1-2. (a) Kuchi sango jili ha Izaia 41:10 jakwashile pangi Yoshiko? (b) Sango ja Yehova jize jili ha Izaia 41:10, aya mujihasa kukwasa?

YOSHIKO umwe pangi washishika katambwile sango jipi. Ndotolo wenyi kamulwezele ngwenyi, kasala wika ni tukweji akehe hanga afwe. Yika iye alingile? Iye yanyonga ha chisoneko chize te akuzanga chinji, Izaia 41:10. (Tanga.) Ni uhumikizo weswe iye yalweza ndotolo ngwenyi kechi kwivwa woma, mumu Yehova te kanamukwata ku kwoko. * Sango ja utakamiso ja versu yino jakwashile pangi yetu kufuliela kuli Yehova ni mbunge yeswe. Versu yino muyihasa kutukwasa tununge ni kulihumikiza muze mutupalika mu yeseko yinji. Mba tunyingike yize mutuhasa kulinga, chitangu tuhengwolenu mumu liaka Zambi atumine Izaia kusoneka sango jacho.

² Ku uputukilo, Yehova kalwezele Izaia hanga asoneke maliji wano a utakamiso kuli A-Yunda waze te maya mu undungo ku Babilonia. Alioze, Yehova kafungile sango jacho hanga jikwase hi wika ko A-Yunda waze te maya mu undungo, alioze ni atu jenyi eswe kukatuka ku matangwa jacho ndo musono. (Iza. 40:8; Roma 15:4) Musono, tuli ha “miaka yikalu,” kashika tunafupiwa utakamiso uze uli mu mukanda wa Izaia.—2 Timo. 3:1.

3. (a) Yilakenyo yika yili ha Izaia 41:10? (b) Mumu liaka tunafupiwa yilakenyo yacho?

³ Ha mutwe uno, mutushimutwinaho yikuma yitatu yize muyikolesa ufulielo wetu ha yilakenyo ya Yehova yize yili ha  Izaia 41:10: (1) Yehova kali hamwe ni yetu, (2) kali Zambi yetu, nawa (3) iye matukwasa. Tunafupiwa yilakenyo * yacho mumu ngwe pangi Yoshiko, mutupalika mu yipikalo ku mwono wetu. Twatamba nawa kukumba yihungumiona ya hano hashi. Amwe a kuli yetu nihindu machikumba yihungumiona ya manguvulu. Kashika mutushimutwina mu yimako-yimako yilakenyo yitatu ha chisoneko cha mwaka 2019.

4. (a) Chilakenyo chika chitangu mutushimutwina? (Tala nawa maliji mushi lia lifwo.) (b) Mu majila aka Yehova akusolwelamo zango lienyi hali yetu? (c) Kuchi wakwivwa ha maliji wano a Zambi?

⁴ Chitangu, Yehova kanatukolweza ni maliji wano: “Kanda wivwa woma, nguli hamwe ni yena.” * Yehova kakusolola ngwo kali hamwe ni yetu ha kutuzanga ni kulihulumba hali yetu. Tala chize iye akusolola zango lienyi hali yetu. Yehova kanambe ngwenyi: “Wapwile wa zango liami; mulemu. Nakuzangile.” (Iza. 43:4) Kukushi ndundo nijimwe mu chifuchi jize mujilingisa Yehova hanga eche kuzanga tuvumbi twenyi; mumu ushishiko wenyi hali yetu kuuchi kahwa. (Iza. 54:10) Zango ni usepa wenyi hali yetu yakutwaha hamu. Iye matufunga musono ngwe chize afungile sepa lienyi Apalama (Apalahama). Yehova yamwamba ngwenyi: “Apalama, kanda wivwa woma. Yami nguli lukepwe we.”—Uputu. 15:1.

5-6. (a) Kuchi tunanyingika ngwetu Yehova kanazange kutukwasa muze tuli mu yipikalo? (b) Yika twalilongesa ha chilweza cha pangi Yoshiko?

⁵ Tunanyingika ngwetu, Yehova kanazange kutukwasa ha yipikalo yetu mumu kanalakenya atu jenyi ngwenyi: “Muze mukapalika mu meya mungukapwa hamwe ni yena. Ha kwenda mu kahia kuchi kawema; mulengi wako kuuchi kakulalisa.” (Iza. 43:2) Yika maliji wano analumbunuka?

