NASEMUKINE ha mwaka 1934. Yisemi jami, Fred ni Edna Molohan, te Alongi a Mbimbiliya (Yela ja Yehova) ha miaka 20. Nakuwahilila chinji hakungulongesa kuzanga Yehova. Te twatwama mu Parsons, yimwe mbonge yikehe ku sango lia Kansas. Anji akuli yetu mu chikungulwila te tuli akuwayisa. Asoko jami kapwile ni kuya ku kukunguluka ni kwambujola sango lipema mashimbu eswe. Liaposo chingoloshi, te twakuya ni kwambujola mu matapalo, mulimo wacho we tunavuluka ngwo kwambujola ha mbunga. Ha mashimbu amwe te twakuhonga, alioze Tata te kakutulanjila yimwe muze mutuhwisa kwambujola.

Chikungulwila chetu chikehe chapwile ni njiza yinene, mwapwile ma fazenda anji ni mambonge anji akehe-akehe. Shimbu atwehe mbongo mumu lia mikanda yetu, atu te kakutwaha mulengi, monda, tusumbi hanji ni yuma yikwo nawa. Tata te kakulianga kakuhana mbongo ja mikanda yize mutuhana mu munda, hanga kulia chize atu matwaha chipwe ni chetu.

Yisemi jami kapwile ni fonografu yize te akuzachisa mu mulimo wa kwambujola. Ami kuchakapwile ni kuyizachisa mumu te nguchili kanuke, alioze te nakuzanga kukwasa Tata ni Mama hanga tuse pande ja Ndumbu Rutherford ha kufuna ni kumeneka atu hamwe ni alongi a Mbimbiliya.

Tata yakasa chitavwi chinene helu lia mashinyi jetu, Ford wa mwaka 1936, chocho yaapwisa a maliji a kukopa. Uno wapwile mulimo unene chinji. Kanji-kanji, te twakulianga kwimbisa miaso hanga atu akundame, mba mutusa pande ja Mbimbiliya. Kusulaho te twakuhana mikanda kuli atu waze mazanga kulilongesa Mbimbiliya.

Mu mbonge yikehe ya Cherryvale, Kansas, Tata te kakuya ni mashinyi jacho ndo ha Parque haze te hakuya atu anji hanga ahwime ha Liayenga. Hachino, pulisha yeza ni yalweza Tata ngwenyi te katamba kwatwala mashinyi sali likwo lia parque. Chocho Tata yatwala mashinyi mu tapalo yikwo ya parque hanga  atu ahase kwivwa kanawa pande jacho. Te nakuzanga chinji kupwa hamwe ni Tata ni yaya Jerry, ha mashimbu ngwe wano.

Ha miaka yino yeswe, te twakulinga mulimo wa kwambujola chalipwila mu njiza muze atu anji te akulimika ni yetu. Ngwe chize nambanga kuuputukilo, te twakuhinduka ha muchima wa ufuku hanga tuye ni kuhichika tumafwo mu yikolo ya mazuwo ja atu. Ni twahwisa, te twaliwana haze lia mbonge hanga tunyingike nyi pulisha kakwata umwe wa kuli yetu.

Kwambujola chikwo chipema chapwile cha kwendanda mu matapalo ni mapapilo a kusoneka. Te twakulizezeleka mapapilo jacho hanga twende mu mbonge yeswe. Nguneuluka tangwa limwe, mandumbu yeza mu mbonge yetu ni kwenda ni mapapilo waze te anambe ngwo, “Uwayilo wa mahuza uli muheto nawa chuma chakuhanga nacho atu.” Ayo yaputukila ku zuwo lietu yenda tando yimuwika ni ndambu, mba yafuna nawa ku zuwo lietu. Chapwile chipema mumu niumwe kakakwikile, alioze atu anji kazangile kunyingika yize te ayo analingi.

Usoko wami te kakulinga wenyi wa kuya ku kukunguluka cha mambonge mu Texas. Tata te kakukalakala ku utulilo wa masuwa, kashika te chakupwa chashi kukwata masuwa awana hanga tuye ku kukunguluka cha mambonge ni kumeneka asoko jetu. Yayo ya mama, Fred Wismar ni mukwo-pwo Eulalie, te katwama mu Temple, Texas. Matu Fred kalilongesele umwenemwene kuuputukilo wa mwaka 1900, muze te uchili mukweze ni kumupapachisa. Nawa yalweza anakwo kuchingako ni mama yuma yize te analilongesa. Mandumbu amu central ya Texas kanyingikine kanawa Matu Fred mumu kapwile kavumbi wa mbonge, (yoze haliapwila twakuvuluka ngwo kalayi wa mbonge). Iye kapwile chimbovu, mukwa-zango, nawa te kakulihana, iye kanguhichikilile chilweza chipema.

