1-2. (a) Ha yika Yehova akulihulikila muze tununu a tununu ja atu akuya ha Chiwanyino cha Kwiwuluka Kufwa cha Yesu? (Tala chizulie ha chifukilo.) (b) Yika mutushimutwina ha mutwe uno?

ACHINYONGA yize Yehova akumona muze tununu ni tununu ja atu hashi heswe akuya ku Chiwanyino cha Mwene cha Ufuku. Iye keshi kutala wika ha unji wa atu, alioze kakutala hali hita mutu yoze uliho. Chakutalilaho, iye kakumona atu ashishika waze akuya ku kukunguluka chino hita mwaka. Atu jacho amwe mahasa kupwa waze akupalika mu yihungumiona yeka ni yeka. Akwo keshi kuya ku kukunguluka cheswe cha chikungulwila, alioze o kakuya ha hita Chiwanyino cha Kwiwuluka Kufwa cha Yesu, mumu o kakuchimona ngwo chili chilemu. Yehova nawa kakumona waze akuya ha Chiwanyino chino ha chisuho chitangu, hanji anyingike wika yize yakulingiwa ko.

² Kwamba pundu, Yehova kakuwahilila chinji ha kumona atu anji maya ha Chiwanyino cha Kwiwuluka Kufwa cha Yesu. (Luka 22:19) Kashika, Yehova keshi kulihulikila wika ha unji wa atu waze akwiza ku kukunguluka chacho. Iye kakulihulikila ha chikuma chilemu chize chakutwala atu ku kukunguluka. Ha mutwe uno, mutushimutwinaho chihula chilemu: Mumu liaka kutwatambile wika kuya ha Chiwanyino cha Kwiwuluka Kufwa cha Yesu, alioze twatamba nawa kuya ha kukunguluka cheswe cha ha poso chize Yehova akululiekela waze eswe amuzanga?

3-4. (a) Mumu liaka twakuya ku kukunguluka? (b) Yika kuhana kumbululo ha kukunguluka chakusolola hali yetu? (c) Kulita ni 1 A-Korindu 11:23-26, mumu liaka kutwatambile kuhona kuya ku Chiwanyino cha Kwiwuluka Kufwa cha Yesu?

³ Twakuya ku kukunguluka mumu chakulinga chihanda cha  uwayilo wetu. Nawa twakulikungulula mumu Yehova he akutulongesela. Atu waze akulizata kakwehuka nyonga liakwamba ngwo kanafupiwa kunyingika chimwe chuma. (3 Yoa. 9) Alioze, yetu tunafupiwa usongwelo wa Yehova uze twakuwana mu ululikiso wenyi.—Iza. 30:20; Yoa. 6:45.

⁴ Kuya ku kukunguluka chakusolola ngwo tuli akwa kulikehesa nawa tunazange hanga atulongese. Muze twakuya ha Chiwanyino chino chilemu cha Kwiwuluka Kufwa cha Yesu, kutushi kuchilinga mumu ngwo twatamba wika kuyako, alioze ni kulikehesa cheswe twakuyako mumu tunazange kwononokena shimbi ya Yesu yinambe ngwo: “lingenu chino nikungwiwuluka.” (Tanga 1 A-Korindu 11:23-26.) Chiwanyino chino chakutakamisa kutalatala chetu cha kulutwe lia matangwa nawa chakutwiwulula chize Yehova akutuzanga. Hachino, Yehova kananyingika yize tunafupiwa hanga atutakamise ni kutulembejeka hi wika ko kamuwika ha mwaka. Kashika iye hanatululiekela kukunguluka ha hita poso ni kutukolweza hanga tuyeko. Kulikehesa chakutukwasa kwononoka. Ha hita poso twakupalikisa amwe maola hanga tululieke kukunguluka mba tukahase kuhana makumbululo ha kukunguluka chacho.

