HA Liamatatu chineme, ha tangwa 24 Janeiro 2018, chisaka cha Mbetele mu Estados Unidos ni cha mu Canada kanakawahilila ha kwivwa mutambi uno ulemu ngwo: Ndumbu Kenneth Cook, Jr., kamutongola hanga apwe umwe wa mu Chizavu cha Tusongo cha Yela ja Yehova.

Ndumbu Cook kasemukine ni kukolela ku Pennsylvania, E.U.A. Iye kalilongesele umwenemwene kupalikila kuli longi-ni-mukwo muze te anayi ni kuhwisa shikola yinene ha 7 Junho 1980. Kaputukile mulimo wa pionelu wa shimbu lieswe ha 1 Setembro 1982. Muze halinga upionelu ha miaka yaali, yamusanyika ku Mbetele, chocho yaputuka mulimo wenyi ku Mbetele ya Wallkill, New York, ha 12 Outubro 1984.

Hakupalika cha miaka 25, Ndumbu Cook kalingile milimo yeka ni yeka ha milimo yacho yaali yili Kuufwambwishilo wa mikanda mu Chipatulo cha Mbetele. Iye yambata mukwo-pwo Jamie ha mwaka 1996, chocho eswe ni aali yanunga ni kukalakala mu Mbetele ya Wallkill. Dezembro 2009, Ndumbu Cook ni mukwo-mama yaatuma ku Mbetele ya Educational Center ku Patterson, New York, koko Ndumbu Cook yamwaha chiteli cha kukalakala mu Chipatulo Chakusoneka Mikanda ni Kuyituma. Ha Abril 2016, muze hafuna chikehe ku Mbetele ya Wallkill Ndumbu Cook ni mukwo-pwo yaatuma ku Brooklyn, New York. Hakupalika cha tukweji atano, ayo yahichika Brooklyn yaya ku Chishina chinene ku Warwick, New York. Ha Janeiro 2017, Ndumbu Cook yamutongola hanga apwe chikwashi wa Komite ya Akwa-Kusoneka a Chizavu cha Tusongo.