⁶ Yehova keshi kulakenya kuchiza yuma yize yakutupinjisa ku mwono, alioze kechi kecha lamba lize liapwa ngwe “meya” litushimbamise hanji yipikalo yize yapwa ngwe “kahia” yituse chito cha mutolo. Iye kanatulakenya  ngwenyi kali hamwe ni yetu, ni kutukwasa ‘tupalike’ mu yipikalo hanji kuyikumba. Yika Yehova makalinga? Iye makatukwasa tukumbe woma hanga tuhase kununga ni kushishika kuli iye, chipwe muze tuli mu ponde ya kufwa. (Iza. 41:13) Pangi Yoshiko, yoze twavuluka kuuputukilo, kamwene umwenemwene wacho. Mwanenyi wa pwo yamba ngwenyi: “Twakomokene ha uhumikizo uze Mama apwile nawo. Twamwene pundu ngwetu, Yehova kamuhele sambukila ya ku mbunge. Ndo ha tangwa lize afwile, Mama te kakuhanjika ni akwa-kumuwuka ni mieji akwo hakutwala kuli Yehova ni yilakenyo yenyi.” Yika twalilongesa ha chilweza cha pangi Yoshiko? Twalilongesa ngwetu, nyi mutufuliela ha chilakenyo cha Zambi chinambe ngwo, “mungukapwa hamwe ni yena,” ni yetu mutupwa ni hamu hamwe ni tachi jakukumba yipikalo.

7-8. (a) Chilakenyo chika chamuchiali mutushimutwina, nawa yika chinalumbunuka? (b) Mumu liaka Yehova ambile kuli A-Yunda waze apwile mu undungo ngwo: “Kanda nulishimwoka”? (c) Maliji aka ali ha Izaia 46:3, 4 waze ahwimishine mbunge ya atu ja Zambi?

⁷ Chilakenyo chamuchiali chili ha mukanda wa Izaia chinambe ngwo: “Kanda ulishimwoka, nguli Zambi ye.” Yika maliji wano analumbunuka? Ha versu yino, limi litangu lize asonekene nalio liji “kulishimwoka” linalumbunuka “mutu yoze unatala-tala kunyima mumu kanevu woma ngwo umwe mutu mupi mamulinga chimwe” hanji “kulihulumba ngwe mutu yoze uli mu ponde.”

⁸ Mumu liaka Yehova alwezele A-Yunda waze te maya mu undungo ku Babilonia hanga ahone “kulishimwoka” hanji kulipikala? Mumu iye kanyingikine ngwenyi atu aku chifuchi chacho te mevwa woma. Mba yika te muyevwisa woma? Hakuhwa cha miaka 70 yize A-Yunda te mapwa mu undungo, A-Babilonia te maalukukila kuli tujita twa A-Media ni A-Persia. Yehova te mazachisa tujita wano hanga atusule atu jenyi mu undungo ku Babilonia. (Iza. 41:2-4) Muze A-Babilonia ni akwa-mavungu akwo apwile ni kumona ngwo akwa-kole jo kanakundama, ayo te kakufupa kufunga hamu lio hakuliamba umwe ni mukwo ngwo: “Hamukako.” Ayo nawa te kakulinga tuzambi anji a tuponya, ni kwafuliela ngwo maafunga. (Iza. 41:5-7) Alioze Yehova yahwimisa mbunge ya A-Yunda waze apwile mu undungo hakwamba ngwenyi: “Yena, kavumbi kami Izalele [kulisa ni enyembo je] yena uli kavumbi kami . . . Kanda ulishimwoka, nguli Zambi ye.” (Iza. 41:8-10) Nyingika ngwe Yehova kambile ngwenyi: “Nguli Zambi ye.” Ni maliji wano, Yehova yalakenya tuvumbi twenyi ashishika ngwenyi te kechi kwaavulama, mumu nihindu te uchili Zambi yo, ni ayo te achili atu jenyi. Yaalweza ngwenyi: ‘Mungunumbata . . . mungunulamwina.’ Maliji wano katakamishine A-Yunda waze apwile mu undungo.—Tanga Izaia 46:3, 4.

9-10. Mumu liaka kutwatambile kwivwa woma? Lumbununa.

