1, 2. (a) Mulimo uka uze wapwile ulemu ku mwono wa Yesu, nawa mumu liaka? (b) Yika twatamba kulinga hanga tufumbuke ngwe akwa “milimo-ni-akwo a Zambi”?

YESU KRISTU kapwile mukwa-kusonga-mapaya nawa kulutwe yapwa kavumbi. (Marku 6:3; A-Roma 15:8) Iye kalingile milimo yeswe yaali ni ungunu weswe. Ngwe mukwa-kusonga-mapaya, kalilongesele kuzachisa kanawa yikwata yacho hanga alinge yuma yipema kupalikila ku mapaya jacho. Nawa ngwe kavumbi, iye kazachishile chinyingi cha Yisoneko hanga akwase atu kunyingika umwenemwene wa Liji lia Zambi. (Mateu 7:28; Luka 24:32, 45) Muze Yesu apwile ni miaka 30, yecha mulimo wa kusonga-mapaya, chocho yapwa kavumbi mumu kanyingikine ngwenyi uno we mulimo ulemu te atamba kulinga. Yamba ngwenyi kwambujola sango lipema lia Wanangana wa Zambi chapwile chikuma chize Zambi amutuminyine hano hashi. (Mateu 20:28; Luka 3:23; 4:43) Yesu kahulikilile mwono wenyi ha kwambujola sango lipema, iye te kanazange hanga akwo no achilinge.—Mateu 9:35-38.

² Anji akuli yetu kutushi akwa-kusonga-mapaya, alioze yetweswe tuli tuvumbi waze akulongesa akwo sango lipema. Mulimo uno uli ulemu chinji mumu twakukalakala hamwe ni Zambi. Hachino, kashika akutuvuluka ngwo “akwa milimo-ni-akwo a  Zambi.” (1 A-Korindu 3:9; 2 A-Korindu 6:4) Tunatayiza mukwa-kwimba masamu yoze wambile ngwenyi: “Liji lie lieswe liapwa umwenemwene.” (Samu 119:159, 160) Ewa, liji lia Yehova liapwa umwenemwene. Kashika twatamba kupwa ni shindakenyo ngwetu ‘tunapatula kanawa mu liji lia umwenemwene’ mu mulimo wetu wa kwambujola. (Tanga 2 Timoteu 2:15.) Hachino, tunungenu ni kuzachisa kanawa Mbimbiliya, chikwata chetu chilemu chize twakulongesa nacho akwetu hakutwala kuli Yehova, Yesu ni Wanangana. Mba atukwase kufumbuka mu mulimo wa kwambujola, ululikiso wa Yehova wakutwaha nawa yikwata yinji yize twatamba kunyingika ni kuyizachisa kanawa. Yikwata yino yili mu Mushete wa Yikwata Yetu ya Kulongesa nayo.

3. Ha yika twatamba kulihulikila muze tuli mu munda, nawa kuchi Yilinga 13:48 muhasa kutukwasa kuchilinga?

³ Muhasa kulihula ngwe mumu liaka twakuvuluka mushete wacho ngwo, Mushete wa Yikwata ya Yakulongesa nayo, alioze hi ko mushete wa Yikwata ya Kwambujola nawo. Twakuuvuluka chocho, mumu “kwambujola” chinalumbunuka kwambulula jimwe sango, alioze “kulongesa” chinalumbunuka kulumbununa sango jacho kuli mutu hanga anyingike kanawa yize anevu ni kukaula yize analilongesa. Ha mashimbu wano akusula a chifuchi chino, twatamba kulihulikila ha kulongesa atu umwenemwene hanga no apwe tumbaji twa Kristu. Chino chinalumbunuka ngwo twatamba kulihulikila kuli atu waze “hanafunjikila ku mwono wa mutolo” ni kwakwasa hanga aputuke kuwayila Yehova.—Tanga Yilinga 13:44-48.