Ha mwaka 1941, twakwachile masuwa hanga tuye ku kukunguluka cha mambonge mu St. Louis mu Missouri. Akweze eswe yaasanyika atwame hakamwihi ni palku hanga apanjike pande ja Ndumbu Rutherford jize jambile ngwo, “Ana ja Mwanangana.” Kusongo lia pande akweze eswe 15,000 yakomoka chinji. Ndumbu Rutherford ni waze apwile no yatwaha mukanda waha, wakwamba ngwo Twanuke.

Ha Abril wa mwaka 1943 yituya ku Kukunguluka cha Mbonge chapwile ni mutwe wakwamba ngwo, “Kulinga Chimwe” mu Coffeyville, Kansas. Chocho, yitwivwa mutambi wakwamba ngwo, yikungulwila yeswe te muyipwa ni Shikola yaha ya Milimo ya Zambi. Nawa yitutambula umwe mukanda te ukwete malongeso 52 uze te mutuzachisa ku shikola yacho. Kulutwe lia mwaka wacho, yinguhanjika pande jitangu ngwe longi ha kukunguluka. Nawa kukunguluka chino chapwile chilemu chinji kuli yami, mumu he angupapachishile hamwe ni akwetu akwo mu chitende chize chapwile hakamwihi ni yimwe fazenda.

Nahwishile shikola yikehe ha mwaka 1951, nawa te natamba kukwata chiyulo cha yize ngulinga ku mwono wami. Yaya Jerry te kakukalakala ku Mbetele. Ni yami te nakuzanga chinji kuya ku Mbetele, hachino, yingushinala mukanda wa kuya ku Mbetele. Ha mwaka 1952 ha tangwa 10 lia Março, yangusanyika ku Mbetele, chocho yinguputuka kukalakala ko. Chino chapwile chiyulo chipema chize changukwashile kuwayila Zambi ni mbunge yeswe.

Ami te nakuzanga kukalakala ku gráfica hanga ngukwase kutuhwisa tuposhi ni mikanda yikwo. Alioze kanguseleko. Hachino yangusa ngwe garson mba kulutwe yangusa ku chikuku. Yinguzanga mulimo wacho nawa yingulilongesa yuma yinji. Te twakukalakala ha amwe maola kashika te ngukwete mashimbu waze te chishi kukalakala. Kanji-kanji te nakuya mu utulikilo wa mikanda ku Mbetele ni kuzachisa mikanda yinji hanga ngulinge longeso liami lia wika. Yino yangukwashile kukolesa ufulielo ni usepa wami ni Yehova. Chocho yingusa tachi ja kununga ni kulingila Yehova ku Mbetele. Jerry kakatukile ku Mbetele ha mwaka 1949 mba yalimbata ni Patricia, alioze o te katwama hakamwihi ni Brooklyn nawa te kakungukwasa ni kungutakamisa mumu ami te nguchili mwaha ku Mbetele.

Muze nahetele lume ku Mbetele, mandumbu yaputuka kufupa ma Mbetelita waze te mahasa  kuwezela ha katalilo wa akwa-kuhanjika pande aku Mbetele. Mandumbu waze apwile ku katalilo wacho yaaha chiteli cha kumeka yikungulwila yize te yatwama ha tando 320, kukatuka ku Brooklyn. Ayo te kakuhanjika pande ja mbunga ni kwambujola hamwe ni chikungulwila. Ni yami napwile umwe wa kuli mandumbu waze asakwile. Yinguputuka kumeneka yikungulwila ni kulinga pande ja mbunga chipwe ngwe kuuputukilo te nakwivwa woma. Ha mashimbu jacho pande ja mbunga te jakulinga ola yimuwika. Kanji-kanji te nakuya ni kumeneka yikungulwila ni masuwa. Ngunewuluka kanawa ha chimwe chingoloshi Liayenga ha mwaka 1954. Nanyinyine mu masuwa hanga ngufune ku Nova York, alioze te natamba kuheta ku Mbetele ha chingoloshi cha ufuku. Alioze mu jila yikuputuka umwe kangonga ni fuji yinji hamwe ni nevwe. Masuwa yafwa chocho chakahashile kuheta ku Nova York ndo ha mandemba Liakasoka. Yingunyina mu masuwa eka waze te anayi ku Brooklyn, muze nahetele yinguya lume ni kukalakala ku chikuku. Nalalukile ku mulimo nawa te ngunahongo chinji mumu chakapombele ufuku weswe. Alioze te ngunawahilila chinji ha kumeka yikungulwila ni kunyingika mandumbu anji aha, yino yahianyine lamba lieswalio namwene.