5. Mumu liaka atu waze alikehesa akutayiza muze Yehova akwasanyika?

⁵ Hita mwaka, atu anji waze alikehesa kakutayiza muze Yehova akwasanyika hanga aalongese kuli iye. (Iza. 50:4) Ayo kakuwahilila chinji kuya ku Chiwanyino cha Kwiwuluka Kufwa cha Yesu ni kuputuka kuya ku kukunguluka chikwo. (Zeka. 8:20-23) Kashika, muze tuli hamwe ni akwetu waze twakusanyika twakuwahilila chinji amu Yehova akutulongesa ni kutusongwela ngwe, “chikwashi [chetu] kanda mukwa [kutupulula].” (Samu 40:17) Chochene lume, yika muyihasa nawa kutuvwisa kuwaha hanji chikwete ulemu unji, kuhiana kutayiza kusanyika cha Yehova hanga aatulongese kuli iye hamwe ni Mwanenyi wa zango Yesu?—Mateu 17:5; 18:20; 28:20.

6. Kuchi kulikehesa chakwachishile umwe lunga mba aye ku Chiwanyino cha Kwiwuluka Kufwa cha Yesu?

⁶ Hita mwaka, twakusa tachi tusanyike atu waze mahasa kuya ha Chiwanyino cha Kwiwuluka Kufwa cha Yesu. Atu anji waze alikehesa kakuyuka ha kutayiza muze twakwasanyika. Tulalenu chimwe chilweza. Ha miaka yinji kunyima, umwe lunga yamwaha papilo lia kusanyika nacho atu hanga aye ha Chiwanyino cha Kwiwuluka Kufwa cha Yesu, alioze iye yalweza ndumbu yoze wamusanyikine ngwenyi kechi kahasa kupwaho. Hachino, ndumbu yakomoka muze amwene lunga wacho kananjila mu Zuwo lia Wanangana ha tangwa lia Chiwanyino chacho. Lunga wacho kakomokene chinji ha chize amutambwishile, chocho yaputuka kuya ha kukunguluka chikwo nawa cha ha poso. Kwamba umwenemwene, iye kahonene wika kuya ku kukunguluka chitatu ha mwaka. Mba yika yamukwashile kutayiza kuya ha hita kukunguluka? Iye kapwile chimbovu nawa te kanazange kwalumuna manyonga jenyi. Ndumbu yoze wamusanyikine kulutwe yamba ngwenyi, “Iye kali lunga yoze walikehesa.” Pundu lume, Yehova kasanyikine lunga wacho hanga amuwayile, nawa musono hanamupapachisa.—2 Samue. 22:28; Yoa. 6:44.

7. Kuchi yize twakulilongesa ha kukunguluka ni yize twakutanga mu Mbimbiliya muyihasa kutukwasa kupwa akwa-kulikehesa?

⁷ Yize twakulilongesa ha kukunguluka ni yize twakutanga mu Mbimbiliya muyihasa kutukwasa hanga tupwe akwa-kulikehesa. Ha poso jimwe shimbu Chiwanyino cha Kwiwuluka Kufwa cha Yesu kanda chilingiwa, kukunguluka chetu kanji-kanji chakuhanjikila chinji ha chilweza cha Yesu ni kulikehesa chize asolwele ha kuhana mwono wenyi ngwe ukuule. Chikwo nawa amwe matangwa shimbu Chiwanyino cha Kwiwuluka Kufwa cha Yesu kanda chilingiwa, kakutukolweza  hanga tutange sango ja Mbimbiliya hakutwala ku yuma yize yalingiwile shimbu te kanda achifwa ni uhindukilo wenyi. Yize twakulilongesa ha kukunguluka ni yuma yize twakutanga mu Mbimbiliya yakutukwasa kulemesa chitapo cha Yesu chize ahanyine hali yetu. Chino chakutulingisa hanga twimbulule yitanga yenyi ya kulikehesa, ni kulinga upale wa Yehova chipwe muze mutupwa mu kapinda.—Luka 22:41, 42.