4. Kuchi mutuhasa kufupa atu waze “hanafunjikila ku mwono wa mutolo”?

⁴ Kuchi mutuhasa kuwana atu waze “hanafunjikila ku mwono wa mutolo”? Kuli akwa-Kristu atangu, jila yimwe yize te akuwanyinamo atu jacho chapwile kwambujola sango lipema. Yesu yalweza tumbaji twenyi ngwenyi: “Mu limbo lieswalio, hanji chihunda mununjila, nukahule hali yoze unatelamo.” (Mateu 10:11) Ni yetu ye twatamba kulinga musono. Chochene, nyi atu katayijile sango jacho hamukunda wakulizata hanji ngwo keshi kuzanga Zambi, kanda twaashimbwila ngwo mapanjika sango lipema. Twatamba kufupa atu a mbunge yipema, waze alikehesa, nawa waze anazange kunyingika umwenemwene. Mutuhasa kutesa kufupa chetu cha atu ni mulimo uze Yesu te akulinga muze apwile mukwa-kusonga-mapaya. Shimbu te kanda aputuka kulinga yimwe yikumba ngwe, chajilo, kanga, hanji yuma yikwo nawa, chitangu iye te katamba kufupa paya lipema. Iye kota te kakwanda mushete wenyi wa yikwata ni kuzachisa utotombo wenyi hanga alinge yikumba yacho. Ni musono nawa, chitangu twatamba kufupa atu a mbunge jipema waze anazenge kutupanjika, mba hi mutuzachisa mushete wetu wa yikwata ya malongeso ni utotombo hanga twaakwase kupwa tumbaji twa Kristu.—Mateu 28:19, 20.

5. Yika twatamba kunyingika hakutwala ku yikwata ya Mushete wetu wa Yikwata ya Kulongesa Nayo? Lumbununa. (Tala yizulie ha uputukilo.)

⁵ Mu Mushete wa Yikwata, hita chikwata chili ni mulimo wacho. Chakutalilaho, achinyonga ha yikwata yize Yesu azachishile ngwe mukwa-kusonga- mapaya. * (Tala maliji mushi lia lifwo.) Iye te kakufupiwa yikwata yize te meseka nayo, kufunjika, kuteta, kufulula, ni kusonga lipaya, hanga ahase kununga mapaya  jacho. Chizechene nawa, hita chikwata mu Mushete wetu wa Yikwata ya Kulongesa Nayo, chikwete mulimo wacho. Kashika, tunyingikenu chize twatamba kuzachisa yikwata yacho yilemu.

6, 7. (a) Kuchi watamba kuzachisa turtau a kunjila no ha jw.org? (b) Mumu liaka twakuzachisa papilo lia kusanyika nalio atu ku kukunguluka?

⁶ Turtau a Kunjila no ha jw.org. Mafwo wano kakukwasa atu hanga atunyingike ni kwaakwasa kunjila mu site yetu jw.org. Mu site yetu, ayo mahasa kulilongesa yuma yinji hakutwala kuli yetu nawa mahasa kwita longeso lia Mbimbiliya. Ndo haliapwila, unji wa atu kuhiana 400,000, hanete longeso lia Mbimbiliya mu site yetu jw.org, nawa kulakaji ja atu no che akulinga hita tangwa! Muhasa kupwa ni mafwo jacho ni kwaazachisa muze muhanjika ni atu waze muliwana no ha shimbu lieswalio ha tangwa.

⁷ Mapapilo a kusanyika no atu ku kukunguluka. Papilo lino liakusanyika nalio atu ku kukunguluka liakwamba ngwo: “Tunakulakenya hanga ulilongese Mbimbiliya ni Yela ja Yehova.” Kusulaho, papilo liacho linambe ngwo muhasa kuchilinga “ha kukunguluka chetu cha mbunga” “hanji ni umwe longeshi we.” Hachino, papilo liacho lia kukwasa atu hanga atunyingike ni kusanyika waze ali “yiswale mu spiritu,” hanga alilongese Mbimbiliya ni yetu. (Mateu 5:3) Ewa, atu mahasa kwiza ku kukunguluka chetu chipwe ngwe kakulilongesa Mbimbiliya hanji ka. Muze atu jacho meza ku kukunguluka chetu, ayo mamona chize mahasa kulilongesa hakutwala ku Mbimbiliya.