Ha miaka yami yitangu ku Mbetele, ni yinguputuka nawa kukalakala ku katalilo wa longeso lia Mbimbiliya lize te akutuhwisa hita poso ku chisaji cha WBBR. Chipatulo cha kukopela chapwile ku zuwo lia mu Columbia Heights 124. Ndumbu Alexander H. Macmillan, yoze te hakalakala ha Mbetele miaka yinji, neye te kwe akukalakala. Te twakumusanyika ngwo Ndumbu Mac. Iye kapwile chilweza chipema kuli yetu akweze ku Mbetele, mumu kanungine ni kushishika chipwe ngwe kapalikile mu yihungumiona yinji.

Ha mwaka 1958, yanguchiza ha mulimo uze napwile ni kulinga, chocho yinguputuka kukalakala ku Shikola ya Ngiliate. Te nakukwasa mandumbu hanga atambule vistu, ni kwaaluliekela wenyi. Wenyi wa ndeke wapwile ni kufwika ndando yinji, kashika alongi waze te akuya ku África ni Azia te kakuya mu ulungu. Hakupalika cha miaka, muze ndando yaputuka kutepuluka ku ndeke, mishionaliu anji yaputuka kuya ni ndeke ku yiteli yo.

Ha mwaka 1960, yingululieke wenyi wa ndeke kukatuka ku Estados Unidos hanga tuye ku kukunguluka cha mambonge cha yifuchi yinji ku Europa ha mwaka 1961. Nayile ha chimwe kukunguluka chacho mu Hamburg, Alemanha. Ha kuhwa cha kukunguluka, mandumbu atatu aku Mbetele hamwe ni yami yitulukala amwe mashinyi kukatuka mu Alemanha ni kuya ku Itália hanga tumeneke mutango wa mu Roma. Koko, yituya mu França, yitupalikila ku milundu ya Pireneus ni kunjila mu Espanha, kuze mulimo wetu wapwile wa kukanjisa. Twahashile kuhana mikanda yimwe kuli mandumbu mu Barcelona, yize twaluliekele ngwe yawana. Ayo kanakawahilila chinji! Muze twakatukile ko, yituya ku Amsterdã, mba yitufuna ku Nova York.

Ha mwaka 1962 yangwaha chiteli chakululieka wenyi wa mandumbu 583, waze te maya ku kukunguluka  cha mambonge cha hashi heswe. Kukunguluka chacho ha 1963, chapwile ni mutwe wakwamba ngwo, “Sango Lipema lia Mutolo.” Mandumbu jacho te maya ku kukunguluka cha mu Europa, Azia ni mu Pacífico Sul, mba hi maya mu Honolulu, Havaí, kusulaho mu Pasadena, Califórnia. Ayo nawa te maya ku Líbano ni Jordánia, uno wapwile wenyi ulemu chinji mumu kamenekene yihela yize asonekenene Mbimbiliya. Chipatulo chetu yichilanda mbiliete ja ndeke ni kufweta mazuwo waze te mandumbu matwama.

Mwaka 1963, wapwile ulemu chinji kuli yami ha chikuma chikwo nawa. Ha 29 ya Junho, yingulimbata ni Lila Rogers, wa ku Missouri, yoze wayile ku Mbetele ha mwaka 1960. Hakupalika cha poso yimuwika muze twalimbachile, yami ni Lila yituputuka kumeneka yikungulwila mu Grécia, Egito ni Líbano. Koko, yitukwata ndeke ni kuya ku Jordánia. Alioze, mulimo wetu te hanaukanjisako nawa manguvulu te keshi kuhana vistu kuli Yela ja Yehova. Kashika, kutwakanyingikine yize te muyilingiwako muze mutuheta. Alioze muze twaheteleko, tunakomoka ni kuwahilila ha kumona chizavu cha mandumbu ku chipalo cha ndeke kanatushimbwila ni mapapilo akusoneka ngwo, “Tambwokenu Yela ja Yehova!” Chapwile chipema chinji kumeneka yifuchi yize asonekenene Mbimbiliya ni kumona yihela yize Apalahama, Izake ni Yakomba atwamine, kuze Yesu ni apostolo ambulwile sango lipema, ni kuze Ukristu waputukile kulitanda “ndo ku kusula songo lia hashi.”—Yilinga 13:47.