⁹ Ha matangwa wano a kusula, atu kanalipikala chinji hamukunda wa yuma yipi yize yinalingiwa hano hashi. Ni yetu twakupalika mu yuma yacho. Alioze chino kuchatambile kutuvwisa woma. Yehova kanambe ngwenyi: “Nguli Zambi ye.” Mumu liaka maliji wano atamba kutwaha uhumikizo?

¹⁰ Achinyonga ha chilweza chino: Jim ni Ben kanalingi wenyi mu ndeke yize anapinjisa ku chijimbi. Muze chijimbi chinakandwisa ndeke ni kuyipalumwisa, mukwa-kwendesa ndeke mamba ngwenyi: “Jichikenu miya ya yitwamo yenu. Mumu mutununga ni kupinda ni chijimbi chino ha amwe maola.” Jim maputuka  kulipikala chinji. Alioze mukwa-kwendesa ndeke mamba nawa ngwenyi: “Kanda nulipikala, yuma yeswe muyenda kanawa.” Muze iye anahanjika, Jim manyikisa mutwe ni kwamba ngwenyi, “Au kanalitambe, shina mahasa kuhwisa kapinda yono?” Alioze mamona ngwo ha yeswe yize yinalingiwako Ben kasolo kulihulumba. Jim mamuhula ngwenyi: “Mumu liaka yena unalihumikiza chize?” Ben masehejela ni kwamba ngwenyi: “Ngunanyingika kanawa mutu yoze unendesa ndeke. Mumu tata!” Chocho Ben mamba ngwenyi: “Mukwetu nguli ni shindakenyo ngwami, nyi nakulweza yimwe hakutwala kuli tata ni utotombo wenyi, ni yena mulihumikiza.”

11. Chilweza cha atu wano aali waze analingi wenyi mu ndeke yika chatulongesa?

¹¹ Malongeso aka mutuhasa kuwana ha chilweza chino? Ngwe Ben, ni yetu mutuhasa kulihumikiza, mumu tunanyingika kanawa Tata yetu wa mu malilu, Yehova. Tunanyingika ngwetu iye matufunga mu kangonga hanji yipikalo yize tuli nayo ha matangwa wano akusula. (Iza. 35:4) Twakufuliela muli Yehova, kashika mutuhasa kulihumikiza chipwe ngwe hano hashi atu anji kanevu woma. (Iza. 30:15) Nawa twatamba kupwa ngwe Ben muze mutulweza enyembo jetu yize yakutukwasa kujikijila kuli Zambi. Acho ayo nawa mahasa kupwa ni shindakenyo ngwo, chipwe ngwe mapalika mu yipikalo yeswayo, nihindu Yehova maakwasa.

12. (a) Chilakenyo chika chamuchitatu chize mutushimutwina? (b) Yika liji “kwoko” lia Yehova linatwiwulula?

¹² Chilakenyo chamuchitatu chize chili ha mukanda wa Izaia chinambe ngwo: “Kumungukutakamisa, kumungukukwasa.” Izaia kaliangile kusolola chize Yehova te matakamisa hanji kukolweza atu jenyi hakwamba ngwenyi: “Yehova kaneza ni ndundo, kwoko lienyi linamukwachila chiyulo.” (Iza. 40:10)  Kanji-kanji Mbimbiliya yakuzachisa liji “kwoko” ngwe chilayi hanga yilumbunune ndundo. Hachino, maliji anambe ngwo “kwoko lienyi linamukwachila chiyulo” kanatwiwulula ngwetu, Yehova kali Mwata mukwa-ndundo-jeswe. Iye kazachishile ndundo jenyi hanga afunge ni kulamwina tuvumbi twenyi ku shakulu, nihindu kananungu ni kutakamisa ni kufunga waze eswe akufuliela muli iye musono.—Shimbi 1:30, 31; Iza. 43:10.

13. (a) Ha mashimbu aka Yehova akumanununa chilakenyo chenyi cha kututakamisa? (b) Chilakenyo chika chize chakutwaha tachi ni ufulielo?

¹³ Chipi-chipi muze akwa-kole matuhungumiona, Yehova kakumanununa chilakenyo chenyi chakwamba ngwo: “Kumungukutakamisa.” Mu yifuchi yimwe musono, akwa-kole jetu kakusa tachi hanga akwike mulimo wetu wa kwambujola hanji kukanjisa ululikiso wetu. Chipwe chocho, kutushi kulipikala ha yuma yacho. Mumu Yehova hanatwehe chilakenyo chize chakutwaha tachi ni ufulielo. Iye kanalakenya ngwenyi: “Nichimwe chikungo kuchichi kawaha nyi hachifula chikalimike ni yena.” (Iza. 54:17) Maliji wano kanatwiwulula yikuma yilemu yitatu.