8. Mumu liaka chili chilemu atu kuya ha chimwe kukunguluka chetu? Hana chilweza.

⁸ Chili chilemu kununga ni kusanyika atu hanga aye ku kukunguluka chetu chipwe ha chisuho chimuwika. Mumu liaka? Mumu nyi meza, mamona ngwo Yela ja Yehova kakulongesa umwenemwene wa mu Mbimbiliya ni kwaakwasa hanga anyingike Zambi, alioze mayingeleja a mahuza keshi kuchilinga. (Izaia 65:13) Chakutalilaho, amwe waze alimbata amu Estados Unidos waze avuluka ngwo Ray ni Linda, kamwene kalisa wacho ha miaka yimwe kunyima. Ayo te kafuliela muli Zambi nawa te kanazange kumunyingika kanawa. Hachino yakwata chiyulo chakuya ku ma yingeleja eswe amu mbonge yo ni kufupa yuma yaali mba aputuke kulikungulula no. Chitangu, te katamba kulilongesa chimwe hakutwala ku hita yingeleja, chamuchiali, akwa-mayingeleja jacho katamba kuzala kanawa kulita ni chize tuvumbi twa Zambi atamba kuzala. Kwapalikile miaka jinji mumu kwapwile ma yingeleja anji. Alioze yahonga mumu kakawanyine yize te anafupu. Kakalilongesele nichimwe, nawa akwa-mayingeleja kakapwile ni kuzala mazalo ahomboka. Muze ayile mu yingeleja yakasula ha katalilo wo, chocho Linda yaya ni kukalakala alioze Ray yahiluka ku zuwo. Muze te anayi ku zuwo, yapalikila ku limwe Zuwo lia Wanangana. Hachino, yamba ngwenyi, ‘Mana nguchinjile ngumone yize yakulingiwamo.’ Ewa, chino chapwile chilweza chipema chinji! Atu eswe waze awanyine mu Zuwo lia Wanangana kapwile yimbovu, akwa-zango nawa te kanazale kanawa. Hachino, Ray yatwama kulutwe nawa yazanga chinji yize alilongesele! Chino chinatweulula yize postolo Paulu asonekene hakutwala hali mutu yoze meza ku kukunguluka chetu ha chisuho chitangu ngwenyi: “Zambi hwali hakachi kenu.” (1 A-Korindu 14:23-25) Chocho, Ray yaputuka kuya ku kukunguluka ha hita Liayenga. Kulutwe yaputuka kuya nawa ku kukunguluka cha  mukachi ka poso. Linda neye yaputuka kuya ku kukunguluka, nawa chipwe ngwe ayo te hapwa ni miaka 70, nihindu yalilongesa Mbimbiliya ni kwaapapachisa.

9, 10. (a) Mumu liaka tumafwo tuno twapwa twashi kuzachisa? (b) Lumbununa chize muzachisa lifwo Wanangana wa Zambi Yika?

⁹ Tumafwo. Tukwete mafwo nake mu mushete wetu wa yikwata ya kulongesa nayo. Mafwo jacho kali ashi kwaazachisa, nawa kapwa ashi kuputuka no lusango. Mafwo atangu waze atuhwishile ha mwaka 2013, kaafwambwishile mu unji wa tununu atano a tununu! Mafwo jacho eswe kali ni utohwe umuwika. Kashika nyi wanyingika chize muzachisa lifwo limuwika, muhasa kukalakala ni mafwo eswe! Mba kuchi muhasa kuzachisa hita lifwo hanga uputuke lusango ni mutu?

¹⁰ Hanji muzanga kuzachisa lifwo, Wanangana wa Zambi Yika? Solwela mutu chihula chize chili ha lutwe ni kumuhula ngwenyi: “Shina hiunalihula kama yize Wanangana wa Zambi unalumbunuka? Kutala muhasa kwamba ngwo. . . ?” Mba himumwita hanga asakule kumbululo limwe ha yihula yitatu yize yiliho. Shimbu umulweze nyi kumbululo lienyi linalite hanji ka, yena azulula wika lifwo ha chihanda “Yize Mbimbiliya Yakulongesa,” ni kutanga yisoneko yize yiliho ya Daniele 2:44 ni Izaia 9:6. Ha kuhwisa lusango wacho, muhule chihula chize chili kunyima, mushi lia mutwe unambe ngwo, “Achi Nyonga Kama”: “Mu Wanangana wa Zambi kuchi atu makapwa?” Mukakumbulula chihula chacho muze mukafuna ni kumumeneka. Nyi waliwana nenyi cheka, muhasa kuzachisa longeso 7 lia mukanda Sango Jipema ja Kuli Zambi! uze uli umwe wa mikanda yize twakuputuka nayo malongeso a Mbimbiliya.

11. Mikanda yika yize akutuhwisa chinji, nawa yika twatamba kunyingika ha mikanda yacho?

¹¹ Tuposhi ni Despertai!. Kaposhi wa Kutalila ni Despertai! yili mikanda yize akutuhwisa chinji hashi heswe! Amu atu mu yifuchi yinji kakutanga mikanda yino, kashika mitwe ya ha chifukilo yapwa yipema chinji hanga ayizange kuli atu aku yihela yeka ni yeka. Kashika twatamba kuzachisa kanawa mikanda yino hanga tukwase atu kulihulikila ku yuma yize yahiana ulemu ku mwono wo. Alioze, chitangu twatamba kunyingika atu waze atuhwishila hita mukanda wacho.

12. (a) Mumu liaka akutuhwisa Lawola (Despertai!), nawa ni chitela chika? (b) Yakulitakanayo yika yize ukwete mumu lia kuzachisa mukanda wacho?