Ha miaka 55, Lila nihindu kali chikwashi washishika ha milimo yeswe yize twakulinga. Twamenekene Espanha ni Portugal ha yisuho yinji muze mulimo wetu wapwile wakukanjisa. Twakolwezele mandumbu ni kwatwalila mikanda ni yuma yikwo nawa yize te anafupiwa. Twahashile nawa kumeneka mandumbu amwe, waze apwile mu muzwo lia ususu ku Cádiz, Espanha. Nawahililile chinji ha kuhanjikila pande ja utakamiso.

Ha miaka 1963, twaluliekele wenyi wa kuya ku kukunguluka cha mambonge cha yifuchi yinji mu África, Austrália, América Central ni Sul, Europa, Extremo Oriente, Havai, Nova Zelândia ni Porto Rico. Yami ni Lila twayile ku kukunguluka cha mambonge chize kutushi kavulama, ngwe ku Varsóvia mu Polónia ha mwaka 1989. Mandumbu anji amu Rússia kahashile kwiza ku kukunguluka chino chinene. Chino chapwile kukunguluka cho chitangu! Twanyingikine mandumbu waze apwile mu mazuwo a ususu ha miaka yinji mu União Soviética mumu lia ufulielo wo.

Chiteli chikwo chize nazangile chinji chapwile cha kumeneka ni kutakamisa asoko aku Mbetele ni mishionaliu hashi heswe. Wenyi wetu wakasula, twayile ku Coréia do Sul ni kulitakana ni mandumbu 50 waze apwile mu zuwo lia ususu ku Suwon. Ayo kapwile ni nyonga lialita nawa te kakushimbwila kuwayila Yehova chakuhona yikwiko. Kuliwana no chatutakamishine chinji!—A-Roma 1:11, 12.

Ngunamono chize Yehova akuwahisa atu jenyi ha miaka yeswayi. Muze angupapachishile ha mwaka  1943, twapwile akwa-kwambujola 100.000. Haliapwila tuli unji wa atu kuhiana 8,000,000 waze tunawayila Yehova mu yifuchi 240. Mulimo ulemu wa mandumbu waze ayile ku shikola ya Ngiliate wakwasa chinji ha kwoka chino. Nawahililile chinji kukalakala hamwe ni mishionaliu wano ha kwaakwasa hanga aye ku milimo yo.

Ngunasakwila chinji, mumu kukatuka ku ukweze wami, nazangile kulingila Yehova ku mwono wami weswe, chocho yinguya ku Mbetele. Yehova kanguwahisa ha miaka yino yeswe. Kuchizako yuma yeswe yize twakuwahilila nayo ku mulimo wetu wa ku Mbetele, ami ni Lila twakuzanga chinji kwambujola hamwe ni yikungulwila yeka ni yeka mu Brooklyn, hakupalika cha miaka 50, ni masepa amwenemwene waze tukwete.

Nguchinunga ni kukalakala ku Mbetele ni ukwaso wa mukwetu-pwo Lila. Chipwe ngwe hinapwa ni miaka 84, nihindu ngunawahilila ha kulinga mulimo uno ulemu ni kukwasa ku chipatulo cha kutambula mikanda ha mutango.

Chili chiwape chinene kupwa mu ululikiso wa Yehova ni kumona kumanunuka cha mukanda wa Malakia 3:18 ngwo: “Munukamona kulipalikila hakachi ka akwa ululi ni yingulungulu; hakachi ka mukwa kulingila Zambi ni yoze kamulingilile.” Hita tangwa tunamono ngwetu hashi ha Satana yuma yinapihia nawa atu keshi ni kutalatala hamwe ni chiseke. Alioze waze akuzanga Yehova ni kumuwayila kali ni mwono upema, chipwe ha matangwa wano akalu, ni kutalatala chingunu cha kulutwe lia matangwa. Pundu lume, chili chiwape chinene kulweza akwetu sango lipema! (Mateu 24:14) Hikwasala hakehe Wanangana wa Zambi muuchiza yuma yipi hano hashi ni kupwisaho paraisu. Kashika, tunashimbwila kuheta cha lino tangwa! Hachino, atu eswe hano hashi makapwa angunu ni kuwahilila hamwe ni mwono wa miaka yeswe.