8. Kuchi Yesu asolwele hamu?

⁸ Twakwimbulula nawa Yesu muze mutusolola hamu. Nyonga ha hamu lize iye asolwele amwe matangwa shimbu te kanda achifwa. Iye kanyingikine pundu ngwenyi akwa kole jenyi te mamuhepwisa, mamulamba, ni kumushiha. (Mateu 20:17-19) Chipwe chocho, yatayiza kufwa. Muze mashimbu akumbanyine, yalweza apostolo jenyi ashishika waze apwile nenyi mu Ngetesemane ngwenyi: “Katukenu, tuyenu: yoze mangukunjika kanakundama.” (Mateu 26:36, 46) Muze chizavu cha maswalale ayile hanga amukwate, iye yalisolola hanga maswalale eche kukwata apostolo jenyi. (Yoa. 18:3-8) Yesu kasolwele hamu lia kayanda! Musono, akwa-Kristu akuwayisa ni spiritu ni mapanga akwo kakusa tachi hanga embulule hamu lia Yesu. Mu mulali uka?

9. (a) Mumu liaka ha mashimbu amwe chakufupiwa hamu mba tuye ha hita kukunguluka? (b) Kuchi chilweza chetu muchihasa kutakamisa mandumbu jetu waze ali mu kamenga?

⁹ Mba tuye ha hita kukunguluka, chakufupiwa kusolola hamu chipi-chipi muze mutupwa mu yipikalo. Amwe akuli mandumbu jetu kakuya ku kukunguluka chipwe muze ananyenganyana, ali mu kapinda, hanji ha lamba lieswalio ngwe misongo. Akwo ni hamu lieswe kakuya ku kukunguluka chipwe ngwe asoko ni manguvulu malimika no. Achinyonga ha limwe shimbu chize chilweza chetu muchikwata hali mandumbu jetu waze ali mu kamenga hamukunda wa ufulielo wo. (Hepre. 13:3) Muze akwivwa ngwo mutuhasa kununga ni kuwayila Yehova chipwe ngwe tunapalika mu yeseko, yino yakwatakamisa hanga akolese ufulielo, hamu ni ushishiko wo. Postolo Paulu neye kapalikile mu yipikalo yacho. Muze apwile mu kamenga mu Roma, yawahilila chinji ha kunyingika ngwo mandumbu jenyi kananungu ni kuwayila Zambi ni ushishiko weswe. (Fwili. 1:3-5, 12-14) Mba muze Paulu te uchili mu kamenga hanji muze hatuhuka yasoneka mukanda kuli A-Hepreu. Ha mukanda wacho iye kakolwezele akwa-Kristu ashishika ngwo, “zango lia undumbu likalinduluke” nawa ngwo kanda alitwamina kulikungulula.—Hepre. 10:24, 25; 13:1.

10-11. (a) Aya waze twatamba kusanyika ha Chiwanyino cha Kwiwuluka Kufwa cha Yesu? (b) Chikuma chika chize A-Efwesu 1:7 unatukwase kulinga?

¹⁰ Twakusolola hamu muze twakusanyika asoko jetu, akwa-milimo-ni-akwetu ni waze twatunga no hanga aye ku Chiwanyino cha Kwiwuluka Kufwa cha Yesu. Mumu liaka twakusanyika atu wano? Mumu twakulemesa yize Yehova ni Yesu akulinga hali yetu, kashika twakusanyika akwetu hanga tupwe no ha Chiwanyino chacho. Tunazange hanga no alilongese chize mahasa kuyuka ni  “kulumbama cha vumbi” lia Yehova kupalikila ha ukuule.—Tanga A-Efwesu 1:7; Uso. 22:17.

¹¹ Muze tuli ha kukunguluka twakusolola hamu ha chiwape chikwo nawa chilemu chize Zambi ni Mwanenyi akutusolwela mu jila yalita.

12. (a) Kuchi kukunguluka chetu chakukolesa zango lietu hali Yehova ni Yesu? (b) Yika 2 A-Korindu 5:14, 15 unatukwasa kulinga ha kwimbulula Yesu?

¹² Zango lize tukwete hali Yehova ni Yesu liakutukwasa hanga tuye ku kukunguluka. Hachino, yize twakulilongesa ha kukunguluka yakukolesa zango lietu hali Yehova ni Mwanenyi. Ha kukunguluka chacho kanji-kanji kakutwiwulula yuma yize ayo akulinga hali yetu. (Roma 5:8) Chiwanyino cha Kwiwuluka Kufwa cha Yesu chakutwiwulula zango lize ayo akwete, chipwe hali atu waze keshi kulemesa ukuule. Ni chiseke cheswe, twakwimbulula Yesu ha chize twakusongwela mwono wetu hita tangwa. (Tanga 2 A-Korindu 5:14, 15.) Hachino, mbunge jetu ja kuzala too ni chiseke ha chize Yehova hanalulieka ukuule. Kashika, jila yimwe yize mutuhasa kumuhalishilamo yili kuhana makumbululo alita ha kukunguluka.