¹² Lawola (Despertai!), mukanda uno kakuutuhwisa hanga ukwase atu waze kanyingikine yuma yinji hakutwala ku Mbimbiliya hanji niyimwe. Ayo hanji kanyingikine malongeso anji hakutwala kuli akwa-Kristu, keshi kufuliela pundu ku ma yingeleja, nawa hanji kanyingikine ngwo Mbimbiliya muyihasa kwaakwasa ku mwono wo. Chikuma chilemu cha Lawola (Despertai!), chili kukwasa atu hanga atayize ngwo Zambi kwali. (A-Roma 1:20; A-Hepreu 11:6) Nawa wakukwasa atu hanga afuliele mu Mbimbiliya ngwo, “chamwenemwene liji lia Zambi.” (1 A-Tesalonika 2:13) Lawola atatu a mwaka wa 2018 kali ni mitwe yino: “Jila ya Uwahililo,” “Yikuma 12 Yize Yakuneha Uwahililo mu Usoko” ni “Kukwasa Atu Waze Afwisa.”

13. (a) Mumu liaka akutuhwisa Kaposhi wa Kutalila wa mbunga? (b) Yakulitakanayo yika yize ukwete mumu lia kuzachisa mukanda wacho?

¹³ Chikuma chilemu cha Kaposhi wa Kutalila wa mbunga chili kulumbununa malongeso a Mbimbiliya kuli atu waze akufuliela muli Zambi  ni kuvumbika Mbimbiliya. Ayo mahasa kunyingika yimwe hakutwala ku Mbimbiliya, alioze keshi kuwana ulumbunwiso walita ha yize yakulongesa. (A-Roma 10:2; 1Timoteu 2:3, 4) Tuposhi atatu a mwaka wa 2018 kakumbulula yihula yino: “Shina Mbimbiliya Yichili ni Ulemu Musono?,” “Yika Tunashimbwila Kulutwe Lia Matangwa?” nawa “Shina Zambi Kakukufunga?”

14. (a) Yinema yika yiwana yize tukwete mu mushete wetu wa yikwata ya kulongesa nayo? (b) Yakulitakana nayo yika yipema yize ukwete mumu lia kusolola yinema yacho?

¹⁴ Yinema. Ha mashimbu ja Yesu yikwata yize te akuzachisa ngwe mukwa-kusonga-mapaya yapwile ya ku moko wika. Alioze musono, akwa-kusonga-mapaya kakuzachisa yikwata yize yakukalakala ni kahia ka zembwe ngwe selalo, katwala, ni kwanga. Muze twakwambujola, kuchizako mikanda yize tuli nayo, tukwete nawa yinema yipema yize twakusolwela atu. Yinema yacho, yiwana yili mu mushete wetu wa yikwata ya kulongesa nayo: Mumu Liaka Twatamba Kulilongesa Mbimbiliya?, Kuchi Longeso lia Mbimbiliya Akulilinga?, Yika Yakupwa mu Zuwo lia Wanangana?, ni Yela ja Yehova—Tuli Aya? Yinema yihi muyihasa kulinga minutu yiali hanji mushi, nawa yili yipema kuputuka nayo lusango. Yinema yisuku-yisuku muhasa kuyizachisa muze mufuna ni kumeneka atu waze akwete mashimbu. Yinema yino yili yikwata yipema chinji, mumu muyihasa kukwasa atu hanga alilongese Mbimbiliya ni kuya ku kukunguluka.

15. Kuchi atu akwivwa muze matala yinema yetu mu limi lio? Hana yilweza.

¹⁵ Chakutalilaho, umwe pangi kalitakanyine ni umwe pwo wakatukile ku Micronésia yoze te wakuhanjika limi lia Yapese. Pangi yamusolwela chinema cha kwamba ngwo, Mumu Liaka Twatamba Kulilongesa Mbimbiliya? mu limi lia Yapese. Muze chinema chaputukile, pwo wacho yamba ngwenyi: “Achi kukomoka. Chinema chino chili mu limi lietu! Iye kanahanjika ngwe atu akumahietu. Iye kanahanjika lume limi lietu!” Kusulaho pangi yamulweza ngwo iye mahasa kutanga ni kutala yinema yinji mu limi lienyi ha site yetu jw.org. (Tesa ni Yilinga 2:8, 11.) Chilweza chikwo, chili cha umwe pangi mu Estados Unidos yoze muhwa wenyi watwama mu chifuchi cheka. Pangi yatumina muhwa wenyi chinema chacho mu limi lienyi. Muze hatala chinema, yamusonekena ngwenyi: “Ha chinema chize wangutumina nazanga chinji chihanda chinambe hakutwala ku ndundo ja yoze unayulu hashi. Kashika neta longeso lia Mbimbiliya.” Chino chapwile chipema chinji mumu iye katwama mu chifuchi muze mulimo wetu hanaukanjisamo!