14. Mumu liaka kutushi kukomoka ha yuma yize akwa-kole ja Zambi akutulinga?

¹⁴ Chitangu, ngwe tumbaji twa Kristu, tunashimbwila ngwetu atu matuvwila kole. (Mateu 10:22) Yesu kambile ngwenyi ha matangwa akusula tumbaji twenyi te maahungumiona chinji. (Mateu 24:9; Yoa. 15:20) Chamuchiali, uprofeto wa Izaia unatutoweza ngwo akwa-kole jetu makatulinga yuma yinji kuhiana kole yize akutuvwila; ayo makazachisa mata eka ni eka hanga alimike ni yetu. Mata jacho kanachingi mahuza waze mahasa kusoloka ngwe umwenemwene, mahuza hakutwala hali yetu ni yihungumiona. (Mateu 5:11) Yehova kechi kukwika akwa-kole jetu kuzachisa mata wano ha kulimika ni yetu. (Efwe. 6:12; Uso. 12:17) Chipwe chocho kutwatambile kwivwa woma. Mumu liaka?

15-16. (a) Chikuma chika chamuchitatu chize twatamba kwiwuluka, nawa kuchi Izaia 25:4, 5 unashindakenya ha maliji wano? (b) Kuchi Izaia 41:11, 12 unasolola yuma yize muyikalingiwa kuli waze akulimika ni yetu?

 ¹⁵ Tutalenu chikuma chamuchitatu chize twatamba kwiwuluka. Yehova kambile ngwenyi, “nichimwe chikungo” hanji uta mauzachisa ha kulimika ni yetu te ‘kuuchi kawaha.’ Ngwe chize chikalakala cha zuwo cha kutufunga ku fuji ya kangonga, Yehova matufunga ku “tachi ja yiswi.” (Tanga Izaia 25:4, 5.) Akwa-kole jetu kechi kahasa kutulinga upi wa mutolo.—Iza. 65:17.

¹⁶ Yehova nawa kakutakamisa ufulielo wetu hali iye, ha kusolola yuma yize anashimbwila waze eswe ‘anatuvundukila.’ (Tanga Izaia 41:11, 12.) Chipwe ngwe akwa-kole jetu mawezela tachi jo ha kulimika ni yetu hanji mokesa jita yo, nihindu kanashimbwila yuma yoyene: ayo eswe “makapwa amokomoko, makakuwa.”

17-18. (a) Kuchi kutanga Mbimbiliya chakukolesa ufulielo wetu kuli Zambi? Hana chilweza. (b) Kuchi kupukuna ha chisoneko cha mwaka 2019 muchitukwasa?

¹⁷ Twakukolesa ufulielo wetu muli Yehova ha kumunyingika kanawa. Kashika jila yize mutuhasa kunyingikinamo Zambi yili kutanga Mbimbiliya kanawa ni kupukuna ha yize tunatange. Mu Mbimbiliya muli sango jize jinasolola chize Yehova afungile atu jenyi ku shakulu. Sango jacho jinatukwase tujikijile ngwetu chipwe musono Yehova matufunga.

¹⁸ Tutalenu maliji apema waze Izaia azachishile hanga asolole chize Yehova akutufunga. Iye yatesa Yehova ngwe kafunga alioze tuvumbi twenyi ngwe ana-mapanga. Izaia yamba hakutwala kuli Yehova ngwenyi: “Kumakakunga ana-mapanga mu moko jenyi, kumakaambata mukondo.” (Iza. 40:11) Muze Yehova matukangayika mukondo lienyi, twakulivwa ngwetu kanatufungu kanawa nawa twakupwa ni uhumikizo. Mba atukwase kununga ni kulihumikiza chipwe ngwe tuli mu yipikalo, ndungo wamwenemwene wa kanyama, kasakula Izaia 41:10 ngwe chisoneko cha mwaka 2019, “Kanda ulishimwoka, nguli Zambi ye.” Pukuna ha maliji wano a utakamiso. Nyi wachilinga, makakutakamisa muze mupwa mu yipikalo.