13. Kuchi mutuhasa kusolola zango lietu hali Yehova ni Mwanenyi? Lumbununa.

¹³ Mutuhasa kusolola zango lietu hali Yehova ni Mwanenyi ha kusa tachi hanga tulinge yuma yeswayo hali ayo. Ha mashimbu amwe, twatamba kusa tachi jinji mba tupwe ha kukunguluka cheswe. Yikungulwila yinji yakulikungulula chingoloshi hanji ufuku, kanji-kanji muze tunahongo ni mulimo wa hita tangwa. Kukunguluka chikwo chakulingiwa ku songo lia poso, muze atu eka anahwimi. Shina Yehova kakumona ngwenyi, twakuya ku kukunguluka chipwe ngwe tunahongo? Ewa, Yehova kakumona! Nawa kakulemesa tachi jize twakusa hanga tuye ku kukunguluka.—Marku 12:41-44.

14. Kuchi Yesu atuhele chilweza chipema chakusolwela akwetu zango?

¹⁴ Yesu katuhichikilile chilweza cha chize mutuhasa kusolola zango liamwenemwene. Iye kakatayijile wika kufwila tumbaji twenyi, alioze te kakusa nawa yuma yize te yinafupiwa kuli tumbaji jenyi kulutwe lia yuma yenyi mwene. Chakutalilaho, iye kalikungulwile ni tumbaji twenyi chipwe ngwe te hahonga hanji muze te anazakalala mu mbunge. (Luka 22:39-46) Iye yalihulikila ha yize te mahana kuli akwo, hi yizeko te akwo mamwaha.  (Mateu 20:28) Kashika, nyi zango lietu mulikola hali Yehova ni mandumbu jetu, mutusa tachi hanga tuye ha Chiwanyino cha Mwene cha Ufuku ni kupwa ha kukunguluka chikwo cheswe cha ha poso.

15. Aya waze chipi-chipi tunazange kukwasa?

¹⁵ Yetweswe tuli a mu usoko umuwika wa mandumbu a mu ufulielo, kashika nyi muchilita, sanyika waze achili aha mu ufulielo hanga upalikise no amwe mashimbu. Alioze, tunazange chinji kukwasa “akwetu akwa kufuliela” waze keshi kuya nawa ni kwambujola hanji ku kukunguluka. (Ngala. 6:10 MW) Mutuhasa kwasolwela zango ha kwakolweza hanga aye ku kukunguluka, chipi-chipi ha Chiwanyino cha Kwiwuluka Kufwa cha Yesu. Ngwe Yehova ni Yesu, twakuwahilila chinji muze twakukwasa waze anazeye ku ufulielo hanga afune kuli Yehova, Tata yetu wa zango nawa Kafunga.—Mateu 18:14.

16. (a) Kuchi mutuhasa kulikolweza umwe ni mukwo, nawa yika kukunguluka chetu chakutukwasa kulinga? (b) Mumu liaka wano ali mashimbu apema ha mwaka hanga twiwuluke maliji a Yesu ali ha Yoano 3:16?

¹⁶ Muze Chiwanyino cha Kwiwuluka Kufwa cha Yesu chinakundama, likolweze hanga usanyike atu anji akaye ha chiwayino chino, chize muchikapwa ha 19 Abril, 2019. (Tala muchete “ Shina Mukaasanyika?”) Ha mwaka weswe, mutuhasa kukolweza akwetu hanga aye ha kukunguluka cheswe chize Yehova akutululiekela. Amu songo lia mwakono linakundama, twatamba kuya ku kukunguluka, mumu che muchitukwasa kununga ni kulikehesa, kupwa ni hamu nawa ni zango. (1 Tesa. 5:8-11) Twakwivwa kuwaha chinji ha zango lize Yehova ni Mwanenyi akusolola hali yetu!—Tanga Yoano 3:16.