16. Lumbununa ulemu wa hita kamukanda: (a) Panjika Zambi Hanga Ukapwe ni Mwono wa Mutolo. (b) Sango Jipema ja Kuli Zambi! (c) Aya Analingi Upale wa Yehova Musono?

¹⁶ Tumikanda. Kuchi mutuhasa kulongesa umwenemwene kuli atu waze kanyingikine kutanga kanawa hanji waze keshi ni mukanda mu limi lio? Mutuhasa kuzachisa mukanda Panjika Zambi Hanga Ukapwe ni Mwono wa Mutolo. * (Tala maliji mushi lia lifwo.) Mukanda upema uze mutuhasa kuputuka nawo longeso lia Mbimbiliya uli Sango Jipema ja Kuli Zambi! Muhasa kusolwela mutu yikuma 14 yize yili kunyima lia chifukilo ni kumuhula chikuma chize iye azanga chinji. Kusulaho, putuka lume longeso lia Mbimbiliya ni mutu  wacho. Shina hiunachilinga kama ha kufuna ni kumeneka mutu? Mukanda wamuchitatu uze tukwete mu mushete wetu wa yikwata ya malongeso uli Aya Analingi Upale wa Yehova Musono? Mukanda uno kaulingile hanga ukwase atu waze analilongesa Mbimbiliya anyingike ululikiso wetu. Mba unyingike kanawa chize muzachisa mukanda uno kuli hita longi wa Mbimbiliya, tala Mukanda Wakuzachisa ha Kukunguluka wa Março 2017 Mwono Wetu ni Mulimo Wetu.

17. (a) Mikanda yino yaali hita mukanda ulemu uka ukwete? (b) Yika waze eswe hanapapachisa atamba kulinga, nawa mumu liaka?

¹⁷ Mikanda. Muze hiwaputuka kulongesa mutu Mbimbiliya hakuzachisa kamukanda, kulutwe muhasa kulilongesa nenyi mukanda Yika Mbimbiliya Muyihasa Kutulongesa? Mukanda uno muhasa kukwasa mutu kunyingika malongeso alemu a mu Mbimbiliya. Nyi longi makola ku ufulielo ni kuhwisa mukanda uno, muhasa kununga ni kulilongesa nenyi mukanda Lifungenu mu Zango lia Zambi. Mukanda uno muukwasa longi amone chize makaula shimbi ja Mbimbiliya ku mwono wenyi hita tangwa. Iwuluka ngwe, chipwe muze mamupapachisa, nihindu katamba kununga ni kulilongesa mukanda wacho ndo haze mauhwishila. Chino muchimukwasa hanga akolese ufulielo wenyi kuli Yehova ni kununga ni kushishika kuli iye.—Tanga A-Kolosu 2:6, 7.

18. (a) Amu twakulongesa umwenemwene kuli atu, yika 1 Timoteu 4:16 unatukolweza kulinga, nawa yika mutuyuka? (b) Nyonga lika tukwete hakuzachisa Mushete wetu wa Yikwata ya Kulongesa nayo?

¹⁸ Ngwe Yela ja Yehova, tukwete chiteli chakulongesa atu “umwenemwene wa sango lipema” uze muhasa kwakwasa kupwa ni mwono wa mutolo. (A-Kolosu 1:5; tanga 1 Timoteu 4:16.) Mba atukwase kuchilinga, tukwete Mushete wa Yikwata ya Kulongesa nayo yize tunafupiwa. (Tala “ Mushete wa Yikwata ya Kulongesa nayo.”) Kashika tuzachisenu kanawa yikwata yacho. Hita umwe wa kuli yetu mahasa kusakula yikwata ya malongeso yize mazachisa ha shimbu lieswalio mazanga. Alioze tunyingikenu ngwetu, nyonga lietu hi wika ko kuhana mikanda kuli atu, nawa kutwatambile kuhana mikanda kuli atu waze keshi kusolola zango ha sango lipema. Nyonga lietu lili lia kutayisa tumbaji atu a mbunge yipema waze anazange kutupanjika, waze alikehesa, ni waze “hanafunjikila ku mwono wa mutolo,” anazange lume kulingila Zambi.—Yilinga 13:48; Mateu 28:19, 20.