhasa kupwa ni yipikalo yize kutuchi kuhasa kuyihwisa  yetwene. Alioze ni mutulihumikiza ni kulinga yize mutuhasa, Yehova matuwahisa. (Samu 37:5) Chipwe mutwivwa ngwe jatuhwa mumu lia yipikalo yize tuli nayo, nihindu kutwatambile kuhonga hanji “kwecha kutalatala chetu.” (2 A-Korindu 4:8) Yehova mapwa hamwe ni yetu, chipi-chipi nyi twanunga ni kulihulikila mu mulimo wetu wa kwambujola.

14-16. Kuchi mukwa-kwambujola Fwilipu alihulikilile ha mulimo wenyi wa kwambujola chipwe muze mwono wenyi walumukine?

¹⁴ Mukwa-kwambujola Fwilipu, kasolwele chilweza chipema ha kulihulikila ha mulimo wenyi wa kwambujola chipwe muze mwono wenyi walumukine. Ha shimbu limwe, kapwile ni kuwahilila ni chiteli chenyi chaha mu Yerusaleme. (Yilinga 6:1-6) Susumuku, yuma yeswe yiyalumuka. Muze ashihile Eshetevau, akwa-Kristu kapwile mu yihungumiona yinji, chocho yachina mu Yerusaleme. Amu Fwilipu azangile kuhondangana chinji mulimo wa Yehova, chocho yaya ku mbonge ya Samaria kuze kwapwile atu waze te akuzanga kwivwa sango lipema.—Mateu 10:5; Yilinga 8:1, 5.

¹⁵ Fwilipu kazangile kuya kweswako te spiritu ya Zambi muyimusongwela. Kashika, Yehova amuzachishile hanga ambujole kuyihela kuze te atu kanda evwa kama sango lipema. A-Yunda anji te keshi kuzanga A-Samaria nawa te kakwaalinga yuma yipi. Alioze Fwilipu te keshi katonde, chocho yasa tachi hanga aambulwile sango lipema. Hachino, A-Samaria yamupanjika “ni mbunge yimuwika!”—Yilinga 8:6-8.

¹⁶ Kulutwe, spiritu ya Zambi yiyisongwela nawa Fwilipu hanga aye ni kwambujola ku mambonge a ku Azote ni Sezarea kuze kwapwile akwa-mavungu anji. (Yilinga 8:39, 40) Chocho mwono wa Fwilipu yiwalumuka nawa. Iye yapwa ni usoko. Alioze, chipwe ngwe mwono wa Fwilipu wapwile ni kwalumwoka, nihindu yalihulikila ha mulimo wenyi wa kwambujola, nawa Yehova yanunga ni kumuwahisa hamwe ni usoko wenyi.—Yilinga 21:8, 9.

17, 18. Nyi mwono wetu muwalumuka susumuku, kuchi kulihulikila ha mulimo wa kwambujola muchihasa kutukwasa?

 ¹⁷ Mandumbu anji waze ali mu mulimo wa shimbu lieswe kakwamba ngwo kulihulikila ha mulimo wo wa kwambujola chakwaakwasa kupwa ni uwahililo hamwe ni nyonga lialita, muze mwono wo muwalumuka. Chakutalilaho, muze alunga ni pwo mu África do Sul, waze avuluka ngwo Osborne ni Polite akatukile ku Mbetele, ayo kanyongene ngwe muchipwa chashi kuwana mulimo wa shimbu likehe ni zuwo hanga atwamemo. Alioze Osborne yamba ngwenyi: “Chaluyinda, twakahashile kuwana mulimo kawashi ngwe chize twanyongene.” Polite yamba ngwenyi: “Twatwamine tukweji atatu chakuhona kuwana mulimo, nawa kutwakapwile ni mbongo. Mwono wetu wakaliwile chinji.”

¹⁸ Mba yika yakwashile Osborne ni Polite ha mashimbu jacho akalu? Osborne ngwenyi: “Kwambujola hamwe ni chikungulwila chatukwashile kulihumikiza ni kupwa ni nyonga lialita.” Shimbu atwame wika ha zuwo ni kuzakalala, o yanunga ni kwambujola. Chino yichaanehena uwahililo unji! Osborne yamba nawa ngwenyi: “Twafupile milimo kuyihela yinji, hanyima mba yituyiwana.”

19-21. (a) Yika muyihasa kutukwasa mba tupwe ni sambukila ya ku mbunge? (b) Kuchi mutuhasa kuyuka muze mwono wetu muwalumuka susumuku?

¹⁹ Ngwe chize twamona, nyi mutupwa ni nyonga lialita ha yize yalumuka ku mwono wetu ni kufuliela kuli Yehova ni mbunge yeswe, mutupwa ni sambukila ya ku mbunge chipwe ngwe mukulingiwa yeswayo. (Tanga Mika 7:7.) Hakupalika cha mashimbu, mutuhasa kumona ngwetu yize yalumuka ku mwono wetu yatukwasa tupwe ni usepa ukolo ni Yehova. Polite yalumbununa ngwenyi, kukatuka ha Mbetele chamukwasa kunyingika chize mutu atamba kujikijila hali Yehova chipwe muze mwono muukaliwa chinji. Mwene ngwenyi: “Haliapwila nguli ni usendo ukolo ni Yehova.”

 ²⁰ Mary, yoze hitwatongola kulu, machilinga upionelu ni kufunga tato yoze hashinakajiwa. Yamba ngwenyi: “Hinanyingika ngwami, muze ngupalika mu yipikalo, natamba kulituchika, kulemba ni kuhwima. Longeso linene lize nalilongesa, lili lia kupwa ni kukunjika yuma yeswe mu moko ja Yehova, nawa ye natamba kununga ni kulinga kulutwe lia matangwa.”

²¹ Lloyd ni Alexandra yamba ngwo kwalumuka cha mwono wo, chesekele chinji ufulielo wo mu mutapu uze te kanda achinyonga kama. Alioze, hamona chize yeseko yacho yinanungu ni kwaakwasa. Haliapwila hanyingika ngwo ufulielo wo hi wakola ni kwaatakamisa muze mapalika mu yipikalo, nawa hapwa atu apema.

22. Yika mutupwa nayo nyi mutulinga yuma yeswayo mutuhasa kulita ni yize yinalingiwa ku mwono wetu?

²² Ha mashimbu wano, mwono wetu muuhasa kwalumuka susumuku. Mahasa kutwaha chiteli cheka mu mulimo wa Yehova, hanji mutupwa ni umwe musongo, nawa hanji mutufupiwa kufunga usoko wetu mumu lia yimwe yize yalingiwa. Alioze cheswacho muchilingiwako, tufulielenu ngwetu Yehova matufunga ni kutukwasa ha mashimbu jacho. (A-Hepreu 4:16; 1 Petulu 5:6, 7) Kashika, haliapwila linga cheswacho muhasa kulita ni yize yinalingiwa ku mwono we. Lemba kuli Tata yetu Yehova, ni kumufuliela ni mbunge ye yeswe. Hachino, yeswayo muyalumuka ku mwono wetu, nihindu mutupwa ni sambukila ya ku mbunge yize akutwaha kuli Yehova.